Lehe Jehovah Nọ Gọalọna Mí Nado Hẹn Lizọnyizọn Mítọn Di Do

 1. Etẹwẹ mí gán donukun, podọ nujikudo tẹwẹ mí gán do?

MÍ GÁN donukun nukundiọsọmẹ dile mí to lizọnyizọn mítọn hẹndi. E yọnbasi taun dọ nukundiọsọmẹ enẹ ni jideji to sọgodo. (Dan. 11:44; 2 Tim. 3:12; Osọ. 16:21) Amọ́, mí gán kudeji dọ Jehovah na na mí alọgọ he mí do hudo etọn. Etẹwutu? Jehovah nọ gọalọna devizọnwatọ etọn lẹ to whelẹponu nado hẹn azọ́ndenamẹ yetọn lẹ di—mahopọnna lehe yé vẹawu sọ. Di apajlẹ, mì gbọ mí ni gbadopọnna nujijọ delẹ to gbẹzan yẹwhegán Ezekiẹli tọn mẹ, yèdọ mẹhe dọyẹwheho na Ju he to kanlinmọgbenu to Babilọni lẹ.

 2. Etẹwẹ Jehovah dọ gando mẹhe nọ nọ̀ aigba-denamẹ Ezekiẹli tọn ji lẹ go, podọ etẹwẹ mí na gbadopọnna to hosọ ehe mẹ? (Ezekiẹli 2:3-6)

² Gbẹtọ alọpa tẹlẹ wẹ to aigba-denamẹ he ji Ezekiẹli dọyẹwheho te? Jehovah dọ dọ yé yin “tasinyẹntọ,” “kanylantọ,” podọ “atẹṣitọ” lẹ. Yé taidi owùn he nọ gbleawunamẹ lẹ bosọ do adí taidi aklekle lẹ. Abajọ Jehovah do dọna Ezekiẹli whlasusu dọmọ: ‘A dibu blo’! (Hia Ezekiẹli 2:3-6.) Ezekiẹli penugo bo hẹn azọ́ndenamẹ yẹwhehodidọ tọn etọn di, na (1) Jehovah wẹ do e hlan, (2) gbigbọ Jiwheyẹwhe tọn na ẹn huhlọn, podọ (3) ohó Jiwheyẹwhe tọn hẹn yise etọn lodo. Nawẹ onú atọ̀n ehelẹ gọalọna Ezekiẹli gbọn? Podọ nawẹ yé nọ gọalọna mí to egbehe gbọn?

 3. Hogbe tẹlẹ wẹ dona ko hẹn Ezekiẹli lodo, podọ nawẹ Jehovah hẹn ẹn deji dọ Emi na nọgodona ẹn gbọn?

³ Jehovah dọna Ezekiẹli dọmọ: “Yẹn to dido we hlan.” (Ezek. 2:3, 4) Hogbe ehelẹ dona ko hẹn Ezekiẹli lodo. Etẹwutu? Ayihaawe ma tin dọ e flindọ Jehovah ko yí hogbe mọnkọ lẹ zan whenue E deazọ́nna Mose po Isaia po taidi yẹwhegán Etọn lẹ. (Eks. 3:10; Isa. 6:8) Ezekiẹli sọ yọ́n lehe Jehovah gọalọna yẹwhegán awe ehelẹ nado duto avùnnukundiọsọmẹnu lẹ ji do. Enẹwutu, whenue Jehovah dọna Ezekiẹli whla awe dọ: “Yẹn to dido we hlan,” yẹwhegán lọ do whẹwhinwhẹ́n dagbe lẹ nado dejido godonọnamẹ Jehovah tọn go. Podọ to owe Ezekiẹli tọn mẹ, mí mọ hodidọ he bọdego ehelẹ whlasusu: “Ohó Jehovah tọn wá dè e.” (Ezek. 3:16) Humọ, hodidọ lọ, “Ohó Jehovah tọn sọ vọ́ wá dè e” sọawuhia pludopludo. (Ezek. 6:1) E họnwun dọ Ezekiẹli kudeji dọ Jehovah wẹ do emi hlan. Podọ, na Ezekiẹli yin visunnu yẹwhegán de tọn wutu, e yọnbasi dọ otọ́ etọn na ko dọhona ẹn gando lehe Jehovah hẹn yẹwhegán Etọn lẹ deji to whenuho gblamẹ dọ Emi na nọgodona yé do go. Jehovah dọna Isaki, Jakọbu po Jelemia po dọmọ: “Yẹn tin po hiẹ po.”—Jen. 26:24; 28:15; Jel. 1:8.

