“Yẹn Ko Yí We Do Basi Nuhọ́tọ De”

 1. Etẹwẹ yẹwhegán kavi nuhọ́tọ Jehovah tọn lẹ wà, podọ etẹlẹ wẹ wá jọ?

NUHỌ́TỌ de ṣite to adó Jelusalẹm tọn ji bo yí alọ do hẹ́ nukun dile owhè to họyì. E to nupọn tlintlin hlan olá. To ajiji mẹ, e ze opẹ̀n etọn daga bo yí agbọ́ ganji bosọ kún opẹ̀n gángán nado na avase—awhànpa Babilọni tọn to aliji ja! Ṣigba, whenu ko fẹ́ do tòmẹnu lẹkàn-lẹkàn dántọ tòdaho lọ tọn lẹ nado yinuwa sọgbe hẹ avase nuhọ́tọ lọ tọn. Na owhe susu, nuhọ́tọ kavi yẹwhegán he Jehovah de lẹ ko to avase na gando azán ehe go; ṣogan, gbẹtọ lọ lẹ ma jlo na dotoai. Todin, awhànpa Babilọni tọn ko lẹdo tòdaho lọ. To osladido lẹdo tòdaho lọ na osun susu godo, awhànfuntọ lẹ gbà adó tòdaho lọ tọn lẹ biọ e mẹ, họ́ tẹmpli lọ liai bo hù tòmẹnu mayisenọ podọ boṣiọ-sẹ̀ntọ Jelusalẹm tọn delẹ bosọ wle mẹdevo lẹ di kanlinmọ.

2, 3. (a) Ninọmẹ tẹwẹ mẹhe to aigba ji lẹ pannukọn to egbehe? (b) Kanbiọ tẹlẹ wẹ mí na gbadopọnna?

² To egbehe, awhànpa whẹdida-hẹnṣẹtọ Jehovah tọn lẹ to mizọnmizọn ji ja nado wá pé awhàn hẹ mayisenọ he to aigba ji lẹ. (Osọ. 17:12-14) Awhàn enẹ mẹ wẹ nukunbibia daho hugan he nkọ ma ko wá aimẹ pọ́n to whenuho gbẹtọvi tọn mẹ na klita do. (Mat. 24:21) Ṣigba, whenu ma ko fẹ́ nado yinuwa sọgbe hẹ avase he to yinyin nina gbọn mẹhe Jehovah ko deazọ́n nuhọ́tọ tọn na lẹ dali.

³ Etẹwẹ whàn Jehovah nado de nuhọ́tọ lẹ? Owẹ̀n nankọ wẹ nuhọ́tọ de nọ lá? Mẹnu lẹ wẹ ko hẹn azọngban ehe di, podọ adà tẹ yiwà wẹ mí te to e mẹ? Mì gbọ mí ni gbadopọnna gblọndo kanbiọ ehelẹ tọn.

 4. Naegbọn Jehovah do de nuhọ́tọ lẹ? (Pọ́n yẹdide he tin to bẹjẹeji hosọ ehe tọn.)

⁴ Hia Ezekiẹli 33:7. To paa mẹ, nuhọ́tọ lẹ nọ saba ṣite to adó tòdaho de tọn lẹ ji nado basi hihọ́na tòmẹnu etọn lẹ. Tintin to finẹ yetọn nọ yin kunnudenu jọnun de dọ gandutọ tòdaho lọ tọn nọ hò dagbemẹninọ mẹjidugando etọn lẹ tọn pọ́n. Dile etlẹ yindọ opẹ̀n kúnkún nuhọ́tọ de tọn sọgan hẹn mẹhe to amlọndọ to tòdaho lọ mẹ lẹ jọsi, nudidọ gángán enẹ dopolọ sọgan whlẹn ogbẹ̀ mẹhe yinuwa sọgbe hẹ ẹ lẹ tọn. Mọdopolọ, Jehovah de nuhọ́tọ lẹ, e ma yin nado yí owẹ̀n ylankan lẹ do dobu homẹ na Islaelivi lẹ wutu, ṣigba na e nọ hò yetọn pọ́n bosọ jlo na whlẹn ogbẹ̀ yetọn wutu.

