“Pọ́n Oylan, Yèdọ Osùnú He Yé To Wiwà” Lẹ

1-3. Etẹwẹ Jehovah jlo dọ Ezekiẹli ni mọ to tẹmpli Jelusalẹm tọn mẹ, podọ etẹwutu? (Pọ́n yẹdide po nudọnamẹ Adà 2tọ tọn lẹ po.)

TAIDI visunnu yẹwhenọ de tọn, yẹwhegán Ezekiẹli yọ́n nuhe Osẹ́n Mose tọn bẹhẹn lẹ ganji. Enẹwutu, e jẹakọ hẹ tẹmpli Jelusalẹm tọn po lehe sinsẹ̀n-bibasi wiwe-ṣeke Jehovah tọn dona nọ yì do to finẹ po. (Ezek. 1:3; Mal. 2:7) Ṣigba todin, to 612 J.W.M., Juvi nugbonọ depope, etlẹ yin Ezekiẹli lọsu, ma gán nọma jọsi eyin e mọ nuhe to jijọ to tẹmpli Jehovah tọn mẹ lẹ.

² Jehovah jlo dọ Ezekiẹli ni mọ ninọmẹ gblezọn he mẹ tẹmpli lọ te bo yì dọ nuhe e mọ lẹ na “mẹho Juda tọn lẹ,” yèdọ kanlinmọ Juvi hatọ etọn he pli do owhé etọn gbè lẹ. (Hia Ezekiẹli 8:1-4; Ezek. 11:24, 25; 20:1-3) Gbọn gbigbọ wiwe gblamẹ, Jehovah sẹtẹnna Ezekiẹli (to numimọ mẹ) na kilomẹtlu kanweko susu sọn owhé etọn gbè to Tẹli-abibi, sẹpọ tọ̀sisa Kẹbali he to Babilọni, yì Jelusalẹm he to whèyihọ-waji. Jehovah hẹn yẹwhegán lọ wá tẹmpli mẹ to họngbo agewaji tọn awánu homẹ tọn lọ tọn kọ̀n. Bẹsọn finẹ, Jehovah plan ẹn dánpe gbọn tẹmpli lọ blebu mẹ to numimọ mẹ.

³ Todin Ezekiẹli mọ nuhẹnmẹ jọsi ẹnẹ delẹ he do obá he mẹ gbigbọnọ-yinyin akọta lọ tọn ko yìdo pete jẹ hia. Etẹwẹ jọ do sinsẹ̀n-bibasi wiwe-ṣeke Jehovah tọn go? Podọ zẹẹmẹ tẹwẹ numimọ ehe tindo na mí to egbehe? Mì gbọ mí ni hodo Ezekiẹli to sadidi etọn mẹ. Ṣigba jẹnukọn whẹ́, mí na gbadopọnna nuhe Jehovah nọ gbọn jlọjẹ dali donukun sọn sinsẹ̀n-basitọ etọn lẹ si.

