Alọdlẹndonu Nuplọnwe Opli Gbẹzan po Lizọnyizọn po Tọn

4-10 JUILLET

NUHỌAKUẸ LẸ SỌN OHÓ JIWHEYẸWHE TỌN MẸ | 2 SAMUẸLI 18-19

“Balzilai Yọ́n Dogbó Etọn”

w07 15/7 14 huk. 5

Balzilai—Dawe de He Yọ́n Dogbó Etọn Lẹ

Matin ayihaawe, Davidi yọ́n pinpẹn alọgọ Balzilai tọn taun. E na vẹawu nado wá tadona kọ̀n dọ ahọlu lọ to tintẹnpọn nado suahọ ẹ gbọn nukunpipedo nuhudo agbasa tọn etọn lẹ go dali. Balzilai adọkunnọ lọ ma tindo nuhudo alọgọ mọnkọtọn tọn gba. Davidi sọgan ko jlo dọ dawe yọnhonọ enẹ ni tin to họ̀nmẹ na jẹhẹnu dagbe etọn lẹ wutu. Gbégbò daho wẹ e na ko yin na Balzilai nado gbọṣi họ̀nmẹ ahọlu tọn bo duvivi lẹblanulọkẹyi he nọ wá sọn họntọn ahọlu tọn yinyin mẹ lẹ tọn.

w07 15/7 14 huk. 7

Balzilai—Dawe de He Yọ́n Dogbó Etọn Lẹ

Whẹwhinwhẹ́n dopo na nudide Balzilai tọn sọgan ko yin yọnhowhe etọn po dogbó he e bẹhẹn lẹ po. Balzilai sọgan ko lẹndọ ewọ ma na nọgbẹ̀ dẹn ba. (Psalm 90:10) E ko wà nuhe go e pé nado nọgodona Davidi, ṣigba e sọ yọ́n dogbó he yọnhowhe bẹhẹn lẹ. Balzilai ma dike linlẹn yindidi po mẹjọmẹ-yinyin po tọn ni glọnalina ẹn nado lẹnnupọndo nugopipe etọn lẹ ji po lẹnpọn dagbe po. To vogbingbọn mẹ na Absalọmi ojlo zogbènọ lọ, Balzilai yí nuyọnẹn do do whiwhẹ hia.—Howhinwhẹn lẹ 11:2.

w07 15/7 15 huk. 1-2

Balzilai—Dawe de He Yọ́n Dogbó Etọn Lẹ

Kandai Balzilai tọn dohia dọ mí dona yin lẹnpọn dagbenọ. To alọ de mẹ, mí ma dona gbẹ́ lẹblanulọkẹyi sinsẹ̀nzọn tọn dai kavi gbẹ́ nado dovivẹnu na mí jlo na zan gbẹzan vivomẹninọ tọn kavi na mí lẹndọ mí ma sọgan didá azọngban wutu. Jiwheyẹwhe sọgan gọalọna mí nado jẹ yanwle lẹ kọ̀n eyin mí ganjẹ ewọ go nado mọ huhlọn po nuyọnẹn po yí.—Filippinu lẹ 4:13; Jakobu 4:17; 1 Pita 4:11.

To alọ devo mẹ, mí dona yọ́n dogbó mítọn lẹ. Di apajlẹ, Klistiani de sọgan ko hẹn alọnu ede tọn ján po nuwiwa gbigbọmẹ tọn lẹ po. E mọdọ eyin ewọ kẹalọyi lẹblanulọkẹyi devo lẹ, e yọnbasi dọ azọngban Owe-wiwe tọn lẹ taidi nukunpipedo whẹndo etọn go ni yin vọdona. To ninọmẹ mọnkọtọn mẹ, be e ma na yin dohia whiwhẹ po lẹnpọn dagbe po tọn to adà etọn mẹ nado gbẹ́ lẹblanulọkẹyi devo lẹ to alọnu din whẹ́ ya?—Filippinu lẹ 4:5; 1 Timoti 5:8.

Onú Sisosiso Gbigbọmẹ Tọn Lẹ

w20.04 30 huk. 19

“Họ̀n Alewezun lọ Jẹ Vivọnu”

Eyin a to pipehẹ madogán delẹ bo nọ mọdọ mẹdevo lẹ ma mọnukunnujẹ emi go, apajlẹ Mẹfiboṣẹti tọn sọgan hẹn we lodo. (2 Sam. 4:4) E dona doakọnna madogán agbasa tọn de, podọ Ahọlu Davidi ṣì whẹdana ẹn. E ma yin Mẹfiboṣẹti lọsu wẹ hẹn whlepọn ehelẹ wá ede ji. Etomọṣo, e ma wleawuna pọndohlan agọ̀ lẹ; e yí nukun nujọnu tọn do pọ́n onú dagbe he jọ dego to gbẹzan etọn mẹ lẹ. E yọ́n pinpẹn homẹdagbe he Davidi dohia ẹ wayi tọn. (2 Sam. 9:6-10) Enẹwutu, to whenue Davidi dawhẹ agọ̀ na ẹn, Mẹfiboṣẹti mọnú zẹ̀ nuhahun enẹ go. E ma na dotẹnmẹ nuṣiwa Davidi tọn nado hẹn ẹn gblehomẹ. Podọ e masọ dowhẹ Jehovah na nuhe Davidi wà. Mẹfiboṣẹti ze ayiha do nuhe e sọgan wà nado nọgodona ahọlu dide Jehovah tọn ji. (2 Sam. 16:1-4; 19:24-30) Jehovah hẹn ẹn diun dọ apajlẹ dagbe Mẹfiboṣẹti tọn yin kinkando Ohó Etọn mẹ na ale mítọn.—Lom. 15:4.

AWUWIWLENA LIZỌNYIZỌN KUNNUDEGBE TỌN

w21.08 23-25 huk. 15-19

Nọ Mọ Ayajẹ to Lẹblanulọkẹyi He A Tindo lẹ Mẹ

Yanwle tẹlẹ wẹ a gán zedai na dewe? Biọ to Jehovah si dọ ni gọalọna we nado yọ́n yanwle he kọ̀n a gán jẹ lẹ. (Howh. 16:3; Jak. 1:5) Be a gán doafọna dopo to yanwle he yin nùdego to hukan tintan hosọ ehe tọn mẹ lẹ mẹ, enẹ wẹ nado bayi gbehosọnalitọ alọgọtọ tọn kavi whepoponu tọn, nado sẹ̀n to Bẹtẹli kavi doalọ to nọtẹn yẹwhehọluduta tọn lẹ gbigbá mẹ ya? Kavi vlavo a do nugopipe lọ nado plọn ogbè yọyọ de bo dọyẹwheho na mẹsusu dogọ kavi tlẹ gbloada na yẹwhehodidọ to jonọ-gbéji. A gán yọ́n nuhe delẹ to yanwle ehelẹ mẹ bẹhẹn dogọ eyin a gbadopọnna weta 10tọ owe lọ Mí Yin Tito-Basina Nado Wà Ojlo Jehovah Tọn, podọ eyin a dọho hẹ mẹho agun tọn towe lẹ. Dile a to vivẹnudo nado jẹ yanwle enẹlẹ kọ̀n, nukọnyiyi towe na họnwun podọ ayajẹ towe nasọ jideji.

