“Yẹn Na Diọnukunsọ We, Hiẹ Gọgi E”

1, 2. Awhàn daho tẹwẹ to yakẹ, podọ kanbiọ tẹlẹ wẹ fọndote gandego? (Pọ́n yẹdide he tin to bẹjẹeji hosọ ehe tọn.)

NA OWHE fọtọ́n susu, aigba ko yin hinhẹnflu gbọn ohùn he awhàn gbẹtọvi tọn sọndai lẹ dali, ehe bẹ hùnsọndai he wá aimẹ to wẹkẹ-whàn awe owhe kanweko 20tọ whenu tọn lẹ hẹn. Amọ́, awhàn daho hugan whenuho gbẹtọvi tọn ko to yakẹ. Ṣigba, awhàn ehe ma na yin gbẹtọvi lẹ kẹdẹ tọn, yèdọ taidi nudindọn de to akọta aigba ji tọn lẹ ṣẹnṣẹn, na whẹwhinwhẹ́n ṣejannabi tọn lẹ poun wutu. Kakatimọ, awhàn he ja ehe na yin “awhàn azán daho Jiwheyẹwhe Ganhunupotọ lọ tọn.” (Osọ. 16:14) Nado fọ́n awhàn ehe dote, kẹntọ goyitọ de na tọ́nawhàn aigba de he họakuẹ na Jiwheyẹwhe; ehe na zọ́n bọ Oklunọ Nupojipetọ Jehovah na do huhlọn daho hugan mẹhusudo tọn etọn hia to aigba ji.

² Enẹwutu, kanbiọ titengbe delẹ fọndote: Mẹnu wẹ yin kẹntọ ehe? Aigba tẹwẹ e na tọ́nawhàn? Whetẹnu, etẹwutu, podọ nawẹ e na tọ́nawhàn aigba lọ gbọn? Na nujijọ sọgodo tọn ehelẹ gando sinsẹ̀n-basitọ nugbo Jehovah tọn he to aigba ji lẹ go wutu, mí dona yọ́n gblọndo kanbiọ lọ lẹ tọn. Mí gán mọ gblọndo lọ lẹ to dọdai ojlofọndotenamẹ tọn he yin kinkandai to Ezekiẹli weta 38 po 39 po mẹ.

 3. Basi zẹẹmẹ nuagokun he dọdai Ezekiẹli tọn bẹhẹn gando Gọgi Magọgi tọn go lẹ tọn.

³ Hia Ezekiẹli 38:1, 2, 8, 18; 39:4, 11. Nuagokun dọdai lọ tọn lẹ die: “To azán godo tọn lẹ mẹ,” kẹntọ de he yin yiylọdọ “Gọgi . . . Magọgi tọn” tọ́nawhàn “aigba” omẹ Jiwheyẹwhe tọn lẹ tọn. Ṣigba, mẹgbeyinyan kanyinylan tọn ehe fọ́n “adi sinsinyẹn” Jehovah tọn dote, bọ Jehovah dademẹ bo gbawhàn Gọgi tọn.a Jehovah sọ yí kẹntọ he ewọ gbawhàn etọn lọ po mẹhe tin to e dè lẹpo po “do basi núdùdù na ohẹ̀ nuwledutọ wunmẹ lẹpo po gbekanlin . . . lẹ po.” Enẹgodo, Jehovah na Gọgi “ṣiọditẹn de.” Nado yọ́n lehe dọdai ehe na mọ hẹndi to madẹnmẹ do, mí dona yọ́n mẹhe Gọgi yin whẹ́.

