“Do Ohia Nukọnna Mẹhe” Jẹ Lẹ

 1-3. (a) Naegbọn avò vò Ezekiẹli, podọ etẹwẹ e sè gando vasudo Jelusalẹm tọn go? (b) Kanbiọ tẹlẹ wẹ mí na gbadopọnna?

AVÒ vò Ezekiẹli! E ṣẹṣẹ mọ numimọ de gando awuhiọnu he wà Juvi atẹṣitọ lẹ te to tẹmpli Jelusalẹm tọn mẹ lẹ go.a Atẹṣitọ enẹlẹ ko hẹn fihe yin ahọnkan sinsẹ̀n-bibasi wiwe-ṣeke tọn to Islaeli sọn whenu dindẹn die lọ flu. Amọ́, e ma yin tẹmpli lọ kẹdẹ wẹ yé hẹnflu. Danuwiwa ko gbọn kámẹ-gòmẹ to aigba Juda tọn ji bọ e taidi dọ ninọmẹ lọ ma gán yin vivọjlado. Jehovah gblehomẹ do nuhe wà mẹdide etọn lẹ te go sọmọ bọ e dọna Ezekiẹli dọmọ: “Yẹn na do adi ṣie hia.”—Ezek. 8:17, 18.

² Lehe e na ko blawuna Ezekiẹli do sọ nado mọdọ Jehovah ko gblehomẹ sinsinyẹn sọta Jelusalẹm po tẹmpli etọn he yin fiwiwe de to ojlẹ de mẹ wayi lọ po bo nasọ và yé sudo! Ayihaawe ma tin dọ Ezekiẹli na ko to kinkanse ede dọ: ‘Bọ nugbonọ he to tòdaho lọ mẹ lẹ lo? Be yé na yin whinwhlẹngán ya? Eyin mọ wẹ, gbọnna?’ E ma dẹn bọ Ezekiẹli mọ gblọndo na kanbiọ etọn lẹ. Tlolo he e sè whẹdida whẹgbledomẹ tọn he yin lilá sọta Jelusalẹm godo, e sọ sè ogbè lélé de he to oylọ-basina whẹdida-hẹnṣẹtọ Jiwheyẹwhe tọn lẹ nado bẹ yede pli. (Ezek. 9:1) Dile numimọ lọ to nukọnzindo, yẹwhegán lọ wá sè nude he hẹn ayiha etọn jai taun, enẹ wẹ yindọ vasudo lọ ma na gando mẹlẹpo go. Na nugbo tọn, mẹhe jẹ lẹ na luntọ́n!

³ Dile mí to dindọnsẹpọ vivọnu titonu ylankan ehe tọn, mílọsu gán ko to kinkanse míde eyin e na yọnbasi nado lùn vasudo daho he to nukọn ja lọ tọ́n. Enẹwutu, mì gbọ mí ni gbadopọnna kanbiọ ehelẹ: (1) Etẹwẹ Ezekiẹli mọ bọdego to numimọ lọ mẹ? (2) Nawẹ numimọ lọ mọ hẹndi to ojlẹ etọn mẹ gbọn? (3) Zẹẹmẹ tẹwẹ numimọ dọdai tọn lọ tindo na mí to egbehe?

 4. Basi zẹẹmẹ nuhe Ezekiẹli mọ bo sè bọdego to numimọ lọ mẹ tọn.

⁴ Etẹwẹ Ezekiẹli mọ bosọ sè bọdego to numimọ lọ mẹ? (Hia Ezekiẹli 9:1-11.) E mọ bọ sunnu ṣinawe dọnsẹpọ “sọn họngbo he to aganu bo pannukọn agewaji lọ kọ̀n,” vlavo sẹpọ fihe boṣiọ awuwhàn tọn lọ te kavi fihe yọnnu lẹ to avivi na yẹwhe Tamuzi tọn wutu te. (Ezek. 8:3, 14) Sunnu ṣinawe lọ lẹ biọ awánu homẹ tọn tẹmpli lọ tọn mẹ bo ṣite to agbà gànvẹẹ tọn lọ pá. Ṣigba, yé ma tọ́n avọ́san gbé. Na whenu ko fẹ́ nado basi avọ́sinsan depope he gán yin alọkẹyi to tẹmpli enẹ mẹ. Ṣidopo to sunnu lọ lẹ mẹ “hẹn adánwanu mẹhusudo tọn to alọmẹ.” Omẹ ṣinawetọ uwọ gbọnvo taun. E do alavọ bo ma hẹn adánwanu depope, adavo “wesinzo wekantọ tọn de” kavi “nuhe mẹ wesin wekantọ tọn nọ nọ̀,” dile nudọnamẹ odò tọn lọ dọ do.