5, 6. Etẹwẹ yin dopo to aliho he mẹ whẹdida dodo Jehovah tọn yin hinhẹn họnwun te lẹ mẹ?

⁵ Whenue Jehovah to azọ́ndena Ezekiẹli taidi nuhọ́tọ, e de jẹhẹnu etọn delẹ hia he vọ́ jide na mí taun. Mí ni dọhodo awe poun to jẹhẹnu enẹlẹ mẹ ji.

⁶ Whẹdida dodo: Whẹdida dodo Jehovah tọn họnwun to enẹ mẹ dọ e nọ yinuwa hẹ dopodopo mítọn matin mẹnukuntahihopọn. Di apajlẹ, dile etlẹ yindọ mẹsusu wẹ sè wẹndomẹ Ezekiẹli tọn bo gbẹ́ ẹ dai, Jehovah ma pọ́n do enẹ go bo yinuwa hẹ Islaelivi lẹpo to pọmẹ taidi atẹṣitọ; kakatimọ e na ayidonugo lehe mẹdopodopo yinuwa do. Whlasusu wẹ e biọ dọ avase ni yin nina “mẹylankan” kavi “dodonọ” dopodopo tlọlọ. Ehe dohia dọ whẹdida Jehovah tọn nọ sinai do lehe mẹdopodopo yinuwa sọgbe hẹ wẹndomẹ lọ do ji.—Ezek. 33:8, 18-20.

 7. Dodonu tẹ ji wẹ Jehovah nọ dawhẹna gbẹtọ lẹ te?

⁷ Whẹdida dodo Jehovah tọn sọ nọ sọawuhia to aliho he mẹ e nọ dawhẹna gbẹtọ lẹ te mẹ. Mẹdopodopo na dogbè, e ma yin na nuhe e ko wà wayi lẹ, ṣigba na lehe e yinuwa sọgbe hẹ avase he to yinyin nina to alọnu lọ do. Jehovah dọna Ezekiẹli dọ: “To whenue yẹn dọna mẹylankan dọ: ‘Hiẹ na kú dandan,’ bọ ewọ diọ sọn ylando etọn mẹ bo wà nuhe sọgbe po dodo po, . . . e họnwun dọ ewọ na nọgbẹ̀.” Enẹgodo, Jehovah yí hogbe ayidego tọn ehelẹ dogọ dọmọ: “Ylando depope he e ko wà ma na yin hihia dokọna ẹn.” (Ezek. 33:14-16) To alọ devo mẹ, mẹhe ko to aliho dodowiwa tọn ji lẹ ma gán donukun dọ tonusise he emi ko dohia dai na suwhẹna atẹṣiṣi emitọn dintọn. Jehovah dọ dọ eyin mẹde “dejido dodowiwa etọn go bo wà oylan, azọ́n dodo tọn etọn depope ma na yin finflin, ṣigba ewọ na kú na oylan he e ko wà wutu.”—Ezek. 33:13.

 8. Etẹwẹ dọdai avase tọn lẹ plọn mí gando whẹdida dodo Jehovah tọn go?

⁸ Nudevo he sọ nọ hẹn whẹdida dodo Jehovah tọn họnwun wẹ yindọ e nọ namẹ avase jẹnukọn whẹpo do yinuwa. Ezekiẹli ko bẹ azọ́n etọn jẹeji nudi owhe ṣidopo whẹpo awhànpa Babilọni tọn do và Jelusalẹm sudo. Ṣigba, e ma yin Ezekiẹli wẹ yin omẹ tintan he na avase omẹ Jiwheyẹwhe tọn lẹ dọ yé na wá dogbè nuyiwa yetọn lẹ tọn. Na owhe kanweko linlán jẹnukọnna vasudo Jelusalẹm tọn, Jehovah do yẹwhegán Hosea, Isaia, Mika, Odẹdi po Jelemia po hlan taidi nuhọ́tọ. Jehovah biọ to Jelemia si nado flinnu Islaelivi lẹ dọmọ: “Yẹn sọ de nuhọ́tọ lẹ he dọ dọ, ‘Mì dotoaina nudidọ azò lọ tọn!’” (Jel. 6:17) Mẹdepope ma gán dowhẹ Jehovah kavi nuhọ́tọ enẹlẹ to whenue Babilọninu lẹ wá hẹn whẹdida Jehovah tọn ṣẹ bọ mẹsusu hẹn ogbẹ̀ yetọn bu.