Amọ́, etẹwẹ lo eyin to alọnu a ma gán jẹ yanwle he yin nùdego wayi lẹ de kọ̀n? Aṣli lọ wẹ nado ze yanwle devo de dai, enẹ wẹ dehe kọ̀n a gán jẹ sọgbe hẹ lẹnpọn dagbe. Lẹnnupọndo dotẹnmẹ hundote he bọdego ehelẹ ji.

Hia 1 Timoti 4:13, 15. Eyin mẹmẹsunnu de wẹ a yin, a gán dovivẹnu nado hẹn nugopipe hodidọ po mẹpinplọn tọn towe po pọnte. Etẹwutu? Na eyin a nọ “jo dewe na” wehihia, hodidọ po mẹpinplọn po, a na yin dona de na hosetọ towe lẹ. Yí do bayi yanwle nado gbadopọnna jẹhẹnu hodidọ tọn he to alọnuwe lọ Jo Dewe Na Wehihia po Mẹpinplọn Po mẹ lẹ dopodopo bosọ yí yé do yizan mẹ. Nọ plọn jẹhẹnu dopodopo bo nọ bayi zepọn yetọn to whégbè, bosọ dovivẹnu nado yí yé zan to azọ́ndenamẹ hodidọ tọn towe lẹ mẹ. Nọ kàn ayinamẹ biọ ayinamẹtọ alọgọtọ kavi mẹho agun tọn devo he “nọ wazọ́n sinsinyẹn to hodidọ po mẹpinplọn po mẹ lẹ.” (1 Tim. 5:17) Dovivẹnu nado mọnukunnujẹ nupinplọn alọnuwe lọ tọn lẹ mẹ, bosọ gọalọna hosetọ towe lẹ na yé nido hẹn yise yetọn lodo kavi whàn yé nado yinuwa. Gbọnmọ dali, a na yidogọna ayajẹ yetọn po towe po.

Mímẹpo wẹ yin azọ́ndena nado dọyẹwheho bo hẹn gbẹtọ lẹ zun devi. (Mat. 28:19, 20; Lom. 10:14) Be a na jlo nado hẹn azọ́nyinyọnẹn towe pọnte to azọ́n titengbe ehe mẹ ya? Nọ ze yanwle tangan lẹ dai dile a to nuhe a plọn to alọnuwe lọ Mẹpinplọn mẹ lẹ yí do yizan mẹ. A gán mọ ayinamẹ yọ́n-na-yizan devo lẹ to Nuplọnwe Opli Gbẹzan po Lizọnyizọn Mítọn po Tọn gọna nuzedonukọnnamẹ video tọn he nọ yin didohia to opli osẹ ṣẹnṣẹn tọn ji lẹ mẹ. Nọ tẹ́n nuzedonukọnnamẹ voovo lẹ pọ́n nado yọ́n dehe na wazọ́n hugan. Eyin a hodo ayinamẹ ehelẹ, ayihaawe ma tin dọ a na do numimọ ayajẹ mayọnjlẹ he lizọnyizọnwatọ Klistiani he yin azọ́nyọnẹntọ de nọ tindo tọn.—2 Tim. 4:5.

Whenue a to nulẹnpọn do yanwle he a na zedai lẹ ji, ma yí nukunpẹvi do pọ́n yanwle he yin nujọnu hugan lọ blo, enẹ wẹ awuwiwlena jẹhẹnu Klistiani tọn lẹ. (Gal. 5:22, 23; Kol. 3:12; 2 Pita 1:5-8) Nawẹ e gán pà we gbọn? Mí ni dọ dọ a jlo na wleawuna yise he dolido de. A gán hia hosọ delẹ to owe mítọn lẹ mẹ he na ayinamẹ yọ́n-na-yizan lẹ gando lehe a gán hẹn yise towe lodo do go. Matin ayihaawe, a na mọaleyi eyin a pọ́n adà Televiziọn JW^® tọn de he dọhodo lehe mẹmẹsunnu po mẹmẹyọnnu mítọn lẹ po do yise ayidego tọn hia to whlepọn voovo lẹ mẹ do ji. Enẹgodo, lẹnnupọndo aliho he mẹ a gán hodo apajlẹ yise yetọn tọn to gbẹzan towe titi mẹ do ji.

11-17 JUILLET

NUHỌAKUẸ LẸ SỌN OHÓ JIWHEYẸWHE TỌN MẸ | 2 SAMUẸLI 20-21

“Jehovah Nọ Dawhẹ Dodo”

it-1-F 1047 huk. 3

Gibeọni

Akọ̀ dowhenu tọn Gibeọninu lẹ tọn ma busẹ sọn aimẹ to owhe kanweko susu godo, mahopọnna dọ Ahọlu Sauli kàn ayiha nado hù yé sudo. Amọ́, yé yí homẹfa do nọtepọn Jehovah, na e nido dádo whẹho lọ mẹ. Huvẹ owhe atọ̀n daa tọn de wẹ Jehovah yizan bo do wàmọ to gandudu Davidi tọn whenu. Davidi kanhose Jehovah bo wá mọdọ whẹho hùnsọndai tọn de wẹ zọ́n. Enẹwutu, e dọho hẹ Gibeọninu lẹ nado yọ́n nuhe yè gán wà nado basi ovẹsè. Po whẹjijọ po, yé gblọn dọ e “ma yin whẹho fataka kavi sika tọn,” na Osẹ́n lọ dọ dọ yè ma dona kẹalọyi ofligọ do hlọnhutọ de tamẹ. (Sọh 35:30, 31) Yé sọ mọnukunnujẹemẹ dọ emi ma do aṣẹ nado hù mẹde eyin mẹhe to otẹn aṣẹpipa tọn mẹ de ma na emi gbè. To whenue Davidi dín na yọ́n nuhe e gán wà wẹ yé do wá biọ dọ yè ni yí ṣinawe to “visunnu” Sauli tọn lẹ mẹ na yé. Eyin kandai lọ dọ dọ hùnhọ́ to okọ̀ na Sauli po whédo etọn po, be “visunnu” etọn lẹ hopódona ẹn to aliho de kavi devo mẹ, dile etlẹ yindọ Sauli wẹ na ko yin tọntlọ́ngbọn. (2Sa 21:1-9) To whẹho ehe mẹ, visunnu lọ lẹ ma kú na ylando otọ́ yetọn tọn wutu (De 24:16) kakatimọ, osẹ́n-ba he dọ dọ “ogbẹ̀ na yì na ogbẹ̀” wẹ hò yé.—De 19:21.

Onú Sisosiso Gbigbọmẹ Tọn Lẹ

w13 15/1 31 huk. 14

Mẹho Agun Tọn lẹ Yin ‘Azọ́nwatọ Hatọ lẹ Na Ayajẹ Mítọn’