 4. Linlẹn homẹmiọnnamẹ tọn tẹlẹ wẹ dona ko na huhlọn Ezekiẹli?

⁴ Nawẹ suhugan Islaelivi lẹ tọn yinuwa gando owẹ̀n he Ezekiẹli lá go gbọn? Jehovah dọmọ: “Owhé Islaeli tọn na gbẹ́ nado dotoaina we, na yé ma jlo na dotoaina mi wutu.” (Ezek. 3:7) Whenue gbẹtọ lẹ gbẹ́ Ezekiẹli dai, Jehovah wẹ yé gbẹ́ dai. Hogbe enẹlẹ hẹn Ezekiẹli deji dọ dile etlẹ yindọ gbẹtọ lẹ gbẹ́ ẹ dai, enẹ ma zẹẹmẹdo dọ e gboawupo taidi yẹwhegán de gba. Jehovah sọ hẹn Ezekiẹli deji dọ whenue owẹ̀n whẹdida tọn he e lá lẹ na mọ hẹndi, gbẹtọ lẹ na ‘yọnẹn dọ yẹwhegán de ko tin to ṣẹnṣẹn yetọn.’ (Ezek. 2:5; 33:33) Ayihaawe matin dọ linlẹn homẹmiọnnamẹ tọn enẹlẹ na Ezekiẹli huhlọn he e do hudo etọn nado hẹn lizọnyizọn etọn di.

 5. Sọgbe hẹ Isaia 44:8, etẹwẹ nọ na mí huhlọn?

⁵ Mílọsu nọ mọ huhlọn yí, na mí yọnẹn dọ Jehovah wẹ do mí hlan nado yì dọyẹwheho wutu. E doyẹyigona mí bo ylọ mí dọ “kunnudetọ” etọn lẹ. (Isa. 43:10) Lẹblanulọkẹyi daho nankọ die! Dile Jehovah dọna Ezekiẹli do dọ: ‘A dibu blo,’ Jehovah nọ dọna mílọsu dọmọ: “Ahun mìtọn gbàdo blo.” Naegbọn mí ma do whẹwhinwhẹ́n depope nado dibuna nukundiọsọmẹtọ mítọn lẹ? Taidi Ezekiẹli, Jehovah wẹ do mí hlan, podọ mí tindo godonọnamẹ Etọn.—Hia Isaia 44:8.

 6. (a) Nawẹ Jehovah nọ hẹn mí deji dọ emi to godona mí gbọn? (b) Etẹwẹ nọ na mí homẹmimiọn po huhlọn po?

⁶ Jehovah hẹn mí deji dọ emi ma na jo mí do. Di apajlẹ, whenue Jehovah dọ dọ: “Mìwlẹ wẹ kunnudetọ ṣie lẹ” godo tlolo, e dọmọ: “Eyin hiẹ to osin mẹ gbọn, yẹn na tin hẹ we, eyin hiẹ sọ to tọ̀sisa lẹ mẹ gbọn, yé ma na ṣinyọ́n ji we. Eyin hiẹ to zọnlinzin gbọn miyọ́n mẹ, e ma na mẹ̀ we, mọjanwẹ miyọ́n he to jiji lọ ma na fiọ we do niyẹn.” (Isa. 43:2) Dile mí to lizọnyizọn mítọn hẹndi, mí nọ pehẹ avùnnukundiọsọmẹnu he taidi tọ̀sisa gọna whlepọn he taidi miyọ́n lẹ to whedelẹnu. Etomọṣo, po alọgọ Jehovah tọn po, mí nọ zindonukọn nado to yẹwhehodọ. (Isa. 41:13) Dile e yin do to azán Ezekiẹli tọn gbè, suhugan mẹlẹ tọn to egbehe nọ gbẹ́ owẹ̀n lọ dai. Mí nọ hẹn do ayiha mẹ dọ e ma yin na yé gbẹ́ mí dai wutu wẹ mí do gboawupo taidi Kunnudetọ Jiwheyẹwhe tọn lẹ gba. Mí nọ mọ homẹmimiọn po huhlọn po yí, na mí yọnẹn dọ homẹ Jehovah tọn nọ hùn eyin mí to owẹ̀n etọn lá po nugbonọ-yinyin po zọnmii. Apọsteli Paulu dọmọ: “Mẹdopodopo na mọ ale etọn titi yí sọgbe hẹ azọ́n etọn titi.” (1 Kọl. 3:8; 4:1, 2) Mẹmẹyọnnu de he yin gbehosọnalitọ sọn ojlẹ dindẹn die dọmọ: “Homẹ ṣie nọ hùn nado yọnẹn dọ Jehovah nọ suahọ vivẹnudido mítọn lẹ tọn.”