 4. Tadona tẹ kọ̀n wẹ mí sọgan wá gando Gọgi Magọgi tọn go?

⁴ Enẹwutu, mẹnu wẹ Gọgi Magọgi tọn yin? Sọgbe hẹ zẹẹmẹ Ezekiẹli tọn, mí sọgan wá tadona kọ̀n dọ Gọgi yin kẹntọ sinsẹ̀n-basitọ nugbo lẹ tọn de. Be yinkọ dọdai tọn de wẹ Gọgi yin na Satani—yèdọ kẹntọ daho hugan sinsẹ̀n-bibasi nugbo tọn ya? Na owhe susu, nuhe owe mítọn lẹ ko dọ niyẹn. Amọ́, dogbigbapọnna dọdai Ezekiẹli tọn yinukọn dogọ zọ́n bọ mí dona vọ́ nukunnumọjẹnumẹ mítọn jlado. Atọ̀họ̀-Nuhihọ́ lọ Tọn dohia dọ tẹnmẹ-yinkọ lọ Gọgi Magọgi tọn ma dlẹnalọdo nudida gbigbọnọ mayinukundomọ de, ṣigba kẹntọ gbẹtọvi yinukundomọ de—yèdọ pipli akọta lẹ tọn de he na funawhàn sọta sinsẹ̀n-bibasi wiwe-ṣeke.b Whẹpo mí nado dọhodo whẹwhinwhẹ́n he wutu mí do dọ mọ ji, mì gbọ mí ni gbadopọnna nudọnamẹ awe delẹ to dọdai Ezekiẹli tọn mẹ he dohia dọ Gọgi ma yin nudida gbigbọnọ de.

5, 6. Nudọnamẹ tẹwẹ dohia to dọdai Ezekiẹli tọn mẹ dọ Gọgi Magọgi tọn ma yin nudida gbigbọnọ de?

⁵ “Yẹn na yí we do basi núdùdù na ohẹ̀ nuwledutọ wunmẹ lẹpo.” (Ezek. 39:4) Owe-wiwe lẹ nọ saba yí linlẹn lọ dọ ohẹ̀ nuwledutọ lẹ to oṣiọ de tlẹndu zan taidi avase de na whẹdida Jiwheyẹwhe tọn. Jiwheyẹwhe na avase mọnkọ lẹ akọta Islaeli tọn po mẹhe ma yin Islaelivi lẹ po. (Deut. 28:26; Jel. 7:33; Ezek. 29:3, 5) Ṣigba, doayi e go dọ avase Jiwheyẹwhe tọn enẹlẹ ma yin nina nudida gbigbọnọ lẹ, kakatimọ gbẹtọvi agbasalannọ lẹ. Humọ, agbasalan wẹ ohẹ̀ nuwledutọ lẹ po gbekanlin lẹ po nọ dù, e ma yin gbigbọ. Enẹwutu, avase Jiwheyẹwhe tọn he to dọdai Ezekiẹli tọn mẹ dohia dọ Gọgi ma yin nudida gbigbọnọ de.

⁶ “Yẹn na na ṣiọditẹn de Gọgi to Islaeli.” (Ezek. 39:11) Owe-wiwe lẹ ma dọ dọ nudida gbigbọnọ lẹ na yin dìdì do aigba ji. Kakatimọ, Satani po aovi etọn lẹ po na yin zizedo odò mapote mẹ na owhe 1 000, podọ yé na wá yin dindlan do agbàdo miyọ́n tọn yẹhiadonu tọn de mẹ, ehe zẹẹmẹdo vasudo madopodo yetọn. (Luku 8:31; Osọ. 20:1-3, 10) To whenuena e yindọ Gọgi yin nùdego taidi mẹhe yè na na “ṣiọditẹn de” to aigba ji, mí sọgan wá tadona lọ kọ̀n dọ ewọ ma yin nudida gbigbọnọ de.

7, 8. Whetẹnu wẹ “ahọlu agewaji tọn” lọ na hẹn opodo ede tọn wá, podọ nawẹ ehe sọgbe pẹpẹ hẹ nuhe na jọ do Gọgi Magọgi tọn go gbọn?

