Owẹ̀n titengbe he ji Biblu dọhodo hugan lọ gando Ahọluduta Jiwheyẹwhe tọn go. Jehovah na yí Ahọluduta enẹ zan nado hẹn lẹndai he e tindo to dowhenu gando aigba go lọ di. Etẹwẹ Ahọluduta enẹ yin? Nawẹ mí gán wagbọn do yọnẹn dọ e to gandu to alọnu din? Etẹwẹ e ko wadotana? Podọ etẹwẹ e na wà to sọgodo? Nupinplọn ehe po awe he bọdego lẹ po na na gblọndo kanbiọ enẹlẹ tọn.

1. Etẹwẹ Ahọluduta Jiwheyẹwhe tọn yin, podọ mẹnu wẹ yin Ahọlu etọn?

Ahọluduta lọ yin gandudu de he yin didoai gbọn Jehovah Jiwheyẹwhe dali. Jesu Klisti he yin Ahọlu etọn to gandu sọn olọn mẹ. (Matiu 4:17; Johanu 18:36) Biblu dọ gando Jesu go dọ: “Ewọ nasọ yin Ahọlu . . . kakadoi.” (Luku 1:32, 33) Taidi Ahọlu Ahọluduta Jiwheyẹwhe tọn, Jesu na dugán do gbẹtọvi he to aigba ji lẹpo ji.

2. Mẹnu lẹ wẹ to gandu hẹ Jesu?

E ma yin Jesu kẹdẹ wẹ na deanana gandudu lọ. Omẹ voovo lẹ sọn “hẹnnu lẹ, ogbè lẹ, gbẹtọ lẹ, podọ sọn akọta lẹpo mẹ [wẹ] na duahọlu do aigba ji” hẹ Klisti. (Osọhia 5:9, 10) Yé omẹ nẹmu wẹ? Sọn owhe he mẹ gbọ́n Jesu wá aigba ji jẹ din, gbẹtọ livi susu wẹ ko lẹzun Klistiani, yèdọ hodotọ etọn lẹ. Ṣigba, be omẹ ehe lẹpo wẹ na yì duahọlu hẹ ẹ ya? Paali, gbẹtọ 144 000 poun wẹ na yì olọn mẹ nado dugán hẹ Jesu. (Hia Osọhia 14:1-4.) Klistiani devo he pò to aigba ji lẹpo na lẹzun mẹjidugando kavi tòvi Ahọluduta lọ tọn lẹ.—Salmu lẹ 37:29.

3. Etẹwẹ dohia dọ Ahọluduta Jiwheyẹwhe tọn yọ́n taun hugan gandudu gbẹtọvi tọn lẹ?

Eyin gbẹtọvi gandutọ lẹ tlẹ to kanván nado wà nudagbe lẹ, yé ma nọ do huhlọn sọmọ nado wà nuhe yé jlo lẹpo. Na to ojlẹ de godo, gandutọ devo lẹ nọ wá jẹ otẹn yetọn mẹ bo sọgan nọma nọ kiya paali na nuhudo tòvi lẹ tọn. Ṣigba, na nuhe dù Jesu he yin Gandutọ Ahọluduta Jiwheyẹwhe tọn, gbẹtọvi devo depope ma na jẹ otẹn etọn mẹ pọ́n gbede. Jiwheyẹwhe ko “ze ahọluduta de dai he ma na yin vivasudo gbede.” (Daniẹli 2:44) Jesu na paṣẹ do aigba lọ blebu ji, podọ e ma na homẹnukuntapọn. Gandutọ owanyinọ, homẹdagbenọ po dodonọ de po wẹ ewọ, podọ e na plọn gbẹtọ lẹ nado nọ hodo apajlẹ etọn, bo nọ yí owanyi, homẹdagbe, po dodo po do yinuwa hẹ yenọzo.—Hia Isaia 11:9.

4. Gandudu huhlọnnọ de na paṣẹ do aigba lọ blebu ji

Huhlọn gandudu tọn he Jesu Klisti tindo ma sọgan yin yiyijlẹdo gandutọ he ko nọgbẹ̀ pọ́n depope tọn go. Hia Matiu 28:18, enẹgodo dọhodo kanbiọ ehe ji:

• Nawẹ aṣẹpipa Jesu tọn yiaga hugan gbẹtọvi gandutọ lẹ tọn gbọn?