 5, 6. Tadona tẹ kọ̀n wẹ mí sọgan wá gando mẹhe yin hiadogona lẹ go? (Pọ́n yẹdide he tin to bẹjẹeji hosọ ehe tọn.)

⁵ Azọ́n tẹ na wà wẹ dawe he hẹn wesinzo lọ te? E mọ azọ́ndenamẹ titengbe de yí sọn Jehovah dè tlọlọ dọmọ: “Jugbọn tòdaho lọ mẹ, yèdọ gbọn Jelusalẹm mẹ, bo do ohia nukọnna mẹhe to lewu bo to hunwẹn na osùnú he to yinyin wiwà to tòdaho lọ mẹ lẹpo wutu.” Vlavo to ojlẹ enẹ mẹ, Ezekiẹli sọgan ko lẹnnupọn yì godo bo flin whenue mẹjitọ Islaelivi nugbonọ lẹ mimí ohùn do aga ohọ̀n yetọn lẹ tọn podọ do dòtin yetọn lẹ go taidi ohia de nado whlẹn viplọnji yetọn lẹ bọ yé ma nado yin vivasudo. (Eks. 12:7, 22, 23) To numimọ Ezekiẹli tọn mẹ, be lẹndai dopolọ wẹ ohia he yin dido nukọnamẹ gbọn sunnu he hẹn wesinzo lọ dali na hẹndi—yèdọ nado dohia dọ mẹhe mọ hiadogonamẹ lọ yí lẹ dona yin pipò dogbẹ̀ to vasudo Jelusalẹm tọn whenu ya?

⁶ Gblọndo kanbiọ enẹ tọn na họnwun eyin mí lẹnnupọndo dodonu he ji mẹde sọgan mọ ohia lọ yí te ji. “Mẹhe to lewu bo to hunwẹn na osùnú he to yinyin wiwà to tòdaho lọ mẹ wutu” lẹ wẹ dona mọ ohia lọ yí do nukọn. Po enẹ po, tadona tẹ kọ̀n wẹ mí gán wá gando mẹhe yin hiadogona lọ lẹ go? Jẹnukọn whẹ́, yé to awubla sisosiso to ahun yetọn mẹ, e ma yin na boṣiọ he sẹ̀n mẹlẹ te to tẹmpli lọ mẹ wutu kẹdẹ, ṣigba na danuwiwa, fẹnnuwiwa gọna mẹhodu he gbayipe to Jelusalẹm wutu ga. (Ezek. 22:9-12) Humọ, e taidi dọ yé ma whlá numọtolanmẹ yetọn lẹ. Ayihaawe ma tin dọ hodidọ po nuyiwa ahunjijlọnọ enẹlẹ tọn po dohia hezeheze dọ yé gbẹwanna nuhe to jijọ to otò lọ mẹ lẹ bosọ ze yede jo na sinsẹ̀n bibasi wiwe-ṣeke. Jehovah na gbọn lẹblanu dali pò mẹhe jẹ enẹlẹ dogbẹ̀.

 7, 8. Nawẹ dawe he hẹn adánwanu mẹhusudo tọn lọ lẹ na hẹn azọ́ndenamẹ yetọn di gbọn, podọ etẹwẹ jọ bọdego?