 7. Nuyiwadomẹji tẹwẹ numimọ he Ezekiẹli mọ lọ dona ko tindo do e ji whedepopenu he e lẹnnupọndeji? (Pọ́n yẹdide he to wepa ji.)

⁷ Ezekiẹli mọ lehe gbigbọ Jiwheyẹwhe tọn dohuhlọn do sọ. To numimọ de mẹ, e mọ lehe gbigbọ wiwe yinuwado nudida gbigbọnọ huhlọnnọ lẹ ji, podọ do kẹkẹfọ daho-gbó awhàn-kẹkẹ olọn mẹ tọn de tọn lẹ ji do. (Ezek. 1:20, 21) Nawẹ Ezekiẹli yinuwa gbọn? E basi kandai nuhe jọ tọn. E dọmọ: “To whenue yẹn mọ, yẹn ṣinyọ́n nukunmẹ ai.” Awuji Ezekiẹli sọmọ bọ e họ́jai jẹ kọmẹ. (Ezek. 1:28) To nukọn mẹ, whedepopenu he Ezekiẹli lẹnnupọndo numimọ jiawu ehe ji, enẹ dona ko nọ hẹn nujikudo etọn lodo dọ, po alọgọ gbigbọ Jiwheyẹwhe tọn po, e gán hẹn lizọnyizọn etọn di.

 8, 9. (a) Etẹwẹ jọ whenue Jehovah dọna Ezekiẹli dọ ni fọnṣite? (b) Nawẹ Jehovah na huhlọn Ezekiẹli dogọ gando aigba-denamẹ etọn he vẹawu go gbọn?

⁸ Jehovah degbena Ezekiẹli dọmọ: “Visunnu gbẹtọ tọn, fọnṣite do afọ towe lẹ ji na yẹn nido dọho hẹ we.” Gbedide ehe po gbigbọ Jiwheyẹwhe tọn po wẹ na Ezekiẹli huhlọn he e do hudo etọn nado fọ́n sọn kọmẹ. Ezekiẹli dọmọ: “Gbigbọ lọ biọ ohò ṣie mẹ bo jlọ mi ṣite do afọ ṣie lẹ ji.” (Ezek. 2:1, 2) To godo mẹ podọ to lizọnyizọn Ezekiẹli tọn blebu whenu, “alọ” Jiwheyẹwhe tọn, yèdọ gbigbọ wiwe etọn wẹ deanana ẹn. (Ezek. 3:22; 8:1; 33:22; 37:1; 40:1) Gbigbọ Jiwheyẹwhe tọn na huhlọn Ezekiẹli nado hẹn azọ́ndenamẹ etọn di, enẹ wẹ nado dọyẹwheho na gbẹtọ “tasinyẹntọ podọ kanylantọ” he to aigba-denamẹ etọn ji lẹ. (Ezek. 3:7) Jehovah dọna Ezekiẹli dọmọ: “Yẹn ko hẹn nukunmẹ towe sinyẹn pẹpẹ taidi nukunmẹ yetọn lẹ podọ nukọn towe taidi nukọn yetọn lẹ. Yẹn ko hẹn nukọn towe tin taidi zannu diamọndi tọn he sinyẹn hú osé. A dibuna yé blo kavi a dike nukunmẹ yetọn lẹ dobuna we blo.” (Ezek. 3:8, 9) To linlẹn de mẹ, Jehovah to didọna Ezekiẹli dọmọ: ‘A dike tasinsinyẹn gbẹtọ lọ lẹ tọn hẹn we gbọjọ blo. N’na na we huhlọn.’

