HOSỌ OPLỌN TỌN 39
Be Oyín Towe Tin to “Owe Ogbẹ̀ Tọn lọ mẹ” Ya?
“Owe oflin tọn de sọ yin kinkandai to nukọn etọn na mẹhe dibusi Jehovah lẹ.”—MAL. 3:16.
OHÀN 61 Mì Zindonukọn, Mì Kunnudetọ Lẹ!
BLADOPỌa
To whenuho gblamẹ, Jehovah ko yí yinkọ lẹ dogọ to “owe ogbẹ̀ tọn lọ” mẹ (Pọ́n hukan 1, 2tọ)
1. Sọgbe hẹ Malaki 3:16, owe tẹwẹ Jehovah ko to awuwlena, podọ etẹwẹ e bẹhẹn?
NA OWHE fọtọ́n susu lẹ, Jehovah ko to awuwlena owe vonọtaun de. Owe ehe bẹ todohukanji yinkọ lẹ tọn de hẹn, bẹsọn yinkọ kunnudetọ nugbonọ tintan lọ Abẹli tọn ji.b (Luku 11:50, 51) Sọn owhe kanweko susu lẹ die, Jehovah ko yí yinkọ lẹ dogọ to owe lọ mẹ, podọ to egbehe, e bẹ yinkọ livi susu lẹ hẹn. To Biblu mẹ, owe enẹ yin yiylọdọ “owe oflin tọn de,” “owe ogbẹ̀ tọn lọ,” podọ “owe-hihá ogbẹ̀ tọn” lọ. To hosọ ehe mẹ, mí na dlẹnalọdo e taidi “owe ogbẹ̀ tọn lọ.”—Hia Malaki 3:16; Osọ. 3:5; 17:8.
2. Yinkọ mẹnu lẹ tọn wẹ yin kinkan do owe ogbẹ̀ tọn lọ mẹ, podọ etẹwẹ mí gán wà na yinkọ mítọn nido yin kinkan do owe enẹ mẹ?
2 Owe vonọtaun ehe bẹ yinkọ mẹhe nọ yí budisi kavi sisi sisosiso do basi sinsẹ̀n hlan Jehovah lẹpo tọn, gọna mẹhe yiwanna yinkọ etọn lẹ tọn hẹn. Yé na tindo dotẹnmẹ hundote lọ nado mọ ogbẹ̀ madopodo. To egbehe, yinkọ mítọn gán yin kinkan do owe enẹ mẹ eyin mí wleawuna haṣinṣan mẹdetiti tọn pẹkipẹki de hẹ Jehovah sinai do avọ́sinsan ofligọ tọn Visunnu etọn Jesu Klisti tọn ji. (Joh. 3:16, 36) Mímẹpo wẹ jlo dọ yinkọ mítọn ni yin kinkan do owe enẹ mẹ—vlavo mí tindo todido nado nọgbẹ̀ to olọn mẹ kavi to aigba ji.
3, 4. (a) Be mí na nọgbẹ̀ kakadoi eyin yinkọ mítọn tin to owe ogbẹ̀ tọn lọ mẹ todin wẹ ya? Basi zẹẹmẹ. (b) Etẹwẹ mí na gbadopọnna to hosọ ehe po dehe bọdego po mẹ?
3 Be ehe zẹẹmẹdo dọ mẹhe yinkọ yetọn yin kinkan do owe ehe mẹ lẹpo na mọ ogbẹ̀ madopodo janwẹ ya? Mí mọ gblọndo kanbiọ enẹ tọn to nuhe Jehovah dọna Mose to Eksọdusi 32:33 mẹ. Jehovah dọmọ: “Oyín mẹhe waylando do mi lẹ tọn wẹ yẹn na súnsún sẹ̀ sọn owe ṣie mẹ.” Enẹwutu, yinkọ he to owe enẹ mẹ todin lẹ gán yin didesẹ kavi yin súnsúnsún sẹ̀, taidi dọ Jehovah kàn yé to tintan whenu po crayon po wẹ nkọ, (yèdọ nukànnu de he gán yin súnsúnsún sẹ̀). (Osọ. 3:5, Odò.) Mí dona wà nuhe go mí pé lẹpo na yinkọ mítọn nido gbọṣi owe enẹ mẹ kakajẹ whenue e na taidi dọ e yin kinkan po nukànnu he ma gán yin súnsúnsún sẹ̀ de po wẹ nkọ.