 4. Etẹwẹ Jehovah nọ donukun sọn sinsẹ̀n-basitọ etọn lẹ si?

⁴ Nudi owhe kanweko ṣinẹnẹ jẹnukọnna azán Ezekiẹli tọn, Jehovah hẹn nuhe e nọ donukun sọn sinsẹ̀n-basitọ etọn lẹ si họnwun hezeheze. To Gbedide Ao he e na Islaelivi lẹ mẹ, e dọna yé to gbedide awetọ mẹ dọmọ:a “Yẹn Jehovah Jiwheyẹwhe towe yin Jiwheyẹwhe de he nọ biọ mẹdezejo mlẹnmlẹn.” (Eks. 20:5) Gbọn hogbe lọ “mẹdezejo mlẹnmlẹn” yiyizan dali, Jehovah dohia dọ emi ma na yigbena sinsẹ̀n-bibasi hlan yẹwhe devo depope. Dile mí mọ do to Weta 2tọ owe ehe tọn mẹ, nubiọtomẹsi sinsẹ̀n-bibasi wiwe-ṣeke tọn tintan wẹ yindọ Jehovah wẹ mẹlọ he dona mọ sinsẹ̀n-bibasi mítọn yí. Sinsẹ̀n-basitọ etọn lẹ dona nọ ze e do otẹn tintan mẹ to gbẹzan yetọn mẹ. (Eks. 20:3) Do glido, Jehovah nọ donukun dọ sinsẹ̀n-basitọ etọn lẹ ni gbọṣi wiweji to gbigbọ-liho bo ma nọ ṣaka sinsẹ̀n-bibasi nugbo dopọ hẹ lalo. To 1513 J.W.M., Islaelivi lẹ desọn ojlo mẹ bo biọ alẹnu Osẹ́n tọn mẹ. Gbọnmọ dali, yé yigbe nado nọ ze yede jo mlẹnmlẹn na Jehovah. (Eks. 24:3-8) Jehovah nọ yin nugbonọ na alẹnu etọn lẹ, enẹwutu e nọ donukun nugbonọ-yinyin dopolọ sọn mẹhe biọ alẹnu mẹ hẹ ẹ lẹ si.—Deut. 7:9, 10; 2 Sam. 22:26.

5, 6. Naegbọn Jehovah do jẹna mẹdezejo mlẹnmlẹn Islaelivi lẹ tọn?

⁵ Be e sọgbe hẹ lẹnpọn dagbe dọ Jehovah ni donukun mẹdezejo mlẹnmlẹn sọn Islaelivi lẹ si ya? Gbau! Ewọ wẹ Jiwheyẹwhe Ganhunupotọ, yèdọ Nupojipetọ wẹkẹ tọn, Asisa ogbẹ̀ tọn podọ Mẹhe nọ hẹn ogbẹ̀ dote. (Salm. 36:9; Owalọ 17:28) Jehovah sọ wẹ Mẹwhlẹngántọ Islaelivi lẹ tọn. To Gbedide Ao lẹ nina omẹ etọn lẹ whenu, e flinnu yé dọ: “Yẹn wẹ Jehovah Jiwheyẹwhe towe, he plan we sọn aigba Egipti tọn ji, yèdọ sọn kanlinmọgbenu.” (Eks. 20:2) Po enẹ lẹpo po, e jẹ dọ Jehovah ni tin to otẹn vonọtaun de mẹ to ahun Islaelivi lẹ tọn mẹ.

⁶ Jehovah ma nọ diọ. (Mal. 3:6) Nubiọtomẹsi etọn nado mọ mẹdezejo mlẹnmlẹn yí ma ko diọ pọ́n gbede. Enẹwutu, yí nukun homẹ tọn do pọ́n numọtolanmẹ he e na ko tindo gando nuhẹnmẹ jọsi ẹnẹ he e dohia Ezekiẹli to numimọ mẹ lọ lẹ go.

 7. (a) Etẹ wà wẹ Juvi atẹṣitọ lẹ te to họngbo agewaji tọn tẹmpli lọ tọn kọ̀n, podọ numọtolanmẹ tẹwẹ enẹ hẹn Jehovah tindo? (Pọ́n yẹdide he tin to bẹjẹeji hosọ ehe tọn.) (b) Linlẹn tẹ mẹ wẹ yé fọ́n awuwhàn Jehovah tọn dote te? (Pọ́n nudọnamẹ odò tọn 2tọ.)

⁷ Hia Ezekiẹli 8:5, 6. Ezekiẹli dona ko jọsi taun! To họngbo agewaji tọn tẹmpli lọ tọn kọ̀n, Juvi atẹṣitọ lẹ to boṣiọ kavi yẹdide de sẹ̀n. Vlavo e sọgan ko yin dòtin wiwe Aṣela tọn, yèdọ yẹwhe yọnnu lalo de he Kenaninu lẹ nọ pọnhlan taidi asi Baali tọn. Depope he whẹho lọ yin, Islaelivi boṣiọ-sẹ̀ntọ enẹlẹ ko tùnafọ nubiọtomẹsi alẹnu he yé basi hẹ Jehovah tọn lẹ ji. Gbọn mẹdezejo he Jehovah kẹdẹ wẹ tindo jlọjẹ na lọ yíyí na boṣiọ de dali, yé fọ́n awuwhàn Jiwheyẹwhe tọn dote; yé hẹn ẹn nado gbọn jlọjẹ dali gblehomẹ.b (Deut. 32:16; Ezek. 5:13) Pọ́n bo: Na owhe 400 linlán, fiwiwe tẹmpli lọ tọn nọ dohia dọ Jehovah tin to ṣẹnṣẹn yetọn. (1 Ahọ. 8:10-13) Amọ́ todin, gbọn kandindlẹn na boṣiọ-sinsẹ̀n kaka wá lẹdo tẹmpli lọ tọn mẹ dali, boṣiọ-sẹ̀ntọ enẹlẹ ko hẹn Jehovah nado “nọla na fiwiwe” etọn.

