NUPINPLỌN 32
Ahọluduta Jiwheyẹwhe Tọn Ko to Gandu!
Ahọluduta Jiwheyẹwhe tọn jẹ gandu ji to olọn mẹ sọn 1914. Ojlẹ enẹ dopolọ mẹ wẹ gandudu gbẹtọvi tọn biọ azán godo tọn etọn lẹ mẹ. Nawẹ mí wagbọn do yọ́n enẹ? Gbọ mí ni gbadopọnna dọdai Biblu tọn, gọna nujijọ po walọyizan gbẹtọ lẹ tọn delẹ po he hẹn enẹ họnwun bẹsọn 1914.
1. Etẹwẹ dọdai Biblu tọn lẹ ko dohia?
To Biblu mẹ, owe Daniẹli tọn dohia dọ Ahọluduta Jiwheyẹwhe tọn na jẹ gandu ji to vivọnu ojlẹ de tọn, he yin yiylọdọ “ojlẹ ṣinawe.” (Daniẹli 4:16, 17) To owhe kanweko susu godo, whenue Jesu wá to hodọ gando ojlẹ enẹ dopolọ go e ylọ ẹ dọ “ojlẹ dide akọta lẹ tọn,” podọ e plọnmẹ dọ ojlẹ enẹ ma ko wá vivọnu. (Luku 21:24) Dile mí na mọ do, ojlẹ ṣinawe lọ lẹ wá vivọnu to owhe 1914 mẹ.
2. Etẹwẹ nuhe to jijọ to aihọn mẹ lẹ po walọyizan gbẹtọ lẹ tọn po dohia bẹsọn 1914?
Devi Jesu tọn lẹ kanse e dọmọ: “Etẹwẹ na yin ohia tintin tofi towe tọn po vivọnu titonu lọ tọn po?” (Matiu 24:3) Nado na yé gblọndo, Jesu dọ dọdai nususu tọn he na jọ to whenue ewọ na hẹ gánzinpo ji to olọn mẹ taidi Ahọlu na Ahọluduta Jiwheyẹwhe tọn. Delẹ to nujijọ lọ lẹ mẹ wẹ awhàn, núdùdù whèdomẹ, po aigba sisọsisọ lẹ po. (Hia Matiu 24:7.) Biblu sọ dọ dọdai dọ walọyizan he gbẹtọ lẹ na tindo to “azán godo tọn lẹ” mẹ na zọ́n bọ gbẹninọ na “vẹawu nado pehẹ.” (2 Timoti 3:1-5) Nujijọ enẹlẹ gọna walọyizan mọnkọ lẹ ko gbayipe taun sọn 1914 jẹ egbé.
3. Naegbọn ninọmẹ nulẹ tọn do ylan sọmọ sọn whenue Ahọluduta Jiwheyẹwhe tọn jẹ gandu ji?
Ojlẹ vude to whenue Jesu lẹzun Ahọlu na Ahọluduta Jiwheyẹwhe tọn godo, ewọ funawhàn hẹ Satani po aovi lẹ po to olọn mẹ. Bọ Satani ṣiawhàn. Biblu dọ gando Satani go dọ “ewọ yin dindlan do aigba ji, podọ angẹli etọn lẹ yin dindlan do odò po e po.” (Osọhia 12:9, 10, 12) Satani to adi ji sinsinyẹn na e yọnẹn dọ emi na yin vivasudo. Enẹwutu, e nọ hẹn awufiẹsa po yajiji po wá mẹhe to ogbẹ̀ lọ mẹ lẹpo ji. Abajọ ninọmẹ nulẹ tọn do ylan sọmọ! Amọ́ Ahọluduta Jiwheyẹwhe tọn na de nuhahun ehe lẹpo sẹ̀ bo vọ́ nulẹpo jlado.
DINDONANU DOGỌ
Gbadopọnna lehe mí wagbọn do yọnẹn dọ 1914 wẹ Ahọluduta lọ jẹ gandu ji, podọ nuhe enẹ dona whàn mí nado wà.