4 Ehe sọgan fọ́n kanbiọ delẹ dote to ayiha mítọn mẹ. Di apajlẹ, etẹwẹ Biblu dọ gando mẹhe yinkọ yetọn ko yin kinkan do owe ogbẹ̀ tọn mẹ lẹ, gọna mẹhe yinkọ yetọn ma tin to e mẹ lẹ go? Whetẹnu wẹ mẹhe yinkọ yetọn gbọṣi owe enẹ mẹ lẹ na mọ ogbẹ̀ madopodo? Etẹwẹ lo na nuhe dù mẹhe kú bo ma ka tindo dotẹnmẹ lọ pọ́n gbede nado yọ́n Jehovah lẹ? Be e yọnbasi dọ yinkọ yetọn ni yin kinkan do owe enẹ mẹ ya? Kanbiọ ehelẹ na mọ gblọndo to hosọ ehe po dehe bọdego po mẹ.
YINKỌ MẸNU LẸ TỌN WẸ TO OWE LỌ MẸ?
5, 6. (a) Dile Filipinu lẹ 4:3 dohia do, yinkọ mẹnu lẹ tọn wẹ tin to dehe ko yin kinkan do owe ogbẹ̀ tọn lọ mẹ lẹ mẹ? (b) Whetẹnu wẹ yinkọ yetọn lẹ na yin kinkan do owe ogbẹ̀ tọn lọ mẹ kakadoi?
5 Yinkọ mẹnu lẹ tọn wẹ yin kinkan do owe yẹhiadonu tọn ehe mẹ? Nado na gblọndo kanbiọ enẹ tọn, mí na dọhodo pipli gbẹtọ tọn atọ́n delẹ ji. To omẹ ehelẹ mẹ, yinkọ mẹdelẹ tọn yin kinkan do owe ogbẹ̀ tọn lọ mẹ, bọ mẹdevo lẹ tọn ma to e mẹ.
6 Pipli tintan lọ bẹ mẹhe yin dide nado dugán hẹ Jesu to olọn mẹ lẹ hẹn. Be yinkọ yetọn lẹ tin to owe ogbẹ̀ tọn lọ mẹ todin wẹ ya? Gbau. Sọgbe hẹ nuhe apọsteli Paulu dọna “azọ́nwatọ hatọ” etọn he to Filipi lẹ, yinkọ mẹyiamisisadode lẹ tọn, yèdọ yinkọ mẹhe yin oylọ-basina nado dugán hẹ Jesu lẹ tọn tin to owe ogbẹ̀ tọn lọ mẹ to alọnu. (Hia Filipinu lẹ 4:3.) Amọ́, yé dona hẹn nugbonọ-yinyin yetọn go, na yinkọ yetọn nido gbọṣi owe yẹhiadonu tọn enẹ mẹ. Enẹgodo, whenue yé mọ hiadogonamẹ godo tọn yetọn yí, vlavo jẹnukọnna okú yetọn kavi whẹpo nukunbibia daho lọ nido gbajẹgbonu, yinkọ yetọn lẹ na yin kinkan do owe ehe mẹ kakadoi.—Osọ. 7:3.
7. Sọgbe hẹ Osọhia 7:16, 17, nukunnumọjẹnumẹ tẹwẹ mí tindo gando ojlẹ he mẹ yinkọ gbẹtọ susugege lẹngbọ devo lẹ tọn na yin kinkan do owe ogbẹ̀ tọn lọ mẹ kakadoi te go?