Gandudu gbẹtọvi tọn lẹ nọ to didiọ sọn mẹde ji jẹ mẹdevo ji, podọ dopodopo yetọn nọ paṣẹ do apadewhe aigba tọn poun ji. Be nudopolọ wẹ e na yin na Ahọluduta Jiwheyẹwhe tọn ya? Hia Daniẹli 7:14, enẹgodo dọhodo kanbiọ ehelẹ ji:

• Naegbọn e do yin wẹndagbe de dọ Ahọluduta Jiwheyẹwhe tọn “ma na yin vivasudo”?

• Naegbọn e do yọ́n dọ e na dugán do aigba lọ blebu ji?

5. Gandudu gbẹtọvi tọn dona yin didesẹ

Naegbọn Ahọluduta Jiwheyẹwhe tọn dona yitẹn sọn gandudu gbẹtọvi tọn lẹ si? Hò VIDEO lọ, enẹgodo dọhodo kanbiọ he bọdego ji.

VIDEO: Etẹwẹ Ahọluduta Jiwheyẹwhe Tọn Yin?—Adà Kleun De (1:41)

• Etẹlẹ mẹ wẹ gandudu gbẹtọvi tọn lẹ ko dekọtọn do?

Hia Yẹwhehodọtọ 8:9, enẹgodo dọhodo kanbiọ ehelẹ ji:

• Be a lẹndọ e biọ dọ Ahọluduta Jiwheyẹwhe tọn ni diọtẹnna gandudu gbẹtọvi tọn lẹ ya? Etẹwutu?

6. Gandutọ Ahọluduta lọ tọn lẹ nọ mọnukunnujẹ ninọmẹ mítọn mẹ

Na Jesu he yin Ahọlu mítọn ko nọgbẹ̀ taidi gbẹtọvi de pọ́n wutu, ewọ sọgan “vẹawu madogán mítọn lẹ.” (Heblu lẹ 4:15) Sunnu po yọnnu po nugbonọ 144 000 he na dugán hẹ Jesu lẹ lọsu ko yin dide gbọn Jehovah dali, “sọn hẹnnu lẹ, ogbè lẹ, gbẹtọ lẹ, podọ sọn akọta lẹpo mẹ.”—Osọhia 5:9.

• Be a mọdọ tulinamẹnu de wẹ e yin dọ Jesu po gandutọgbẹ etọn lẹpo po yin mẹhe ko nọgbẹ̀ to aigba ji pọ́n bo yọ́n nuhe nọ gbò gbẹtọvi lẹ ya? Naegbọn a do dọ mọ?

7. Osẹ́n dagbe hugan lẹ wẹ Ahọluduta Jiwheyẹwhe tọn zedai

Gandudu aihọn tọn lẹ nọ do osẹ́n lẹ, po linlẹn lọ po dọ ehe na hẹn ale wá na tòvi yetọn lẹ bosọ basi hihọ́na yé. Ahọluduta Jiwheyẹwhe tọn lọsu ko ze osẹ́n delẹ dai, ehe tòvi etọn lẹ dona nọ yìn. Hia 1 Kọlintinu lẹ 6:9-11, enẹgodo dọhodo kanbiọ ehelẹ ji:

• Nawẹ a lẹndọ ogbẹ̀ lọ na te eyin mẹlẹpo nọ yìn osẹ́n he Jiwheyẹwhe do gando walọyizan go lẹ?a

• Be a lẹndọ e sọgbe hẹ lẹnpọn dagbe dọ Jehovah nọ donukun dọ tòvi Ahọluduta lọ tọn lẹ ni setonuna osẹ́n enẹlẹ ya? Naegbọn a do lẹnmọ?

• Etẹwẹ dohia dọ mẹhe ma nọ yìn osẹ́n enẹlẹ sọgan diọ jijọ?—Pọ́n wefọ 11.

BLADOPỌ

Ahọluduta Jiwheyẹwhe tọn yin gandudu nujọnu tọn de he to olọn mẹ bo na dugán do aigba lọ blebu ji.

Dogbapọn

• Mẹnu lẹ wẹ yin gandutọ Ahọluduta Jiwheyẹwhe tọn?

• Etẹwẹ dohia dọ Ahọluduta Jiwheyẹwhe tọn yọ́n taun hugan gandudu gbẹtọvi tọn depope?

• Etẹwẹ yin delẹ to nuhe Jehovah nọ donukun dọ tòvi Ahọluduta lọ tọn lẹ ni wà lẹ mẹ?

PỌ́N NUDỌNAMẸ DEVO LẸ

Gbadopọnna nuhe Jesu plọnmẹ gando fie Ahọluduta lọ te go.