⁷ Eyin mọ wẹ, nawẹ sunnu ṣidopo he hẹn adánwanu mẹhusudo tọn lọ lẹ na hẹn azọ́ndenamẹ yetọn di gbọn? Ezekiẹli gblató anademẹ he Jehovah na yé dọmọ: Mì hodo dawe he hẹn wesinzo lọ bo hù mẹlẹpo adavo mẹhe tindo ohia lọ to nukọn lẹ kẹdẹ. “Mì dona bẹjẹeji sọn fiwiwe ṣie mẹ,” wẹ Jehovah dọ. (Ezek. 9:6) Whẹdida-hẹnṣẹtọ lọ lẹ dona bẹ azọ́n yetọn jẹeji sọn ahọnkan Jelusalẹm tọn, yèdọ sọn tẹmpli he masọ yin wiwe to nukun Jehovah tọn mẹ ba lọ mẹ. Omẹ tintan he dona yin hùhù lẹ wẹ “sunnu mẹho he to ohọ̀ lọ nukọn lẹ”—yèdọ mẹho Islaeli tọn 70 he tin to tẹmpli lọ mẹ bo to nuyọnwan mẹ̀ na yẹwhe lalo lẹ.—Ezek. 8:11, 12; 9:6.

⁸ Etẹwẹ jọ bọdego? Dile Ezekiẹli zindonukọn nado to nupọn bo to todoai, dawe he hẹn wesinzo lọ dogbè na Jehovah dọmọ: “Yẹn ko basi pẹpẹ kẹdẹdile hiẹ degbe etọn na mi do.” (Ezek. 9:11) E sọgbe nado kanse míde dọ: ‘Nawẹ nulẹ wá yì do na tòmẹnu Jelusalẹm tọn lẹ? Be nugbonọ depope tin he lùn vasudo lọ tọ́n ya?’

 9, 10. Slẹ nugbonọ delẹ he lùn vasudo Jelusalẹm tọn tọ́n, podọ tadona tẹ kọ̀n wẹ mí sọgan wá gando yé go?

⁹ Hia 2 Otànnugbo lẹ 36:17-20. Dọdai Ezekiẹli tọn mọ hẹndi to 607 J.W.M. to whenue awhànpa Babilọni tọn và Jelusalẹm po tẹmpli etọn po sudo. Taidi “kọfo . . . de to alọ Jehovah tọn mẹ,” Babilọninu lẹ wẹ Jehovah yizan nado túntún homẹgble etọn jẹgbonu do Jelusalẹm atẹṣitọ lọ ji. (Jel. 51:7) Be mẹlẹpo wẹ yin vivasudo dopọ ji ya? Paali. Numimọ Ezekiẹli tọn ko dohia jẹnukọn dọ mẹdelẹ ma na yin sinsánsẹ gbọn Babilọninu lẹ dali.—Jen. 18:22-33; 2 Pita 2:9.

¹⁰ Nugbonọ delẹ luntọ́n, yèdọ mẹdelẹ taidi Lekabinu lẹ, Ebẹdi-melẹki Etiopianu lọ, Jelemia yẹwhegán lọ po Baluki wekantọ etọn po. (Jel. 35:1-19; 39:15-18; 45:1-5) Sọgbe hẹ numimọ Ezekiẹli tọn, mí gán wá tadona kọ̀n dọ omẹ mọnkọtọn lẹ dona ko to “lewu bo to hunwẹn na osùnú he to yinyin wiwà” to Jelusalẹm lẹ wutu. (Ezek. 9:4) Jẹnukọnna vasudo lọ, yé na ko dohia po ahundopo po dọ yé gbẹwanna kanyinylan bo ze yede jo na sinsẹ̀n-bibasi wiwe-ṣeke podọ yé na ko gbọnmọ dali ze yede do hukan mẹhe na yin pipò dogbẹ̀ lẹ tọn ji.