7 Pipli awetọ bẹ gbẹtọ susugege lẹngbọ devo lẹ tọn hẹn. Be yinkọ yetọn lẹ tin to owe ogbẹ̀ tọn lọ mẹ todin wẹ ya? Mọwẹ. Be yinkọ yetọn lẹ na pò to owe ogbẹ̀ tọn lọ mẹ whenue yé na lùn Amagẹdọni tọ́n godo wẹ ya? Gbau. (Osọ. 7:14) Jesu dọ dọ gbẹtọ taidi lẹngbọ ehelẹ na “nọgbẹ̀ kakadoi.” (Mat. 25:46) Amọ́, mẹhe na lùn Amagẹdọni tọ́n enẹlẹ ma na mọ ogbẹ̀ madopodo yí to afọdopolọji. To aliho de mẹ, yinkọ yetọn lẹ na gbẹ́ yin kinkan do owe ogbẹ̀ tọn lọ mẹ po nukànnu he gán yin súnsúnsún sẹ̀ de po. To Gandudu Owhe Fọtọ́n tọn lọ whenu, Jesu “na yin lẹngbọhọtọ yetọn bo na deanana yé yì asisa osin ogbẹ̀ tọn lẹ kọ̀n.” Mẹhe kẹalọyi anademẹ Klisti tọn to aliho dagbe mẹ lẹ bosọ yin whẹdana to godo mẹ taidi mẹhe yin nugbonọ na Jehovah lẹ sin yinkọ na yin kinkan do owe ogbẹ̀ tọn lọ mẹ kakadoi.—Hia Osọhia 7:16, 17.
8. Yinkọ mẹnu lẹ tọn wẹ ma yin kinkan do owe ogbẹ̀ tọn lọ mẹ, podọ etẹwẹ na jọ do yé go?
8 Pipli atọ̀ntọ lọ bẹ gbọgbọẹ he na yin vivasudo to Amagẹdọni whenu lẹ hẹn. Yinkọ yetọn ma tin to owe ogbẹ̀ tọn lọ mẹ. Jesu dọ dọ yé na “yin sinsánsẹ kakadoi.” (Mat. 25:46) Paulu dọna mí to gbọdo glọ dọ “omẹ ehelẹ na jiya whẹdida yasanamẹ he yin vasudo madopodo tọn.” (2 Tẹs. 1:9; 2 Pita 2:9) Nudopolọ wẹ gán yin didọ gando mẹhe desọn ojlo mẹ bo waylando sọta gbigbọ wiwe to whenuho gblamẹ lẹ go. Yelọsu na yin vivasudo kakadoi, yé ma na mọ ogbẹ̀ madopodo. Matin ayihaawe, yé ma na yin finfọnsọnku. (Mat. 12:32; Malku 3:28, 29; Heb. 6:4-6) Todin, mì gbọ mí ni gbadopọnna pipli gbẹtọ tọn awe he na yin finfọnsọnku do aigba ji lẹ po sọwhiwhe po.
MẸHE NA YIN FINFỌNSỌNKU LẸ
9. Dile Owalọ lẹ 24:15 dohia do, pipli gbẹtọ tọn awe tẹlẹ wẹ na yin finfọnsọnku do aigba ji, podọ vogbingbọn tẹwẹ to pipli awe ehelẹ mẹ?
9 Biblu dọho gando pipli gbẹtọ tọn awe delẹ go, he na yin finfọnsọnku po todido lọ po nado nọgbẹ̀ kakadoi to aigba ji, yèdọ “dodonọ lẹ” po “mawadodonọ lẹ” po. (Hia Owalọ lẹ 24:15.) “Dodonọ lẹ” wẹ mẹhe sẹ̀n Jehovah po nugbonọ-yinyin po to gbẹwhenu yetọn lẹ. To alọ devo mẹ, “mawadodonọ lẹ” wẹ mẹhe ma sẹ̀n Jehovah po nugbonọ-yinyin po lẹ. Na nugbo tọn, to suhugan whẹho lẹ tọn mẹ, yé ma yinuwa po dodowiwa po. Na pipli awe lẹ wẹ na yin finfọnsọnku wutu, be mí gán dọ dọ yinkọ yetọn yin kinkan do owe ogbẹ̀ tọn lọ mẹ wẹ ya? Nado mọ gblọndo kanbiọ enẹ tọn, mì gbọ mí ni gbadopọnna pipli lọ lẹ dopodopo.