⁷ Eyin Gọgi ma yin nudida gbigbọnọ de, mẹnu kavi etẹwẹ yin Gọgi, yèdọ kẹntọ he na fọ́n mẹgbeyinyan godo tọn dote sọta sinsẹ̀n-basitọ nugbo lẹ? Mì gbọ mí ni gbadopọnna dọdai Biblu tọn awe he gọalọna mí nado yọ́n mẹhe Gọgi Magọgi tọn yin.

⁸ “Ahọlu agewaji tọn.” (Hia Daniẹli 11:40-45.) Daniẹli dọ dọdai huhlọn aihọn tọn he na dugán sọn ojlẹ etọn mẹ kakajẹ azán mítọn gbè lẹ tọn. Dọdai lọ sọ donù huhlọn tonudidọ tọn delẹ go he whlẹnagbà hẹ yede taidi kẹntọ—yèdọ “ahọlu hùwaji tọn” po “ahọlu agewaji tọn” po—podọ dopodopo yetọn nọ to didiọ to owhe kanweko lẹ gblamẹ dile akọta aigba ji tọn voovo lẹ nọ hoavùn nado dugán. Gando avùnhiho godo tọn ahọlu agewaji tọn to “ojlẹ opodo tọn mẹ” go, Daniẹli dọmọ: “E na tọ́nyi po homẹgble daho de po nado husudo podọ nado và mẹsusu sudo mlẹnmlẹn.” Sinsẹ̀n-basitọ Jehovah tọn lẹ dín wẹ ahọlu agewaji tọn lọ te taun.c Ṣigba taidi Gọgi Magọgi tọn, ahọlu agewaji tọn “hẹn opodo ede tọn” wá to whenue mẹgbeyinyan etọn sọta omẹ Jiwheyẹwhe tọn lẹ ma pà ẹ godo.

 9. Kanṣiṣa tẹwẹ tin to nuhe na jọ do Gọgi Magọgi tọn po nuhe na jọ do “ahọlu aigba fininọ lẹpo tọn lẹ” po go ṣẹnṣẹn?

⁹ “Ahọlu aigba fininọ lẹpo tọn lẹ.” (Hia Osọhia 16:14, 16; 17:14; 19:19, 20) Owe Osọhia tọn dọ dọdai dọ “ahọlu aigba ji tọn lẹ” na yangbé “Ahọlu ahọlu lẹ tọn,” yèdọ Jesu he to olọn mẹ tọn. Ṣigba na yé ma penugo nado yì olọn mẹ wutu, atẹṣitọ lọ lẹ yangbé mẹhe nọ nọgodona Ahọluduta lọ to aigba ji lẹ tọn. Enẹgodo, ahọlu aigba ji tọn lọ lẹ na ṣíawhàn to Amagẹdọni. Doayi e go dọ yé hẹn opodo wá yede ji to whenue yé yangbé omẹ Jehovah tọn lẹ tọn. Onú mọnkọ pẹẹ wẹ yin didọ gando Gọgi Magọgi tọn go.d

10. Tadona tẹ kọ̀n wẹ mí gán wá gando mẹhe Gọgi Magọgi tọn yin go?

¹⁰ Po nuhe mí ko dọ wayi lẹ po, tadona tẹ kọ̀n wẹ mí gán wá gando mẹhe Gọgi yin go? Tintan, Gọgi ma yin nudida gbigbọnọ de. Awetọ, Gọgi nọtena akọta aigba ji tọn lẹ he na yangbé omẹ Jiwheyẹwhe tọn lẹ tọn to madẹnmẹ. Ayihaawe ma tin dọ akọta enẹlẹ na basi gbekọndopọ de, enẹ wẹ yindọ yé na wanu dopọ to aliho de mẹ. Etẹwutu? To whenuena e yindọ omẹ Jiwheyẹwhe tọn lẹ to otò voovo mẹ lẹdo aihọn pé, akọta enẹlẹ dona bẹ yede pli po gbemima lọ po nado yangbé yetọn. (Mat. 24:9) E họnwun dọ Satani wẹ na nọgodona mẹgbeyinyan enẹ. Sọn whenu dindẹn die wẹ e ko nọ sisẹ́ akọta aihọn tọn lẹ nado diọnukunsọ sinsẹ̀n-bibasi nugbo. (1 Joh. 5:19; Osọ. 12:17) Amọ́, dọdai Ezekiẹli tọn gando Gọgi Magọgi tọn go dọ̀n ayidonugo wá adà he ahọlu aigba ji tọn lẹ he na yangbé omẹ Jehovah tọn lẹ tọn na yiwà ji.e

