Nuhewutu Jesu Yin Mẹplọntọ Daho

HUGAN owhe fọtọ́n donu awe die, ovi vonọtaun de yin jiji, bọ e whẹ́n bo lẹzun dawe klohugan lọ he nkọtọn ma ko nọgbẹ̀ pọ́n. Mẹdepope ma tindo agahun kavi mọto to whenẹnu gba. Podọ ladio, televiziọn, po ọdinatẹẹ po ma ko tin gba.

Jesu wẹ ovi lọ nọ yin. E lẹzun dawe he yọnnuin hugan to mẹhe ko nọ̀ aigba ji pọ́n lẹpo mẹ. Jesu sọ lẹzun mẹplọntọ he yọnhugan lọ. E nọ basi zẹẹmẹ nuhe sinyẹnawu nado mọnukunnujẹemẹ lẹ tọn to aliho he bọawu mẹ.

Jesu nọ plọn gbẹtọ lẹ to fidepope he e dukosọ hẹ yé te. E plọn yé to huto podọ to tọjihun mẹ. E plọn yé to owhé lẹ gbè podọ to whenuena yé to gbejizọnlinzin. Jesu ma tindo gbẹduhun de, mọ e masọ dó mọto kavi pinpán pọ́n. Zọnlin wẹ Jesu nọ zìn sọn fide jẹ fide, bo nọ to gbẹtọ lẹ plọn.

Mí nọ plọn nususu sọn mẹdevo lẹ dè. Ṣigba mí sọgan plọn onú titengbe hugan lẹ sọn Jesu, heyin Mẹplọntọ Daho lọ dè. Biblu mẹ wẹ ohó Jesu tọn lẹ tin te. Eyin mí to ohó enẹlẹ hia sọn Biblu mẹ, e nọ taidi dọ Jesu lọsu wẹ to hodọ na mí nkọtọn.

Etẹwutu Jesu do yin Mẹplọntọ Daho de? Gblọndo lọ wẹ yindọ, mẹde ko plọn Jesu lọsu pọ́n. Podọ e yọ́n lehe e yin nujọnu sọ nado setonu. Ṣigba mẹnu wẹ Jesu setonuna? Mẹnu wẹ plọn ẹn?⁠— Otọ́ etọn wẹ. Jiwheyẹwhe wẹ yin Otọ́ Jesu tọn.

Whẹpo Jesu do wá aigba ji di gbẹtọ de, e ko nọgbẹ̀ to olọn mẹ hẹ Jiwheyẹwhe. Enẹwutu Jesu gbọnvona gbẹtọ devo lẹ, na gbẹtọ de ma ko nọgbẹ̀ to olọn mẹ pọ́n whẹpo do yin jiji do aigba ji gba. Ovi dagbe de wẹ Jesu yin to olọn mẹ, bo setonuna Otọ́ etọn. Enẹ wẹ zọ́n bọ Jesu penugo nado dọna gbẹtọ lẹ nuhe e ko plọn sọn Jiwheyẹwhe dè. Hiẹ lọsu sọgan hodo apajlẹ Jesu tọn gbọn tonusisena otọ́ po onọ̀ towe po dali.

Onú devo he zọ́n bọ Jesu do yin Mẹplọntọ Daho de wẹ yindọ, e yiwanna gbẹtọ lẹ. E jlo nado gọalọna gbẹtọ lẹ nado plọnnu dogbọn Jiwheyẹwhe dali. Jesu yiwanna mẹhe ko whẹ́n mẹho lẹ, ṣigba e sọ yiwanna ovivu lẹ ga. Ovi lẹ lọsu yiwanna Jesu dè wiwá, na e nọ dọho hẹ yé bo nọ dotoaina yé wutu.