Lẹdo aihọn pé, omẹ Jehovah tọn lẹ to sinsẹ̀nzọn yetọn hẹndi mahopọnna aliglọnnamẹnu he Satani po godonọnamẹtọ etọn lẹ po nọ zedonukọnna yé lẹ. Delẹ to mí mẹ ko pehẹ avùnnukundiọsọmẹnu he nọ kàn dẹpẹ biọ lẹ, ṣigba mí nọ ganjẹ Jehovah go mlẹnmlẹn nado duto yé ji dile Davidi gbawhàn Goliati tọn do. Etomọṣo, dile mí to pipehẹ kọgbidinamẹnu aihọn ehe tọn lẹ zọnmii, onú nọ wá ṣikọna mí bọ mí nọ gbọjọ to whedelẹnu. To ninọmẹ gbigbọjọ tọn mọnkọtọn mẹ, e nọ bọawu nado joawuna kọgbidinamẹnu he ji mí sọgan ko dù te po awubibọ po lẹ. To ojlẹ mọnkọtọn lẹ mẹ, alọgọ he wá do gànmẹ sọn mẹho de dè sọgan gọalọna mí nado gọ̀ ayajẹ po huhlọn mítọn po mọyi, dile mẹsusu ko tindo numimọ etọn do. Mẹmẹyọnnu gbehosọnalitọ whepoponu tọn de he tindo nudi owhe 65 dọmọ: “To ojlẹ de mẹ wayi, n’ma to gángán, podọ sinsẹ̀nzọn kunnudegbe tọn nọ hẹn nuṣikọna mi. Mẹho de doayi ninọmẹ ṣie go bo dọnsẹpọ mi. Mí tindo hodọdopọ tulinamẹ tọn he sinai do Biblu ji de. N’yí ayinamẹ he e na mi lẹ do yizan mẹ, podọ n’mọaleyi sọn e mẹ.” Ewọ yidogọ dọmọ: “Lehe nuyiwa mẹho enẹ tọn gọ́ na owanyi do sọ to whenue e doayi madogán ṣie go bo gọalọna mi!” Na nugbo tọn, homẹ mítọn nọ hùn nado yọnẹn dọ mí tindo mẹho lẹ he nọ gbọn owanyi dali na mí ayidonugo bo nọ wleawufo nado ‘gọalọna mí’ dile Abiṣai wà do to hohowhenu.

18-24 JUILLET

NUHỌAKUẸ LẸ SỌN OHÓ JIWHEYẸWHE TỌN MẸ | 2 SAMUẸLI 22

“Nọ Ganjẹ Alọgọ Jehovah Tọn Go”

cl 19 huk. 11

Be Hiẹ Sọgan ‘Dọnsẹpọ Jiwheyẹwhe’ Nugbonugbo?

Onú dopo wẹ e yin nado hia dọ Jiwheyẹwhe “sinyẹn to huhlọn mẹ.” (Isaia 40:26) Onú devo pete wẹ e yin nado hia lehe e whlẹn Islaeli gán to Ohù Vẹẹ mẹ bo penukundo akọta lọ go to zungbo mẹ na owhe 40 do. Hiẹ sọgan yí nukun homẹ tọn do pọ́n lehe agbówhẹn osin tọn lẹ to mimá do awe do. Hiẹ sọgan yí nukun homẹ tọn do pọ́n lehe akọta lọ—vlavo gbẹtọ he yì 3000000 lọ lẹpo, to zọnlinzin gbọn aigba kló ji, bọ osin lẹ mlin dote taidi adó gángán to adà awe lẹ ji. (Eksọdusi 14:21; 15:8) Hiẹ sọgan mọ kunnudenu hihọ́-basinamẹ po nukunpedomẹgo Jiwheyẹwhe tọn po to zungbo lọ mẹ. E hẹn osin nado tọ́njẹgbonu sọn osó mẹ. Núdùdù, he taidi okún wéwé lẹ nọ ja do aigba. (Eksọdusi 16:31; Osọha lẹ 20:11) Jehovah dohia tofi dọ e ma yindọ emi tindo huhlọn poun wẹ gba ṣigba emi nọ yí ì zan na dagbe omẹ emitọn lẹ tọn. Be e mayin jidenamẹnu de wẹ e yin nado yọnẹn dọ odẹ̀ mítọn lẹ nọ yì Jiwheyẹwhe huhlọnnọ lọ dè, mẹhe yin “fibẹtado po huhlọn mítọn po, alọgọ alọnu-alọnu tọn to tukla mẹ” ya?—Psalm 46:1.

w10-F 1/6 26 huk. 4-6

“Hiẹ Nọ Yinuwa po Nugbonọ-Yinyin Po”

Mí ni yí sọwhiwhe do lẹnnupọndo nuhe Davidi dọ lẹ ji. Hodidọ Heblugbe tọn he yin lilẹdo “yinuwa po nugbonọ-yinyin po” gán sọ yin lilẹdo “yinuwa po dagbewanyi po.” Ehe dohia dọ owanyi wẹ nọ whànmẹ nado yin nugbonọ. Owanyi he Jehovah do na mẹhe nọ yin nugbonọ na ẹn lẹ wẹ nọ zọ́n bọ e do nọ tẹdo yé go.

Humọ, nugbonọ-yinyin ma yin nùmẹ-yozo; e nọ biọ dọ yè ni yinuwa. Davidi gán dekunnu etọn dọ Jehovah nọ yinuwa po nugbonọ-yinyin po. To whenue gbẹ̀mẹ dózin do e, Jehovah gọalọna ẹn, yí nugbonọ-yinyin do basi hihọ́na ẹn bo deanana ẹn, na ahọlu nugbonọ de wẹ wutu. Davidi yọ́n pinpẹn enẹ tọn bo tlẹ dọ dọ Jehovah wẹ whlẹn emi ‘sọn alọ kẹntọ emitọn lẹpo tọn mẹ.’—2 Samuẹli 22:1.

Etẹwẹ nuhe Davidi dọ lẹ plọn mí? Jehovah ma nọ diọ. (Jakọbu 1:17) E ma nọ diọ nujinọtedo etọn lẹ, podọ e nọ de opà etọn lẹ janwẹ. Davidi jihàn dọmọ: “Jehovah . . . ma na gbẹ́ nugbonọ etọn lẹ dai.”—Salmu lẹ 37:28.

Onú Sisosiso Gbigbọmẹ Tọn Lẹ

w12 15/11 17 huk. 7

Wleawuna Gbigbọ Mẹdezewhè Tọn

Apajlẹ whiwhẹ tọn Jiwheyẹwhe tọn yinuwado Psalm-kantọ Davidi ji sisosiso. E jihàn hlan Jehovah dọmọ: “Hiẹ ko na awọ̀yinu whlẹngán towe tọn mi ga: jijọ dẹẹdẹ [kavi whiwhẹ] towe ko hẹn mi zun daho.” (2 Sam. 22:36) Davidi yọnẹn dọ emi penugo nado wà onú daho he emi wà to Islaeli lẹ na Jehovah yinuwa hẹ emi po whiwhẹ po to whenue e na emi ayidonugo bo gọalọna emi. (Ps. 113:5-7) Be nudopolọ wẹ e yin na mílọsu lẹ ya? Jẹhẹnu, nugopipe kavi lẹblanulọkẹyi tẹwẹ depope to mí mẹ tindo bọ e “ma yin dọ [mí] mọyi” sọn Jehovah dè wẹ? (1 Kọl. 4:7) Mẹhe nọ ze ede whè “klo” to linlẹn lọ mẹ dọ e nọ yọ́n-na-yizan dogọ na Jehovah. (Luku 9:48) Mì gbọ mí ni lẹnnupọndo lehe enẹ yinmọ do ji.