11. Zẹẹmẹ tẹwẹ dọdai Ezekiẹli tọn basi gando “aigba” he Gọgi na tọ́nawhàn lọ go?

¹¹ Dile mí mọ do to hukan 3tọ mẹ, Gọgi Magọgi tọn na fọ́n adi Jehovah tọn dote gbọn awhàn tintọ́n aigba he họakuẹ na Jehovah de dali. Aigba tẹwẹ? Mì gbọ mí ni lẹkọyi dọdai Ezekiẹli tọn lọ mẹ. (Hia Ezekiẹli 38:8-12.) E dọ dọ Gọgi na “tọ́nawhàn aigba he omẹ etọn lẹ yin hinhẹngọwa” bo yin ‘vivọ́ bẹpli sọn akọta lẹ mẹ’ lọ. Sọ doayi nuhe e dọ gando sinsẹ̀n-basitọ he yin hinhẹngọwa bo nọ nọ̀ aigba enẹ ji lẹ go: Yé “tin to jijọho mẹ,” bo nọ nọ̀ osla “he yè ma yí adó, dòtin kavi họngbo lẹ do basi hihọ́na lẹ mẹ”; podọ yé “to adọkunnu . . . bẹpli.” Aigba ehe ji wẹ sinsẹ̀n-basitọ nugbo Jehovah tọn lẹ tin te lẹdo aihọn pé. Nawẹ mí wagbọn do yọnẹn?

12. Hẹngọwa tẹwẹ wá aimẹ to aigba Islaeli tọn ji to ojlẹ Biblu tọn mẹ?

¹² E na yọ́n dọ mí ni gbadopọnna hẹngọwa Islaeli hohowhenu tọn, yèdọ aigba he ji mẹdide Jiwheyẹwhe tọn lẹ nọ, wazọ́n, bo basi-sinsẹ̀n te na owhe kanweko susu. To whenue Islaelivi lẹ ma yin nugbonọ ba, Jehovah dọ dọdai gbọn Ezekiẹli gblamẹ dọ aigba yetọn na yin hinhẹn jẹvọ́ bo nasọ gbọgbé. (Ezek. 33:27-29) Ṣigba, Jehovah sọ dọ dọdai dọ pipotọ yetọn he lẹnvọjọ de na wá lẹkọ sọn kanlinmọgbenu to Babilọni bo na hẹn sinsẹ̀n-bibasi wiwe-ṣeke gọwá aigba lọ ji. Dona Jehovah tọn na zọ́n bọ aigba Islaeli tọn na diọ bo na de sinsẹ́n tọ́n “taidi jipa Edẹni tọn.” (Ezek. 36:34-36) Hẹngọwa ehe wá aimẹ bẹsọn 537 J.W.M. whenue kanlinmọ Juvi lẹ lẹkọwa Jelusalẹm nado hẹn sinsẹ̀n-bibasi nugbo gọwá aigba yiwanna yetọn ji.

13, 14. (a) Etẹwẹ aigba gbigbọmẹ tọn lọ yin? (b) Naegbọn aigba ehe do họakuẹ na Jehovah?

