Owanyi He Sinyẹn Hugan Onọ̀ de Tọn

TO ALIGBỌNTẸN lẹ, to adàdo paa lẹ mẹ, kavi to tohomẹliho jinján lẹ ji, onọ̀ lẹ to gbigbẹkọ oviyẹyẹ yetọn lẹ go. To ojlẹ delẹ mẹ, ogbó-bẹtọ lẹ tlẹ ko mọ ovivu he onú ko ṣikọna sọn avi vivi na onọ̀ yetọn mẹ lẹ to ogbó-hẹnnu lẹ mẹ. Sọgbe hẹ O Estado de S. Paulo, “whẹho ovi heyin gbigbẹkọ e go lẹ tọn to tòhomẹ-liho lẹ ji to jideji tindo.” Nugbo wẹ dọ, e sọgan vẹna onọ̀ jọja lọ to godo mẹ. Etomọṣo e nọ ze ovi etọn dlan, dile etlẹ yindọ e sọgan hẹn ogbẹ̀ ovi etọn tọn bú.

E sọgan paṣa we dọ, ‘Nawẹ onọ̀ de tlẹ sọgan lẹnnupọndo gbigbẹkọ ovi etọn go na sọgodo he ma họnwun de wutu do?’ Biblu yí ninọmẹ awubla tọn mọnkọtọn zan taidi yẹdenanu de nado wleawuna vogbingbọn sinsinyẹn hlan numọtolanmẹ Mẹdatọ mítọn tọn dohlan mẹhe yin etọn titi lẹ dọmọ: “Be yọnnu sọgan wọ̀n ovi etọn he tin anọ́nù, bọ e ma na do walẹblanuna ovi ohò etọn mẹ tọn? Nugbo yé sọgan wọ̀n, ṣigba yẹn ma na wọ̀nji ogo we gba.”—Isaia 49:15.

Na taun tọn, hugan onọ̀ gbẹtọ tọn depope, Jiwheyẹwhe tindo owanyi sisosiso na mí bo nọ do numọtolanmẹ hia hlan nuhudo mítọn lẹ. Vlavo jọja de kavi mẹhomẹ de wẹ hiẹ yin, nuhahun depope he hiẹ sọgan pehẹ, hiẹ matin dewe ṣokẹdẹ gba. Mẹdatọ towe nọ jlo nado gọalọna we bo tindo ojlo to dagbemẹ-ninọ towe mẹ. To ohó psalmkantọ lọ tọn lẹ mẹ, “whenuena otọ́ ṣie po onọ̀ ṣie po gbẹ́ mi dai, whenẹnu wẹ OKLUNỌ na dealọyí mi.”—Psalm 27:10.

Lẹdo aihọn pé, linlinnamẹwe Atọ̀họ̀-Nuhihọ́ Lọ Tọn po Réveillez-vous! po nọ yin zinzinjẹgbonu nado wleawuna oyọnẹn ‘Jiwheyẹwhe nugbo dopo kẹdẹ lọ tọn,’ yèdọ Jehovah, po Visunnu etọn, Jesu Klisti tọn po, ehe sọgan zẹẹmẹdo ogbẹ̀ madopodo na mẹhe gbọn pinpẹn nutọn yinyọnẹn dali kẹalọyí ì lẹ.—Johanu 17:3.