Nọ Nọgodona Agun Towe

Lẹdo aihọn pé, gbẹtọ livi susu wẹ nọ yí ayajẹ do sẹ̀n Jehovah to agun fọtọ́n susu lẹ mẹ. Yé nọ yọ́n pinpẹn nuplọnmẹ po anademẹ he yé nọ mọyi lẹ po tọn, podọ yé nọ yí zohunhun do nọgodona agun lọ to aliho voovo lẹ mẹ. Be numọtolanmẹ dopolọ wẹ hiẹ lọsu nọ do gando agun towe go ya?

1. Aliho tẹlẹ mẹ wẹ a sọgan nọ yí whenu po huhlọn towe po zan nado nọgodona agun lọ te?

Mímẹpo wẹ sọgan gọalọ to agun lọ mẹ. Di apajlẹ, be mẹhomẹ kavi madogánnọ delẹ to agun towe mẹ ya? Be a sọgan gọalọ nado nọ ze yé yì opli lẹ ya? Kavi be a sọgan gọalọna yé nado wà nudelẹ, taidi nado whleahi kavi wà whégbè-zọ́n lẹ na yé ya? (Hia Jakọbu 1:27.) Mí sọgan sọ ze míde jo nado hẹn Plitẹnhọ Ahọluduta tọn mítọn do wiweji podọ nado penukundego. Mẹde ma nọ hẹn mí po huhlọn po nado wà onú enẹlẹ. Owanyi mítọn na Jiwheyẹwhe po mẹmẹsunnu mítọn lẹ po wẹ nọ whàn mí nado “ze [míde] jo sọn ojlo mẹ wá.”—Salmu lẹ 110:3.

Wẹnlatọ he ko yí baptẹm lẹ sọgan gọalọna agun lọ to aliho devo lẹ mẹ. Mẹmẹsunnu gbigbọnọ he pegan lẹ sọgan sẹ̀n taidi devizọnwatọ lizọnyizọnwiwa tọn, podọ taidi mẹho agun tọn lẹ to nukọn mẹ. Mẹmẹsunnu po mẹmẹyọnnu lẹ po sọgan yí zohunhun do nọgodona azọ́n yẹwhehodidọ tọn lọ, gbọn gbehosọnalitọ bibasi dali. Podọ Kunnudetọ delẹ sọgan gọalọ nado gbá nọtẹn sinsẹ̀n-bibasi tọn lẹ kavi sẹtẹn yì lẹdo de mẹ fie agun de do hudo alọgọ tọn te to adà delẹ mẹ.

2. Nawẹ mí sọgan yí nutindo mítọn lẹ do nọgodona agun lọ gbọn?

Mí sọgan “nọ yí nuhọakuẹ [mítọn] lẹ do gbògbéna Jehovah.” (Howhinwhẹn lẹ 3:9) Mí nọ yí ayajẹ do basi nunina akuẹ tọn gọna nutindo mítọn devo lẹ tọn nado nọgodona agun mítọn po azọ́n yẹwhehodidọ lẹdo aihọn pé tọn lọ po. (Hia 2 Kọlintinu lẹ 9:7.) Nunina mítọn lẹ sọ nọ yin yiyizan nado nọgodona azọ́n kọgbọ tọn. Mẹsusu wẹ nọ saba “de nude dovo” nado basi nunina de. (Hia 1 Kọlintinu lẹ 16:2.) Mí sọgan nọ basi nunina lẹ do apotin nunina tọn he to nọtẹn sinsẹ̀n-bibasi tọn mítọn lẹ mẹ kavi to nọtẹn Intẹnẹt tọn donate.jw.org ji. Lẹblanulọkẹyi de wẹ e yin na mí nado yí nutindo agbasa tọn mítọn lẹ do basi nunina nado do owanyi mítọn na Jehovah hia.

DINDONANU DOGỌ

3. Nọ yí nutindo towe lẹ do nọgodona agun lọ

Jehovah po Jesu po nọ yiwanna nunamẹtọ homẹhunnọ lẹ. Di apajlẹ, Jesu pà nawe asuṣiọsi wamọnọ he dovivẹnu nado basi nunina de. Hia Luku 21:1-4, enẹgodo dọhodo kanbiọ ehelẹ ji:

• Be nunina daho wẹ mí dona basi nado hẹn homẹhun Jehovah ya?

• Nukun tẹwẹ Jehovah po Jesu po nọ yí do pọ́n nunina ahundopo tọn mítọn lẹ?

Nado mọ lehe nunina mítọn lẹ nọ yin yiyizan do, hò VIDEO lọ. Enẹgodo dọhodo kanbiọ he bọdego ji.

VIDEO: ‘Po Nunina de po to Alọmẹ Hlan Jehovah’ (4:47)

• Nawẹ aliho he mẹ nunina mítọn lẹ nọ yin yiyizan te nọ hẹn ale wá na agun lẹ lẹdo aihọn pé gbọn?

