Etẹwẹ Hiẹ Sọgan Plọn sọn Yọpọvu lẹ Dè?

“A TO nuwà di yọpọvu!” E yọnbasi dọ homẹ ni gble mí eyin hogbe enẹlẹ yin yiyizan na mí. Dile etlẹ yindọ yọpọvu lẹ nọ hẹn awuvivi wá na mí, e họnwun dọ yé ma tindo whinwhẹ́n, numimọ, gọna nuyọnẹn he nọ saba yin kinkọndopọ po mẹhowhe po.—Job 12:12.

Etomọṣo, Jesu dọna devi etọn lẹ to gbèdopo dọmọ: “Nugbo wẹ yẹn dọhlan mì, Adavo mìwlẹ diọ bo taidi yọpọvu lẹ, mìwlẹ ma na biọ ahọludu olọn tọn mẹ gbọn alọ depope mẹ gba.” (Matiu 18:3) Etẹ dọ wẹ Jesu te? Jẹhẹnu tẹlẹ wẹ yọpọvu lẹ tindo ehe mẹho lẹ na wadagbe nado hodo?

Awuwiwlena Whiwhẹ Yọpọvu Tọn Nkọ

Lẹnnupọndo ninọmẹ he hẹn Jesu nado dọ ohó ehelẹ ji. To gbejizọnlin gaa de zinzin wá Kapẹlnaumi godo, Jesu kanse devi etọn lẹ dọmọ: “Etẹwẹ mì to núdọ̀n na to mìde ṣẹnṣẹn to aliho?” Winyan hù devi lẹ bọ yé gbọṣi abọẹ, na yé ko dọnnu to yede ṣẹnṣẹn nado yọ́n mẹhe yin kiklo hugan to yé mẹ. To godo mẹ, yé wleawuna adọgbigbo bo kanse Jesu dọmọ: “Mẹnu wẹ klohugan to ahọludu olọn tọn mẹ lo?”—Malku 9:33, 34; Matiu 18:1.

E sọgan taidi nupaṣamẹ dọ to nudi owhe atọ̀n yiyizan hẹ Jesu godo, devi lẹ na gbẹsọ dọnnu gando yindidi kavi ogántẹn go. Nalete, sinsẹ̀n Ju lẹ tọn mẹ wẹ yé yin pinplọn whẹ́n te, ehe nọ ze ayidonugo vonọtaun do whẹho mọnkọtọn lẹ ji. E họnwun dọ, nuplọnmẹ sinsẹ̀n enẹ tọn, gọna mape gbẹtọvi tọn, yinuwado nulẹnpọn devi lọ lẹ tọn ji.

Jesu sinai bo ylọ devi lẹ do ede dè bosọ dọmọ: “Eyin mẹdepope jlo na yin nukọntọ, ewọ lọ wẹ na yin godotọ yemẹpo tọn, bosọ yin lizọnyitọ yemẹpo tọn.” (Malku 9:35) Hogbe ehelẹ na ko paṣa yé. Hodidọ Jesu tọn jẹagọdo pọndohlan Ju lẹ tọn gando kiklo-yinyin go tlọlọ! Enẹgodo Jesu ylọ ovi pẹvi de do ede dè. E plasikọna ovi lọ po zohunhun po bo vọ́ nùzindo nuagokun lọ ji dọmọ: “Nugbo wẹ yẹn dọhlan mì, Adavo mìwlẹ diọ bo taidi yọpọvu lẹ, mìwlẹ ma na biọ ahọludu olọn tọn mẹ gbọn alọ depope mẹ gba. Enẹwutu mẹdepope he na whiwhẹ ede dai di yọpọvu, dopolọ wẹ klohugan to ahọludu olọn tọn mẹ.”—Matiu 18:3, 4.

Apajlẹ yọn-na-yizan dagbe nankọtọn die gando whiwhẹ go! Yí nukun homẹ tọn do pọ́n nujijọ lọ. Sunnu mẹho he whèwhín susu pli lẹdo ovi pẹvi de bo to pinpọn ẹn tlintlin. Lehe ovi lọ na to winyan kú to homẹvọ etọn mẹ do sọ! Lehe e vò sọn agbàwhinwhlẹn po linlẹn ylankan po mẹ do sọ! Lehe e setonu bosọ tin to jlẹkaji do sọ! Mọwẹ, ovi pẹvi lọ do jẹhẹnu Jiwheyẹwhe tọn he yin whiwhẹ hia to aliho jiawu mẹ.