¹³ To egbezangbe, sinsẹ̀n-basitọ nugbo Jiwheyẹwhe tọn lẹ duvivi hẹngọwa mọnkọ de tọn. Dile mí mọ do to Weta 9tọ owe ehe tọn mẹ, to 1919, omẹ Jiwheyẹwhe tọn lẹ yin tuntundote sọn kanlinmọgbenu ojlẹ dindẹn tọn Babilọni Daho lọ tọn glọ. To owhe enẹ mẹ, Jehovah plan sinsẹ̀n-basitọ etọn he yin hinhẹngọwa lẹ biọ aigba gbigbọmẹ tọn de ji. Aigba enẹ wẹ paladisi gbigbọmẹ tọn lọ—yèdọ lẹdo gbigbọmẹ tọn dagbe he mẹ hihọ́ tin te, kavi agblò nuwiwa tọn he mẹ mí nọ sẹ̀n Jiwheyẹwhe nugbo lọ te. To aigba enẹ ji, mí nọ nọpọ́ to hihọ́ mẹ bo nọ tindo jijọho to ayiha mẹ podọ to ahun mẹ. (Howh. 1:33) Mí nọ mọ núdùdù gbigbọmẹ tọn susugege yí bo tindo azọ́n pekọhẹnwanamẹ tọn susu nado wà to Ahọluduta Jiwheyẹwhe tọn lilá mẹ. Mí ko mọdọ nugbo wẹ nuhe owe howhinwhẹn tọn dọ dọmọ: “Dona Jehovah tọn wẹ nọ hẹnmẹ wàdọkun, Ewọ masọ nọ yí awufiẹsa depope dogọ ẹ.” (Howh. 10:22) Mahopọnna fidepope he mí nọ nọ̀ to aihọn mẹ, aigba enẹ ji wẹ mí te—yèdọ paladisi gbigbọmẹ tọn—dile e na dẹnsọ bọ mí yí zohunhun do to godonọna sinsẹ̀n-bibasi wiwe-ṣeke to ohó po walọ po mẹ.

¹⁴ Aigba gbigbọmẹ tọn ehe họakuẹ na Jehovah. Etẹwutu? To nukun etọn mẹ, mẹhe to aigba lọ ji lẹ yin “nuhọakuẹ akọta lẹpo tọn,” enẹ wẹ dopodopo mẹhe ewọ dọ̀n wá sinsẹ̀n-bibasi wiwe-ṣeke mẹ lẹ tọn. (Hag. 2:7; Joh. 6:44) Yé nọ dovivẹnu vẹkuvẹku nado ze gbẹtọ-yinyin yọyọ lọ do, yèdọ dehe nọ do jẹhẹnu yiaga Jiwheyẹwhe tọn lẹ hia. (Efe. 4:23, 24; 5:1, 2) Sinsẹ̀n-basitọ nugbo ehelẹ nọ ze yede jo pete to sinsẹ̀nzọn etọn mẹ, podọ to aliho he nọ pagigona ẹn bosọ do owanyi he yé tindo na ẹn hia lẹ mẹ. (Lom. 12:1, 2; 1 Joh. 5:3) Yí nukun homẹ tọn do pọ́n lehe homẹ Jehovah tọn nọ hùn do dile e to mimọ bọ sinsẹ̀n-basitọ etọn lẹ to nuhe go yé pé lẹpo wà nado hẹn aigba gbigbọmẹ tọn ehe yọnwhanpẹ dogọ. Lẹnnupọndo ehe ji: Eyin a ze sinsẹ̀n-bibasi wiwe-ṣeke do otẹn tintan mẹ to gbẹzan towe mẹ, e ma yin whanpẹ yidogọna paladisi gbigbọmẹ tọn lọ wẹ a te poun, a sọ to homẹ Jehovah tọn hẹn hùn!—Howh. 27:11.

15, 16. Whetẹnu wẹ Gọgi Magọgi tọn na tọ́nawhàn aigba gbigbọmẹ tọn mítọn?

