Yé Wà Ojlo Jehovah tọn

Jesu Yin Gigopana Taidi Mẹssia po Ahọlu Po!

GBẸTỌGUN he biọ Jelusalẹm po awhá po to 9 Nisan, 33 W.M. tọn lẹ, hẹnnu paṣa suhugan Judanu lẹ tọn. Dile etlẹ yindọ e mayin nupaṣamẹ de nado mọ gbẹtọ lẹ to wiwọ̀ biọ tòdaho lọ mẹ jẹnukọnna Juwayi lọ, jonọ ehelẹ gbọnvo. Omẹ titengbe he tin to ṣẹnṣẹn yetọn wẹ dawe he hẹ ovi kẹtẹkẹtẹ tọn de ji. Jesu Klisti wẹ dawe lọ, podọ gbẹtọ lẹ to avọ̀ yetọn lẹ po odéma lẹ po vlọ́n do aigba to nukọn etọn dile yé to awhá do dọmọ: “Hosana hlan ovi sunnu Davidi tọn: Donanọ wẹ ewọ he ja to oyín Oklunọ tọn mẹ; Hosana to oji aga.” To mimọ gbẹtọgun lọ lẹ, susu mẹhe ko tin to Jelusalẹm lẹ tọn yin whinwhàn nado kọnawudopọ hẹ gbẹtọgun lọ lẹ.—Matiu 21:7-9; Johanu 12:12, 13.

Dile etlẹ yindọ e to yinyin gigopana todin, Jesu yọnẹn dọ whlepọn lẹ tin to ote pọ́n emi. Yèdọ, to azán atọ́n gblamẹ poun, e na yin hùhù to otò ehe dopolọ mẹ! Mọwẹ, Jesu yọnẹn dọ Jelusalẹm yin aigba-denamẹ agọjẹdomẹtọ lẹ tọn, podọ e basi tito tòdaho lọ mẹ bibiọ etọn to ayidego liho po linlẹn enẹ taun lọ po to ayiha mẹ.

Dọdai Hohowhenu Tọn de Yin Hinhẹndi

To owhe 518 J.W.M., Zekalia dọ dọdai Jelusalẹm bibiọ Jesu tọn po awhàngbigba po. E wlan dọmọ: “Viyọnnu Ziọni tọn e, jaya dahodaho, dabobo hiẹ viyọnnu Jelusalẹm tọn e: doayi e go, ahọlu towe ja dewe; nugbonọ wẹ ewọ, bo tindo whlẹngán; whiwhẹnọ, bo hẹ́ kẹtẹkẹtẹ de ji. . . . Ewọ bo nasọ dọhó jijọho hlan akọta lẹ: ahọluigba etọn bo nasọ tin sọn ohù mẹ jẹ ohù dè, podọ sọn Otọ̀ lọ mẹ jẹ opodo aigba lọ tọn lẹ.”—Zekalia 9:9, 10.

Enẹwutu Jelusalẹm bibiọ Jesu tọn to 9 Nisan hẹn dọdai Biblu tọn di. E mayin nujijọ kosọ tọn de gba ṣigba e yin tito basina po sọwhiwhe po. Jẹnukọn dai, tlolo he e tin to gbonu Jelusalẹm tọn, Jesu ko degbena awe to devi etọn lẹ mẹ dọmọ: “Mì yì biọ otò pẹvi he pannukọn mì mẹ, to afọdoponẹji mì na mọ kẹtẹkẹtẹ de to sìnsìn, po ovi etọn po: mì tún yé, na mì ni hẹn yé wá dee. Eyin mẹde sọ dọ nude hlan mì, mì na dọmọ, Oklunọ do onú na yí yé do wà; afọdoponẹji e nasọ do yé hlan.” (Matiu 21:1-3) Ṣigba naegbọn Jesu do jlo nado dó kẹtẹkẹtẹ de biọ Jelusalẹm, podọ etẹwẹ yin zẹẹmẹ nuyiwa gbẹtọgun lọ tọn?

Wẹndomẹ de Gando Ahọlu-yinyin Go

Yẹdide he yè yí nukun do mọ nọ saba tindo huhlọn hugan ohó he yè dọ. Gbọnmọ dali, to whedelẹnu Jehovah nọ hẹn yẹwhegan etọn lẹ nado yinuwa sọgbe hẹ wẹndomẹ yetọn nado na huhlọn wẹndomẹ yetọn to dọdai liho. (1 Ahọlu lẹ 11:29-32; Jẹlemia 27:1-6; Ezekiẹli 4:1-17) Aliho hodọnamẹ tọn he yè sọgan yí nukundomọ yiaga tlala ehe jo nuyiwadomẹji he ma sọgan yin jiwọ̀n e go gbede do ayiha mẹ na mẹhe tlẹ yin nupọntọ ahún sinsinyẹnnọ hugan lẹ. To aliho dopolọ mẹ, Jesu yinuwa sọgbe hẹ wẹndomẹ huhlọnnọ de gbọn kẹtẹkẹtẹ de didó biọ otò Jelusalẹm tọn mẹ dali. Gbọnna?