 8. Zẹẹmẹ tẹwẹ numimọ Ezekiẹli tọn he gando boṣiọ awuwhàn tọn lọ go tindo na mí to egbehe?

⁸ Zẹẹmẹ tẹwẹ numimọ Ezekiẹli tọn he gando boṣiọ awuwhàn tọn lọ go tindo na mí to egbehe? Matin ayihaawe, nuyiwa Juda atẹṣitọ lọ tọn hẹn mí flin sinsẹ̀n Mẹylọhodotọklisti tọn lẹ. Boṣiọ-sinsẹ̀n ko gbayipe to ṣọṣi Mẹylọhodotọklisti tọn lẹ mẹ, ehe nọ zọ́n bọ mẹdezejo depope he hagbẹ yetọn lẹ tlẹ sọalọakọ́n dọ emi tindo na Jiwheyẹwhe nọ yin hinhẹn zun ovọ́. To whenuena e yindọ Jehovah ma nọ diọ, mí gán kudeji dọ kẹdẹdi Juda atẹṣitọ lọ, sinsẹ̀n Mẹylọhodotọklisti tọn lẹ ko fọ́n homẹgble dodo tọn Jiwheyẹwhe tọn dote. (Jak. 1:17) E họnwun dọ, Jehovah na nọla na sinsẹ̀n Klistiani tọn he gblezọn enẹ janwẹ!

9, 10. Nuplọnmẹ avase tọn tẹwẹ mí sọgan mọyi sọn nuyiwa boṣiọ-sẹ̀ntọ he to tẹmpli mẹ lọ lẹ tọn mẹ?

⁹ Nuplọnmẹ avase tọn tẹwẹ mí sọgan mọyi sọn nuyiwa boṣiọ-sẹ̀ntọ he to tẹmpli lọ mẹ enẹlẹ tọn mẹ? Nado ze míde jo mlẹnmlẹn na Jehovah, mí dona “họ̀nna boṣiọ-sinsẹ̀n.” (1 Kọl. 10:14) Mí sọgan lẹn to míde mẹ dọ, ‘N’ma gán yí yẹdide kavi boṣiọ lẹ zan to sinsẹ̀n-bibasi ṣie hlan Jehovah mẹ gbede!’ Amọ́, boṣiọ-sinsẹ̀n wunmẹ voovo wẹ tin, podọ delẹ nọ gẹdẹ hú devo lẹ. Owe alọdlẹndonu tọn he sinai do Biblu ji de dọ ẹ dole: “Mí gán dọ dọ hogbe lọ boṣiọ-sinsẹ̀n nọ yin yiyizan nado nọtena nudevo lẹ—yèdọ nudepope he yin nujọnu, he họakuẹ kavi dohuhlọn sọmọ nado lẹzun ahunmẹdunamẹnu mítọn tintan to gbẹ̀mẹ kakati nido yin Jiwheyẹwhe.” Enẹwutu, boṣiọ-sinsẹ̀n sọgan bẹ nutindo agbasa tọn lẹ, akuẹ, zanhẹmẹ kavi ayidedai lẹ hẹn—yèdọ nudepope he sọgan yitẹn mẹdezejo mlẹnmlẹn he Jehovah jẹna tọn bo lẹzun nuhe tin to otẹn tintan mẹ to gbẹzan mítọn mẹ. (Mat. 6:19-21, 24; Efe. 5:5; Kol. 3:5) Mí dona họ́ míde sọta boṣiọ-sinsẹ̀n wunmẹ lẹpo, na Jehovah kẹdẹ wẹ mí dona nọ yí ahun lẹpo do sẹ̀n!—1 Johanu 5:21.

