NUPINPLỌN 03
Be A Gán Dejido Biblu Go Ya?
Opagbe po ayinamẹ susu lẹ po wẹ tin to Biblu mẹ. E yọnbasi dọ a nọ jlo na yọ́n nuhe Biblu plọnmẹ lẹ, amọ́ vlavo a sọ nọ to aṣeji ma nado yí nudepope poun sè. Be a dona dejido opagbe po ayinamẹ he to owe he ko tin hoho enẹ mẹ lẹ po go ya? Be a gán yise dọ mí na duvivi ogbẹ̀ tọn nugbonugbo todin podọ to sọgodo dile Biblu dọ do ya? Gbẹtọ livi susu lẹ wẹ yí enẹ sè. Gbọ mí ni pọ́n eyin hiẹ lọsu gán wà nudopolọ.
1. Be nuhe to Biblu mẹ lẹ yin hójọhó kavi hopàdọ wẹ ya?
Biblu bẹ “hogbe nugbo he sọgbe lẹ” hẹn. (Yẹwhehodọtọ 12:10) Nujijọ he to Biblu mẹ lẹ yin nugbo bo gando omẹ jọnun lẹ go. (Hia Luku 1:3; 3:1, 2.) Whenuho-kantọ po dodinnanutọ dòkuntọ susu po wẹ yigbe dọ nuhe Biblu dọ gando azán, nọtẹn, nujijọ po omẹ tangan delẹ po go sọgbe.
2. Naegbọn mí sọgan dọ dọ nuhe to Biblu mẹ lẹ ma ko dohó?
Biblu ko dọho gando nususu go hoho whẹpo gbẹtọ lẹ do wá yọ́n onú enẹlẹ. Di apajlẹ, e dọho gando nuhe lẹnunnuyọnẹn nọ plọnmẹ delẹ go. Na nugbo tọn, mẹsusu wẹ ma kẹalọyi nuhe e dọ gando whẹho enẹlẹ go to ojlẹ he mẹ e yin kinkan te. Amọ́ lẹnunnuyọnẹntọ egbezangbe tọn lẹ wá kẹalọyi dọ nuhe Biblu dọ lẹ sọgbe. Mí sọgan “ganjẹ yé go to whepoponu, yèdọ todin podọ kakadoi.”—Salmu lẹ 111:8.
3. Naegbọn mí sọgan yí nuhe Biblu dọ gando sọgodo go lẹ sè?
Biblu dọ dọdaia “nuhe ma ko yin wiwà lẹ” tọn. (Isaia 46:10) E ko dọho gando nujijọ delẹ go hoho, whẹpo nujijọ lọ lẹ tlẹ do wá aimẹ pẹpẹ dile e dọ do. Podọ e ko sọ dọ nususu gando nuhe to jijọ todin lẹ go. To nupinplọn ehe mẹ, mí na gbadopọnna dọdai Biblu tọn delẹ. E jiawu nado mọdọ yé jọ pẹẹ dile Biblu dọ do!
DINDONANU DOGỌ
Pọ́n lehe lẹnunnuyọnẹntọ egbezangbe tọn lẹ kọngbedopọ hẹ Biblu do, podọ basi dodinnanu do dọdai Biblu tọn he fọnjlodotenamẹ delẹ ji.
4. Lẹnunnuyọnẹn ma jẹagọdo Biblu
To hohowhenu, suhugan mẹlẹ tọn wẹ yise dọ aigba sinai do nude ji. Hò VIDEO lọ.
Pọ́n nuhe yin kinkandai to owe Jobu tọn mẹ sọn owhe 3 500 die. Hia Jobu 26:7, enẹgodo dọhodo kanbiọ ehe ji:
Naegbọn nuhe Biblu dọ, dọ aigba yin pipla “do agbágbá” do yin nupaṣamẹ?
To nudi owhe 200 die poun wẹ lehe lilẹpe osin tọn nọ yì do to aigba ji wá họnwun na gbẹtọvi lẹ. Amọ́, pọ́n nuhe Biblu ko dọ sọn owhe 3 500 die. Hia Jobu 36:27, 28, enẹgodo dọhodo kanbiọ ehelẹ ji:
Etẹwẹ a lẹn gando zẹẹmẹ lilẹpe osin tọn he ma doglẹ ehe go?
Be wefọ he a ṣẹṣẹ hia ehelẹ vọ́ huhlọnna jidide towe to Biblu mẹ ya?