To ojlẹ Biblu tọn mẹ kẹtẹkẹtẹ nọ yin yiyizan na lẹndai otẹn yiaga tọn lẹ. Di apajlẹ, Sọlọmọni dó “otlòsọ” otọ́ etọn tọn, yèdọ ovi flusọ kẹtẹkẹtẹ asu de tọn ji to whenuena yè yiamisisadode e taidi ahọlu.a (1 Ahọlu lẹ 1:33-40) Enẹwutu na Jesu nado dó kẹtẹkẹtẹ de biọ Jelusalẹm na zẹẹmẹdo dọ e to ede zedonukọnnamẹ taidi ahọlu de. Nuyiwa gbẹtọgun lọ tọn na huhlọn wẹndomẹ ehe. Matin ayihaawe, pipli ehe bẹ suhugan Galilinu lẹ hẹn, he vlọ́n avọ̀ yetọn lẹ donukọnna Jesu—agbasa-yido-basi dohia he hẹnmẹ flin nulilá gbangba na ahọlu-yinyin Jehu tọn. (2 Ahọlu lẹ 9:13) Alọdlẹndo Jesu yetọn taidi “ovi sunnu Davidi” tọn zinnudo jlọjẹ sọgbe hẹ osẹ́n etọn ji na gandudu. (Luku 1:31-33) Podọ kunnudenu dohia dọ yizan odéma tọn yetọn lẹ do taliai yetọn hlan aṣẹpipa ahọlu-yinyin etọn tọn hia.—Yijlẹdo Osọhia 7:9, 10 go.

Enẹwutu gbẹtọgun he biọ Jelusalẹm to 9 Nisan lọ lẹ dohia hezeheze dọ Jesu wẹ Mẹssia dide lọ po Ahọlu po. Nugbo wẹ dọ, e mayin homẹ mẹlẹpo tọn wẹ hùn nado mọ dọ Jesu yin didohia to aliho ehe mẹ gba. Falesi lẹ na titengbe tọn lẹndọ e ma sọgbe depope na Jesu nado yin gbégbò gigonọ mọnkọtọn dohia na gba. “Mẹplọntọ,” wẹ yé kanse, matin ayihaawe po homẹgble po to hogbe yetọn lẹ mẹ dọmọ, “wọhẹ nuplọntọ towe lẹ.” Jesu gblọn dọmọ: “Yẹn dọna mì, dọ, eyin ehelẹ na nabọẹ, ozannu lẹ na dawhá jẹgbonu.” (Luku 19:39, 40) Mọwẹ, Ahọluduta Jiwheyẹwhe Tọn wẹ yin hosọ yẹwhehodidọ Jesu tọn. E na lá wẹndomẹ ehe po adọgbigbo po vlavo eyin gbẹtọ lẹ kẹalọyí i kavi lala.

Nuplọnmẹ lọ na Mí

E biọ adọgbigbo daho to Jesu si nado biọ Jelusalẹm to aliho heyin dọdai etọn dọ gbọn yẹwhegan Zekalia dali mẹ. E yọnẹn dọ to mọwiwà mẹ emi to adi kẹntọ emitọn lẹ tọn fọndaga. Jẹnukọnna agahihẹ yì olọn mẹ etọn, Jesu deazọnna hodotọ etọn lẹ nado dọyẹwheho wẹndagbe Ahọluduta Jiwheyẹwhe Tọn podọ nado “hẹn akọta lẹpo zun nuplọntọ.” (Matiu 24:14; 28:19, 20) Nado dotana azọ́n ehe sọ biọ adọgbigbo. E mayin homẹ mẹlẹpo tọn wẹ hùn nado sè wẹndomẹ lọ gba. Mẹdelẹ yin ojlo matindotọ hlan ẹn, to whenuena mẹdevo lẹ jẹagọdo e. Gandudu delẹ ko ze alọhẹndotenamẹ lẹ do azọ́n yẹwhehodidọ tọn lọ ji kavi hẹnalọdotena ẹn pete.

Ṣogan, Kunnudetọ Jehovah Tọn lẹ yọnẹn dọ wẹndagbe Ahọluduta Jiwheyẹwhe tọn he ko yin zizedai lọ dona yin didọ, vlavo gbẹtọ lẹ dotoai kavi gbẹkọ sọn mọwiwà go. (Ezekiẹli 2:7) Dile yé zindonukọn nado to azọ́n gbẹwhlẹngán tọn ehe wà, opagbe Jesu tọn vọ́ jide na yé he dọmọ: “Bo pọ́n, yẹn tin to mì dè to whepoponu, kakajẹ opodo aihọn tọn.”—Matiu 28:20.

[Nudọnamẹ Odò Tọn]