¹⁰ Nuhẹnmẹ jọsi tintan he Jehovah dohia Ezekiẹli bẹ “nuylankan, yèdọ osùnú” lẹ hẹn. Etomọṣo, Jehovah dọna yẹwhegán nugbonọ etọn dọmọ: “Hiẹ nasọ mọ osùnú he tlẹ sọ ylanhu enẹlẹ.” Etẹwẹ gán sọ ylanhu sinsẹ̀n-bibasi hlan boṣiọ awuwhàn tọn de to lẹdo tẹmpli lọ tọn mẹ?

11. Nuhẹnmẹ jọsi tẹlẹ wẹ Ezekiẹli mọ to whenue e biọ awánu homẹ tọn mẹ sẹpọ agbà tẹmpli lọ tọn?

¹¹ Hia Ezekiẹli 8:7-12. To whenue Ezekiẹli ko biọ awánu homẹ tọn tẹmpli lọ tọn mẹ sẹpọ agbà lọ gbọn nùvo he yin dide do adó mẹ de gblamẹ godo, e mọ yẹdide adógo tọn wunmẹwunmẹ “nuhe nọ lìn po gbekanlin hiọawu lẹ po tọn, gọna boṣiọ hiọawu” lẹ tọn.c Yẹdide adógo tọn yẹwhe lalo lẹ tọn wẹ. Nuhe Ezekiẹli mọ bọdego tlẹ sọ hiọawu hugan: “70 to mẹho owhé Islaeli tọn lẹ tọn mẹ ṣite . . . to zinvlu mẹ” bo to nuyọnwan mẹ̀ hlan yẹwhe lalo lẹ. To Osẹ́n Mose tọn glọ, nuyọnwan owán gblingblinnọ he nọ yin mimẹ̀ lẹ nọtena odẹ̀ sinsẹ̀n-basitọ nugbonọ lẹ tọn he nọ yin alọkẹyi lẹ. (Salm. 141:2) Ṣigba, owán ylankan de wẹ nuyọnwan he mẹho 70 enẹlẹ to mimẹ̀ hlan yẹwhe lalo lẹ yin na Jehovah. Owán odẹ̀ yetọn lẹ tọn ma yọ́nsè na ẹn. (Howh. 15:8) Mẹho enẹlẹ to yede klọ dọmọ: “Jehovah ma to mí mọ.” Amọ́, Jehovah to mimọ yé fẹẹ, e sọ do nuhe wà yé te to tẹmpli Etọn mẹ lọ lẹpo hia Ezekiẹli!

12. Naegbọn mí dona nọ yin nugbonọ etlẹ yin “to zinvlu mẹ,” podọ mẹnu lẹ na taun tọn wẹ dona nọ ze apajlẹ dagbe dai to ehe mẹ?

¹² Etẹwẹ kandai Ezekiẹli tọn he gando mẹho Islaeli tọn 70 he to nuyọnwan mẹ̀ hlan yẹwhe lalo lẹ go lọ sọgan plọn mí? Eyin Jiwheyẹwhe na sè odẹ̀ mítọn lẹ—bọ sinsẹ̀n-bibasi mítọn nasọ wé ṣeke to nukun etọn mẹ—mí dona nọ yin nugbonọ etlẹ yin “to zinvlu mẹ.” (Howh. 15:29) Mì gbọ mí ni hẹn do ayiha mẹ dọ whelẹponu wẹ nukun Jehovah tọn he nọ mọ nulẹpo lẹ nọ tin to mí ji. Eyin Jehovah yin omẹ nujọnu tọn de na mí, mí ma na wà nudepope he mí yọnẹn dọ e ma nọ hẹn homẹ etọn hùn to nuglọ. (Heb. 4:13) Titengbe mẹho agun tọn lẹ dona nọ ze apajlẹ dagbe dai to gbẹzan Klistiani tọn zinzan mẹ. (1 Pita 5:2, 3) Mẹhe agun lọ bẹhẹn lẹ nọ gbọn gbesisọ dali donukun dọ mẹho he nọ ṣite to nukọn yetọn nado deanana yé to sinsẹ̀n-bibasi mẹ to opli ji lẹ ni nọgbẹ̀ sọgbe hẹ nunọwhinnusẹ́n Biblu tọn lẹ etlẹ yin “to zinvlu mẹ,” enẹ wẹ to whenue mẹdevo lẹ ma to mimọ yé.—Salm. 101:2, 3.