 9. Nawẹ Jehovah do owanyi nugbo etọn hia gbọn?

⁹ Owanyi: Jehovah do owanyi nugbo hia to enẹ mẹ dọ e do nuhọ́tọ etọn lẹ hlan, e ma yin nado na avase dodonọ lẹ kẹdẹ, ṣigba mẹylankan lẹ ga—yèdọ yé mẹhe hẹn homẹgble e bosọ kọnmasin do oyín etọn go lẹ. Pọ́n bo—Islaelivi lẹ yin yinyọnẹn taidi omẹ Jehovah tọn lẹ, amọ́ whlasusu wẹ yé dogodo e bo lẹhlan yẹwhe lalo lẹ! Jehovah do obá he mẹ nugbonọ-mayin ehe vẹna ẹn jẹ hia gbọn akọta lọ yiyijlẹdo yọnnu ayọdetọ de go dali. (Ezek. 16:32) Mahopọnna enẹ, Jehovah ma gbẹ́ yé dai to afọdopolọji. E tẹnpọn nado dọwhẹgbọ hẹ yé kakati nado yiahọsu to yé go. Whenue e glo pete wẹ e wá dọ̀n ohí whẹdida tọn sún taidi afọdide godo tọn, e ma yin afọdide tintan. Etẹwutu? E dọna Ezekiẹli dọmọ: “Yẹn ma nọ mọ awuvivi depope to okú mẹylankan tọn mẹ, kakatimọ yẹn jlo dọ mẹylankan ni diọ sọn aliho etọn ji bo nọgbẹ̀.” (Ezek. 33:11) Numọtolanmẹ he Jehovah tindo to whenẹnu niyẹn, podọ numọtolanmẹ dopolọ wẹ e gbẹ́ tindo to egbé.—Mal. 3:6.

10, 11. Etẹlẹ wẹ mí sọgan plọn sọn aliho he mẹ Jehovah yinuwa hẹ omẹ etọn lẹ te mẹ?

¹⁰ Etẹwẹ whẹdida dodo po owanyi he Jehovah yí do yinuwa hẹ Islaelivi lẹ po sọgan plọn mí? Nuplọnmẹ dopo wẹ yindọ mí ma dona nọ pọ́n mẹhe mí nọ dọyẹwheho na lẹ hlan taidi gbẹtọgun de poun, ṣigba mí dona nọ na ayidonugo dopodopo yetọn. Nuṣiwa daho wẹ e na yin nado dawhẹna mẹde to ayiha mítọn mẹ dọ e ma jẹ nado sè owẹ̀n mítọn na ogbẹ̀ he e ko zan wayi wutu, kavi na akọ̀, aṣa, ogbè kavi ninọmẹ akuẹzinzan tọn etọn wutu! Jehovah plọn onú titengbe de apọsteli Pita, ehe gbẹ́ yọ́n-na-yizan na mí to egbehe: “Jiwheyẹwhe ma yin mẹnukuntahopọntọ gba, ṣigba to akọta lẹpo mẹ, mẹhe nọ dibusi i bo nọ wà dodo wẹ e nọ kẹalọyi.”—Owalọ 10:34, 35.

¹¹ Nuplọnmẹ titengbe devo wẹ yindọ mí dona ṣọ́ míde taun; azọ́n dodo tọn he mí ko wà wayi lẹ ma na suwhẹna ylanwiwa mítọn dintọn lẹ. Mí na wà dagbe nado nọ flindọ ayilinlẹn ylankan dopolọ he mẹhe mí nọ dọyẹwheho na lẹ tindo wẹ mílọsu tindo. Ayinamẹ he apọsteli Paulu na agun Kọlinti tọn, gando mílọsu go: “Mì gbọ mẹhe lẹndọ emi to ote ni payi, na e nikaa jai. Whlepọn depope ma ko wá mì ji adavo dehe to paa mẹ na gbẹtọ lẹ.” (1 Kọl. 10:12, 13) Mí ma na jlo gbede nado lẹzun mẹhe nọ “dejido dodowiwa etọn go,” bo nọ lẹndọ mí gán wà nuylankan bọ nude ma na jọ, na mí sọ to nudagbe susu wà wutu. (Ezek. 33:13) Mahopọnna lehe mí ko to Jehovah sẹ̀n dẹnsọ, dandannu wẹ e yin dọ mí ni hẹn pọndohlan whiwhẹ po tonusise po tọn go.