10. Naegbọn “dodonọ lẹ” na yin finfọnsọnku, podọ lẹblanulọkẹyi tẹwẹ delẹ to yé mẹ na tindo? (Sọ pọ́n “Kanbiọ lẹ sọn Wehiatọ lẹ Dè” to zinjẹgbonu ehe mẹ gando fọnsọnku aigba ji tọn go.)
10 Pipli enẹtọ lọ wẹ “dodonọ lẹ.” Yinkọ yetọn lẹ ko yin kinkan do owe ogbẹ̀ tọn lọ mẹ whẹpo yé do kú. Be yinkọ yetọn lẹ yin didesẹ sọn owe enẹ mẹ to whenue yé kú wẹ ya? Lala, na yé gbẹ́ pò “to ogbẹ̀” to oflin Jehovah tọn mẹ. Jehovah yin “Jiwheyẹwhe mẹhe to ogbẹ̀ lẹ tọn . . ., e ma yin oṣiọ lẹ tọn gba, na yemẹpo wẹ to ogbẹ̀ na ẹn.” (Luku 20:38) Ehe zẹẹmẹdo dọ whenue dodonọ lẹ na yin hinhẹngọwá ogbẹ̀ to aigba ji, yinkọ yetọn lẹ na tin to owe ogbẹ̀ tọn lọ mẹ, dile etlẹ yindọ to linlẹn de mẹ yé na yin kinkàn po nukànnu he sọgan yin súnsúnsún sẹ̀ de po to tintan whenu. (Luku 14:14) Matin ayihaawe, delẹ to mẹhe na yin finfọnsọnku ehelẹ mẹ na tindo lẹblanulọkẹyi lọ nado sẹ̀n taidi “ahọvi lẹ to aigba lẹpo ji.”—Salm. 45:16.
11. Etẹwẹ “mawadodonọ lẹ” dona plọn whẹpo yinkọ yetọn nido sọgan yin kinkan do owe ogbẹ̀ tọn lọ mẹ?
11 Gbọngodo, mì gbọ mí ni dọhodo pipli atọ́ntọ ji, enẹ wẹ “mawadodonọ lẹ.” Vlavo na yé ma yọ́n nubiọtomẹsi Jehovah tọn lẹ wutu, yé ma zan gbẹzan dodowiwa tọn whẹpo do kú. Enẹwutu, yinkọ yetọn lẹ ma yin kinkan do owe ogbẹ̀ tọn lọ mẹ. Amọ́, Jiwheyẹwhe na fọ́n yé sọnku nado hùn dotẹnmẹ lọ dote na yé, na yinkọ yetọn lẹ nido yin kinkan do owe enẹ mẹ to godo mẹ. “Mawadodonọ” ehelẹ na do hudo alọgọ susu tọn. Whẹpo yé do kú, delẹ to yé mẹ wà nuhe ylan taun lẹ. Enẹwutu, e na biọ dọ yè ni plọn yé nado nọgbẹ̀ sọgbe hẹ nujinọtedo dodo tọn Jehovah tọn lẹ. Nado jẹ yanwle enẹ kọ̀n, Ahọluduta Jiwheyẹwhe tọn na deanana azọ́n mẹpinplọn tọn daho hugan he nkọ ma ko wá aimẹ to whenuho gbẹtọvi tọn gblamẹ pọ́n lọ.
12. (a) Mẹnu lẹ wẹ na plọnnu mawadodonọ lẹ? (b) Etẹwẹ na jọ do mẹhe gbẹ́ nado yí nuhe yin pinplọn yé lẹ do yizan mẹ lẹ go?
12 Mẹnu lẹ wẹ na plọnnu mawadodonọ lẹ? Gbẹtọ susugege lọ po dodonọ he na yin finfọnsọnku lẹ po wẹ. Eyin yinkọ mawadodonọ lẹ tọn na yin kinkan do owe ogbẹ̀ tọn lọ mẹ, yé dona wleawuna haṣinṣan pẹkipẹki de hẹ Jehovah bosọ klan yede do wiwe na ewọ. Jesu Klisti po whẹdatọ hatọ etọn lẹ po na tindo ojlo sisosiso to nukọnyiyi he mawadodonọ ehe lẹpo na basi lẹ mẹ. (Osọ. 20:4) Mẹdepope he gbẹ́ nado kẹalọyi alọgọ mọnkọ na yin didesẹ—eyin e tlẹ ko tindo owhe 100. (Isa. 65:20) Jehovah po Jesu po gán mọnú jẹ ahun mẹ, podọ yé ma na dike mẹdepope ni hẹn awugble depope wá to aihọn yọyọ lọ mẹ.—Isa. 11:9; 60:18; 65:25; Joh. 2:25.