13. Etẹwẹ Ezekiẹli mọ bọ yọnnu atẹṣitọ lẹ to wiwà to họngbo tẹmpli lọ tọn dopo kọ̀n?

¹³ Hia Ezekiẹli 8:13, 14. To whenue Jehovah ko do osùnú awe tintan lẹ hia Ezekiẹli godo, e sọ vọ́ dọna ẹn dọmọ: “Hiẹ na mọ osùnú he tlẹ sọ ylanhu, he yé to wiwà lẹ.” Etẹwẹ yẹwhegán lọ mọ to enẹgodo? To “họngbo he to agewaji na ohọ̀ Jehovah tọn lọ nù,” e mọ “yọnnu he sinai bo to avivi na yẹwhe Tamuzi tọn wutu lẹ.” Tamuzi yin yẹwhe Mẹsopotamia tọn de he nọ yin yiylọdọ Dumuzi to kandai Sumer-nu lẹ tọn mẹ bo nọ saba yin pinpọnhlan taidi mẹyiwanna yẹwhe-yọnnu vijiji tọn Iṣta tọn.d E taidi dọ avi he ví yọnnu Islaelivi lọ lẹ te yin apadewhe oyẹsu sinsẹ̀n tọn de tọn he tindo kanṣiṣa hẹ okú Tamuzi tọn. Gbọn avivivi na Tamuzi to tẹmpli Jehovah tọn mẹ dali, yọnnu enẹlẹ to hùnwhẹ kosi tọn de basi to ahọnkan sinsẹ̀n-basi wiwe-ṣeke tọn mẹ. Ṣigba, hùnwhẹ sinsẹ̀n lalo tọn de ma na lẹzun wiwe, na e yin bibasi to tẹmpli Jiwheyẹwhe tọn mẹ wutu. Kakatimọ, to pọndohlan Jehovah tọn mẹ, “osùnú” de wà wẹ yọnnu atẹṣitọ enẹlẹ te!

14. Etẹwẹ pọndohlan Jehovah tọn gando nuyiwa yọnnu atẹṣitọ lọ lẹ tọn go sọgan plọn mí?

¹⁴ Etẹwẹ pọndohlan Jehovah tọn gando nuhe wà yọnnu enẹlẹ te go sọgan plọn mí? Na sinsẹ̀n-bibasi mítọn nido wé ṣeke, mí ma dona nọ ṣaka ẹ dopọ hẹ aṣa mawé kosi tọn lẹ. Enẹwutu, mí ma dona nọ doalọ to hùnwhẹ depope he wá sọn aṣa sinsẹ̀n kosi tọn lẹ mẹ. Be fie aṣa de wá sọn ka yin nujọnu nugbonugbo ya? Gbau! To egbehe, aṣa he nọ yin hihodo to hùnwhẹ delẹ whenu, taidi to Noẹli po Paaki po whenu lẹ sọgan taidi nuhe ma ylan. Ṣigba, mí ni ma wọn blo dọ Jehovah to finẹ bo mọ whenue aṣa kosi tọn enẹlẹ wá diọ vudevude zun hùnwhẹ egbezangbe tọn lẹ. To pọndohlan Jehovah tọn mẹ, ojlẹ he juwayi kavi vivẹnudido gbẹtọvi lẹ tọn nado ṣaka aṣa kosi tọn lẹ dopọ hẹ sinsẹ̀n-bibasi wiwe-ṣeke ma na zọ́n bọ yé na gọ̀n mayin osùnú.—2 Kọl. 6:17; Osọ. 18:2, 4.

