Hẹn Kadaninọ Towe Go to Aihọn He Klan Ehe Mẹ

 1. Nawẹ mí sọgan setonuna Jiwheyẹwhe po gandudu gbẹtọvi tọn lẹ po gbọn?

OHÓ JIWHEYẸWHE tọn plọn mí nado nọ setonuna gandudu gbẹtọvi tọn lẹ, etomọṣo e sọ plọn mí dọ mí dona setonuna Jiwheyẹwhe kakati nido yin gbẹtọ lẹ. (Owalọ 5:29; Titu 3:1) Be hodidọ ehelẹ sọta yede wẹ ya? Paali! Nunọwhinnusẹ́n taliai he tindo dogbó tọn nọ gọalọna mí nado mọnukunnujẹ gbedide ehelẹ mẹ bo setonuna yé. Jesu basi bladopọ nunọwhinnusẹ́n ehe tọn to whenue e dọmọ: “To whelọnu lo, mì yí onú he yin Sesali tọn lẹ na Sesali, ṣigba onú he yin Jiwheyẹwhe tọn lẹ na Jiwheyẹwhe.”^[1] (Mat. 22:21) Nawẹ mí nọ hodo anademẹ Jesu tọn enẹ gbọn? Mí nọ litaina aṣẹpipa gandudu otò he mẹ mí tin te tọn gbọn tonusisena osẹ́n etọn lẹ, sisi nina aṣẹpatọ etọn lẹ, po takuẹ lẹ súsú po dali. (Lom. 13:7) Etomọṣo, eyin gandudu lẹ biọ to mí si nado vẹtolina Jiwheyẹwhe, mí dona gbẹ́ po sisi po.

 2. Nawẹ mí nọ dohia dọ mí ma nọ nọgodona tonudidọ aihọn tọn gbọn?

² Aliho dopo nado na Jiwheyẹwhe nuhe ewọ jẹna wẹ nado gbọṣi kada na nuhe dù whẹho tonudidọ aihọn tọn lẹ. (Isa. 2:4) Enẹwutu, mí ma nọ jẹagọdo gandudu gbẹtọvi tọn lẹ he Jehovah na dotẹnmẹ nado yinuwa; mọjanwẹ mí masọ nọ nọgodona gbigbọ wanyina otò mẹtọn tọn kavi akọ̀ ṣinṣinyan tọn do niyẹn. (Lom. 13:1, 2) Mí ma nọ tẹnpọn nado diọlinlẹnna aṣẹpatọ lẹ, mí ma nọ blavo, podọ mí ma nọ dín azọ́ntẹn tonudidọ tọn, kavi tẹnpọn nado diọ gandudu lẹ.

 3. Naegbọn mí dona gbọṣi kada?

³ Biblu na whẹwhinwhẹ́n susu he wutu Jiwheyẹwhe do biọ dọ mí ni gbọṣi kada. Di apajlẹ, nado hodo nuplọnmẹ po apajlẹ Visunnu etọn Jesu Klisti tọn po, mí nọ dapana tonudidọ aihọn tọn po awhànfunfun po “ma [nado] yin apadewhe aihọn tọn.” (Joh. 6:15; 17:16) Nado yin mẹjidugando nugbonọ Ahọluduta Jiwheyẹwhe tọn lẹ, mí dona gbọṣi kada. Eyin mí ma wàmọ, nawẹ mí sọgan tindo ayihadawhẹnamẹnu wiwe de gbọn to whenue mí to yẹwheho wẹndagbe lọ tọn lá dọ Ahọluduta Jiwheyẹwhe tọn kẹdẹ wẹ sọgan didẹ nuhahun gbẹtọvi tọn lẹ? Humọ, to vogbingbọn mẹ na sinsẹ̀n lalo lẹ he nọ dádo whẹho tonudidọ tọn lẹ mẹ bo nọ gbọnmọ dali klan hagbẹ sinsẹ̀n tọn yetọn lẹ, sinsẹ̀n-bibasi nugbo nọ gọalọna mí nado gbọṣi kada bo nọ gbọnmọ dali basi hihọ́na pipli mẹmẹsunnu lẹdo aihọn pé tọn mítọn.—1 Pita 2:17.