⁹ Enẹgodo, gbigbọ Jiwheyẹwhe tọn plan Ezekiẹli gbọn aigba-denamẹ etọn ji. Ezekiẹli wlan dọmọ: “Alọ Jehovah tọn sọ gbọṣi ji e sinsinyẹn.” E yí osẹ dopo to yẹwhegán lọ si nado mọnukunnujẹ owẹ̀n he e dona lá lọ mẹ, na e nido penugo bo lá ẹ po nujikudo po. (Ezek. 3:14, 15) Enẹgodo, Jehovah deanana Ezekiẹli yì dankló de ji fie “gbigbọ biọ ohò [etọn] mẹ” te. (Ezek. 3:23, 24) Ezekiẹli ko wleawufo nado bẹ lizọnyizọn etọn jẹeji.

10. Etẹwẹ na gọalọna mí nado hẹn azọ́n yẹwhehodidọ tọn mítọn di, podọ etẹwutu?

¹⁰ Etẹwẹ na gọalọna mí nado hẹn azọ́n yẹwhehodidọ tọn mítọn di? Nado mọ gblọndo lọ, sọ lẹnnupọndo nuhe jọ do Ezekiẹli go ji. Whẹpo e do wá penugo nado bẹ azọ́n yẹwhehodidọ tọn etọn jẹeji, gbigbọ Jiwheyẹwhe tọn wẹ na ẹn huhlọn he e do hudo etọn. To egbehe, dile e yin do to whẹho Ezekiẹli tọn mẹ, mí ma gán hẹn azọ́n yẹwhehodidọ tọn lọ di eyin alọgọ gbigbọ Jiwheyẹwhe tọn dẹ́n. Etẹwutu? Na Satani to awhànfun sọta mí nado doalọtena azọ́n yẹwhehodidọ tọn mítọn. (Osọ. 12:17) To pọndohlan gbẹtọvi tọn mẹ, e taidi dọ mí ma gán duto Satani ji pọ́n gbede wẹ nkọ. Amọ́, gbọn azọ́n kunnudide tọn mítọn gblamẹ, mí nọ gbawhàn etọn! (Osọ. 12:9-11) To aliho tẹ mẹ? Whenue mí do mahẹ to lizọnyizọn lọ mẹ, mí nọ dohia dọ adánsin-namẹ Satani tọn lẹ ma nọ dobuna mí. Whedepopenu he mí dọyẹwheho, mí nọ gbawhàn Satani tọn. Enẹwutu, tadona tẹ kọ̀n wẹ mí gán wá na mí nọ penugo bo nọ hẹn azọ́n yẹwhehodidọ tọn mítọn di mahopọnna nukundiọsọmẹ? Mí gán wá tadona kọ̀n dọ gbigbọ wiwe wẹ nọ na mí huhlọn, podọ dọ mí tindo nukundagbe Jehovah tọn.—Mat. 5:10-12; 1 Pita 4:14.

11. Etẹwẹ gbigbọ Jiwheyẹwhe tọn na wà na mí, podọ nawẹ mí gán nọ mọ ẹn yí gbọn?

¹¹ Jidenamẹ devo tẹwẹ mí gán mọyi to yinyọnẹn mẹ dọ Jehovah hẹn nukunmẹ Ezekiẹli tọn po nukọn etọn po sinyẹn to yẹhiadonu-liho? Gbigbọ Jiwheyẹwhe tọn gán gọalọna mí nado duto avùnnukundiọsọmẹnu depope he mí gán pehẹ to lizọnyizọn mítọn mẹ ji. (2 Kọl. 4:7-9) Enẹwutu, etẹwẹ mí gán wà nado hẹn ẹn diun dọ mí nọ mọ gbigbọ Jiwheyẹwhe tọn yí? Mí dona nọ hodẹ̀ vẹkuvẹku nado biọ ẹ, bo deji dọ Jehovah na sè odẹ̀ mítọn lẹ. Jesu plọn devi etọn lẹ dọmọ: “Mì to bibiọ zọnmii, . . . mì to dindin zọnmii, . . . mì to họ̀nhúhú zọnmii.” Podọ, Jehovah na “na gbigbọ wiwe mẹhe to bibiọ ẹ lẹ.”—Luku 11:9, 13; Owalọ 1:14; 2:4.