AWUWIWLENA LIZỌNYIZỌN KUNNUDEGBE TỌN

w06 15/8 21 huk. 7-8

Job—Dawe Akọ́ndonanutọ Podọ Tenọglinọ De

To egbehe, dile etlẹ yindọ Klistiani susu ma nọ jiya jẹ obá he mẹ Job jiya jẹ, whlepọn wunmẹ voovo lẹ nọ sayana yé. Mẹsusu nọ pehẹ homẹkẹn kavi nuhahun whẹndo tọn lẹ. Nuhahun akuẹzinzan tọn kavi agbasamalo sọgan hẹn flumẹjijẹ wá. Mẹdelẹ ko hẹn ogbẹ̀ yetọn bu do yise yetọn tamẹ. Na nugbo tọn, mí ma dona lẹndọ Satani wẹ nọ hẹn nugbajẹmẹji he nọ sayana mí lẹpo wá gba. Nado dọ hójọhó, nuhahun delẹ tlẹ sọgan wá sọn nuṣiwa mítọn titi lẹ kavi sọn oblọ he mí dugu etọn lẹ mẹ. (Galatianu lẹ 6:7) Podọ mímẹpo wẹ nọ jiya nugandomẹgo ylankan yọnhowhe tọn lẹ po nugbajẹmẹji jọwamọ tọn lẹ po. Biblu hẹn ẹn họnwun dọ Jehovah ma nọ basi hihọ́na devizọnwatọ etọn lẹ todin sọn yajiji mọnkọtọn lẹ mẹ to azọ́njiawu-liho gba.—Yẹwhehodọtọ 9:11.

Etomọṣo, Satani sọgan yí nuhahun he mí nọ pehẹ lẹ zan nado dekanpona yise mítọn. Apọsteli Paulu dọ dọ ‘owùn to agbasalan mẹ, mẹdagun Satani tọn he to nuli i de,’ sayana emi. (2 Kọlintinu lẹ 12:7) Vlavo ehe yin nuhahun agbasalilo tọn, taidi nukun-zọ̀n, kavi onú devo de, Paulu yọnẹn dọ Satani sọgan yí nuhahun lọ po ayimajai he e nọ hẹnwa po zan nado de ayajẹ emitọn pò bo hẹn tenọgli emitọn gble. (Howhinwhẹn lẹ 24:10) To egbehe, Satani sọgan yí hagbẹ whẹndo tọn lẹ, wehọmẹvigbẹ́ lẹ, kavi gandudu aṣẹ-glanglan panamẹtọ lẹ zan nado dohomẹkẹn devizọnwatọ Jiwheyẹwhe tọn lẹ to aliho delẹ mẹ.

25-31 JUILLET

NUHỌAKUẸ LẸ SỌN OHÓ JIWHEYẸWHE TỌN MẸ | 2 SAMUẸLI 23-24

“Nunina Jehovah Nọ Biọ Avọ́sinsan”

it-1-F 153 huk. 5

Alauna

Alauna jlo na na likun-flétẹn etọn, oyìn po nake he avọ́sinsan lọ na biọ lẹ po, amọ́ Davidi tẹkudeji dọ emi na suahọ ẹ. Kandai he to 2 Samuẹli 24:24 mẹ dohia dọ Davidi họ̀ likun-flétẹn lọ po oyìn lọ lẹ po yin ṣekẹli fataka tọn 50 (63822FCFA). Amọ́, 1 Otànnugbo lẹ 21:25 dọ dọ ṣekẹli sika tọn 600 wẹ Davidi sú bo do họ̀ aigba lọ (nudi 44675400FCFA). Akuẹ he e biọ nado họ̀ fie agbà lọ te po nuhe avọ́sinsan lọ na biọ lẹ po ji wẹ mẹhe kàn Samuẹli Awetọ zinnudo. Enẹ wẹ na ko zọ́n bọ e do donù akuẹ he nulọ lẹ hihọ̀ dù kẹdẹ go. To vogbingbọn mẹ, mẹhe kàn Otànnugbo lẹ Tintan uwọ dọho gando aigba lọ hihọ̀ po onú voovo he tẹmpli lọ gbigbá na biọ lẹ po go. (1Ot 22:1-6; 2Ot 3:1) Na aigba he ji yè gbá tẹmpli lọ do klo taun wutu, ṣekẹli sika tọn 600 lọ na ko yin akuẹ he Davidi do họ̀ nọtẹn lọ. E ma yin akuẹ he e do họ̀ nọtẹn kleun he ji e do agbà lọ do.

w12 15/1 18 huk. 8

Plọnnu sọn ‘Adà Tangan Nugbo lọ Tọn’ Mẹ

Eyin avọ́sinsan he Islaelivi de jlo na basi dohia dọ e desọn ojlo mẹ nado do pinpẹn-nutọn-yinyọnẹn ahundopo tọn hia Jehovah kavi, taidi to whẹho avọ́nunina mimẹ̀ tọn mẹ, yin obiọ de nado mọ nukundagbe etọn, to whelọnu lo nunina kanlin tọn he sọgbe de dide ma dona yin nuhahun na ẹn. Homẹ Islaelivi lọ tọn na hùn nado na nuhe yọ́n hugan Jehovah. To egbehe, Klistiani lẹ ma nọ basi avọ́sinsan he yin nùdego to Osẹ́n Mose tọn mẹ lẹ gba; etomọṣo yé nọ basi avọ́sinsan lẹ to linlẹn lọ mẹ dọ yé nọ yí whenu, huhlọn po nutindo yetọn lẹ po zan nado sẹ̀n Jehovah. Apọsteli Paulu dohia dọ “gbeyiyi gbangba tọn” todido Klistiani tọn gọna “dagbe wiwà po onú lẹ mimá hẹ mẹdevo lẹ po” yin avọ́sinsan he nọ hẹn homẹ Jiwheyẹwhe tọn hùn lẹ. (Heb. 13:15, 16) Mẹwhinwhàn he omẹ Jehovah tọn lẹ do nọ tindo mahẹ to nuwiwa mọnkọtọn lẹ mẹ nọ do lehe yé yọ́n pinpẹn nuhe Jiwheyẹwhe wà na yé lẹpo tọn do hia. Enẹwutu, kanṣiṣa de tin to pọndohlan gọna mẹwhinwhàn mẹhe nọ tindo mahẹ to sinsẹ̀nzọn Klistiani tọn mẹ to egbehe lẹ tọn po mẹhe basi avọ́sinsan sọn ojlo mẹ wá to hohowhenu lẹ tọn po ṣẹnṣẹn.

Onú Sisosiso Gbigbọmẹ Tọn Lẹ

w05 15/5 19 huk. 6

Nuagokun lẹ sọn Owe Samuẹli Awetọ Tọn Mẹ

23:15-17. Davidi tindo sisi sisosiso na osẹ́n Jiwheyẹwhe tọn gando ogbẹ̀ po ohùn po go sọmọ bọ to nujijọ ehe mẹ, e họ́ ede ma nado wà nuhe sọgan ko taidi osẹ́n enẹ gbigbà. Mí dona wleawuna gbigbọ mọnkọtọn gando gbedide Jiwheyẹwhe tọn lẹpo go.