 4. (a) Nawẹ mí wagbọn do yọnẹn dọ e na wá vẹawu dogọ nado hẹn kadaninọ go? (b) Naegbọn e do yindọ din wẹ mí dona wleawu nado gbọṣi kada?

⁴ Whẹho tonudidọ tọn sọgan nọma sinyẹn to fie mí nọ nọ̀, bọ mí tindo vivò nado basi sinsẹ̀n nugbo. Etomọṣo, dile opodo titonu Satani tọn to sisẹpọ, mí sọgan donukun dọ e na wá vẹawu dogọ nado hẹn kadaninọ go. Na aihọn lọ gọ́ na gbẹtọvi he “ma nọ tindo gbigbọ gbekọndopọ tọn” po “tasinyẹntọ” lẹ po wutu, kinklan na fọ́n bo to susudeji to aihọn lọ mẹ. (2 Tim. 3:3, 4) To otò delẹ mẹ, ninọmẹ tonudidọ tọn diọ to ajiji mẹ, podọ ehe zọ́n bọ mẹmẹsunnu mítọn lẹ pehẹ avùnnukundiọsọmẹnu madonukun lẹ gando kadaninọ yetọn go. Be a mọ nuhewutu e do yindọ din wẹ mí dona hẹn gbemima mítọn sinyẹn deji nado gbọṣi kada ya? Eyin mí nọte kakajẹ whenue mí na wá pehẹ ninọmẹ sinsinyẹn de whẹ́, mí sọgan gboawupo nado hẹn kadaninọ mítọn go bo jogbe. To whelọnu lo, nawẹ mí sọgan wleawu nado hẹn kadaninọ mítọn go to aihọn he ko klan ehe mẹ gbọn? Mì gbọ mí ni gbadopọnna onú titengbe ẹnẹ he na gọalọna mí nado wàmọ po kọdetọn dagbe po lẹ.

 5. Etẹwẹ Jehovah nọ lẹn gando gandudu gbẹtọvi tọn lẹ go?

⁵ Onú tintan he mí dona wà nado gbọṣi kada wẹ nado nọ pọ́n gandudu gbẹtọvi tọn lẹ hlan dile Jehovah nọ wà do. Dile etlẹ yindọ gandudu delẹ sọgan taidi gandudu dagbe, linlẹn lọ dọ gbẹtọvi ni dugán do gbẹtọvi devo lẹ ji ma yin lẹndai Jehovah tọn pọ́n gbede. (Jel. 10:23) Gandudu gbẹtọvi tọn lẹ nọ nọgodona akọ̀ ṣinṣinyan, podọ ehe nọ klan whẹndo gbẹtọvi tọn. Togán dagbe lẹ lọsu ma nọ penugo nado didẹ nuhahun lẹpo. Humọ, sọn 1914 gbọ́n wẹ gandudu gbẹtọvi tọn lẹ jẹ agbàwhlẹn hẹ Ahọluduta Jiwheyẹwhe tọn ji, yèdọ Ahọluduta he na hẹn whẹdida ṣẹ do akọta lẹ ji to whenue e na và yé sudo.—Hia Salmu lẹ 2:2, 7-9.