15, 16. Etẹ wà wẹ sunnu 25 delẹ te to awánu homẹ tọn tẹmpli lọ tọn mẹ, podọ naegbọn nuyiwa yetọn do hẹn homẹgble Jehovah taun?

¹⁵ Hia Ezekiẹli 8:15-18. Jehovah do nuhẹnmẹ jọsi ẹnẹtọ he yin godo tọn lọ hia po hogbe he mí ko jẹakọ hẹ todin ehelẹ po dọmọ: “Hiẹ na mọ osùnú he tlẹ sọ ylan taun hú enẹlẹ.” Vlavo yẹwhegán lọ sọgan ko kanse ede dọ: ‘Etẹwẹ gán sọ ylanhu nuhe n’ko mọ wayi lẹ?’ Awánu homẹ tọn tẹmpli lọ tọn mẹ wẹ Ezekiẹli te todin. To finẹ, to họntonu tẹmpli lọ tọn, e mọ sunnu 25 he to taliai nado sẹ̀n “owhè to whèzẹtẹn.” Nuylankan hugan he sunnu enẹlẹ sọgan ko wà nado hẹn homẹgble Jehovah niyẹn. Etẹwutu mí do dọ mọ?

¹⁶ Yí nukun homẹ tọn do pọ́n: Tẹmpli Jiwheyẹwhe tọn yin gbigbá to aliho de mẹ bọ họntonu etọn pànta whèzẹtẹn-waji. Mẹhe to tẹmpli lọ mẹ biọ nado basi sinsẹ̀n lẹ nọ pannukọn whèyihọ-waji bo nọ dogodo owhè he to zizẹ to whèzẹtẹn. Amọ́, sunnu 25 he yin nùdego to numimọ lọ mẹ lẹ “dogodo tẹmpli” lọ bo wá pannukọn whèzẹtẹn nado sẹ̀n owhè. Gbọnmọ dali, Jehovah wẹ yé dogodo, na “ohọ̀ Jehovah tọn” wẹ tẹmpli lọ. (1 Ahọ. 8:10-13) Atẹṣi wẹ sunnu 25 enẹlẹ te. Yé gbẹkọ Jehovah go bo tùnafọ gbedide etọn he tin to Deutelonomi 4:15-19 mẹ ji. Lehe yé hẹn homẹgble Jiwheyẹwhe he jẹna mẹdezejo mlẹnmlẹn lọ do sọ!

17, 18. (a) Etẹwẹ mí sọgan plọn sọn otàn owhè-sẹ̀ntọ he to tẹmpli lọ mẹ lẹ tọn mẹ? (b) Haṣinṣan tẹlẹ wẹ Islaelivi atẹṣitọ lọ lẹ hẹngble, podọ gbọnna?

¹⁷ Etẹwẹ mí sọgan plọn sọn otàn owhè-sẹ̀ntọ enẹlẹ tọn mẹ? Na sinsẹ̀n-bibasi mítọn nido wé ṣeke, mí dona nọ lẹhlan Jehovah nado mọ hinhọ́n gbigbọmẹ tọn yí. Flindọ, “owhè . . . wẹ Jehovah Jiwheyẹwhe,” bọ Ohó etọn sọ yin “hinhọ́n de” na ali mítọn. (Salm. 84:11; 119:105) Gbọn Ohó etọn po owe sinai do Biblu ji he titobasinanu etọn nọ wleawuna lẹ po gblamẹ, e nọ hẹn hinhọ́n họnwun to ayiha po ahun mítọn po mẹ bo nọ dohia mí lehe mí sọgan tindo gbẹzan kọdetọn dagbenọ de todin bosọ mọ ogbẹ̀ madopodo yí to sọgodo do. Eyin mí nọ lẹhlan aihọn ehe nado dín hinhọ́n he mí nado deanana gbẹzan mítọn, be Jehovah dogodo wẹ mí te. Nuyiwa to aliho mọnkọ mẹ na hẹn homẹgble e sinsinyẹn bosọ hẹn ẹn blawu yì ahun mẹ. Mí ma na jlo gbede nado wàmọ na Jiwheyẹwhe mítọn! Numimọ Ezekiẹli tọn sọ yin avase de na mí dọ mí dona nọ dapana mẹhe dogodo nugbo lẹ, enẹ wẹ atẹṣitọ lẹ.—Howh. 11:9.