1^er-7 AOÛT

NUHỌAKUẸ LẸ SỌN OHÓ JIWHEYẸWHE TỌN MẸ | 1 AHỌLU LẸ 1-2

“Nọ Plọnnu sọn Nuṣiwa Towe lẹ Mẹ”

it-2-F 870 huk. 3

Sọlomọni

To whenue Adonija po mẹhe kọnawudopọ hẹ ẹ to sébibla etọn mẹ lẹ po sè nuhiho sọn Gihọni he ma dẹn do yé paali, po awhágbe lọ “Gbẹ̀gaa na Ahọlu Sọlomọni!” po, obu jẹ yé ji bọ yé doge-wezun mẹ. Sọlomọni do jijọho susugege he na tin to gandudu etọn whenu hia bo ma yiahọsu. Eyin ewọ yiahọsu wẹ, enẹ wẹ yè na nọ yí do flin bẹjẹeji gandudu etọn tọn. Afọ wẹ na yọ́n bọ Sọlomọni ma na ko kú eyin Adonija wẹ yin ahọlu. Adonija họnyi fiwiwe lọ mẹ, amọ́ Sọlomọni domẹhlan bọ yè yì plan ẹn wá. Sọlomọni dọna Adonija dọ yè ma na hù i adavo e wá wà nuylankan de. Enẹgodo, e dọna ẹn dọ ni lẹkọyi whégbè.—1Ah 1:41-53.

it-1-F 48 huk. 5

Adonija

Amọ́ whenue Davidi kú, Adonija yì mọ Bati-ṣeba bo dọna ẹn dọ ni yì Sọlomọni dè bo biọ Abiṣagi na emi di asi, yèdọ awhli he penukundo Davidi go. E họnwun dọ Adonija mọdọ yè tafu emi, na ewọ he yigbe dọ Jiwheyẹwhe wẹ jlo dọ Sọlomọni ni yin ahọlu, sọ to didọ dọ “yẹn wẹ dona ko duahọlu, podọ Islaeli pete wẹ to nukundo dai dọ yẹn ni lẹzun ahọlu.” (1Ah 2:13-21) Yè gán lẹndọ yọnnu lọ biọ wẹ Adonija te poun di asi nado sú odò gandudu he gbọ̀ e go lọ tọn. Amọ́ to hohowhenu, to otò he to Whèzẹtẹn-waji lẹ mẹ, mẹhe jẹ ahọlu de tẹnmẹ sọgbe hẹ osẹ́n wẹ nọ yí asi po asimọwhlá etọn lẹ po. Po enẹ po, e họnwun dọ Adonija ma ko jo nukunkẹn do. (Yijlẹdo 2Sa 3:7; 16:21 go.) Sọlomọni doayi nuhe obiọ Adonija tọn bẹhẹn go bo degbe dọ yè ni hù i, bọ Bẹnaia hù i hadopo.—1Ah 2:22-25.

Onú Sisosiso Gbigbọmẹ Tọn Lẹ

w05 1/7 30 huk. 1

Nuagokun lẹ sọn Owe Ahọlu lẹ Tintan Tọn Mẹ

2:37, 41-46. Lehe e yin owùnu do sọ nado lẹndọ mí sọgan dasá dogbó Jiwheyẹwhe tọn lẹ matin yasanamẹ! Mẹhe nọ zẹ̀ sọn ‘ali jijlọ he planmẹ yì ogbẹ̀ mẹ’ lọ ji sọn ojlo mẹ wá lẹ na jiya kọdetọn nudide nulú tọn enẹ tọn.—Matiu 7:14.

AWUWIWLENA LIZỌNYIZỌN KUNNUDEGBE TỌN

km 1/15 2 huk. 1-3

Nọ to Nukọnyi Taidi Lizọnyizọnwatọ De

Klistiani lẹ dona nọ yinukọn to lizọnyizọn yetọn mẹ. Enẹ wẹ zọ́n bọ Jesu zindonukọn nado plọnazọ́n devi etọn lẹ gando yẹwhehodidọ go. (Luku 9:1-5; 10:1-11) Enẹ wẹ sọ zọ́n bọ Akuila po Pliskila po dọ̀n Apolo do ogbẹ́ mẹ bo “hẹn aliho Jiwheyẹwhe tọn họnwun na ẹn to aliho he sọgbe mẹ dogọ.” (Owalọ 18:24-26) Whẹwhinwhẹ́n dopolọ wutu wẹ Paulu do na tuli Timoti, he yin yẹwhehodọtọ numimọnọ de, nado zindonukọn nado nọ jo ede na mẹpinplọn, na nukọnyiyi etọn nido sọgan “họnwun na gbẹtọ lẹpo.” (1 Tim. 4:13-15) Mahopọnna lehe e ko dẹnsọ bọ mí to azọ́nwa na Oklunọ di afanumẹ, yèdọ taidi wẹnlatọ wẹndagbe lọ tọn, mí dona zindonukọn nado to lizọnyizọn mítọn hẹn pọnte dogọ.

Nọ Plọnnu sọn Mẹdevo lẹ Dè: Dopo to aliho he mẹ mí sọgan hẹn lizọnyizọn mítọn pọnte dogọ te lẹ mẹ wẹ nado nọ plọnnu sọn mẹdevo lẹ dè. (Howh. 27:17) Enẹwutu, nọ na ayidonugo wẹnlatọ he a to azọ́nwa hẹ to whenue e to hodọna whétọ de. Nọ kàn ayinamẹ sè gando adà lizọnyizọn lọ tọn tangan de go sọn wẹnlatọ kọdetọn dagbenọ lẹ dè bo nọ yí sọwhiwhe do dotoaina ayinamẹ yetọn. (Howh. 1:5) Be a ma nọ yọ́n lehe a na basi gọyìpọn kavi deanana plọnmẹ Biblu de do wẹ ya? Kavi a ma nọ yọ́n lehe a sọgan tindo mahẹ to adà lizọnyizọn lọ tọn devo lẹ mẹ do wẹ ya? Ze afọdide bo kanhose nugopọntọ pipli kunnudegbe tọn towe kavi wẹnlatọ numimọnọ de nado plọnazọ́n we. Flindọ gbigbọ wiwe Jehovah tọn sọgan gọalọna we nado hẹn azọ́nyinyọnẹn towe pọnte dogọ, enẹwutu nọ biọ gbigbọ wiwe etọn whẹwhẹ to odẹ̀ mẹ.—Luku 11:13.

Eyin a ma tlẹ kàn ayinamẹ biọ whẹpo mẹde do na we ayinamẹ do lehe a sọgan yinukọn do ji, ma gblehomẹ blo. (Yẹwh. 7:9) Taidi Apolo, kẹalọyi alọgọ lọ po whiwhẹ po bo yọ́n pinpẹn etọn. Aliho he mẹ gbẹtọ nuyọnẹntọ de nọ yinuwa te niyẹn.—Howh. 12:15.

8-14 AOÛT

NUHỌAKUẸ LẸ SỌN OHÓ JIWHEYẸWHE TỌN MẸ | 1 AHỌLU LẸ 3-4

“Nuyọnẹn Họakuẹ”

w11 15/12 8 huk. 4-6

Be Apajlẹ Dagbe Wẹ E Yin Na We Ya Kavi Avase De?

To bẹjẹeji gandudu Sọlomọni tọn, Jiwheyẹwhe sọawuhia ẹ to odlọ mẹ bo dọna ẹn nado basi obiọ de. Na Sọlomọni yọnẹn dọ emi ma tindo numimọ sọmọ wutu, e biọ nuyọnẹn. (Hia 1 Ahọlu lẹ 3:5-9.) Homẹ Jiwheyẹwhe tọn hùn dọ ahọlu lọ biọ nuyọnẹn kakati nado biọ adọkun kavi gigo, enẹwutu, e na Sọlomọni “ayiha nuyọnẹn tọn de po sisè [kavi nukunnumọjẹnumẹ] tọn de po” gọna adọkun. (1 Ahọ. 3:10-14) Dile Jesu donù e go do, nuyọnẹn Sọlomọni tọn jiawu sọmọ bọ ahọsi Ṣeba tọn sèhó gandego bo basi gbejizọnlin gaa nado wá mọ po nukun etọn lẹ po.—1 Ahọ. 10:1, 4-9.