5. Biblu dọ dọdai nujijọ ayidego tọn lẹ tọn
Hia Isaia 44:27–45:2, enẹgodo dọhodo kanbiọ ehe ji:
Zẹẹmẹ tẹlẹ wẹ Biblu basi owhe 200 jẹnukọnna vasudo Babilọni tọn?
Whenuho dohia nugbo dọ Ahọlu Kilusi Pẹlsia tọn po awhànpa etọn po gbawhàn tòdaho Babilọni tọn to owhe 539 J.W.M.b Yé diọkọna tọ̀sisa he nọ basi hihọ́na tòdaho lọ. To whenue yé ko biọ tòdaho lọ mẹ gbọn họngbo etọn he yin jijodo nùvo lẹ nù godo, yé gbawhàn etọn matin tukla. Etlẹ yin to owhe 2 500 linlán godo to egbehe, Babilọni gbẹ́ gbọgbé. Pọ́n nuhe Biblu dọ jẹnukọn gandego.
Hia Isaia 13:19, 20, enẹgodo dọhodo kanbiọ ehe ji:
Nawẹ nuhe jọ do Babilọni go dohia dọ dọdai he yin didọ gandego yin nugbo gbọn?
Babilọni he gbọgbé lọ to Irak egbezangbe tọn mẹ
6. Biblu ko dọ dọdai nuhe to jijọ to egbehe lẹ tọn
Biblu dohia dọ mí to gbẹnọ to “azán godo tọn lẹ” mẹ. (2 Timoti 3:1) Pọ́n dọdai delẹ he Biblu dọ gando ojlẹ mítọn go.
Hia Matiu 24:6, 7, enẹgodo dọhodo kanbiọ ehe ji:
Nujijọ ayidego tọn tẹlẹ wẹ Biblu dọ dọ yé na wá aimẹ to azán godo tọn lẹ mẹ?
Hia 2 Timoti 3:1-5, enẹgodo dọhodo kanbiọ ehelẹ ji:
Sọgbe hẹ nuhe Biblu dọ, jijọ tẹlẹ wẹ gbẹtọ lẹ na tindo to azán godo tọn lẹ mẹ?
Detẹ to jijọ ehelẹ mẹ wẹ a nọ mọ to egbehe?
MẸDELẸ NỌ DỌ DỌ: “Hopàdọ po otàngblo po kẹdẹ wẹ gọ́ Biblu mẹ.”
Na hiẹ tọn, etẹwẹ hẹn we kudeji hugan dọ yè sọgan dejido Biblu go?
BLADOPỌ
Whenuho, lẹnunnuyọnẹn, po dọdai lẹ po dohia dọ a sọgan dejido Biblu go.
Dogbapọn
Be nuhe to Biblu mẹ lẹ yin hójọhó kavi hopàdọ wẹ ya?
Etẹlẹ wẹ Biblu dọ he lẹnunnuyọnẹntọ lẹ mọdọ e yin nugbo?
Be a lẹndọ Biblu ko dọ nuhe na jọ to sọgodo lẹ ya? Naegbọn a do dọ mọ?
PỌ́N NUDỌNAMẸ DEVO LẸ
Be nuhe Biblu dọ gando lẹnunnuyọnẹn go ma sọgbe wẹ ya?
“Be Nuhe Lẹnunnuyọnẹn Dọ Sọgbe hẹ Nuhe Biblu Dọ Ya?” (Hosọ Intẹnẹt ji tọn)
Nugbo tẹlẹ wẹ mí yọnẹn gando “azán godo tọn lẹ” go?
“Dọdai Biblu Tọn 6 Delẹ He to Hẹndi Mọ to Alọnu” (Alọnuwe Atọ̀họ̀-Nuhihọ́ lọ Tọn, 1er mai 2011 tọn)
Pọ́n lehe dọdai Biblu tọn gando Ahọluigba Glẹki tọn go mọ hẹndi do.
Pọ́n lehe dọdai Biblu tọn lẹ diọ pọndohlan dawe de tọn gando Biblu go do.
“Na Yẹn Tọn, Jiwheyẹwhe de Ma Tin” (Atọ̀họ̀-Nuhihọ́ lọ Tọn, Sọha 5 2017 tọn)
a Dọdai lẹ bẹ nuhe Jiwheyẹwhe dọ dọ yé na jọ to sọgodo lẹ hẹn.
b Wekun lọ lẹ J.W.M. zẹẹmẹdo “Jẹnukọnna Whenu Mítọn,” bọ wekun lọ lẹ W.M. zẹẹmẹdo “Whenu Mítọn.”