4. Lehe sọhayiyina ojlẹ nujijọ Biblu tọn lẹ tọn do 1914 hia do
Jiwheyẹwhe hẹn Ahọlu Nẹbukadnẹzali he dugán do Babilọni hohowhenu tọn ji nado kudlọ de gando nujijọ sọgodo tọn delẹ go. Odlọ enẹ po tadena he Daniẹli na gandego po dohia dọ gandudu Nẹbukadnẹzali tọn po Ahọluduta Jiwheyẹwhe tọn po wẹ numimọ lọ to alọdlẹndo.—Hia Daniẹli 4:17.a
Hia Daniẹli 4:20-26, enẹgodo yí apotin he bẹ yẹdide zẹẹmẹ-bibasi tọn hẹn lọ zan nado na gblọndo na kanbiọ he bọdego lẹ:
(A) Etẹwẹ Nẹbukadnẹzali mọ to odlọ etọn mẹ?—Pọ́n wefọ 20 po 21 po.
(B) Etẹwẹ jọ do atin lọ go?—Pọ́n wefọ 23.
(C) Etẹwẹ jọ to vivọnu “ojlẹ ṣinawe” lọ tọn?—Pọ́n wefọ 26.
Kanṣiṣa He Odlọ He Gando Atin de Go lọ Tindo hẹ Ahọluduta Jiwheyẹwhe Tọn
DỌDAI LỌ (Daniẹli 4:20-36)
Gandudu
(A) Atin daho-gbó de
Gandudu lọ yin alọhẹndotena
(B) “Mì sán atin lọ liai,” bo dike “ojlẹ ṣinawe ni juwayi”
Gandudu lọ yin hinhẹngọwa
(C) “Ahọluduta towe nasọ lẹzun towe whladopo dogọ”
To hẹndi tintan dọdai ehe tọn mẹ . . .
(D) Mẹnu wẹ atin lọ nọtena?—Pọ́n wefọ 22.
(E) Nawẹ gandudu etọn yin alọhẹndotena gbọn?—Hia Daniẹli 4:29-33.
(F) Etẹwẹ jọ do Nẹbukadnẹzali go to vivọnu “ojlẹ ṣinawe” lọ lẹ tọn?—Hia Daniẹli 4:34-36.
HẸNDI TINTAN DỌDAI LỌ TỌN
Gandudu
(D) Nẹbukadnẹzali, Ahọlu Babilọni tọn
Gandudu lọ yin alọhẹndotena
(E) To owhe 606 J.W.M. godo, Nẹbukadnẹzali hùnalẹ̀ bo ma gán sọ deanana gandudu lọ ba na owhe ṣinawe pipé
Gandudu lọ yin hinhẹngọwa
(F) Nẹbukadnẹzali gọ̀ jẹgangan bọ gandudu etọn zindonukọn whladopo dogọ
To hẹndi awetọ dọdai ehe tọn mẹ . . .
(G) Mẹnu wẹ atin lọ nọtena?—Hia 1 Otànnugbo lẹ 29:23.
(H) Nawẹ gandudu yetọn yin alọhẹndotena gbọn? Nawẹ mí wagbọn do yọnẹn dọ e gbẹ́ pò to alọhẹndotenamẹ glọ etlẹ yin to ojlẹ he mẹ Jesu tin to aigba ji?—Hia Luku 21:24.
(I) Whetẹnu wẹ gandudu ehe yin hinhẹngọwa podọ to fitẹ?
HẸNDI AWETỌ DỌDAI LỌ TỌN
Gandudu
(G) Ahọlu Islaelivi he ze afọ gandudu Jiwheyẹwhe tọn dai lẹ
Gandudu lọ yin alọhẹndotena
(H) Jelusalẹm yin vivasudo, bọ gbọnmọ dali gandudu ahọlu Islaeli tọn lẹ tọn yin alọhẹndotena na owhe 2 520
Gandudu lọ yin hinhẹngọwa
(I) Jesu jẹ gandu ji to olọn mẹ taidi Ahọlu do Ahọluduta Jiwheyẹwhe tọn ji
Nawẹ ojlẹ ṣinawe lọ lẹ dẹnsọ?
Adà Biblu tọn de nọ gọalọna mí nado mọnukunnujẹ adà etọn devo lẹ mẹ. Di apajlẹ, owe Biblu tọn he nọ yin Osọhia dọ dọ ojlẹ atọ̀n daa sọzẹn hẹ azán 1 260. (Osọhia 12:6, 14) Ojlẹ ṣinawe ka bayi ojlẹ atọ̀n daa donu awe, kavi azán 2 520. To whedelẹnu, hogbe lọ “azán” to Biblu mẹ sọgan dlẹnalọdo owhe dopo. (Ezekiẹli 4:6) Aliho he mẹ ojlẹ ṣinawe he go owe Daniẹli tọn donù tofi lẹ na yin linlẹn te niyẹn. Enẹwutu, ojlẹ 7 lọ lẹ dẹn kavi nọtena owhe 2 520.