Mí ma nọ donukun nado mọ nuyọnẹn yí to azọ́njiawu-liho gba. Sọlomọni dọmọ: “OKLUNỌ wẹ nọ na [nuyọnẹn] omẹ,” ṣigba e sọ dohia dọ mí dona dovivẹnu nado wleawuna jẹhẹnu Jiwheyẹwhe tọn enẹ to whenuena e wlan dọmọ: “Lẹ́ otó towe hlan nuyọnẹn go, bosọ jlẹ ayiha towe hlan ayitùnnugo.” Enẹwutu, e yí hogbe delẹ zan taidi “to awhádo hodo,” po “dín” nuyọnẹn po. (Howh. 2:1-6) E họnwun dọ mí sọgan yin nuyọnẹntọ.

Mí na wà dagbe nado kanse míde dọ ‘Be n’nọ yí nukun họakuẹ do pọ́n nuyọnẹn Jiwheyẹwhe tọn dile Sọlomọni wà do ya?’ Na ninọmẹ akuẹzinzan tọn ma tindo jidide ba wutu, mẹsusu ko ze ayidonugo yetọn lẹpo do azọ́n po akuẹ po ji kavi ko dike enẹ ni yinuwado nudide yetọn gando obá he mẹ yé na yì wehọmẹ jẹ po wepinplọn he yé na doafọna po go. Etẹwẹ dogbọn hiẹ po whẹndo towe po dali? Be nudide mìtọn lẹ nọ dohia dọ mì nọ ylọ nuyọnẹn Jiwheyẹwhe tọn dọ nujọnu bosọ nọ dín in ya? Be vọjlado bibasi to yanwle mìtọn lẹ mẹ sọgan gọalọna mì nado tindo nuyọnẹn dogọ ya? Na nugbo tọn, nuyọnẹn tintindo po yíyí i zan po na hẹn ale wá na mì kakadoi. Sọlomọni wlan dọmọ: “Whenẹnu wẹ hiẹ na tunwun dodo, po whẹdida po, po kunnumahu po; yèdọ omọ́ dagbe lẹpo.”—Howh. 2:9.

Onú Sisosiso Gbigbọmẹ Tọn Lẹ

w98 1/2 11 huk. 15

Jehovah Yin Jiwheyẹwhe Alẹnu Tọn De

Po okunkan Ablaham tọn heyin tito-basina taidi akọta de to Osẹ́n glọ po, Jehovah dona yé sọgbe hẹ opagbe etọn hlan tọgbo lọ. To owhe 1473 J.W.M., mẹhe jẹ otẹn Mose tọn mẹ, yèdọ Jọṣua, plan Islaeli biọ Kenani. Aigba mimá he bọdego to whẹndo lọ lẹ ṣẹnṣẹn hẹn opagbe Jehovah tọn nado na aigba lọ hlan okún Ablaham tọn dì. To whenuena Islaeli yin nugbonọ, Jehovah hẹn opagbe etọn nado na awhàngbigba yé do kẹntọ yetọn lẹ ji dì. Ehe yin nugbo taun to gandudu Ahọlu Davidi tọn whenu. To ojlẹ visunnu Davidi tọn Sọlọmọni whenu, adà atọ̀ntọ alẹnu Ablaham tọn yin hinhẹndi. “Juda po Islaeli po yin susu, di otọ̀kẹ́n he tin to ohù tó to gege mẹ, to dùdù bo nùnù bo to aglinjẹ basi.”—1 Ahọlu lẹ 4:20.

15-21 AOÛT

NUHỌAKUẸ LẸ SỌN OHÓ JIWHEYẸWHE TỌN MẸ | 1 AHỌLU LẸ 5-6

“Yé Wazọ́n lọ po Ahundopo Po”

w11-F 1/2 15 huk. 5

Be Hiẹ Yọnẹn Ya?

Atin vonọtaun wẹ kedali Lẹbanọni tọn yin. E nọ yọnwhanpẹ taun, nọ dọ́jì bo nọ dewán gblingblin, podọ wanvú lẹ ma nọ yawu dù i. E dohia dọ atin dagbe hugan wẹ Sọlomọni yí do gbá tẹmpli lọ. Kedali-tin he nọ gọ́ osó Lẹbanọni tọn lẹ ji dai masọ sù sọmọ ba.

it-1-F 411 huk. 1

Kedali

Huhlọn-zọ́nwatọ fọtọ́n susu wẹ e biọ nado mọ owhlẹ kedali tọn planplan enẹ. Yé nọ sán atin lọ lẹ, kùn yé gbọn ohù Meditẹlane ji yì Tile kavi Sidoni, blá yé dopọ bo wá de yé do agé, vlavo to Jọpa. Enẹgodo, yè nọ dọ̀n owhlẹ lọ lẹ yì Jelusalẹm. Gbekọndopọ he to Sọlomọni po Hilami po ṣẹnṣẹn wẹ hẹn ẹn yọnbasi. (1Ah 5:6-18; 2Ot 2:3-10) Owhlẹ kedali tọn nọ biọ otò lọ mẹ sọmọ bọ yè gán dọ dọ to gandudu Sọlomọni tọn whenu, “atin kedali tọn sù tlala taidi atin sikomoli tọn.”—1Ah 10:27; yijlẹdo Isa 9:9, 10 go.

it-2-F 1047 huk. 8

Tẹmpli

Lehe Sọlomọni basi tito azọ́n lọ tọn do die: e de sunnu 30000 sọn Islaelivi lẹ mẹ bo nọ do 10000 to yé mẹ hlan Lẹbanọni to aliho mẹjijẹ-mẹjijẹ tọn mẹ. Yé nọ nọ̀ dọ́n na osun dopo bo nọ nọ̀ whégbè na osun awe. (1Ah 5:13, 14) E sọ de pakanọ paa 70000 sọn sunnu he to “jonọ-gbéji” to aigba Islaeli tọn ji lẹ mẹ, podọ zannu-pàtọ 80000. (1Ah 5:15; 9:20, 21; 2Ot 2:2) Humọ, e de azọ́ngán 550, podọ e di dọ alọgọtọ 3300 wẹ e de do oglọ na yé. (1Ah 5:16; 9:22, 23) Omẹ 250 to yé mẹ wẹ na ko yin Islaelivi bọ omẹ 3600 he pò lẹ yin jonọ to Islaeli.—2Ot 2:17, 18.

Onú Sisosiso Gbigbọmẹ Tọn Lẹ

g-F 5/12 17, apotin

Dọdai Biblu Tọn lẹ Nọ Sọgbe Janwẹ, Apá 1

OJLẸ HE GO BIBLU NỌ DONÙ LẸ NỌ SỌGBE

Kandai he to 1 Ahọlu lẹ 6:1 mẹ dohia dọ ojlẹ he go Biblu nọ donù lẹ nọ sọgbe. Wefọ lọ dọ whenue Ahọlu Sọlomọni jẹ tẹmpli Jelusalẹm tọn gbá ji. Kandai lọ dọmọ: “Owhe 480 [kavi owhe 479 pipé] to whenue Islaelivi lẹ ko tọ́njẹgbonu sọn aigba Egipti tọn ji godo, to owhe ẹnẹtọ gandudu Sọlomọni tọn do Islaeli ji mẹ, to osun Zivi tọn mẹ (enẹ wẹ, osun awetọ), ewọ jẹ ohọ̀ Jehovah tọn gbá ji.”