¹⁵ E blawu nado mọdọ to madẹnmẹ pipli akọta aigba ji tọn lẹ tọn de na tọ́nawhàn aigba gbigbọmẹ tọn mítọn he họakuẹ. Na mẹgbeyinyan he ko yin didọdai ehe na gando míwu sinsẹ̀n-basitọ nugbo Jehovah tọn lẹ go wutu, mí jlo na yọ́n nususu gandego. Lẹnnupọndo kanbiọ atọ̀n he fọndote ehelẹ ji.

¹⁶ Whetẹnu wẹ Gọgi Magọgi tọn na tọ́nawhàn aigba gbigbọmẹ tọn he yin hinhẹngọwa lọ? Dọdai lọ dọ dọ Gọgi na yangbé omẹ Jiwheyẹwhe tọn lẹ tọn “to azán godo tọn lẹ mẹ.” (Ezek. 38:16) Ehe dohia dọ mẹgbeyinyan lọ na wá aimẹ to ojlẹ he sẹpọ vivọnu titonu ehe tọn de mẹ. Flindọ nukunbibia daho lọ na bẹjẹeji po vasudo Babilọni Daho lọ tọn po, yèdọ sinsẹ̀n lalo lẹpo to pọmẹ. To whenue sinsẹ̀n lalo lẹpo na ko yin vivasudo godo podọ jẹnukọnna bẹjẹeji Amagẹdọni tọn, Gọgi na fọ́n mẹgbeyinyan godo tọn egblemaku tọn de dote sọta sinsẹ̀n-basitọ nugbo lẹ.

17, 18. Nawẹ Jehovah na deanana whẹho lẹ gbọn to nukunbibia daho lọ whenu?

¹⁷ Naegbọn Gọgi na tọ́nawhàn aigba sinsẹ̀n-basitọ nugbo Jehovah tọn lẹ tọn he yin hinhẹngọwa lọ? Dọdai Ezekiẹli tọn dehia dọ whẹwhinwhẹ́n titengbe awe wutu wẹ—tintan, Jehovah na doalọ to whẹho lọ mẹ, podọ awetọ, Gọgi na tindo mẹwhinwhàn ylankan lẹ.

¹⁸ Jehovah na doalọ to whẹho lọ mẹ. (Hia Ezekiẹli 38:4, 16.) Doayi nuhe Jehovah dọna Gọgi go: “Yẹn na . . . yí omlẹn lẹ do aglàn towe mẹ” podọ, “yẹn na hẹn we wá sọta aigba ṣie.” Be hogbe ehelẹ dohia dọ Jehovah na hẹn akọta lẹ gánnugánnu nado yangbé sinsẹ̀n-basitọ etọn lẹ tọn wẹ ya? Paali, e ma yinmọ! E ma na hẹn oylan wá omẹ etọn lẹ ji pọ́n gbede. (Jobu 34:12) Ṣigba, Jehovah yọ́n kẹntọ etọn lẹ—dọ yé na gbẹwanna sinsẹ̀n-basitọ nugbo lẹ sọmọ bo ma na dike dotẹnmẹ hundote depope nado gbidi yé sẹ̀ ni gbọ yé go. (1 Joh. 3:13) Jehovah na deanana whẹho lọ lẹ taidi dọ ewọ ze omlẹn de do aglàn mẹ na Gọgi bo to dindọn ẹn jei wẹ nkọ, na nujijọ lọ lẹ nido wá aimẹ sọgbe hẹ ojlo Etọn podọ to ojlẹ sisọ mẹ. To ojlẹ de mẹ to vasudo Babilọni Daho lọ tọn godo, Jehovah sọgan doyẹklọ akọta lẹ to aliho de mẹ nado wà nuhe to ahun yetọn mẹ lẹ. Gbọnmọ dali, Jehovah na basi titona mẹgbeyinyan lọ he na klita do Amagẹdọni, yèdọ awhàn daho hugan he na jọ to aigba ji. To whenẹnu, e na whlẹn omẹ etọn lẹ, yiavùnlọna nupojipetọ-yinyin etọn bo klan oyín wiwe etọn do wiwe.—Ezek. 38:23.