“Be Ahun mẹ Wẹ Ahọluduta Jiwheyẹwhe Tọn te Ya?” (Hosọ Intẹnẹt ji tọn)

Naegbọn Kunnudetọ Jehovah tọn lẹ do nọ magbe nado yin nugbonọ mlẹnmlẹn na Ahọluduta Jiwheyẹwhe tọn kakati ni yin gandudu gbẹtọvi tọn?

Yé Ze Yede Jo Mlẹnmlẹn Na Ahọluduta Jiwheyẹwhe Tọn (1:43)

Pọ́n nuhe Biblu dọ gando gbẹtọ 144 000 he Jehovah de nado dugán hẹ Jesu lẹ go.

“Mẹnu lẹ Wẹ Jei Olọn Mẹ?” (Hosọ Intẹnẹt ji tọn)

Etẹwẹ whàn nawe he to gànpamẹ de nado kudeji dọ Jiwheyẹwhe kẹdẹ janwẹ sọgan hẹn aihọn he mẹ dodowiwa na tin te de wá?

“N’Wá Mọ Nuhe Gán Doalọtena Whẹdida Agọ̀” (Fọ́n, novembre 2011 tọn)

Ahọluduta Jiwheyẹwhe tọn ko to gandu. To madẹnmẹ, diọdo susu lẹ wẹ e na hẹnwa aigba ji. Gbọ mí ni gbadopọnna delẹ to nudagbe he a gán to nukọnpọnhlan nado mọ to Ahọluduta lọ glọ lẹ mẹ.

1. Nawẹ Ahọluduta Jiwheyẹwhe tọn na hẹn jijọho po whẹdida dodo po gọwá aigba ji gbọn?

Jesu, yèdọ Ahọlu Ahọluduta Jiwheyẹwhe tọn na và mẹylankan lẹ po gandudu aihọn tọn lẹ po sudo to awhàn Amagẹdọni tọn whenu. (Osọhia 16:14, 16) To ojlẹ enẹ mẹ, dọdai Biblu tọn ehe na mọ hẹndi mlẹnmlẹn, he dọ: “Na whenu pẹẹde dogọ, mẹylankan lẹ ma na tin ba.” (Salmu lẹ 37:10) Gbọn Ahọluduta lọ gblamẹ, Jesu na hẹn ẹn diun dọ jijọho po whẹdida dodo po tin to aigba ji.—Hia Isaia 11:4.

2. Nawẹ gbẹninọ na te to whenue ojlo Jiwheyẹwhe tọn na yin wiwà to aigba ji?

To whenue Ahọluduta Jiwheyẹwhe tọn na to gandu, “dodonọ lẹ wẹ na dugu aigba tọn, yé nasọ nọgbẹ̀ to e ji kakadoi.” (Salmu lẹ 37:29) Yí nukun homẹ tọn do pọ́n lehe gbẹninọ na te to aihọn de mẹ fihe mẹlẹpo na yin dodonọ bo nasọ yiwanna Jehovah po ode awetọ po te! Mẹde ma na jẹazọ̀n, podọ mẹlẹpo na nọgbẹ̀ kakadoi.

3. Ale tẹlẹ wẹ Ahọluduta Jiwheyẹwhe tọn na hẹnwa to vasudo mẹylankan lẹ tọn godo?

To whenue mẹylankan lẹ ko yin vivasudo godo, Jesu na dugán taidi Ahọlu na owhe 1 000. To ojlẹ enẹ mẹ, ewọ po gandutọgbẹ́ etọn 144 000 lẹ po na gọalọna gbẹtọvi he to aigba ji lẹ nado lẹzun mẹpipe. To vivọnu ojlẹ enẹ tọn, aigba na lẹzun paladisi whanpẹnọ de, fie gbẹtọvi ayajẹnọ he nọ setonuna osẹ́n Jehovah tọn lẹ bosọ nọ mọaleyi sọn e mẹ lẹ nọ nọ̀. Enẹgodo, Jesu na gọ̀ gandudu lọ jo na Otọ́ etọn Jehovah. To whenẹnu, ‘oyín Jehovah tọn na yin kinklandowiwe’ hugan gbede pọ́n. (Matiu 6:9, 10) E na họnwun dọ Jehovah yin Gandutọ dagbe de he nọ hò dagbemẹninọ mẹjidugando etọn lẹ tọn pọ́n. To godo mẹ, Jehovah na và Satani, aovi lẹ gọna mẹdevo depope he de nado ṣiatẹ sọta gandudu Etọn sudo. (Osọhia 20:7-10) Ninọmẹ pipé he Ahọluduta Jiwheyẹwhe tọn na hẹnwa lẹ na nọ aimẹ kakadoi.