FỌNSỌNKU OGBẸ̀ TỌN PO FỌNSỌNKU WHẸDIDA TỌN PO
13, 14. (a) To ojlẹ de mẹ wayi, nukunnumọjẹnumẹ tẹwẹ mí tindo gando hogbe Jesu tọn he to Johanu 5:29 mẹ lẹ go? (b) Etẹ go wẹ mí dona doayi gando hogbe enẹlẹ go?
13 Jesu sọ dọho gando mẹhe na yin finfọnsọnku do aigba ji fi lẹ go. Di apajlẹ e dọmọ: “Ojlẹ lọ ja, to ehe mẹ mẹhe to yọdò oflin tọn lẹ mẹ lẹpo na sè ogbè etọn bo tọ́njẹgbonu, mẹhe wà dagbe lẹ na fọnsọnku ogbẹ̀ tọn bọ mẹhe wà nuylankan lẹ na fọnsọnku whẹdida tọn.” (Joh. 5:28, 29) Etẹ dọ wẹ Jesu te taun?
14 To ojlẹ de mẹ wayi, mí mọnukunnujẹemẹ dọ hogbe Jesu tọn lẹ to alọdlẹndo nuhe mẹhe yin finfọnsọnku lẹ na wà to fọnsọnku yetọn godo; enẹ wẹ yindọ, mẹhe lẹkọwa ogbẹ̀ delẹ na wà nudagbe to whenuena mẹdevo lẹ na wà nuylankan lẹ. Amọ́, doayi e go dọ Jesu ma dọ dọ mẹhe ṣẹṣẹ tọ́n sọn yọdò oflin tọn mẹ lẹ na wà nudagbe lẹ kavi na wà nuylankan lẹ gba. Hogbe he e yizan lẹ dohia dọ nuhe ko jọ wayi lẹ hodọ wẹ e te. E dọho gando mẹhe “wà dagbe lẹ” po mẹhe “wà nuylankan lẹ” po go. Ehe dohia dọ nuhe yé wà ehelẹ jọ jẹnukọnna okú yetọn. Enẹ sọgbe hẹ lẹnpọn dagbe kavi e ma yin mọ wẹ? To popolẹpo mẹ, mẹdepope ma na yin dotẹnmẹ na nado wà nuylankan lẹ to aihọn yọyọ lọ mẹ. Enẹwutu, mawadodonọ lẹ dona ko wà nuylankan enẹlẹ jẹnukọnna okú yetọn. To whelọnu lo, nawẹ mí dona mọnukunnujẹ nuhe Jesu dọ gando “fọnsọnku ogbẹ̀ tọn” po “fọnsọnku whẹdida tọn” po mẹ go gbọn?
15. Mẹnu lẹ wẹ na mọ “fọnsọnku ogbẹ̀ tọn” yí, podọ etẹwutu?
15 Gbẹtọvi dodonọ he wà nudagbe jẹnukọnna okú yetọn lẹ na mọ “fọnsọnku ogbẹ̀ tọn” yí, na yinkọ yetọn lẹ na ko yin kinkan do owe ogbẹ̀ tọn lọ mẹ wutu. Ehe dohia dọ fọnsọnku “mẹhe wà dagbe lẹ” tọn he yin zẹẹmẹ basina to Johanu 5:29 mẹ yin nudopolọ hẹ fọnsọnku “dodonọ lẹ” tọn he yin nùdego to Owalọ lẹ 24:15 mẹ. Nukunnumọjẹnumẹ ehe sọgbe hẹ nuhe yin didọ to Lomunu lẹ 6:7 mẹ, ehe dọmọ: “Na mẹhe kú ko yin whẹsuna sọn ylando etọn mẹ.” Ylando dodonọ ehelẹ tọn ko yin jijona yé to whenue yé kú, amọ́ kandai nugbonọ-yinyin tọn yetọn gbọṣi aimẹ. (Heb. 6:10) Na nugbo tọn, dodonọ he yin finfọnsọnku ehelẹ dona hẹn nugbonọ-yinyin yetọn go, na yinkọ yetọn lẹ nido gbọṣi owe ogbẹ̀ tọn lọ mẹ.