¹⁸ Dile mí ko mọ do kakajẹ din, Ezekiẹli yí nukun do mọ nuyiwa boṣiọ-sinsẹ̀n po sinsẹ̀n-bibasi lalo po tọn ẹnẹ he hẹnmẹ jọsi bo do obá he mẹ Juda atẹṣitọ lọ gblezọn to gbigbọ-liho jẹ hia. Gbọn yede hinhẹnflu to gbigbọ-liho dali, Islaelivi enẹlẹ hẹn haṣinṣan dagbe he akọta yetọn tindo hẹ Jiwheyẹwhe gble. Hẹnflu gbigbọmẹ tọn ka nọ zọnpọ hẹ walọ gblezọn to whelẹponu. Enẹwutu, e ma yin nupaṣamẹ dọ Islaelivi atẹṣitọ lọ lẹ sọ doalọ to walọ gblezọn wunmẹ lẹpo mẹ, ehe hẹn haṣinṣan yetọn gble, e ma yin hẹ Jiwheyẹwhe kẹdẹ ṣigba hẹ hatọ yetọn lẹ ga. Todin, mì gbọ mí ni pọ́n lehe yẹwhegán Ezekiẹli basi zẹẹmẹ doyiyi walọ dagbe tọn Juda atẹṣitọ lọ tọn to gbọdo glọ do.

19. Nawẹ Ezekiẹli basi zẹẹmẹ obá he mẹ akọta alẹnu tọn Jehovah tọn gblezọn to walọyizan-liho jẹ tọn gbọn?

¹⁹ Hia Ezekiẹli 22:3-12. Akọta lọ pete wẹ gblezọn to walọyizan-liho, yèdọ sọn ogán lẹ ji jẹ omẹ paa lẹ ji. “Ahọvi,” kavi nukọntọ lẹ nọ yí aṣẹpipa yetọn zan nado sọ̀n ohùn homẹvọnọ tọn dai. Akọta lọ blebu sọ nọ hodo apajlẹ nukọntọ lẹ tọn to Osẹ́n Jiwheyẹwhe tọn gbigbà mẹ. To whẹndo mẹ, ovi lẹ “nọ vlẹ” mẹjitọ yetọn lẹ kò bọ zanhẹmẹ to hẹnnumẹ lẹ ṣẹnṣẹn sọ gbayipe taun. To aigba lọ pete ji, Islaelivi tasinyẹntọ lẹ nọ hò mẹhe to jonọ-gbéji lẹ dù bo nọ sayana tọṣiọvi po asuṣiọsi lẹ po. Islaelivi sunnu lẹ nọ zanhẹ asi kọmẹnu yetọn lẹ tọn gánnugánnu. Nukunkẹn do tadu gbẹtọ lọ lẹ sọmọ bọ alọgodo-kuẹ yíyí, alọslonamẹ gọna akuẹ-yannamẹ po akuẹvi po gbọn kámẹ-gòmẹ. Lehe e na ko doadi homẹ na Jehovah do sọ nado mọdọ akọta alẹnu tọn etọn to afọtùn Osẹ́n etọn ji bo wọnji gbigbọ owanyi tọn he ji Osẹ́n lọ sinai do go! Obá he mẹ yé gblezọn jẹ to walọyizan-liho vẹna Jehovah taun. E na anademẹ Ezekiẹli dọ ni dọna akọta walọ gbíngbánnọ lọ dọmọ: “Mì ko wọn mi pete.”