DINDONANU DOGỌ

4. Ahọluduta Jiwheyẹwhe tọn na hẹn gandudu gbẹtọvi tọn lẹpo wá opodo

“Gbẹtọ ko dugán do gbẹtọ ji na awugble etọn.” (Yẹwhehodọtọ 8:9) Jehovah na yí Ahọluduta etọn zan nado hẹn ẹn diun dọ nuyiwahẹmẹ agọ̀ ehe ma nasọ tin ba.

Hia Daniẹli 2:44 po 2 Tẹsalonikanu lẹ 1:6-8 po, enẹgodo dọhodo kanbiọ ehelẹ ji:

• Nawẹ Jehovah po Visunnu etọn Jesu po na yinuwa hẹ gandudu gbẹtọvi tọn lẹ po godonọnamẹtọ yetọn lẹ po gbọn?

• Nawẹ nuhe a ko plọn gando Jehovah po Jesu po go hẹn we kudeji dọ yé na yí whẹdida dodo zan to whenue yé to nuyiwa hẹ omẹ enẹlẹ gbọn?

5. Jesu wẹ Ahọlu dagbe hugan lọ

Taidi Ahọlu Ahọluduta Jiwheyẹwhe tọn, nususu lẹ wẹ Jesu na wà na dagbemẹninọ mẹjidugando etọn lẹ tọn to aigba ji. Hò VIDEO lọ nado pọ́n lehe Jesu dohia dọ emi tindo ojlo lọ nado gọalọna gbẹtọ lẹ bo ko sọ mọ huhlọn yí sọn Jiwheyẹwhe dè nado wàmọ do.

VIDEO: Jesu Do Ale He Ahọluduta lọ Na Hẹnwa lẹ Hia (1:13)

Whenue Jesu to aigba ji, e do nuhe Ahọluduta lọ na wadotana lẹ hia to kleun mẹ. Detẹ to dona he yin sislẹ tofi lẹ mẹ wẹ a to jejeji nado mọ? Hia wefọ he dọho gando dona lọ lẹ go lẹ.

6. Sọgodo na yọ́n taun to Ahọluduta Jiwheyẹwhe tọn glọ

VIDEO: Dohia Kleun Sọgodo Jiawu lọ Tọn (4:38)

Hia Salmu lẹ 145:16, enẹgodo dọhodo kanbiọ ehe ji:

• Numọtolanmẹ tẹwẹ a tindo todin he a wá yọnẹn dọ Jehovah na “hẹn pekọ wá na ojlo nutogbẹ̀ lẹpo tọn”?

BLADOPỌ

Ahọluduta Jiwheyẹwhe tọn na jẹ yanwle etọn kọ̀n. E na diọ aigba zun paladisi de lẹdo aihọn pé, fihe mẹhe nọ wà nudagbe lẹ na sẹ̀n Jehovah kakadoi te.

Dogbapọn

• Nawẹ Ahọluduta Jiwheyẹwhe tọn na klan oyín Jehovah tọn do wiwe gbọn?

• Naegbọn mí gán kudeji dọ Ahọluduta Jiwheyẹwhe tọn na hẹn opagbe he to Biblu mẹ lẹpo di?

• Dona Ahọluduta lọ tọn tẹwẹ a to jejeji nado mọ?

PỌ́N NUDỌNAMẸ DEVO LẸ

Pọ́n nuhe Amagẹdọni zẹẹmẹdo.

“Etẹwẹ Awhàn Amagẹdọni Tọn Zẹẹmẹdo?” (Hosọ Intẹnẹt ji tọn)

Gbadopọnna nujijọ he na wá aimẹ to nuhe Jesu ylọdọ ­“nukunbibia daho” lọ whenu lẹ.—Matiu 24:21.

“Etẹwẹ Nukunbibia Daho lọ Yin?” (Hosọ Intẹnẹt ji tọn)

Pọ́n lehe whẹndo lẹ gán lẹnayihamẹpọn dopọ do dona sọgodo tọn Ahọluduta lọ tọn lẹ ji do.

Mọ Dewe Hlan Paladisi Mẹ (1:50)

To hosọ lọ “Kanbiọ Susu lẹ Wẹ Dotukla Mi” mẹ, pọ́n lehe mẹhe nọ fọngu sọta tito tonudidọ tọn lẹ de wá mọ gblọndo na ahunmẹdunamẹnu etọn lẹ do.

“Biblu Nọ Diọ Gbẹzan Mẹtọn” (Alọnuwe Atọ̀họ̀-Nuhihọ́ lọ Tọn, 1^er janvier 2012 tọn)