16. Etẹwẹ “fọnsọnku whẹdida tọn” to alọdlẹndo?
16 Etẹwẹ lo na nuhe dù mẹhe wà nuylankan whẹpo do kú lẹ? Dile etlẹ yindọ ylando yetọn lẹ yin jijona yé to whenue yé kú, yé ma sẹ̀n Jehovah po nugbonọ-yinyin po to whenue yé togbẹ̀. Yinkọ yetọn lẹ ma yin kinkan do owe ogbẹ̀ tọn lọ mẹ. Enẹwutu, fọnsọnku “mẹhe wà nuylankan lẹ” tọn yin nudopolọ hẹ fọnsọnku “mawadodonọ lẹ” tọn he yin nùdego to Owalọ lẹ 24:15 mẹ. Yewlẹ wẹ na mọ “fọnsọnku whẹdida tọn”c yí. Mawadodonọ lẹ na yin whẹdana to linlẹn lọ mẹ dọ yé na yin gbigbejepọn. (Luku 22:30) E na yí whenu nado magbe eyin vlavo yé na yin whẹdana taidi mẹhe jẹ nado tindo yinkọ yetọn lẹ to owe ogbẹ̀ tọn lọ mẹ kavi lala. Kiki eyin mawadodonọ ehelẹ gbẹ́ aliho gbẹninọ tọn ylankan yetọn hoho lọ dai, bo klan yede do wiwe na Jehovah wẹ yinkọ yetọn lẹ gán yin kinkan do owe ogbẹ̀ tọn lọ mẹ.
17, 18. Etẹwẹ mẹhe na yin finfọnsọnku nado nọgbẹ̀ to aigba ji lẹ dona wà, podọ “walọ” tẹlẹ wẹ yin alọdlẹndo to Osọhia 20:12, 13 mẹ?
17 Vlavo mẹhe yin finfọnsọnku lẹ ko yin dodonọ kavi mawadodonọ jẹnukọnna okú yetọn, yé dona setonuna osẹ́n he tin to owe-hihá yọyọ he na yin hùnhùn to owhe 1000 lọ gblamẹ lẹ mẹ. Apọsteli Johanu basi zẹẹmẹ nuhe e mọ to numimọ de mẹ tọn dọmọ: “Yẹn sọ mọ oṣiọ lẹ, daho po pẹvi po, to ote to ofìn lọ nukọn, owe-hihá lẹ sọ yin hùnhùn. Ṣigba, owe-hihá devo yin hùnhùn; owe-hihá ogbẹ̀ tọn lọ wẹ. Oṣiọ lẹ sọ yin whẹdana sọn nuhe yin kinkan do owe-hihá lọ lẹ mẹ lẹ mẹ sọgbe hẹ walọ yetọn lẹ.”—Osọ. 20:12, 13.
18 To dodonu “walọ” tẹlẹ tọn ji wẹ mẹhe yin finfọnsọnku lẹ na yin whẹdana te? Be e na yin sọgbe hẹ walọ he yé zan whẹpo do kú lẹ wẹ a? Lala! Flindọ ylando he yé wà whẹpo do kú lẹ ko yin jijona yé. Enẹwutu tofi, “walọ yetọn lẹ” ma gán to alọdlẹndo nuhe yé wà whẹpo do kú lẹ. Kakatimọ, yé dona ko to alọdlẹndo walọ yetọn to aihọn yọyọ lọ mẹ to whenue yè ko plọnnu yé godo. Etlẹ yin sunnu nugbonọ lẹ taidi Noa, Samuẹli, Davidi po Daniẹli po dona plọnnu gando Jesu Klisti go bosọ do yise hia to avọ́sinsan etọn mẹ. Nẹmunẹmu wẹ e na yin na mawadodonọ lẹ!