Mẹjitọ delẹ plan ovi flinflin yetọn lẹ wá Jesu dè to gbèdopo. Ṣigba họntọn etọn lẹ lẹndọ alọnu Mẹplọntọ Daho lọ tọn ko ján gbau, bọ e ma sọgan dọho hẹ ovi flinflin lẹ. Enẹwutu họntọn Jesu tọn lẹ dọna mẹjitọ lẹ po ovi yetọn lẹ po nado lẹkọ. Ṣigba be a yọ́n nuhe Jesu dọ ya?⁠— Jesu dọmọ: “Mì gbọ yọpọvu lẹ ni wá dè e, mì sọ kọ́ na yé blo.” Mọwẹ, Jesu jlo dọ ovi flinflin lẹ ni wá e dè. Enẹwutu, mahopọnna dọ Jesu yin gbẹtọ nuyọnẹntọ he diyin taun de, e yí whenu zan nado plọn ovi flinflin lẹ.​—⁠Malku 10:​13, 14.

Be a yọ́n nuhewutu Jesu plọn yọpọvu lẹ bo dotoaina yé ya? Na e jlo nado hẹn yé jaya gbọn ohó Jiwheyẹwhe, mẹhe yin Otọ́ olọn mẹ tọn etọn didọna yé dali. Nawẹ hiẹ lọsu sọgan hẹn gbẹtọ lẹ jaya gbọn?⁠— Gbọn nuhe a ko plọn gando Jiwheyẹwhe go lẹ didọna yé dali.

To gbèdopo, Jesu yí ovi pẹvi de zan nado plọn onú titengbe de họntọn Etọn lẹ. E plan ovi lọ bo dọna ẹn nado nọte to hodotọ Etọn lẹ ṣẹnṣẹn. Enẹgodo Jesu dọna sunnu he ko whẹ́n mẹho ehelẹ dọ yé dona diọ jijọ yetọn bo na taidi ovi pẹvi ehe.

Etẹ dọ wẹ Jesu te to whenuena e dọmọ? Be a yọ́n lehe sunnu mẹho de, kavi etlẹ yin jọja de sọgan diọ bo na taidi ovi pẹvi de do ya?⁠— Ovi pẹvi de ma nọ yọnnuin sọ mẹhe ko whẹ́n mẹho gba podọ e nọ jlo nado plọnnu. Enẹwutu, nuhe dọ Jesu te wẹ yindọ hodotọ etọn lẹ dona yin whiwhẹnọ, di ovi flinflin lẹ. Mọwẹ, mímẹpo wẹ sọgan plọn nususu sọn mẹdevo lẹ dè. Podọ mí dona yọnẹn dọ nuplọnmẹ Jesu tọn lẹ yin nujọnu hú linlẹn mítọn titi lẹ.​—⁠Matiu 18:​1-5.

Onú devo he wutu Jesu yin Mẹplọntọ Daho de wẹ yindọ, e yọ́n lehe e sọgan hẹn onú lẹ yọ́nsè na gbẹtọ lẹ do. E nọ basi zẹẹmẹ onú lẹ tọn to aliho he bọawu bo họnwun de mẹ. E nọ dọho gando ohẹ̀ lẹ, vounvoun lẹ po onú paa devo lẹ po go nado gọalọna gbẹtọ lẹ nado yọ́n mẹhe nkọtọn Jiwheyẹwhe yin.

To gbèdopo, Jesu yì osó de ji bọ gbẹtọ susu wá e dè. Jesu sinai bo dọho, kavi dọyẹwheho na yé, dile a to mimọ to yẹdide ehe mẹ do. Hodidọ ehe nọ yin yiylọdọ Yẹwhehodidọ Osó ji tọn. E dọmọ: ‘Mì pọ́n ohẹ̀ he to agahomẹ lẹ. Yé ma nọ dó jinukun. Yé ma nọ bẹ núdùdù pli do họmẹ. Ṣigba Jiwheyẹwhe he to olọn mẹ nọ na núdùdù yé. Be mìwlẹ ma họakuẹ hú yé ya?’

Jesu sọ dọmọ: ‘Mì plọnnu sọn vounvoun danji tọn lẹ dè. Yé ma nọ wazọ́n whẹpo do nọ whẹ́n. Ṣigba mì pọ́n lehe yé nọ yọnwhanpẹ do! Yèdọ Ahọlu Sọlọmọni adọkunnọ lọsu ma doaṣọ hú vounvoun danji tọn lẹ gba. Enẹwutu eyin Jiwheyẹwhe nọ penukundo vounvoun he nọ wú poun lẹ go, be e ma na penukundo mìlọsu lẹ go ya?’​—⁠Matiu 6:​25-​33.