Po kunnudenu he to Biblu mẹ lẹ po, owhe ẹnẹtọ gandudu Sọlomọni tọn jẹ do owhe 1034 J.W.M. Todin, eyin mí hia owhe 479 pipé lọ lẹ sọn owhe enẹ mẹ, e plan mí wá owhe 1513 J.W.M, he yin owhe he mẹ Islaelivi lẹ tlọ́n kanlinmọgbenu to Egipti.

22-28 AOÛT

NUHỌAKUẸ LẸ SỌN OHÓ JIWHEYẸWHE TỌN MẸ | 1 AHỌLU LẸ 7

“Nuhe Dòtin Awe Delẹ Plọn Mí”

w13-F 1/12 13 huk. 3

‘Hiẹ Sọgan Nọ Kùn Gànvẹẹ sọn Osó lẹ Ji’

Gànvẹẹ he Ahọlu Sọlomọni yí do doaṣọ́na tẹmpli Jelusalẹm tọn ma whè. Otọ́ etọn Davidi wẹ bẹ gànvẹẹ lọ lẹ sọn Silianu lẹ si to whenue e gbawhàn yetọn. (1 Otànnugbo lẹ 18:6-8) “Ohù gànkinkọ̀n tọn” yin basia daho de he yè yí gànvẹẹ do basi bọ finẹ wẹ yẹwhenọ lẹ nọ klọ́ alọ po afọ po te. E nọ hẹn osin litli 66000 bo gán pẹ̀n sọ̀ tọnu 30. (1 Ahọlu lẹ 7:23-26, 44-46) Dòtin daho blibata gànvẹẹ tọn awe sọ tin to tẹmpli lọ nukọn. Yé dite sọ̀ mẹtlu 8 bọ ota gànvẹẹ tọn to aga na dopodopo yetọn. Ota lọ lẹ yiji sọ̀ nudi mẹtlu 2. Dòtin lọ lẹ gblo sọ̀ nudi mẹtlu 2 bọ tonù yetọn lẹ tli sọ̀ santimẹtlu 7 daa, podọ yé do odò to homẹ sọn aga wá odò. (1 Ahọlu lẹ 7:15, 16; 2 Otànnugbo lẹ 4:17) E họnwun dọ gànvẹẹ he yè zan sù tlala.

it-1-F 355 huk. 6

Boazi, II

Dòtin gànvẹẹ tọn daho awe wẹ to nukọnna atọ̀họ̀ tẹmpli blibata he Sọlomọni gbá bọ dehe to agewaji lọ yin yiylọdọ Boazi he na ko zẹẹmẹdo “To Huhlọn Mẹ.” Dehe to hùwaji uwọ yin yiylọdọ “Jakini” bo zẹẹmẹdo “Na [Jehovah] Ni Hẹn Lodo Gligli.” E dohia dọ eyin mẹde pannukọn hùwaji bo na hia nuhe yin kinkan do dòtin awe lọ lẹ go sọn adusi yì amiyọn, e na yin ‘Na [Jehovah] ni hẹn [tẹmpli lọ] lodo to huhlọn mẹ.’—1Ah 7:15-21; pọ́n CHAPITEAU.

Onú Sisosiso Gbigbọmẹ Tọn Lẹ

it-1-F 257 huk. 14

Awulilẹ̀

Jehovah jlo dọ mẹhe nọ sẹ̀n emi lẹ ni nọ nọ̀ wiweji. Anademẹ he nọ yin hihodo to gòhọtúntún mẹ lẹ, po dehe wá yin zizedai na mẹhe nọ wà sinsẹ̀nzọn to tẹmpli mẹ lẹ po do ehe hia hezeheze. To whenue Mọse jlo na na aṣẹ Yẹwhenọ Daho Aalọn po visunnu etọn lẹ po, yé lawu whẹpo do dó awù yẹwhenọ tọn yetọn lẹ. (Eks 29:4-9; 40:12-15; Le 8:6, 7) Yẹwhenọ lẹ nọ yí osin he to basia gànvẹẹ tọn mẹ to awánu gòhọtúntún lọ tọn mẹ do klọ́ alọ po afọ po. Amọ́ to nukọn mẹ, osin he to ohù gànvẹẹ tọn mẹ to tẹmpli Sọlomọni tọn mẹ wẹ yé nọ yizan. (Eks 30:18-21; 40:30-32; 2Ot 4:2-6) Yẹwhenọ daho nọ lawu whla awe to Azán Ovẹsè tọn gbè. (Le 16:4, 23, 24) Humọ, osẹ́n lọ biọ to mẹdelẹ si nado nọ lawu bo yàn avọ̀ yetọn whẹpo do lẹkọwa osla lọ mẹ. Yewlẹ wẹ mẹhe do gbọgbọẹ de hlan sọn osla lọ mẹ di Azazẹli lẹ, mẹhe bẹ nuhe pò sọn kanlin he yè yí do sanvọ́ lẹ go yì gbonu osla lọ tọn lẹ, po mẹhe ze oyìnsi vẹẹ he yè do sanvọ́ lọ yì lẹ po.—Le 16:26-28; Sọh 19:2-10.

29 AOÛT–4 SEPTEMBRE

NUHỌAKUẸ LẸ SỌN OHÓ JIWHEYẸWHE TỌN MẸ | 1 AHỌLU LẸ 8

“Odẹ̀ Gbangba Tọn de He Do Whiwhẹ Hia”

w09 15/11 9 huk. 9-10

Hẹn Odẹ̀ Towe lẹ Pọnte Gbọn Biblu Pinplọn Dali

Whẹpo Jehovah nido sè odẹ̀ mẹde tọn, e dona wá sọn ahun mẹ. Sọlọmọni hodẹ̀ ahundopo tọn de, he yin kinkàndai to 1 Ahọlu lẹ weta 8 mẹ, to gbẹtọgun he pli to Jelusalẹm na klandowiwe tẹmpli Jehovah tọn lọ nukọn to 1026 J.W.M. To whenue aki alẹnu tọn yin zizedo Fiwiwe Gbaugbau lọ, bọ aslọ Jehovah tọn gọ́ tẹmpli lọ mẹ, Sọlọmọni pagigona Jiwheyẹwhe.

Lẹnnupọndo odẹ̀ Sọlọmọni tọn ji, bo doayi aliho he mẹ e donù ayiha go te to odẹ̀ etọn mẹ. Sọlọmọni dọ dọ Jehovah kẹdẹ wẹ nọ yọ́n nuhe tin to ahun gbẹtọ tọn mẹ. (1 Ahọ. 8:38, 39) Odẹ̀ dopolọ dohia dọ todido tin na ylandonọ he ‘yí ayiha etọn lẹpo do gọ̀ do Jiwheyẹwhe dè.’ Eyin kẹntọ de wle omẹ Jiwheyẹwhe tọn lẹ, Jehovah na sè odẹ̀ yetọn eyin yé tindo ayiha pipé. (1 Ahọ. 8:48, 58, 61) Enẹwutu, odẹ̀ towe lẹ dona nọ wá sọn ahun mẹ.

w99 15/1 17 huk. 7-8

Ze Alọ Nugbonọ lẹ Daga to Odẹ̀ Mẹ

Vlavo eyin mí to odẹ̀ gbangba tọn kavi mẹdetiti tọn hò, nunọwhinnusẹ́n Owe-wiwe tọn titengbe he dona yin hinhẹn do ayiha mẹ wẹ yindọ mí dona do walọ whiwhẹ tọn hia to odẹ̀ mítọn lẹ mẹ. (2 Otannugbo lẹ 7:13, 14) Ahọlu Sọlọmọni do whiwhẹ hia to odẹ̀ gbangba tọn etọn mẹ to klandowiwe tẹmpli Jehovah tọn whenu to Jelusalẹm. Sọlọmọni ko ṣẹṣẹ dotana dopo to ohọ̀ daho hugan lẹ mẹ he hunkọ ma ko yin gbigbá to aigba ji pọ́n. Ṣogan, e hodẹ̀ po whiwhẹ po dọmọ: “Be Jiwheyẹwhe to owalọ nugbo mẹ na nọ̀ aigba go? Doayi e go, olọn po olọn olọn lẹ tọn po ma sọgan hẹn we; whè sọ na ohọ̀ he ehe yẹn ko dó!”—1 Ahọlu lẹ 8:27.