11. Mẹnu lẹ wẹ sunnu ṣidopo he hẹn adánwanu mẹhusudo tọn lọ lẹ po dawe he hẹn wesinzo wekantọ tọn lọ po nọtena?

¹¹ Be nugbonọ enẹlẹ yin hiadogona nado luntọ́n to aliho tlọlọ tọn mẹ wẹ ya? Kunnudenu depope ma dohia dọ mẹde—vlavo Ezekiẹli kavi yẹwhegán devo depope—jugbọn Jelusalẹm bo yí ohia donukọnna nugbonọ lẹ to paa mẹ. Enẹwutu, e họnwun dọ nuhe to jijọ to agblò gbigbọmẹ tọn mẹ to olọn mẹ bọ nukun gbẹtọvi tọn ma sọgan mọ lẹ wẹ yin didehia Ezekiẹli to numimọ dọdai tọn he e mọ lọ mẹ. Dawe he hẹn wesinzo wekantọ tọn lọ po sunnu ṣidopo he hẹn adánwanu mẹhusudo tọn lọ lẹ po nọtena nudida gbigbọnọ nugbonọ Jehovah tọn lẹ he nọ wleawufo to whepoponu nado hẹn ojlo etọn di. (Salm. 103:20, 21) Matin ayihaawe, angẹli lẹ wẹ Jehovah yizan nado hẹn whẹdida ṣẹ do Jelusalẹm atẹṣitọ lọ ji. E taidi dọ angẹli lọ lẹ yí ohia de donukọnna mẹhe na luntọ́n lẹ wẹ nkọ, na yé hẹn ẹn diun dọ whẹdida lọ na pò mẹdelẹ dogbẹ̀ kakati nado hù mẹlẹpo dopọ ji.

12, 13. (a) Naegbọn Jehovah do túntún homẹgble etọn jẹgbonu do Jelusalẹm ji, podọ naegbọn mí dona donukun nudopolọ to egbehe? (b) Be Mẹylọhodotọklisti wẹ Jelusalẹm atẹṣitọ lọ nọtena ya? Basi zẹẹmẹ. (Pọ́n apotin lọ “Be Mẹylọhodotọklisti Wẹ Jelusalẹm Nọtena Ya?”)

¹² To egbehe, mí to nukọnpọnhlan whẹdida Jiwheyẹwhe tọn he nkọ ma ko yin hinhẹnṣẹ pọ́n—yèdọ “nukunbibia daho de . . . ehe nkọ ma ko jọ pọ́n sọn bẹjẹeji aihọn tọn gbọ́n kakajẹ din, lala, e ma nasọ jọ gbede ba.” (Mat. 24:21) Dile mí to tepọn nujijọ ayidego tọn enẹ, kanbiọ titengbe delẹ fọndote: Be vasudo he ja lọ na pò mẹdelẹ dogbẹ̀ ya? Be sinsẹ̀n-basitọ nugbo Jehovah tọn lẹ na yin hiadogona to aliho de mẹ nado luntọ́n wẹ ya? To hogbe devo mẹ, be numimọ dọdai tọn he Ezekiẹli mọ gando dawe he hẹn wesinzo go lọ nasọ mọ hẹndi to azán mítọn gbè wẹ ya? Gblọndo kanbiọ atọ̀n lọ lẹpo tọn wẹ mọwẹ. Naegbọn mí gán wá tadona enẹ kọ̀n? Nado mọnukunnujẹ ehe mẹ, mì gbọ mí ni vọ́ nulẹnpọn do numimọ Ezekiẹli tọn lọ ji.

¹³ Be a flin nuhewutu Jehovah do túntún homẹgble etọn jẹgbonu do Jelusalẹm hohowhenu tọn ji ya? Sọ vọ́ lẹnnupọndo Ezekiẹli 9:8, 9 ji. (Hia.) To whenue Ezekiẹli to nuhà dọ vasudo he ja lọ sọgan wá sukúndona “mẹhe pò to Islaeli lẹpo,” Jehovah slẹ whẹwhinwhẹ́n ẹnẹ delẹ he wutu whẹdida enẹ nado yin hinhẹnṣẹ. Tintan, “nuṣiwa” akọta lọ tọn “ko gọfla.”b Awetọ, aigba Juda tọn “ko gọ́ na hùnsọndai.” Atọ̀ntọ, Jelusalẹm, yèdọ tatọ́-tònọ ahọluduta Juda tọn “ko gọ́ na mẹhodu.” Ẹnẹtọ, mẹhe to aigba lọ ji lẹ nọ to didọna yede dọ Jehovah “ma to” walọ ylankan yetọn lẹ mọ bo nọ gbọnmọ dali suwhẹna nuylankan he wà yé te lẹ. Be whẹgbledomẹ enẹ ma sọgbe pẹpẹ na aihọn egbehe tọn he gọ́ na walọ gblezọn, danuwiwa, mẹhodu po yise matindo po ya? Na Jehovah “ma nọ diọ” wutu, e họnwun dọ nuhe fọ́n homẹgble dodo tọn etọn dote to ojlẹ Ezekiẹli tọn mẹ enẹlẹ na gbẹsọ fọ́n homẹgble etọn dote to egbehe ga. (Jak. 1:17; Mal. 3:6) Enẹwutu, mí dona donukun dọ dawe ṣidopo he hẹn adánwanu mẹhusudo tọn lọ lẹ po dawe he hẹn wesinzo lọ po na gbẹ́ tindo nususu nado wà to egbehe ga!

