Ahọlu lọ Biọ Jelusalẹm to Kẹtẹkẹtẹvu de Ji

To wunkẹngbe, Sẹgbe azán 9tọ Nisan tọn, Jesu po devi etọn lẹ po tọ́n sọn Bẹtani bo dedo Jelusalẹm. Dile yé sẹpọ Bẹtfagi to Osó Olivie tọn ji, Jesu dọna devi etọn awe dọmọ:

“Mì yì gbétatò he mì to mimọ hlan lọ mẹ, podọ to afọdopolọji mì na mọ kẹtẹkẹtẹ de to sìnsìn bọ kẹtẹkẹtẹvu de gọna ẹn. Mì tún yé bo hẹn yé wá na mi. Eyin mẹde dọ nudepope na mì, mì na dọ dọ, ‘Oklunọ tindo nuhudo yetọn.’ To whenẹnu, e na do yé hlan to afọdopolọji.”—Matiu 21:2, 3.

Devi lọ lẹ ma doayi e go dọ anademẹ Jesu tọn lẹ tin to kọndopọ mẹ hẹ dọdai Biblu tọn de. Ṣigba to nukọn mẹ, yé mọnukunnujẹ hẹndi dọdai Zekalia tọn lọ mẹ. E dọ dọdai dọ Ahọlu dopagbe Jiwheyẹwhe tọn na biọ Jelusalẹm taidi “whiwhẹnọ bo hẹ kẹtẹkẹtẹ de ji, kẹtẹkẹtẹvu de, ovi kẹtẹkẹtẹ asiwhe de tọn.”—Zekalia 9:9.

Whenue devi lọ lẹ wá Bẹtfagi bo tún kẹtẹkẹtẹvu asu lọ po onọ̀ etọn po, mẹhe to ote to finẹ lẹ kanse dọmọ: “Naegbọn mì do to kẹtẹkẹtẹvu lọ tún?” (Malku 11:5) Amọ́, whenue yé sè dọ Oklunọ wẹ biọ kanlin lọ lẹ, yé jo devi lẹ do bọ yé hẹn yé wá Jesu dè. Devi lẹ tẹ́ awugbó yetọn lẹ do kẹtẹkẹtẹ lọ po ovi etọn po ji, ṣigba kẹtẹkẹtẹvu lọ ji wẹ Jesu hẹ.

Gbẹtọgun lọ to susudeji dile Jesu dedo Jelusalẹm to kẹtẹkẹtẹvu lọ ji. Mẹsusu tẹ́ awugbó yetọn lẹ do aliho ji. Mẹdevo lẹ sán alà atin lẹ tọn kavi “sán amà lẹ sọn glemẹ” bo tẹ́ yé. Yé dawhá dọmọ: “Mí vẹ̀ we, whlẹn ẹn! Donanọ wẹ mẹlọ he ja to oyín Jehovah tọn mẹ! Donanọ wẹ Ahọluduta otọ́ mítọn Davidi tọn he ja!” (Malku 11:8-10) Hodidọ ehelẹ hẹn homẹgble Falesi he to gbẹtọgun lọ mẹ lẹ. Yé dọna Jesu dọmọ: “Mẹplọntọ, gbẹnuna devi towe lẹ.” Jesu gblọn dọmọ: “Yẹn dọna mì dọ: Eyin omẹ ehelẹ nabọẹ, zannu lẹ na dawhá jẹgbonu.”—Luku 19:39, 40.

Dile Jesu to Jelusalẹm pọnhlan, e jẹ avivi ji bo dọmọ: “Eyin hiẹ lọsu ko mọnukunnujẹ nuhe nọ hẹn jijọho wá lẹ mẹ to azán ehe gbè wẹ—ṣigba todin, yé ko yin whiwhla do nukun towe lẹ.” Jelusalẹm na suahọ tolivivẹ sọn ojlo mẹ wá etọn tọn. Jesu dọ dọdai dọmọ: “Kẹntọ towe lẹ na yí opò tlọ́ntlọ́n lẹ do dó figángán de lẹdo we bo na lẹdo we pé bo nasọ hẹn awusinyẹn we to awà lẹpo ji, yé nasọ họ́ hiẹ po ovi towe he to hiẹ mẹ lẹ po liai, podọ yé ma na jo zannu de do zannu de ji to hiẹ mẹ.” (Luku 19:42-44) Dile Jesu dọ do, vasudo Jelusalẹm tọn wá aimẹ to owhe 70 W.M.

Whenue Jesu biọ Jelusalẹm, “tòdaho lọ pete hozín, bo to didọmọ: ‘Mẹnu wẹ ehe?’” Gbẹtọgun lọ lẹ sọ to didọ mapote dọmọ: “Ehe wẹ yẹwhegán lọ, Jesu, sọn Nazalẹti Galili tọn!” (Matiu 21:10, 11) Mẹhe to gbẹtọgun lọ mẹ bo mọ bọ Jesu fọ́n Lazalọsi sọnku lẹ dọhona mẹdevo lẹ gando azọ́njiawu enẹ go. Falesi lẹ wule dọ yé ma to kọdetọn dagbe tindo. Yé dọ to yede ṣẹnṣẹn dọmọ: “Aihọn lọ pete ko hodo e.”—Johanu 12:18, 19.

Dile e yin aṣa Jesu tọn do eyin e wá Jelusalẹm, e yì tẹmpli mẹ nado plọnmẹ. To finẹ, e hẹnazọ̀ngbọna nukuntọ́nnọ lẹ po sẹkunọ lẹ po. Whenue yẹwhenọgán lẹ po wekantọ lẹ po mọ nuhe wà e te lẹ bo sè yọpọ sunnu lẹ to awhádo to tẹmpli lọ mẹ dọ, “Mí vẹ̀ we, whlẹn Visunnu Davidi tọn!” homẹgble yé. Sinsẹ̀ngán lọ lẹ kanse Jesu dọmọ: “Be a sè nuhe omẹ ehelẹ to didọ?” E gblọn dọmọ: “Be mì ma ko hia ehe gbede dọ, ‘Onù yọpọvu lẹ po viyẹyẹ lẹ po tọn mẹ wẹ hiẹ ko hẹn pipà wá sọn’?”—Matiu 21:15, 16.

Jesu pọ́n nuhe to tẹmpli lọ mẹ lẹ lẹdo pé. Whenu ko yì todin, enẹwutu ewọ po apọsteli lẹ po dedo. Whẹpo azán 10tọ Nisan tọn nido bẹjẹeji, e zingbejizọnlin lẹkọyi Bẹtani bo dọ́ finẹ to Sẹgbe.