Taidi Sọlọmọni, mí dona tindo whiwhẹ to whenuena mí nọtena mẹdevo lẹ to odẹ̀ gbangba tọn mẹ. Dile etlẹ yindọ mí dona dapana dodonọ mẹdetiti tọn jijlá to hodidọ mẹ, whiwhẹ sọgan yin didohia gbọn kọnugbè mítọn dali. Odẹ̀ whiwhẹ tọn lẹ ma nọ yin hogbe goyiyi tọn kavi numọtolanmẹ glanglan tọn gba. Yé nọ dọ̀n ayidonugo, e mayin do mẹhe to dẹ̀ho lọ ji gba, ṣigba do Omẹ lọ he yè to hodọna lọ ji. (Matiu 6:5) Whiwhẹ sọ nọ yin didohia gbọn nuhe mí dọ to odẹ̀ mẹ dali. Eyin mí hodẹ̀ po whiwhẹ po, mí ma na dọho taidi dọ mí to díndín dọ Jiwheyẹwhe ni wà onú delẹ dile míwlẹ jlo gbọn gba. Kakatimọ, mí na vẹ̀ Jehovah nado yinuwa to aliho he sọgbe hẹ ojlo wiwe etọn mẹ. Psalmkantọ lọ ze apajlẹ walọyizan he sọgbe tọn dai to whenuena e vẹvẹ dọmọ: “Whlẹnmẹ lò, mí vẹ̀ we, OKLUNỌ E: Do yọ́nna hlan lò, mí vivẹ̀ we, OKLUNỌ E.”—Psalm 118:25; Luku 18:9-14.

Onú Sisosiso Gbigbọmẹ Tọn Lẹ

it-1-F 475 huk. 3

Olọn

Sọlomọni he gbá tẹmpli Jelusalẹm tọn dọ dọ “olọn olọn lẹ tọn” ma gán hẹn Jiwheyẹwhe. (1Ah 8:27) Na Jehovah wẹ dá olọn lẹ wutu, otẹn he mẹ e te yiaga taun hú olọn lọ lẹpo bọ “oyín etọn kẹdẹ wẹ klohugan. Gigo daho etọn yiaga hú aigba po olọn po.” (Slm 148:13) Ewọ nọ jlẹ olọn lẹ kẹdẹdile gbẹtọ gán yí alọsu po alọvi pẹvi pete etọn po do jlẹ nude do. (Isa 40:12) Nuhe dọ Sọlomọni te tofi ma yindọ Jiwheyẹwhe ma nọ nọ̀ ofi tangan de gba. E masọ yindọ e to filẹpo bo to nulẹpo mẹ wẹ gba. To fidevo, Sọlomọni tlẹ dọ dọ Jehovah nọ sè “sọn olọn mẹ, yèdọ fininọ” etọn he yin fie angẹli lẹ nọ nọ̀.—1Ah 8:30, 39.

AWUWIWLENA LIZỌNYIZỌN KUNNUDEGBE TỌN

km 5/10 2

Klistiani Lizọnyizọnwatọ lẹ Dona Nọ Hodẹ̀

Mí ma sọgan wà lizọnyizọn lọ dotana gbọn huhlọn mítọn dali gba. Jehovah nọ na mí huhlọn nado wà azọ́n lọ. (Flp. 4:13) E nọ yí angẹli etọn lẹ zan nado gọalọna mí nado sọgan mọ omẹ taidi lẹngbọ lẹ. (Osọ. 14:6, 7) Jehovah wẹ nọ hẹn okún he mí do bo húsinna lẹ whẹ́n. (1 Kọl. 3:6, 9) Lehe e yin nujọnu dọ Klistiani lizọnyizọnwatọ lẹ ni nọ ganjẹ Otọ́ mítọn olọn tọn go to odẹ̀ mẹ do sọ!

Nọ Hodẹ̀ to Ninọmẹ Lẹpo Mẹ: Mí dona nọ hodẹ̀ to ninọmẹ dopodopo mẹ dile mí to yẹwhehodọ. (Efe. 6:18) Etẹlẹ ji wẹ mí dona nọ hodẹ̀ do? Mí sọgan hodẹ̀ nado tindo pọndohlan dagbe gando mẹhe to aigba-denamẹ mítọn ji lẹ go podọ nado tindo adọgbigbo. (Owalọ 4:29) Mí sọgan biọ Jehovah nado deanana mí yì omẹ ahunjijlọnọ he mí sọgan plọn Biblu hẹ lẹ dè. Eyin whétọ de kàn kanbiọ sè, mí sọgan hodẹ̀ kleun to ahun mẹ nado biọ Jehovah dọ ni gọalọna mí nado na gblọndo he sọgbe. (Nẹh. 2:4) Mí sọ sọgan biọ nuyọnẹn nado ze lizọnyizọn lọ do otẹn tintan mẹ zọnmii. (Jak. 1:5) Humọ, homẹ Jehovah tọn nọ hùn eyin hogbe he mí yizan to odẹ̀ mítọn mẹ lẹ nọ do pinpẹn-nutọn-yinyọnẹn hia na lẹblanulọkẹyi he mí tindo nado yin lizọnyizọnwatọ etọn.—Kọl. 3:15.

Nọ Hodẹ̀ Na Mẹdevo Lẹ: Mí sọ dona “nọ hodẹ̀ na ode awetọ,” bo tlẹ nọ ylọ yinkọ lizọnyizọnwatọ hatọ lẹ tọn to whenue e biọ domọ. (Jak. 5:16; Owalọ 12:5) Be nuhe hiẹ sọgan wà to azọ́n yẹwhehodidọ tọn mẹ tindo dogbó na agbasa towe to godo yì wutu wẹ ya? Eyin mọ wẹ, nọ hodẹ̀ na lizọnyizọnwatọ hatọ he tindo agbasalilo lẹ. Ma yí nukunpẹvi do pọ́n nuhe odẹ̀ towe sọgan wà na mẹdevo lẹ blo! E sọ sọgbe nado nọ hodẹ̀ na mẹhe to otẹn aṣẹpipa tọn mẹ lẹ nado tindo pọndohlan dagbe gando azọ́n yẹwhehodidọ tọn go, na mẹmẹsunnu mítọn lẹ nido “zindonukọn to gbẹzan abọẹninọ tọn po whii-ninọ tọn po” mẹ.—1 Tim. 2:1, 2.

Wẹndagbe lọ lilá to aigba fininọ lẹpo ji yin azọ́ndenamẹ daho de. Eyin mí “sinyẹnlin to odẹ̀ mẹ,” mí na wazọ́n lọ dotana po alọgọ Jehovah tọn po.—Lom. 12:12.