19. Etẹwẹ na whàn Gọgi nado tẹnpọn nado hò sinsẹ̀n-bibasi wiwe-ṣeke yí?

¹⁹ Gọgi na tindo mẹwhinwhàn ylankan lẹ. Akọta lẹ “nasọ kàn ayiha ylankan de.” Yé na kàn ayiha nado túntún adi po wangbẹna yetọn whenu dindẹn tọn po do omẹ Jehovah tọn he taidi mẹhe ma do mẹde lẹ ji, yèdọ “mẹhe nọ nọ̀ osla he yè ma yí adó, dòtin kavi họngbo lẹ do basi hihọ́na lẹ mẹ.” Akọta lẹ nasọ tin to jejeji nado “bẹ ogblànnu susu yì” sọn “mẹhe to adọkunnu . . . bẹpli” lẹ si. (Ezek. 38:10-12) “Adọkunnu” tẹlẹ? Omẹ Jehovah tọn lẹ tindo adọkunnu gbigbọmẹ tọn susu; dehe họakuẹ na mí hugan wẹ sinsẹ̀n-bibasi wiwe-ṣeke mítọn hlan Jehovah kẹdẹ. Akọta lẹ na jlo na hò sinsẹ̀n-bibasi wiwe-ṣeke yí, e ma yin na e họakuẹ na yé wutu wẹ, ṣigba na yé gbẹwanna ẹn po mẹhe nọ ze e daga lẹpo po.

20. Nawẹ Gọgi na tọ́nawhàn aigba kavi paladisi gbigbọmẹ tọn lọ gbọn?

²⁰ Nawẹ Gọgi na tọ́nawhàn aigba kavi paladisi gbigbọmẹ tọn lọ gbọn? Akọta lẹ sọgan tẹnpọn nado hẹn mí po huhlọn po nado diọ aliho gbẹninọ tọn mítọn bo hẹnalọdotena sinsẹ̀n-bibasi mítọn. Nado wàmọ, vlavo yé gán tẹnpọn nado doalọtena aliho he mẹ mí nọ mọ núdùdù gbigbọmẹ tọn yí te, glọnalina opli mítọn lẹ, hẹn pọninọ mítọn gble bo hẹnalọdotena mí nado yí zohunhun do lá owẹ̀n Jiwheyẹwhe tọn. Onú enẹ lẹpo wẹ to paladisi gbigbọmẹ tọn lọ mẹ. Satani na sisẹ́ akọta lẹ nado tẹnpọn bo sukúndona sinsẹ̀n-basitọ nugbo lẹ—gọna sinsẹ̀n-bibasi wiwe-ṣeke—sọn aigba ji.

21. Naegbọn a do yọ́n pinpẹn etọn dọ Jehovah ko na mí avase gando nuhe na jọ to madẹnmẹ lọ go?

²¹ Mẹgbeyinyan Gọgi Magọgi tọn he ja lọ na gando sinsẹ̀n-basitọ nugbo lẹpo go to aigba gbigbọmẹ tọn he Jiwheyẹwhe na mí lọ ji. Lehe mí dopẹ́ do sọ dọ Jehovah ko na mí avase gando nuhe na jọ to madẹnmẹ lẹ go! Todin whẹ́, dile nukunbibia daho lọ to sisẹpọ, mì gbọ mí ni magbe nado tẹdo sinsẹ̀n-bibasi wiwe-ṣeke go bo ze e do otẹn tintan mẹ to gbẹzan mítọn mẹ. Gbọnmọ dali, mí na yidogọna whanpẹ aigba he yin hinhẹngọwa lọ tọn todin. Podọ, mí na ze míde do hukan ji nado yin kunnudetọ nujijọ ayidego tọn he na jọ to madẹnmẹ lọ tọn, enẹ wẹ: Lehe Jehovah na yiavùnlọna omẹ etọn lẹ po oyín wiwe etọn po do to Amagẹdọni, dile weta he bọdego na dọhodeji do.