20. Naegbọn nuhe Ezekiẹli dọ gando walọ mawé Juda tọn go lẹ dona duahunmẹna mí to egbehe?

²⁰ Naegbọn nuhe Ezekiẹli dọ gando walọ mawé Juda tọn go lẹ dona duahunmẹna mí to egbehe? Hẹnflu Juda atẹṣitọ lọ tọn hẹn mí flin obá he mẹ aihọn he mẹ mí to gbẹnọ te to egbehe ko gblezọn jẹ. Aṣẹpatọ tonudidọ tọn lẹ nọ ṣì aṣẹpipa yetọn zan bo nọ gbidikọna mẹjidugando yetọn lẹ. Sinsẹ̀ngán lẹ—titengbe nukọntọ sinsẹ̀n Mẹylọhodotọklisti tọn lẹ—nọ hodẹ̀ do awhàn akọta lẹ tọn tamẹ, ehe mẹ gbẹtọ livi madosọha lẹ ko hẹn ogbẹ̀ yetọn bu te. Nukọntọ sinsẹ̀n tọn lẹ ko zẹhudo nujinọtedo wiwejininọ tọn Biblu tọn he họnwun gando zanhẹmẹ go lẹ ji. Taidi kọdetọn de, nujinọtedo walọ dagbe tọn aihọn he mẹ mí te tọn fọ́n bo to doyi petepete. E họnwun dọ nuhe Jehovah dọna Juda atẹṣitọ lọ wẹ e na dọna sinsẹ̀n Mẹylọhodotọklisti tọn lẹ dọmọ: “Mì ko wọn mi pete.”

21. Etẹwẹ walọ mawé Juda hohowhenu tọn plọn mí?

²¹ Taidi omẹ Jehovah tọn lẹ, etẹwẹ walọ mawé Juda hohowhenu tọn plọn mí? Nado sẹ̀n Jehovah to aliho he sọgbe mẹ, mí dona nọ hẹn walọ dagbe go to adà lẹpo mẹ. Mọwiwà gán kàn dẹpẹ biọ to aihọn he gblezọn to walọyizan-liho ehe mẹ. (2 Tim. 3:1-5) Ṣigba, mí yọ́n nuhe Jehovah nọ lẹn gando walọ gblezọn wunmẹ lẹpo go. (1 Kọl. 6:9, 10) Mí nọ setonuna nujinọtedo walọ dagbe tọn Jehovah tọn lẹ, na mí yiwanna ewọ po osẹ́n etọn lẹ po wutu. (Salm. 119:97; 1 Joh. 5:3) Eyin mí jo míde na walọ mawé, enẹ na dohia dọ mí ma yiwanna Jiwheyẹwhe wiwe mítọn. Mí ma na jlo gbede dọ Jehovah ni wá dọ gando mí go dọ: “[A] ko wọn mi pete.”

22. (a) To dogbigbapọnna numimọ he Jehovah dohia gando Juda hohowhenu tọn go godo, etẹwẹ a magbe nado wà? (b) Etẹ ji wẹ mí na dọhodo to hosọ he bọdego mẹ?

²² Dogbigbapọnna numimọ he Jehovah dohia gando hẹnflu gbigbọmẹ tọn podọ walọyizan tọn Juda hohowhenu tọn go ko gọalọna mí nado plọn nuhọakuẹ susu. Matin ayihaawe, e ko yidogọna gbemima mítọn nado na Jehovah mẹdezejo mlẹnmlẹn he e jẹna. Nado jẹ yanwle enẹ kọ̀n, mí dona họ́ míde sọta boṣiọ-sinsẹ̀n wunmẹ lẹpo bo gbọṣi wiweji to walọyizan-liho. Ṣigba, etẹwẹ Jehovah wà na omẹ etọn he ma yin nugbonọ lọ lẹ? To whenue Ezekiẹli ko dán gbọn tẹmpli lọ mẹ pé godo, Jehovah dọna yẹwhegán etọn madoadúdẹji dọmọ: “Yẹn na do adi ṣie hia.” (Ezek. 8:17, 18) Mí na jlo nado yọ́n afọdide he Jehovah ze sọta Juda he ma yin nugbonọ lọ, na whẹdida mọnkọ pẹẹ wẹ na yin hinhẹn ṣẹ do aihọn ylankan ehe ji. Weta he bọdego na dọhodo lehe whẹdida he Jehovah lá sọta Juda lẹ yin hinhẹn ṣẹ do ji.