5. Ninọmẹ aihọn tọn ko diọ sọn 1914
Jesu ko dọ dọdai lehe nulẹ na te do to aihọn lọ mẹ tọn to whenue ewọ na lẹzun Ahọlu. Hia Luku 21:9-11, enẹgodo dọhodo kanbiọ ehe ji:
Detẹ to ninọmẹ ehelẹ mẹ wẹ a to mimọ kavi nọ sè linlin yetọn?
Apọsteli Paulu basi zẹẹmẹ jijọ he gbẹtọ lẹ na tindo to azán godo tọn gandudu gbẹtọvi tọn lẹ mẹ tọn. Hia 2 Timoti 3:1-5, enẹgodo dọhodo kanbiọ ehe ji:
Detẹ to jijọ enẹlẹ mẹ go wẹ a doayi dọ gbẹtọ lẹ tindo to egbezangbe?
6. Gandudu Ahọluduta Jiwheyẹwhe tọn nọ whàn mí nado yinuwa
Hia Matiu 24:3, 14, enẹgodo dọhodo kanbiọ ehelẹ ji:
Azọ́n titengbe tẹwẹ nọ dohia dọ Ahọluduta Jiwheyẹwhe tọn to gandu to alọnu din?
Etẹwẹ a gán wà nado doalọ to azọ́n ehe mẹ?
Ahọluduta Jiwheyẹwhe tọn ko to gandu to alọnu din, podọ azán he gbè e na dlẹnkan bo paṣẹ do aigba lọ blebu ji ko sẹpọ. Hia Heblu lẹ 10:24, 25, enẹgodo dọhodo kanbiọ ehe ji:
Etẹwẹ dopodopo mítọn dona wà dile mí “mọdọ azán lọ to dindọnsẹpọ”?
Eyin a plọn nude he gán gọalọna mẹdevo lẹ bosọ whlẹn yé, etẹwẹ enẹ na whàn we nado wà?
MẸDE SỌGAN KANSE DỌ: “Naegbọn Kunnudetọ Jehovah tọn lẹ nọ to owhe 1914 ké sọmọ?”
Etẹwẹ a na gblọn?
BLADOPỌ
Dọdai lẹ, ojlẹ nujijọ Biblu tọn lẹ tọn, gọna ninọmẹ aihọn lọ tọn dohia dọ Ahọluduta Jiwheyẹwhe tọn to gandu to alọnu. Mí nọ dohia dọ mí yí ehe sè gbọn yẹwhehodidọ gandego po opli agun tọn lẹ yìyì po dali.
Dogbapọn
Etẹwẹ jọ to vivọnu ojlẹ ṣinawe he sin dọdai Daniẹli dọ to Biblu mẹ lẹ tọn?
Etẹwẹ hẹn we kudeji dọ owhe 1914 mẹ wẹ Ahọluduta Jiwheyẹwhe tọn jẹ gandu ji te?
Etẹwẹ a gán wà nado dohia dọ a yise dọ Ahọluduta lọ ko to gandu?
PỌ́N NUDỌNAMẸ DEVO LẸ
Gbadopọnna nuhe whenuho-kantọ lẹ po mẹdevo lẹ po dọ gando diọdo he yin ayidego lẹdo aihọn pé lẹ go bẹsọn 1914.
“Whetẹnu Wẹ Jijọ Dagbe Jẹ Bubusẹ Ji to Aliho He Sẹhundaga Mẹ” (Fọ́n!, avril 2007 tọn)
Pọ́n lehe dọdai he tin to Matiu 24:14 mẹ yinuwado dawe de ji sisosiso do.
“N’Yiwanna Bọlu-Hihò Hú Nudevo Depope!” (Atọ̀họ̀-Nuhihọ́ lọ Tọn, Sọha 3 2017 tọn)
Nawẹ mí wagbọn do yọnẹn dọ dọdai he to Daniẹli weta 4tọ mẹ gando Ahọluduta Jiwheyẹwhe tọn go?
Etẹwẹ dohia dọ “ojlẹ ṣinawe” he go Daniẹli weta 4tọ donù lẹ wá vivọnu to 1914?
a Gbadopọnna hosọ awe he gbọngodo to adà lọ Pọ́n Nudọnamẹ Devo Lẹ glọ to nupinplọn ehe mẹ lẹ.