12. Eyin mí ko waylando sinsinyẹn delẹ wayi, etẹwẹ mí dona nọ flin?

¹² Amọ́, etẹwẹ lo eyin mí ko waylando sinsinyẹn lẹ wayi bo wá to whẹgbledo míde todin? Sọn wẹndomẹ Ezekiẹli tọn mẹ, mí plọn dọ Jehovah na sayana ylanwatọ he ma lẹnvọjọ lẹ. Ṣigba, mí sọ plọn dọ Jiwheyẹwhe owanyinọ wẹ Jehovah yin jẹnukọn, e ma yin ahọsuyitọ. (1 Joh. 4:8) Eyin mí dohia to nuyiwa mítọn lẹ mẹ dọ mí ko lẹnvọjọ, mí ma dona lẹn gbede dọ ylando mítọn lẹ ko zẹ̀ dogbó lẹblanu Jiwheyẹwhe tọn go. (Jak. 5:14, 15) Kẹdẹdile Jehovah wleawufo nado jona Islaelivi he deayọ to gbigbọ-liho lẹ do, mọ wẹ e wleawufo nado jona mílọsu do.—Salm. 86:5.

13, 14. (a) Owẹ̀n nankọ wẹ nuhọ́tọ lẹ nọ lá? (b) Owẹ̀n tẹwẹ Isaia lá?

¹³ Hia Ezekiẹli 33:2, 3. Owẹ̀n nankọ wẹ nuhọ́tọ Jehovah tọn lẹ dona lá? Adà tangan azọ́n yetọn tọn dopo wẹ nado na avase. Ṣigba, yé sọ nọ lá wẹndagbe lẹ ga. Apajlẹ delẹ die.

¹⁴ Isaia, he wadevizọn sọn nudi owhe 778 jẹ 732 J.W.M., na avase dọ Babilọninu lẹ na gbawhàn Jelusalẹm tọn bo bẹ tòmẹnu etọn lẹ yì kanlinmọgbenu. (Isa. 39:5-7) Ṣigba, e sọ yin gbigbọdo nado wlan dọmọ: “Dotoai! Nuhọ́tọ towe lẹ ze ogbè yetọn daga. Yé yí ayajẹ do dawhá to pọmẹ, na whenue Jehovah na hẹn omẹ Ziọni tọn lẹ gọwá, yewlẹ na mọ ẹn hezeheze.” (Isa. 52:8) Owẹ̀n dagbe hugan lọ wẹ Isaia lá—sinsẹ̀n-bibasi nugbo na yin hinhẹngọwa!

15. Owẹ̀n tẹwẹ Jelemia lá?

¹⁵ Jelemia, he wadevizọn sọn owhe 647 jẹ 580 J.W.M., nọ saba yin alọdlẹndo gbọn nuṣiwa dali taidi “nugbajẹmẹji látọ.” Ayihaawe ma tin dọ e wazọ́n ayidego tọn de nado na avase Islaelivi kanylantọ lẹ gando nugbajẹmẹji he Jehovah na hẹnwa yé ji go.a Amọ́, e sọ lá wẹndagbe ga bo dọ dọdai dọ omẹ Jiwheyẹwhe tọn lẹ na lẹkọwa aigba yetọn ji bọ sinsẹ̀n-bibasi wiwe-ṣeke na yin hinhẹngọwa to finẹ.—Jel. 29:10-14; 33:10, 11.

