Kanbiọ lẹ sọn Wehiatọ lẹ Dè

Whiwhle de yin zẹẹmẹ basina taidi “ohó he yè whlé do dọ . . . kavi opà vonọtaun de nado wà nude kavi ma nado wà nude. E nọ saba yin pàdido na mẹhe yiaga de, titengbe na Jiwheyẹwhe.” E gán yin kinkàn kavi yin didọ poun.

Mẹdelẹ gán lẹndọ e ma sọgbe nado whlé, na Jesu dọ dọ: “Mì whlé paali blo . . . Mì kúkú gbọ hogbe mìtọn ‘Mọwẹ’ ni yin mọwẹ, podọ ‘Lala’ mìtọn ni yin lala, na nuhe hú ehelẹ, mẹylankan lọ dè wẹ yé wá sọn.” (Mat. 5:33-37) Na nugbo tọn, Jesu yọnẹn dọ Osẹ́n Mose tọn biọ nado nọ whlé to ninọmẹ delẹ mẹ, podọ devizọnwatọ nugbonọ Jiwheyẹwhe tọn delẹ ko wàmọ. (Jen. 14:22, 23; Eks. 22:10, 11) E sọ yọnẹn ga dọ Jehovah lọsu nọ whlé. (Heb. 6:13-17) Enẹwutu, Jesu ma to didọ dọ mí ma dona nọ whlé paali wẹ gba. Kakatimọ, avase na wẹ e te ma nado nọ whlé na numadinu lẹ kavi na nuhe ma yin nujọnu lẹ. Mí dona nọ mọdọ azọngban wiwe de wẹ e yin nado nọ de opà he mí do lẹ, na nuhe Jehovah nọ jlo dọ mí ni wà niyẹn.

Etẹwẹ a na wà lo eyin yè biọ to asi we nado whlé? Jẹnukọn whẹ́, hẹn ẹn diun dọ a gán zìn gbọn nuhe a whlé nado wà lọ ji. Eyin a ma kudeji dọ e na pà emi, e na yọ́n hugan ma nado whlé. Ohó Jiwheyẹwhe tọn na avase dọmọ: “E pọnte na we hugan ma nado dopà hú nado dopà bo ma de e.” (Yẹwh. 5:5) Enẹgodo, gbadopọnna nunọwhinnusẹ́n Owe-wiwe tọn lẹ gando opà dido go bo yinuwa sọgbe hẹ ayihadawhẹnamẹnu towe he ko yin pinplọn. Etẹwẹ yin delẹ to nunọwhinnusẹ́n Owe-wiwe tọn ehelẹ mẹ?

Whiwhle delẹ nọ sọgbe hẹ ojlo Jiwheyẹwhe tọn. Di apajlẹ, Kunnudetọ Jehovah tọn lẹ nọ dopà na yede whenue yé jlo na wlealọ. Opà ehelẹ yin wunmẹ whiwhle tọn de. To Jiwheyẹwhe po kunnudetọ lẹ po nukọn, asisunọ yọyọ lọ po asiyọyọ lọ po nọ dopà nado yiwanna yede, wlebòna yede bo do sisi hia ode awetọ, podọ nado wà ehe “dile e na dẹnsọ bọ [yé] omẹ awe lẹ na togbẹ̀.” (Asu po asi po devo lẹ gán nọma yí hogbe ehelẹ pẹẹ zan to alọwle-zan yetọn gbè, amọ́ yé gbẹ́ nọ dopà to Jiwheyẹwhe nukọn.) Enẹgodo, yé nọ lẹzun asu po asi po bọ kanṣiṣa ehe dona nọ aimẹ na gbẹzan yetọn blebu. (Jen. 2:24; 1 Kọl. 7:39) Tito ehe sọgbe bosọ to kọndopọ mẹ hẹ ojlo Jiwheyẹwhe tọn.

Whiwhle delẹ nọ jẹagọdo ojlo Jiwheyẹwhe tọn. Di apajlẹ, Klistiani nugbo de ma na whlé nado hẹn awhànfunnu bo yiavùnlọ na otò etọn, kavi nado mọ́n yise etọn to Jiwheyẹwhe mẹ. Mọwiwà na jẹagọdo gbedide Jiwheyẹwhe tọn lẹ. Klistiani lẹ ma dona “yin apadewhe aihọn tọn,” enẹwutu mí ma dona nọ dádo whẹho po nudindọn etọn lẹ po mẹ.—Joh. 15:19; Isa. 2:4; Jak. 1:27.