Nuagokun Jesu tọn họnwun. Mímẹpo dona wleawuna whiwhẹ yọpọvu tọn nkọ eyin mí jlo na dugu Ahọluduta Jiwheyẹwhe tọn. To haṣinṣan Klistiani tọn he Jehovah zedai mẹ, nudindọn agbàwhinwhlẹn tọn kavi goyiyi ma dona tin. (Galatianu lẹ 5:26) Na nugbo tọn, jijọ ehelẹ wẹ zọ́n taun bọ Satani Lẹgba do ṣiatẹ sọta Jiwheyẹwhe to tintan whenu. Abajọ Jehovah do gbẹwanna jijọ enẹlẹ!—Howhinwhẹn lẹ 8:13.

Klistiani nugbo lẹ nọ jlo nado wadevizọn, e ma yin nado dugán gba. Mahopọnna lehe azọ́n lọ demẹpò kavi lehe mẹhe mí to wiwà ẹ na yìdo do sọ, whiwhẹ nujọnu tọn nọ whàn mí nado yilizọn na mẹdevo lẹ. Devizọnwiwa whiwhẹ tọn mọnkọtọn nọ hẹn ale susugege lẹ wá. Jesu dọmọ: “Mẹdepope he yí ovi pẹvi he nkọtọn dopo to oyín ṣie mẹ, e yí mi: mẹdepope he sọ yí mi, yẹn ma wẹ e yí gba, adavo ewọ he do mi hlan.” (Malku 9:37) Awuwiwlena gbigbọ alọtútlú po whiwhẹ tọn po he taidi yọpọvu tọn nkọ nọ kọ̀n mí dopọ hẹ Mẹhe yiaga hugan to wẹkẹ lọ mẹ po Ovi etọn po. (Johanu 17:20, 21; 1 Pita 5:5) Mí na mọ ayajẹ he nọ wá sọn nunamẹ mẹ. (Owalọ lẹ 20:35) Podọ mí nọ tindo pekọ nado yidogọna jijọho po pọninọ he tin to omẹ Jiwheyẹwhe tọn lẹ ṣẹnṣẹn po.—Efesunu lẹ 4:1-3.

Yé Nọ Kẹalọyi Oplọn bo Nọ Deji

Enẹgodo Jesu zinnudo nudevo he mẹho lẹ sọgan plọn sọn yọpọvu lẹ dè ji dọmọ: “Mẹdepope he ma yí ahọludu Jiwheyẹwhe tọn di yọpọvu, e ma to na biọ e mẹ.” (Malku 10:15) E ma yindọ yọpọvu lẹ tindo whiwhẹ kẹdẹ wẹ gba; yé sọ nọ kẹalọyi oplọn. “Yé nọ yawu kẹalọyi nudọnamẹ lẹ dile tekan nọ yawu dọ̀n osin do,” wẹ onọ̀ de dọ.

Enẹwutu, nado sọgan dugu Ahọluduta Jiwheyẹwhe tọn, mí dona kẹalọyi bo setonuna owẹ̀n Ahọluduta lọ tọn. (1 Tẹsalonikanu lẹ 2:13) Di viyẹyẹ to anọ́nù, mí dona “jlo yìnnọ ohó lọ tọn he tin matin oklọ, na [mí] nido whẹ́n gbọn e dali jẹ whlẹngán.” (1 Pita 2:2) Etẹwẹ lo, eyin e taidi dọ nuplọnmẹ Biblu tọn de vẹawu nado mọnukunnujẹemẹ? Vigopọntọ de dọmọ: “Ovi lẹ nọ to kinkanse madoalọte dọ ‘Etẹwutu?’ kakajẹ whenue yé mọ gblọndo pekọhẹnwanamẹ tọn na kanbiọ yetọn lẹ.” Mí na wadagbe nado hodo apajlẹ yetọn. Enẹwutu, to nuplọn zọnmii. Dọho hẹ Klistiani numimọnọ lẹ. Biọ nuyọnẹn sọn Jehovah dè. (Jakobu 1:5) Matin ayihaawe, vivẹnudido towe nado to dẹ̀ho magbọjẹ na yin ahọsuna to nukọn mẹ.—Matiu 7:7-11.