16. Nawẹ kanlinmọ he to Babilọni lẹ mọaleyi sọn wẹndomẹ Ezekiẹli tọn mẹ gbọn?

¹⁶ Ezekiẹli yin dide taidi nuhọ́tọ to 613 J.W.M., e sọ zindonukọn to azọ́ndenamẹ ehe mẹ e whè gbau kakajẹ 591 J.W.M. Dile Weta 5tọ po 6tọ owe ehe tọn po dọhodeji do, Ezekiẹli yí zohunhun do na avase omẹ Islaeli tọn lẹ gando vasudo he na wá yé ji lọ go, bo gbọnmọ dali wé sọn ohùn mẹhe wá hẹn ogbẹ̀ yetọn bu lẹ tọn mẹ. Gbọnvona dọ e na avase kanlinmọ lọ lẹ dọ Jehovah na sayana atẹṣitọ he to Jelusalẹm lẹ, e sọ gọalọna kanlinmọ he to Babilọni lẹ nado gbọṣi nukle to gbigbọ-liho bo wleawudaina azọ́n he to tepọn yé. To vivọnu kanlinmọgbenu-ninọ owhe 70 tọn lọ tọn, Jehovah na hẹn pipotọ de lẹkọwa aigba Islaeli tọn he yin hinhẹngọwa lọ ji. (Ezek. 36:7-11) Na taun tọn, pipotọ ehe na bẹ ovi po ovivi mẹhe dotoaina Ezekiẹli lẹ tọn po hẹn. Dile weta devo he tin to Adà 3tọ owe ehe tọn mẹ lẹ zinnudeji do, wẹndagbe susu wẹ Ezekiẹli lá nado vọ́ jidenamẹ dọ sinsẹ̀n-bibasi wiwe-ṣeke na yin hinhẹngọwa to Jelusalẹm.

17. Whetẹnu wẹ Jehovah nọ de nuhọ́tọ lẹ?

¹⁷ Be yẹwhegán he dọhona omẹ Jiwheyẹwhe tọn lẹ to vasudo Jelusalẹm tọn whenu to 607 J.W.M. lẹ kẹdẹ wẹ Jehovah ko yizan taidi nuhọ́tọ ya? Lala wẹ yin gblọndo lọ. To nujijọ ayidego tọn he gando hẹndi lẹndai etọn tọn go lẹpo whenu wẹ Jehovah nọ de nuhọ́tọ lẹ nado na avase mẹylankan lẹ bosọ lá wẹndagbe delẹ.

18. Azọ́n tẹwẹ Johanu Baptizitọ wà?

¹⁸ To owhe kanweko tintan W.M., Johanu Baptizitọ wazọ́n nuhọ́tọ tọn. E na avase mẹhe tin to whédo Islaeli agbasalan tọn mẹ lẹ dọ yé na yin gbigbẹdai to madẹnmẹ. (Mat. 3:1, 2, 9-11) Ṣigba, e sọ wà nususu humọ. Jesu dọ dọ Johanu wẹ “wẹnsagun” he dọdai etọn yin didọ lọ, yèdọ mẹhe jla aliho do na Mẹsia lọ. (Mal. 3:1; Mat. 11:7-10) Apadewhe azọ́n enẹ tọn bẹ wẹndagbe delẹ lilá hẹn—di apajlẹ wẹndagbe lọ dọ Jesu, yèdọ “Lẹngbọvu Jiwheyẹwhe tọn lọ,” ko wá nado “ze ylando aihọn tọn yì.”—Joh. 1:29, 30.

19, 20. Nawẹ Jesu po devi etọn lẹ po wazọ́n nuhọ́tọ tọn gbọn?

¹⁹ To mẹhe wazọ́n nuhọ́tọ tọn lẹpo mẹ, Jesu wẹ yin tọ́ntlọ́ngbọ́n. Taidi Ezekiẹli, Jehovah do e hlan “owhé Islaeli tọn” dè. (Ezek. 3:17; Mat. 15:24) Jesu na avase dọ akọta Islaeli agbasalan tọn na yin gbigbẹdai to ojlẹ kleun de godo bọ Jelusalẹm na yin vivasudo. (Mat. 23:37, 38; 24:1, 2; Luku 21:20-24) Ṣigba, azọ́n etọn tintan wẹ nado lá wẹndagbe.—Luku 4:17-21.