Whiwhle delẹ nọ yin whẹho ayihadawhẹnamẹnu tọn. To whedelẹnu, e gán biọ dọ mí ni yí sọwhiwhe do gbeje whiwhle delẹ pọ́n to kọndopọ mẹ hẹ ayinamẹ Jesu tọn lọ nado “yí nuhe yin Sesali tọn lẹ na Sesali, ṣigba nuhe yin Jiwheyẹwhe tọn lẹ na Jiwheyẹwhe.”—Luku 20:25.

Mí ni dọ dọ Klistiani de jlo na basi wema tòvi-yinyin tọn kavi tòmẹ-yìyì tọn de bọ yè biọ to e si nado whlé dọ emi na ze emide jo na otò lọ. Eyin to otò enẹ mẹ, whiwhle mọnkọ yin opà de nado wà nude he jẹagọdo osẹ́n Jiwheyẹwhe tọn tlọlọ, ayihadawhẹnamẹnu etọn he yin pinplọn gbọn Biblu dali ma na na ẹn dotẹnmẹ nado basi whiwhle mọnkọ. Amọ́, tohọluduta lẹ gán yigbe dọ ni diọ hogbe whiwhle lọ tọn delẹ sọgbe hẹ nuhe ayihadawhẹnamẹnu etọn kẹalọyi.

Klistiani de gán yí hogbe he yin vivọjlado lẹ do whlé nado ze ede jo na otò de, ṣogan bọ nuyiwa etọn na sọgbe hẹ nunọwhinnusẹ́n he to Lomunu lẹ 13:1 mẹ he dọmọ: “Mì gbọ mẹlẹpo ni yin mẹmẹglọ na aṣẹpipa daho lẹ.” Enẹwutu, Klistiani lọ gán mọdọ nude ma ylan to e mẹ nado whlé nado wà nude he Jiwheyẹwhe biọ to mẹsi.

Ayihadawhẹnamẹnu sọ nọ yí adà de wà to whenue yè biọ to asi we nado yí nude do whlé kavi nado basi ohia whiwhle tọn de. To hohowhenu Lomunu lẹ po Skitianu lẹ po nọ yí ohí yetọn lẹ do whlé, enẹ wẹ yindọ yé nọ yí yẹwhe awhàn tọn de do whlé, na mẹlẹ nido dejido nuhe dọ yé te go. Glẹkinu lẹ nọ ze alọ daga whenue yé jlo na whlé. Yé nọ gbọnmọ dali kẹalọyi dọ yẹwhe huhlọnnọ de tin he nọ mọ nuhe dọ yé te po nuhe wà yé te lẹ po, yèdọ mẹde he gbẹtọvi lẹ na dogbè na.

Nugbo wẹ dọ devizọnwatọ Jehovah tọn de ma na whlé to ohia otò tọn he do kanṣiṣa hẹ sinsẹ̀n-bibasi lalo depope nukọn. Amọ́, etẹwẹ lo eyin yè biọ to asi we to whẹdọhọsa nado ze alọ do Biblu de ji bo whlé nado do nugbo-yinyin nuhe dọ a te tọn hia? To ninọmẹ enẹ mẹ, a gán de nado wàmọ, na Owe-wiwe lẹ donù devizọnwatọ nugbonọ delẹ go he basi ohia lẹ nado nọgodona whiwhle yetọn. (Jen. 24:2, 3, 9; 47:29-31) Nujọnu wẹ e yin nado nọ flindọ eyin a basi whiwhle mọnkọ, opà do wẹ a te to Jiwheyẹwhe nukọn dọ a na dọ nugbo hó lọ tọn. A dona wleawufo nado dọ nugbo dile a to gblọndo na na kanbiọ depope he gán yin kinkanse we.

Na haṣinṣan mítọn po Jehovah po họakuẹ na mí wutu, mí dona nọ hodẹ̀ bo nọ lẹnnupọn sisosiso do whiwhle depope he yè biọ to mí si nado basi ji, bo hẹn ẹn diun dọ e ma jẹagọdo ayihadawhẹnamẹnu mítọn kavi nunọwhinnusẹ́n Biblu tọn lẹ. Eyin a de nado whlé, a dona hẹn ẹn diun dọ emi yinuwa sọgbe hẹ whiwhle emitọn.—1 Pita 2:12.