14, 15. Apajlẹ tẹlẹ wẹ dohia dọ Jehovah nọ na avase mẹlẹ jẹnukọnna ojlẹ vasudo tọn?

¹⁴ Ṣigba, nawẹ numimọ dọdai tọn he Ezekiẹli mọ lọ to hẹndi mọ to azán mítọn gbè gbọn? Eyin mí lẹnnupọndo lehe numimọ lọ mọ hẹndi to hohowhenu do ji, mí gán yọ́n nuhe mí na donukun todin podọ to sọgodo. Mì gbọ mí ni gbadopọnna nujijọ delẹ to dọdai Ezekiẹli tọn mẹ, ehe ko jọ todin kavi na wá jọ to nukọn mẹ.

¹⁵ Jehovah nọ na avase mẹlẹ jẹnukọnna ojlẹ vasudo tọn. Dile mí mọ do to Weta 11tọ owe ehe tọn mẹ, Jehovah “yí [Ezekiẹli] do basi nuhọ́tọ de na owhé Islaeli tọn.” (Ezek. 3:17-19) Bẹsọn owhe 613 J.W.M., Ezekiẹli na avase akọta Islaeli tọn to aliho he họnwun mẹ dọ vasudo de to unklẹn ja. Yẹwhegán devo lẹ, taidi Isaia po Jelemia po sọ na avase gando nugbajẹmẹji he ja Jelusalẹm ji lọ go. (Isa. 39:6, 7; Jel. 25:8, 9, 11) To egbehe, Jehovah ko gbọn Klisti gblamẹ yí pipli pẹvi mẹyiamisisadode lẹ tọn de zan, e ma yin nado nọ na núdùdù sinsẹ̀n-basitọ nugbo lẹ, yèdọ devizọnwatọ whégbè tọn lẹ kẹdẹ gba, ṣigba nado nọ na avase mẹdevo lẹ gando nukunbibia daho he to mizọnmizọn ji ja lọ go ga.—Mat. 24:45.

16. Be mí omẹ Jehovah tọn lẹ wẹ nọ dohiagona mẹhe na luntọ́n lẹ ya? Basi zẹẹmẹ.

¹⁶ E ma yin omẹ Jehovah tọn lẹ wẹ nọ dohiagona mẹhe na luntọ́n lẹ. Flindọ e ma yin bibiọ to Ezekiẹli si nado dán gbọn Jelusalẹm bo dohiagona mẹhe na luntọ́n lẹ. Mọdopolọ, Jehovah ma deazọ́nna omẹ etọn lẹ to egbehe nado dohiagona mẹhe jẹ nado luntọ́n lẹ. Kakatimọ, taidi devizọnwatọ whégbè tọn lẹ to whédo gbigbọmẹ tọn Klisti tọn mẹ, azọ́ndenamẹ mítọn wẹ nado dọyẹwheho. Mí nọ dohia dọ mí ylọ azọ́ndenamẹ ehe dọ nujọnu gbọn zohunhun yíyí do lá wẹndagbe Ahọluduta Jiwheyẹwhe tọn gọna jeje yíyí do na avase dọ opodo aihọn ylankan ehe tọn to dindọnsẹpọ po awuyiya po dali. (Mat. 24:14; 28:18-20) Gbọnmọ dali, mí nọ yí adà mítọn wà nado gọalọna ahunjijlọnọ lẹ na yé nido kẹalọyi sinsẹ̀n-bibasi wiwe-ṣeke.—1 Tim. 4:16.