²⁰ Whenue Jesu to aigba ji, e dọna devi etọn lẹ tlọlọ dọmọ: “Mì gbọṣi nukle.” (Mat. 24:42) Yé setonuna gbedide etọn bo yinuwa di nuhọ́tọ bosọ na avase dọ Jehovah ko gbẹ́ whédo Islaeli agbasalan tọn po tòdaho Jelusalẹm aigba ji tọn po dai. (Lom. 9:6-8; Gal. 4:25, 26) Kẹdẹdi nuhọ́tọ he jẹnukọnna yé lẹ, yelọsu sọ tindo wẹndagbe lẹ nado lá. Owẹ̀n yetọn bẹ nulila ayidego tọn lọ hẹn dọ bẹsọn din, Kosi lẹ sọgan yin apadewhe Islaeli Jiwheyẹwhe tọn he yin dide gbọn gbigbọ dali lọ tọn, bo tindo lẹblanulọkẹyi nado gọalọna Klisti to sinsẹ̀n-bibasi wiwe-ṣeke hinhẹngọwa aigba ji mẹ.—Owalọ 15:14; Gal. 6:15, 16; Osọ. 5:9, 10.

21. Apajlẹ tẹwẹ Paulu zedai?

²¹ To nuhọ́tọ owhe kanweko tintan whenu tọn lẹ mẹ, apajlẹ apọsteli Paulu tọn jẹna ayidego taun. E ylọ azọngban etọn dọ nujọnu. Taidi Ezekiẹli, e yọnẹn dọ emi na duhùnhọ eyin emi gboawupo nado hẹn azọ́ndenamẹ emitọn di. (Owalọ 20:26, 27) To apajlẹ nuhọ́tọ he jẹnukọn lẹ tọn hihodo mẹ, Paulu ma na avase mẹlẹ poun gba, e sọ lá wẹndagbe na yé ga. (Owalọ 15:35; Lom. 1:1-4) Na nugbo tọn, to anademẹ gbigbọ wiwe tọn glọ, e yihodọ sọn dọdai he Isaia kandai mẹ dọmọ: “Lehe afọ mẹhe hẹn wẹndagbe ja tọn lẹ yọnwhanpẹ to osó lẹ ji do sọ,” bo dohia dọ e tindo kanṣiṣa hẹ azọ́n he hodotọ Klisti tọn lẹ nọ wà dile yé to yẹwhehodọ gando Ahọluduta Jiwheyẹwhe tọn go.—Isa. 52:7, 8; Lom. 10:13-15.

22. Etẹwẹ jọ to okú apọsteli lẹ tọn godo?

²² To okú apọsteli lẹ tọn godo, atẹṣiṣi he dọdai etọn yin didọ lọ bẹpla agun Klistiani tọn. (Owalọ 20:29, 30; 2 Tẹs. 2:3-8) Na ojlẹ dindẹn, Klistiani oklọ tọn he taidi ogbé ylankan lẹ sù hú hodotọ nugbo Klisti tọn he taidi likun lẹ bọ nuplọnmẹ lalo lẹ ṣinyọnyẹ owẹ̀n he họnwun gando Ahọluduta Jiwheyẹwhe tọn go lọ ji. (Mat. 13:36-43) Ṣigba, whenue ojlẹ he mẹ Jehovah na dádo whẹho gbẹtọvi lẹ tọn mẹ jẹ sisẹpọ ji, ewọ sọ vọ́ do owanyi po whẹdida dodo etọn po hia gbọn nuhọ́tọ lẹ dide dali nado na avase to aliho he họnwun mẹ bo lá wẹndagbe delẹ. Mẹnu lẹ wẹ do yede hia nado yin nuhọ́tọ ehelẹ?

23. Adà tẹwẹ C. T. Russell po gbẹdohẹmẹtọ etọn lẹ po yiwà?

²³ To owhe he jẹnukọnna 1914 lẹ gblamẹ, Charles Taze Russell po gbẹdohẹmẹtọ etọn lẹ po yinuwa taidi “wẹnsagun” he na “jla aliho . . . do” lọ whẹpo Ahọluduta Mẹsia tọn do yin didoai.b (Mal. 3:1) Pipli enẹ sọ wazọ́n nuhọ́tọ tọn bo yí linlinwe lọ Le Phare de la Tour de Sion et Messager de la Présence de Christ zan nado na avase gando whẹdida Jiwheyẹwhe tọn go bo lá wẹndagbe Ahọluduta Jiwheyẹwhe tọn.