Ṣigba, mẹdelẹ sọgan hanú dọ, ‘Be mẹhe nọ yawu kẹalọyi oplọn lẹ ma nọ yin kiklọ po awubibọ po ya?’ E na vẹawu, eyin yé tindo anademẹ dejidego de. Di apajlẹ, ovi lẹ nọ lẹhlan mẹjitọ yetọn lẹ dè na anademẹ to jọwamọ-liho. Otọ́ de dọmọ: “Mẹjitọ lẹ nọ dohia dọ yé sọgan yin jidedego gbọn hihọ́ bibasina ovi yetọn lẹ po nukunpipedo yé go egbesọegbesọ po dali.” Na jide tọn, mí tindo whẹwhinwhẹ́n dopolọ lẹ nado dejido Otọ́ olọn mẹ tọn mítọn Jehovah go. (Jakobu 1:17; 1 Johanu 4:9, 10) Jehovah nọ na mí anademẹ he ma nọ gboawupo gbọn Ohó kandai etọn gblamẹ. Gbigbọ wiwe etọn po titobasinanu etọn po nọ miọnhomẹna mí bosọ nọ nọgodona mí. (Matiu 24:45-47; Johanu 14:26) Awuwledainanu ehelẹ yiyizan na whlá mí sọn awugble gbigbọmẹ tọn mẹ.—Psalm 91:1-16.

Awuwiwlena jidide yọpọvu tọn nkọ to Jiwheyẹwhe mẹ sọ nọ hẹn mí tindo jijọho ayiha mẹ tọn. Weyọnẹntọ Biblu tọn dopo dọmọ: “Whenuena mí tin to ovu, mí nọ bẹ gbejizọnlin jẹeji matin akuẹ depope nado sú húnkuẹ, podọ mí ma nọ tindo linlẹn depope gando lehe mí na jẹ fie mí jei do go, ṣogan e ma nọ wá linlẹn mẹ na mí pọ́n gbede nado tindo ayihaawe dọ mẹjitọ mítọn lẹ na plan mí yì filọ awuyẹyẹ-afọyẹyẹ.” Be mí nọ tindo jidide dopolọ do Jehovah go dile mí to gbejizọnlin gbẹ̀mẹ tọn zìn ya?—Isaia 41:10.

Jidide mlẹnmlẹn to Jiwheyẹwhe mẹ nọ gọalọna mí nado dapana pọndohlan po nuyiwa he sọgan ze gbigbọnọ-yinyin mítọn do owù mẹ lẹ po. Humọ, mí tindo jidide mlẹnmlẹn to hogbe Jesu tọn lẹ mẹ dọ Otọ́ olọn mẹ tọn mítọn yọ́n nuyiwa mítọn lẹ podọ dile e na dẹnsọ bọ mí na to Ahọluduta Jiwheyẹwhe tọn po dodo etọn po dín whẹ́, Jiwheyẹwhe na penukundo mí go. Ehe na gọalọna mí nado nọavunte sọta whlepọn lọ nado ze ayidonugo do yanwle agbasa tọn lẹ ji bo gbẹkọ azọngban gbigbọmẹ tọn lẹ go.—Matiu 6:19-34.

‘To Ylanwa mẹ Mì Yin Yọpọ’

Mahopọnna dọ yọpọvu lẹ nọ yin jiji to mape mẹ, homẹhunnu wẹ e nọ yin dọ ahun po ayiha yetọn po wé. Enẹwutu, Biblu na tuli Klistiani lẹ dọmọ: “To okẹ̀n [kavi ylanwa] mẹ mì yin yọpọ.”—1 Kọlintinu lẹ 14:20.