17. Etẹwẹ mẹdopodopo dona wà todin nado ze ede do hukan mẹhe na yin hiadogona to sọgodo lẹ tọn ji?

¹⁷ Nado lùn vasudo he ja lọ tọ́n, mẹdopodopo dona do yise etọn hia todin. Dile mí mọ do wayi, mẹhe lùn vasudo Jelusalẹm tọn tọ́n to 607 J.W.M. lẹ ko do wangbẹna sinsinyẹn he yé tindo na ylanwiwa hia jẹnukọn gọna mẹdezejo yetọn na sinsẹ̀n-bibasi wiwe-ṣeke. Mọ wẹ e sọ dona yin to egbehe. Whẹpo vasudo lọ nado wá, mẹlẹ dona to “lewu bo to hunwẹn”—kavi to awubla sisosiso to ahun mẹ—na kanyinylan aihọn ehe tọn wutu. Podọ kakati nado ze numọtolanmẹ yetọn lẹ whlá, yé dona nọ do mẹdezejo yetọn na sinsẹ̀n-bibasi wiwe-ṣeke hia to ohó po walọ po mẹ. Nawẹ yé gán wàmọ gbọn? Yé dona kẹalọyi yẹwheho he to yinyin didọ to egbehe, zindonukọn nado to gbẹtọ-yinyin Klisti tọn nkọ ze dogo, yí baptẹm nado do klandowiwe yetọn hlan Jehovah hia bosọ nọgodona mẹmẹsunnu Klisti tọn lẹ po nugbonọ-yinyin po. (Ezek. 9:4; Mat. 25:34-40; Efe. 4:22-24; 1 Pita 3:21) Mẹhe ze afọdide mọnkọtọn todin bo ko lẹzun sinsẹ̀n-basitọ nugbo jẹnukọnna bẹjẹeji nukunbibia daho lọ tọn lẹ kẹdẹ wẹ na tin to otẹn dagbe mẹ nado yin hiadogona taidi mẹhe na luntọ́n.

18. (a) Whetẹnu podọ nawẹ Jesu Klisti na dohiagona mẹhe jẹ lẹ gbọn? (b) Be mẹyiamisisadode nugbonọ lẹ do hudo nado mọ ohia dopolọ yí taidi mẹhe na lùn Amagẹdọni tọ́n lẹ wẹ ya? Basi zẹẹmẹ.

¹⁸ Hiadogonamẹ mẹhe jẹ lẹ tọn lọ na wá aimẹ to agblò gbigbọmẹ tọn mẹ to olọn mẹ. To ojlẹ Ezekiẹli tọn mẹ, angẹli lẹ yí adà de wà nado dohiagona nugbonọ he na luntọ́n lẹ. To hẹndi egbezangbe tọn dọdai lọ tọn mẹ, dawe he hẹn wesinzo wekantọ tọn lọ nọtena Jesu Klisti to whenue ewọ “na wá to gigo etọn mẹ” taidi Whẹdatọ akọta lẹpo tọn. (Mat. 25:31-33) Wiwá Jesu tọn enẹ na yin to nukunbibia daho lọ whenu, to vasudo sinsẹ̀n lalo tọn godo.c To ojlẹ sinsinyẹn enẹ mẹ, yèdọ whẹpo awhàn Amagẹdọni tọn nado bẹjẹeji, Jesu na dawhẹna gbẹtọ lẹ taidi lẹngbọ kavi gbọgbọẹ. Mẹhe “gbẹtọ susugege” lọ bẹhẹn lẹ na yin whẹdana kavi yin hiadogona taidi lẹngbọ, bọ ehe na dohia dọ yé na “nọgbẹ̀ kakadoi.” (Osọ. 7:9-14; Mat. 25:34-40, 46) Bọ etẹwẹ dogbọn mẹyiamisisadode nugbonọ lẹ dali? Yewlẹ ma do hudo nado mọ ohia dopolọ yí taidi mẹhe na lùn Amagẹdọni tọ́n lẹ. Kakatimọ, yé na mọ hiadogonamẹ godo tọn yetọn yí vlavo jẹnukọnna okú yetọn kavi jẹnukọnna bẹjẹeji nukunbibia daho lọ tọn. Enẹgodo, to ojlẹ de mẹ whẹpo awhàn Amagẹdọni tọn nado bẹjẹeji, mẹhe pò to aigba ji to yé mẹ lẹ na yin zize yì olọn mẹ.—Osọ. 7:1-3.