12. Sọgbe hẹ Ezekiẹli 2:9–3:3, fitẹ wẹ owe-hihá lọ wá sọn, podọ etẹwẹ e bẹhẹn?

¹² Gbọnvona dọ gbigbọ Jiwheyẹwhe tọn na huhlọn Ezekiẹli, ohó etọn sọ hẹn ẹn lodo ga. To numimọ de mẹ, Ezekiẹli mọ alọ de he hẹn owe-hihá de. (Hia Ezekiẹli 2:9–3:3.) Fitẹ wẹ owe-hihá lọ wá sọn? Etẹwẹ e bẹhẹn? Nawẹ e hẹn yise Ezekiẹli tọn lodo gbọn? Mì gbọ mí ni pọ́n. Owe-hihá lọ wá sọn ofìn Jiwheyẹwhe tọn kọ̀n. E yọnbasi dọ Jehovah yí dopo to angẹli ẹnẹ he Ezekiẹli mọ wayi lẹ mẹ zan nado ze owe-hihá lọ na ẹn. (Ezek. 1:8; 10:7, 20) Owe-hihá lọ bẹ Ohó Jiwheyẹwhe tọn hẹn—enẹ wẹ owẹ̀n whẹdida tọn he gbloada he Ezekiẹli dona lá na atẹṣitọ he to kanlinmọgbenu lọ lẹ. (Ezek. 2:7) Owẹ̀n enẹ yin kinkan do nukọn po godo po na owe-hihá lọ.

13. Etẹwẹ Jehovah dọna Ezekiẹli nado wà po owe-hihá lọ po, podọ naegbọn e do vivi?

¹³ Jehovah dọna yẹwhegán etọn nado dù owe-hihá lọ na “adọ̀go [etọn] ni gọ́.” Ezekiẹli setonu bo dù owe-hihá lọ pete. Etẹwẹ adà numimọ lọ tọn ehe zẹẹmẹdo? Ezekiẹli dona mọnukunnujẹ owẹ̀n he e dona lá lọ mẹ to gigọ́ mẹ. E dona họnwun na ẹn sọmọ bọ e na yin whinwhàn nado lá ẹ na mẹdevo lẹ. Enẹgodo nupaṣamẹ de jọ. Ezekiẹli doayi e go dọ owe-hihá lọ “vivi taidi owín.” (Ezek. 3:3) Etẹwutu? Na Ezekiẹli, gbégbò lọ nado ze afọ Jehovah tọn dai yin numimọ dagbe kavi awuvivi tọn de. (Salm. 19:8-11) E yọ́n pinpẹn etọn dọ Jehovah kẹalọyi emi nado sẹ̀n taidi yẹwhegán etọn.

14. Etẹwẹ gọalọna Ezekiẹli nado wleawufo nado bẹ azọ́ndenamẹ etọn jẹeji?

¹⁴ To godo mẹ, Jehovah dọna Ezekiẹli dọmọ: “Dotoai bo sè ohó he yẹn na dọna we lẹpo.” (Ezek. 3:10) Po anademẹ enẹlẹ po, Jehovah to didọna Ezekiẹli nado hẹn nuhe yin kinkan do owe-hihá lọ mẹ lẹ do ayiha mẹ bosọ lẹnayihamẹpọndo yé ji. Mọwiwà hẹn yise Ezekiẹli tọn lodo. Humọ, e sọ gọalọna ẹn nado mọ owẹ̀n huhlọnnọ de he e na lá na gbẹtọ lọ lẹ. (Ezek. 3:11) Po owẹ̀n Jiwheyẹwhe tọn po to ahun etọn mẹ podọ to nùflo etọn lẹ ji, Ezekiẹli wleawufo nado bẹ azọ́ndenamẹ etọn jẹeji bosọ hẹn ẹn di.—Yijlẹdo Salmu lẹ 19:14 go.

15. Nado doakọnnanu, mẹnu wẹ mí dona nọ ‘dotoaina’?

¹⁵ Nado doakọnnanu to lizọnyizọn mítọn mẹ, mílọsu dona dike ohó Jiwheyẹwhe tọn ni to yise mítọn hẹn lodo zọnmii. Mí dona ‘dotoaina’ nuhe Jehovah nọ dọna mí lẹpo. To egbehe, Jehovah nọ dọhona mí gbọn Ohó etọn Biblu gblamẹ. Nawẹ mí gán nọ hẹn ẹn diun dọ Ohó Jiwheyẹwhe tọn nọ yinuwado linlẹn, numọtolanmẹ po mẹwhinwhàn mítọn lẹ po ji gbọn?