Lẹnnupọndo apajlẹ owhe atọ́n mẹvi de he nọ yin Monique tọn ji, mẹhe dọna onọ̀ etọn po jejejininọ po dọmọ: “Họntọn ṣie yọyọ Sarah tindo oda minmlin taidi ṣie nkọ!” E ma donù sinmẹ agbasa Sarah tọn po akọ̀ etọn he gbọnvo po go gba. Mẹjitọ de dọmọ: “Yọpọvu lẹ ma nọ payi sinmẹ agbasa tọn go. Yé ma yọ́n nudepope gando akọ̀ kavi nuvẹun go.” To whẹho ehe mẹ, lehe yọpọvu lẹ nọ do pọndohlan Jiwheyẹwhe mítọn he ma nọ homẹnukuntapọ́n tọn hia to aliho jiawu mẹ do sọ, mẹhe yiwanna gbẹtọ akọta lẹpo tọn.—Owalọ lẹ 10:34, 35.

Yọpọvu lẹ sọ tindo nugopipe ayidego tọn lọ nado nọ jonamẹ. Mẹjitọ de dọmọ: “Eyin ovi pẹvi Jack po Levi po hoavùn, mí nọ dọna yé nado vẹvẹna yedelẹ, podọ to madẹnmẹ yé nọ gọ̀ jẹ aihunda ji po ayajẹ po. Yé ma nọ tẹdo nuhe ko jọ wayi lẹ go, bo masọ nọ hẹn yé wá flinmẹ, kavi ze nubiọtomẹsi lẹ dai whẹpo do jonamẹ gba. Yé nọ zindonukọn poun wẹ.” Apajlẹ dagbe nankọtọn die na mẹho lẹ nado hodo!—Kọlọsinu lẹ 3:13.

Humọ, yọpọvu lẹ nọ yigbe po awubibọ po dọ Jiwheyẹwhe tin. (Heblu lẹ 11:6) Hodidọ ahundopo tọn yetọn to jọwamọ-liho nọ saba whàn yé nado yí adọgbigbo do dekunnuna mẹdevo lẹ. (2 Ahọlu lẹ 5:2, 3) Odẹ̀ kleun ahundopo tọn yetọn lẹ sọgan yinuwado ahun he tlẹ sinyẹn hugan lẹ ji. Podọ to whlepọn glọ, yé sọgan tẹdo walọ dagbe go to aliho jiawu mẹ. Nunina họakuẹ nankọ die he yọpọvu lẹ yin!—Psalm 127:3, 4.

Hẹngọwa Whanpẹ Tọn

Hiẹ sọgan kanse dọ, ‘Be e yọnbasi na mẹho lẹ nado gọ̀ jẹhẹnu dagbedagbe ovu whenu tọn lẹ tindo ya?’ Gblọndo kleun jidevọnamẹ tọn lọ wẹ yin mọwẹ! Na jide tọn, gbedide Jesu tọn nado “taidi yọpọvu lẹ” dohia dọ enẹ yọnbasi.—Matiu 18:3.

Di dohia: Pipli anazọ́n jladotọ lẹ tọn de sọgan wazọ́n nado vọ́ anazọ́n he họakuẹ tlala de jlado. Dile azọ́n lọ to nukọn yì, yé nọ de dihó he ko hòpli lẹ sẹ̀ bo nọ vọ́ fie ma ko yin jijlado ganji dai lẹ basi. To whenuena nujladotọ lọ lẹ ko yí sọwhiwhe do dovivẹnu susu godo, sinmẹ dagbedagbe anazọ́n dowhenu lọ tọn lẹ po whanpẹ etọn po nọ sọawuhia bọ mẹlẹpo sọgan mọ. Mọdopolọ, gbọn vivẹnudido vẹkuvẹku dali, po alọgọ gbigbọ wiwe Jehovah tọn po, gọna godonọnamẹ owanyinọ agun Klistiani tọn, mí sọgan gọ̀ jẹhẹnu dagbedagbe he nọ sọawuhia to jọwamọ-liho to ovu whenu lẹ tindo.—Efesunu lẹ 5:1.

[Yẹdide to weda 5, 10]

Yọpọvu lẹ nọ whiwhẹ yede to jọwamọ-liho

Yọpọvu lẹ ma nọ tindo nuvẹun, podọ yé nọ yawu jonamẹ bo nọ wọnji nuhe ko wayi lẹ go