4. Mí sọgan ze míde jo nado gọalọ

To hohowhenu, sinsẹ̀n-basitọ Jehovah tọn lẹ nọ yí zohunhun do wazọ́n nado penukundo nọtẹn sinsẹ̀n-bibasi tọn yetọn lẹ go. Amọ́, ehe nọ bẹ nususu hẹn hugan nunina akuẹ tọn lẹ bibasi poun. Hia 2 Otànnugbo lẹ 34:9-11, enẹgodo dọhodo kanbiọ ehe ji:

• Nawẹ Islaelivi lẹpo nọ gọalọ nado penukundo ohọ̀ Jehovah tọn kavi nọtẹn sinsẹ̀n-bibasi tọn lẹ go gbọn?

Nado mọ lehe Kunnudetọ Jehovah tọn lẹ nọ hodo apajlẹ Biblu tọn hohowhenu tọn enẹ do, hò VIDEO lọ. Enẹgodo dọhodo kanbiọ he bọdego lẹ ji.

VIDEO: Nukunpipedo Nọtẹn Sinsẹ̀n-Bibasi Tọn Mítọn lẹ Go (3:31)

• Naegbọn e do yin nujọnu nado hẹn Plitẹnhọ Ahọluduta tọn mítọn lẹ do wiweji podọ do ninọmẹ dagbe mẹ?

• Aliho tẹlẹ mẹ wẹ a sọgan gọalọ te?

5. Mẹmẹsunnu lẹ emi, mì dovivẹnu na azọngban lẹ dogọ

Owe-wiwe lẹ na tuli sunnu Klistiani lẹ nado nọ ze yede jo bo wà nuhe go yé pé lẹpo nado nọgodona agun lọ. Nado mọ apajlẹ dopo, hò VIDEO lọ. Enẹgodo dọhodo kanbiọ he bọdego ji.

VIDEO: Mẹmẹsunnu lẹ Emi, Mì Dovivẹnu Nado Pegan (5:19)

• To video lọ mẹ, nawẹ Ryan dovivẹnu nado gọalọna agun lọ to gigọ́ mẹ gbọn?

Biblu dọ nubiọtomẹsi he kọ̀n mẹmẹsunnu lẹ dona jẹ nado pegan taidi devizọnwatọ lizọnyizọnwiwa tọn podọ taidi mẹho lẹ. Hia 1 Timoti 3:1-13, enẹgodo dọhodo kanbiọ ehelẹ ji:

• Etẹlẹ wẹ yè nọ donukun sọn mẹmẹsunnu he to vivẹnudo nado pegan taidi devizọnwatọ lizọnyizọnwiwa tọn kavi mẹho lẹ si?

• Etẹwẹ yè nọ donukun sọn whẹndo yetọn lẹ si? —Pọ́n wefọ 4 po 11 po.

• Eyin mẹmẹsunnu lẹ dovivẹnu nado jẹ nubiọtomẹsi ehelẹ kọ̀n, ale tẹlẹ wẹ e nọ hẹnwa na mẹlẹpo to agun lọ mẹ?

BLADOPỌ

Jehovah nọ yọ́n pinpẹn etọn taun, eyin mí yí whenu mítọn, huhlọn po nutindo mítọn lẹ po do nọgodona agun lọ.

Dogbapọn

• Nawẹ mí sọgan nọ yí whenu po huhlọn mítọn po zan do agun lọ tamẹ gbọn?

• Nawẹ mí sọgan nọ yí nutindo agbasa tọn mítọn lẹ do nọgodona agun lọ gbọn?

• Aliho tẹlẹ mẹ wẹ e na jlo we nado gọalọna agun lọ te?

PỌ́N NUDỌNAMẸ DEVO LẸ

Gbadopọnna nuhewutu Jiwheyẹwhe masọ nọ biọ mado-ao sọn sinsẹ̀n-basitọ etọn lẹ si ba.

“Etẹwẹ Biblu Dọ Gando Mado-Ao Nina Go?” (Hosọ Intẹnẹt ji tọn)

To Biblu mẹ, azọngban delẹ yin didena sunnu he yí baptẹm lẹ. Bọ eyin e wá biọ dọ yọnnu he yí baptẹm de ni penukundo azọngban enẹlẹ go lo?

“Tito Tatọ́-Yinyin Tọn to Agun Mẹ” (Atọ̀họ̀-Nuhihọ́ lọ Tọn, Février 2021 tọn)

Pọ́n mẹmẹsunnu adọgbotọ delẹ he basi avọ́sinsan susu nado bẹ owe lẹ yì na sinsẹ̀n- basitọ hatọ yetọn lẹ.

Owe lẹ Bibẹ Yì Agun lẹ mẹ to Congo (4:25)

Gbọnvona sinsẹ̀n he pò lẹ, be a yọ́n fie mí nọ mọ akuẹ te nado wà azọ́n mítọn lẹ ya?

“Fie Wẹ Kunnudetọ Jehovah Tọn lẹ Nọ Mọ Akuẹ te Nado Wà Azọ́n Yetọn Lẹ?” (Hosọ Intẹnẹt ji tọn)