16. Etẹwẹ mí dona wà po Ohó Jiwheyẹwhe tọn po, podọ nawẹ mí gán mọnukunnujẹemẹ ganji gbọn?

¹⁶ Kẹdẹdile mí nọ mọ huhlọn yí to agbasa-liho do whenue mí dùnú bọ núdùdù lọ sọ yin lìlì, mí nọ mọ huhlọn yí to gbigbọ-liho eyin mí hia Ohó Jiwheyẹwhe tọn bosọ lẹnayihamẹpọn deji. Mí nọ hẹn nuplọnmẹ he gando owe-hihá lọ go do ayiha mẹ. Gando Ohó Jiwheyẹwhe tọn go, Jehovah jlo dọ mí ni ‘dù i na adọ̀go mítọn ni gọ́,’ enẹ wẹ yindọ mí ni mọnukunnujẹemẹ ganji. Mí gán wàmọ, eyin mí nọ hodẹ̀, nọ hia ẹ bosọ nọ lẹnayihamẹpọn deji. Jẹnukọn whẹ́, mí nọ hodẹ̀ nado wleawuna ahun mítọn nado kẹalọyi linlẹn Jiwheyẹwhe tọn lẹ. Enẹgodo, mí nọ hia adà Biblu tọn de. Podọ, mí nọ nọte nado lẹnayihamẹpọn, enẹ wẹ nado lẹnnupọn sisosiso do nuhe mí hia ji. Etẹwẹ na yin kọdetọn lọ? Lehe mí to nukunnumọjẹ Ohó Jiwheyẹwhe tọn mẹ sọ, mọ wẹ yise mítọn na lodo dogọ do niyẹn.

17. Naegbọn e do yin nujọnu nado nọ lẹnayihamẹpọn do nuhe mí hia to Biblu mẹ ji?

¹⁷ Naegbọn e do yin dandan nado nọ hia Biblu bo nọ lẹnayihamẹpọn deji? Mọwiwà nọ na mí huhlọn he mí do hudo etọn nado lá owẹ̀n Ahọluduta lọ tọn todin podọ nado lá owẹ̀n whẹdida tọn sinsinyẹn he mí gán wá lá to sọgodo he to yakẹ lọ. Podọ, eyin mí lẹnayihamẹpọn do jẹhẹnu dagbedagbe Jehovah tọn lẹ ji, haṣinṣan mítọn hẹ ewọ na lodo hugan gbede pọ́n. Taidi kọdetọn de, mí na duvivi nudagbe kavi awuvivinu de tọn nugbo, enẹ wẹ jijọho ahun mẹ tọn po pekọ po.—Salm. 119:103.

18. Etẹwẹ mẹhe to aigba-denamẹ mítọn ji lẹ na to dandannu glọ nado kẹalọyi, podọ etẹwutu?

¹⁸ To vogbingbọn mẹ na Ezekiẹli, mí ma yin gbigbọdo nado dọ dọdai na gbẹtọ lẹ. Etomọṣo, mí magbe nado to owẹ̀n gbọdo he Jehovah ko hlá do Ohó etọn mẹ lọ lá zọnmii kakajẹ whenue azọ́n yẹwhehodidọ tọn lọ na yin wiwadotana sọgbe hẹ ojlo etọn. Whenue ojlẹ whẹdida tọn na wá, mẹhe to aigba-denamẹ mítọn ji lẹ ma na tindo whẹwhinwhẹ́n depope nado dọ dọ yé ma sèava kavi dọ Jiwheyẹwhe dovọ́na yé. (Ezek. 3:19; 18:23) Kakatimọ, yé na to dandannu glọ nado kẹalọyi dọ Jiwheyẹwhe dè wẹ owẹ̀n he mí lá lọ wá sọn.

19. Etẹwẹ na na mí huhlọn nado hẹn lizọnyizọn mítọn di?

¹⁹ Etẹwẹ na na mí huhlọn nado hẹn lizọnyizọn mítọn di? Onú atọ̀n he na huhlọn Ezekiẹli lọ lẹ wẹ. Mí nọ zindonukọn nado to yẹwhehodọ, na mí yọnẹn dọ Jehovah wẹ do mí hlan, gbigbọ wiwe etọn nọ na mí huhlọn, podọ Ohó etọn nọ hẹn yise mítọn lodo wutu. Po alọgọ Jehovah tọn po, mí nọ yin whinwhàn nado hẹn lizọnyizọn mítọn di, podọ nado doakọnnanu “kakajẹ opodo.”—Mat. 24:13.