24. (a) Nawẹ afanumẹ nugbonọ lọ wazọ́n nuhọ́tọ tọn gbọn? (b) Etẹwẹ a plọn sọn apajlẹ nuhọ́tọ hoho lẹ tọn mẹ? (Pọ́n apotin lọ “Nuhọ́tọ Apajlẹ Dagbenọ Delẹ.”)

²⁴ To whenue Ahọluduta lọ ko yin didoai godo, Jesu de sunnu sọha kleun de nado nọ wadevizọn to pọmẹ taidi afanumẹ nugbonọ lọ. (Mat. 24:45-47) Sọn whenẹnu, afanumẹ nugbonọ lọ he yin yinyọnẹn todin taidi Hagbẹ Anademẹtọ lọ ko to azọ́n nuhọ́tọ tọn wà. E nọ yin nukọntọ, e ma yin nado na avase gando “azán ahọsuyi” tọn lọ go kẹdẹ gba, ṣigba nado lá “owhe ojlo dagbe Jehovah tọn” ga.—Isa. 61:2; sọ pọ́n 2 Kọlintinu lẹ 6:1, 2.

25, 26. (a) Azọ́n tẹwẹ hodotọ Klisti tọn lẹpo dona nọ wà, podọ nawẹ e nọ yin wiwà gbọn? (b) Etẹwẹ mí na gbadopọnna to weta he bọdego mẹ?

²⁵ Dile etlẹ yindọ afanumẹ nugbonọ lọ wẹ nọ yin nukọntọ to azọ́n nuhọ́tọ tọn lọ wiwà mẹ, Jesu deazọ́nna hodotọ etọn ‘lẹpo’ nado “gbọṣi nukle.” (Malku 13:33-37) Mí nọ setonuna gbedide enẹ gbọn nukleninọ to gbigbọ-liho po godoninọna nuhọ́tọ egbezangbe tọn lọ mlẹnmlẹn po dali. Mí nọ dohia dọ mí to nukle gbọn azọngban mítọn nado dọyẹwheho hinhẹndi dali. (2 Tim. 4:2) Etẹwẹ nọ whàn mí nado wàmọ? Onú dopo wẹ ojlo mítọn nado whlẹn ogbẹ̀ gán. (1 Tim. 4:16) To madẹnmẹ, mẹsusu na hẹn ogbẹ̀ yetọn bu na yé gbẹkọ avase nuhọ́tọ egbezangbe tọn lọ tọn go wutu. (Ezek. 3:19) Amọ́, mẹwhinwhàn mítọn tintan wẹ yindọ homẹ mítọn nọ hùn nado lá owẹ̀n dagbe hugan lọ—yèdọ owẹ̀n lọ dọ sinsẹ̀n-bibasi wiwe-ṣeke ko yin hinhẹngọwa! Todin whẹ́, dile “owhe ojlo dagbe Jehovah tọn” gbẹ́ to nukọnzindo, dotẹnmẹ gbẹ́ hundote na mẹsusu dogọ nado wá kọnawudopọ hẹ mí to Jiwheyẹwhe dodonọ podọ owanyinọ mítọn Jehovah sinsẹ̀n mẹ. To madẹnmẹ din, mẹhe lùn opodo titonu ylankan ehe tọn tọ́n to aigba ji lẹpo na mọaleyi sọn gandudu Visunnu etọn Jesu Klisti tọn he sinai do lẹblanu ji mẹ. Nawẹ mí gán blá alọ dogo bo nọma gọalọna nuhọ́tọ egbezangbe tọn lọ nado lá wẹndagbe mọnkọtọn gbọn!—Mat. 24:14.

²⁶ Etlẹ yin jẹnukọnna opodo titonu ylankan ehe tọn, Jehovah ko kọ̀n omẹ etọn lẹ dopọ to aliho he jiawu de mẹ. To weta he bọdego mẹ, mí na gbadopọnna dọdai de he dọhodo owhlẹ awe delẹ ji he yin yiyizan nado do lehe enẹ jọ gbọn hia.