Be a yọ́n nuhe Jesu to pinplọnmẹ tofi ya?⁠— E ma jlo dọ núdùdù he mí na dù kavi avọ̀ he mí na dó ni duahunmẹna mí zẹjlẹgo gba. Jiwheyẹwhe yọnẹn dọ mí tindo nuhudo onú enẹ lẹpo tọn. Jesu ma dọ dọ mí ma na wazọ́n nado dín núdùdù po avọ̀ po gba. Ṣigba e dọ dọ mí dona ze Jiwheyẹwhe do otẹn tintan mẹ. Eyin mí wàmọ, Jiwheyẹwhe na gọalọna mí nado mọ núdùdù he mí na dù po avọ̀ he mí na dó po. Be hiẹ yí enẹ sè ya?⁠—

To whenuena Jesu dotana hodidọ etọn, etẹwẹ gbẹtọ lẹ lẹn?⁠— Biblu dọ dọ e paṣa yé gando aliho mẹpinplọn tọn etọn go. Ohó etọn lẹ nọ vivi sisè. Nuhe e dọ lẹ gọalọna gbẹtọ lẹ nado wà nuhe sọgbe.​—⁠Matiu 7:⁠28.

Enẹwutu e jẹ dọ mí ni plọnnu sọn Jesu dè. Be a yọ́n lehe mí sọgan wà enẹ gbọn ya?⁠— Ohó etọn lẹ yin kinkàn do owe de mẹ. Owe tẹwẹ?⁠— Biblu Wiwe lọ wẹ. Ehe zẹẹmẹdo dọ mí sọgan dotoaina Jesu gbọn tonusisena nuhe mí hia to Biblu mẹ lẹ dali. Biblu lọsu tlẹ bẹ otàn awuvivi tọn de hẹn dogbọn lehe Jiwheyẹwhe lọsu dọna mí nado dotoaina Jesu do dali. Gbọ mí ni pọ́n nuhe jọ lọ.

Gbèdopo wẹ Jesu plan omẹ atọ̀n to họntọn etọn lẹ mẹ yì osó de ji aga. Yé omẹ atọ̀n lẹ wẹ Jakobu, Johanu, po Pita po. Mí na wá plọn nususu gando dawe ehelẹ go to nukọnmẹ, na yé omẹ atọ̀n lẹpo wẹ yin họntọn vivẹ Jesu tọn. Ṣigba to nujijọ vonọtaun ehe whenu, nukunmẹ Jesu tọn jẹ sisẹ́ ji mlánmlán. Bọ avọ̀ etọn lẹ lọsu wé gblegede di hinhọ́n, dile a sọgan mọ ẹn tofi do.

Enẹgodo, ogbè de dọho sọn olọn mẹ bọ Jesu po họntọn etọn lẹ po sè. E dọmọ: “Ehe wẹ Ovi yiwanna ṣie, mẹhe mẹ yẹn yin homẹhunnọ te tlala; mì nọ sè etọn.” (Matiu 17:​1-5) Ogbè mẹnu tọn wẹ?⁠— Ogbè Jiwheyẹwhe tọn wẹ! Mọwẹ, Jiwheyẹwhe lọsu wẹ dọ dọ yé ni dotoaina Ovi emitọn.

Etẹwẹ dogbọn míwlẹ dali to egbehe? Be mí na setonuna Jiwheyẹwhe bo dotoaina Ovi etọn, heyin Mẹplọntọ Daho lọ ya?⁠— Mímẹpo wẹ dona wàmọ. Be a gbẹsọ flin lehe mí sọgan wà ehe gbọn ya?⁠—

Mọwẹ, mí sọgan dotoaina Ovi Jiwheyẹwhe tọn gbọn kandai gbẹzan etọn tọn he to Biblu mẹ lẹ hihia dali. Mẹplọntọ Daho lọ tindo onú dagbe susu he e jlo na dọna mí. Homẹ towe na hùn nado plọn onú lọ lẹ, he yin kinkàndai to Biblu mẹ. Podọ e nasọ hẹn we jaya eyin a dọ onú dagbe he a ko plọn lẹ na họntọn towe lẹ.