19. Etẹwẹ na yin kọdetọn lọ na mẹhe gbẹ́ dotẹnmẹ hundote jiawu ehe dai lẹ?
19 Etẹwẹ na yin kọdetọn lọ na mẹhe gbẹ́ dotẹnmẹ hundote jiawu ehe dai lẹ? Osọhia 20:15 dọna mí dọ: “Humọ, mẹdepope he oyín etọn ma yin kinkan do owe ogbẹ̀ tọn lọ mẹ yin dindlan do agbàdo miyọ́n tọn lọ mẹ.” Mọwẹ, yé na yin vivasudo mlẹnmlẹn, podọ kakadoi. Enẹwutu, lehe e yin nujọnu do sọ dọ mí ni hẹn ẹn diun dọ yinkọ mítọn yin kinkan do owe ogbẹ̀ tọn lọ mẹ bosọ gbọṣi e mẹ!
Mẹmẹsunnu de to mahẹ do to tito mẹpinplọn tọn daho he na wá aimẹ to Owhe Fọtọ́n lọ whenu lọ mẹ (Pọ́n hukan 20tọ)
20. Azọ́n ojlofọndotenamẹ tọn tẹwẹ na yin wiwà to Gandudu Owhe Fọtọ́n tọn lọ whenu? (Pọ́n yẹdide he to wepa ji.)
20 Ojlẹ ojlofọndotenamẹ tọn nankọ die Gandudu Owhe Fọtọ́n tọn lọ na yin! Azọ́n mẹpinplọn tọn daho hugan he nkọ ma ko wá aimẹ pọ́n lọ na yin wiwà to aigba ji fi to ojlẹ enẹ mẹ. Amọ́, e nasọ yin ojlẹ de he mẹ walọyizan dodonọ lẹ po mawadodonọ lẹ po tọn na yin gbigbejepọn te. (Isa. 26:9; Owalọ 17:31) Nawẹ azọ́n mẹpinplọn tọn ehe na yin wiwà gbọn? Hosọ mítọn he bọdego na gọalọna mí nado mọnukunnujẹ awuwledainanu jiawu ehe mẹ bosọ yọ́n pinpẹn etọn.
OHÀN 147 Opagbe Ogbẹ̀ Madopodo Tọn Yin Dido
a Hosọ ehe bẹ vọjlado de hẹn gando nukunnumọjẹnumẹ mítọn go, na nuhe dù “fọnsọnku ogbẹ̀ tọn” po “fọnsọnku whẹdida tọn” po he hó Jesu dọ to Johanu 5:28, 29 mẹ. Mí na dọhodo nuhe fọnsọnku awe ehelẹ to alọdlẹndo ji, podọ mẹhe dopodopo yetọn na bẹhẹn lẹ.
b Owe ehe jẹ yinyin awuwlena ji sọn “whenue aihọn ko yin didoai,” enẹ wẹ aihọn gbẹtọ he sọgan yin fifligọ sọn ylando mẹ lẹ tọn. (Mat. 25:34; Osọ. 17:8) Enẹwutu, e taidi dọ Abẹli wẹ omẹ tintan he yinkọ etọn yin kinkan do owe ogbẹ̀ tọn lọ mẹ.
c To ojlẹ de mẹ wayi, mí basi zẹẹmẹ dọ hogbe lọ “whẹdida” he yin yiyizan tofi to alọdlẹndo whẹdida whẹgbledomẹ tọn kavi whẹdida nado yin yasana. Nugbo wẹ dọ hogbe lọ “whẹdida” gán tindo zẹẹmẹ enẹ. Amọ́, to lẹdo hodidọ tọn ehe mẹ, e taidi dọ Jesu yí hogbe lọ “whẹdida” zan to linlẹn he gbloada de mẹ nado dlẹnalọdo mẹde pinpọn na ojlẹ de kavi tintẹ́n ẹn pọ́n, kavi sọgbe hẹ wezẹhomẹ Glẹkigbe tọn de, “walọyizan mẹde tọn gbigbejepọn.”