19. Mẹnu lẹ wẹ na wazọ́n to pọmẹ hẹ Jesu nado hẹn whẹdida ṣẹ do titonu ehe ji? (Pọ́n apotin lọ “Lewuwu, Hunwinwẹn, Hiadogonamẹ po Mẹhusudo po—Whetẹnu Podọ Gbọnna?”)

¹⁹ Ahọlu olọn mẹ tọn lọ, Jesu Klisti po awhànpa olọn mẹ tọn etọn lẹ po na hẹn whẹdida ṣẹ do titonu ehe ji. To numimọ Ezekiẹli tọn mẹ, dawe ṣidopo he hẹn adánwanu mẹhusudo tọn lọ lẹ ma bẹ vasudo lọ jẹeji kakajẹ whenue dawe he do alavọ lọ ko dotana azọ́n hiadogonamẹ tọn etọn whẹ́. (Ezek. 9:4-7) Mọdopolọ, vasudo he ja lọ na bẹjẹeji to whenue Jesu na ko dawhẹna omẹ akọta lẹ tọn lẹpo bo dohiagona lẹngbọ lẹ nado luntọ́n godo. Enẹgodo, to awhàn Amagẹdọni tọn whenu, Jesu na nọ nukọnna awhànpa whẹdida-hẹnṣẹtọ olọn mẹ tọn lẹ, ehe na bẹ angẹli wiwe lẹ gọna gandutọgbẹ́ 144 000 etọn lẹpo hẹn, bọ yé na yinuwa sọta aihọn ylankan ehe bo na và ẹ sudo mlẹnmlẹn bosọ deanana sinsẹ̀n-basitọ nugbo lẹ biọ aihọn yọyọ dodowiwa tọn de mẹ.—Osọ. 16:14-16; 19:11-21.

20. Nuplọnmẹ he vọ́ jidenamẹ tẹlẹ wẹ mí mọyi sọn numimọ Ezekiẹli tọn he gando dawe he hẹn wesinzo wekantọ tọn lọ go mẹ?

²⁰ Lehe mí dopẹ́ do sọ dọ mí mọ nuplọnmẹ he vọ́ jidenamẹ lẹ yí sọn numimọ Ezekiẹli tọn he gando dawe he hẹn wesinzo wekantọ tọn lọ go mẹ! Mí sọgan kudeji mlẹnmlẹn dọ Jehovah ma na và dodonọ po mẹylankan po sudo dopọ. (Salm. 97:10) Mí yọ́n nuhe mí dona wà todin nado sọgan yin hiadogona to sọgodo taidi mẹhe na luntọ́n. Taidi sinsẹ̀n-basitọ Jehovah tọn lẹ, gbemima mítọn wẹ nado tindo mahẹ to azọ́n wẹndagbe lilá tọn lọ mẹ to gigọ́ mẹ dile e yọnbasi do podọ nado na avase mẹhe to lewu bo to hunwẹn na kanyinylan he gbayipe to aihọn Satani tọn mẹ wutu lẹ. Gbọnmọ dali, mí gán tindo lẹblanulọkẹyi lọ nado gọalọna mẹhe “tindo ninọmẹ ahun mẹ tọn he jẹna ogbẹ̀ madopodo” lẹ nado wá kọnawudopọ hẹ mí to sinsẹ̀n-bibasi wiwe-ṣeke mẹ bo ze yede do hukan ji nado yin hiadogona taidi mẹhe na luntọ́n biọ aihọn yọyọ dodowiwa tọn Jiwheyẹwhe tọn mẹ lẹ.—Owalọ 13:48.