 6. Nawẹ mí dona nọ yinuwa hẹ aṣẹpatọ lẹ gbọn?

⁶ Jiwheyẹwhe jotẹnna gandudu gbẹtọvi tọn lẹ nado gbọṣi aimẹ, na yé nọ hẹn jijọho yọnbasi jẹ obá de mẹ wutu, podọ ehe nọ gọalọna mí nado lá wẹndagbe Ahọluduta lọ tọn. (Lom. 13:3, 4) Jiwheyẹwhe tlẹ degbena mí nado nọ hodẹ̀ do ota mẹhe to otẹn aṣẹpipa tọn mẹ lẹ tọn mẹ, titengbe to whenue nudide yetọn lẹ sọgan yinuwado sinsẹ̀n-bibasi mítọn ji. (1 Tim. 2:1, 2) Eyin mí yin nuyiwa hẹ to aliho agọ̀ mẹ, mí nọ ze whẹho lọ yì aṣẹpatọ lẹ dè dile apọsteli Paulu wà do. (Owalọ 25:11) Dile etlẹ yindọ Biblu plọnmẹ dọ kẹntọ Jiwheyẹwhe tọn, Satani, tindo aṣẹpipa do gandudu gbẹtọvi tọn lẹ ji, e ma dọ dọ ewọ nọ deanana togán kavi aṣẹpatọ dopodopo gba. (Luku 4:5, 6) Enẹwutu, mí ma dona nọ dọ dọ Lẹgba wẹ to anadena aṣẹpatọ de. Kakatimọ, to whenue mí to nuyiwa hẹ “gandudu lẹ po aṣẹpipa lẹ po,” mí “ma [na] nọ dọho ylankan gando mẹdepope go.”—Titu 3:1, 2.

 7. Etẹwẹ mí dona dapana?

⁷ Mí nọ setonuna Jiwheyẹwhe gbọn gbigbẹ́ nado nọgodona tonudọtọ kavi tonudọgbẹ́ depope dali, etlẹ yin to whenue linlẹn kavi pọndohlan yetọn na hẹn ale wá na mí kavi lala. Ṣigba, nawẹ kadaninọ mítọn sọgan yin whiwhlepọn to whẹho ehe mẹ gbọn? Mí ni dọ dọ mẹsusu fọngu bo tẹnpọn nado de gandudu kọgbidinamẹtọ de sẹ̀, ehe glọ omẹ Jiwheyẹwhe tọn lẹ lọsu jiya te. Na nugbo tọn, mí ma na kọnawudopọ hẹ gufọntọ lọ lẹ, ṣigba be mí na kọnawudopọ hẹ yé to ahun mítọn mẹ wẹ ya? (Efe. 2:2) Mí dona gbọṣi kada, e ma yin to hodidọ po walọ mítọn po kẹdẹ mẹ gba, ṣigba to ahun mẹ ga.

 8. To whenue e vẹawu nado hẹn kadaninọ go, nawẹ mí sọgan yin “zinzintọ” ṣogan bo yin “homẹvọnọ” gbọn?

⁸ Onú awetọ he mí na wà nado gbọṣi kada wẹ nado yin “zinzintọ taidi odàn ṣogan bo yin homẹvọnọ taidi apoe” to whenue mí to pipehẹ avùnnukundiọsọmẹnu lẹ. (Hia Matiu 10:16, 17.) Mí nọ do zinzin hia gbọn owù lẹ mimọ hlan nukọn dali, podọ mí nọ yin homẹvọnọ to whenue mí ma na dotẹnmẹ owù lọ lẹ nado hẹn mí jogbe. Mì gbọ mí ni dọhodo avùnnukundiọsọmẹnu delẹ po lehe mí sọgan pehẹ yé do po ji.

 9. Etẹ go wẹ mí dona nọ payi to whenue mí to hodọdopọ hẹ mẹdevo lẹ?

⁹ Hodọdopọ lẹ. Mí dona yí zinzin zan to whenue gbẹtọ lẹ fọ́n whẹho tonudidọ tọn lẹ dote. Di apajlẹ, to whenue a to owẹ̀n Ahọluduta lọ tọn zedonukọnna gbẹtọ lẹ, ma nọ na pipà kavi mọhodọdo linlẹn tonudọgbẹ́ kavi togán de tọn go blo. Tẹnpọn nado ze hodidọ towe sinai do nuhe ji hiẹ po whétọ towe po kọngbedopọ do gbọn ayidonugo nina nuhahun lọ dali kakati nado dọhodo pọngbọ depope he gandudu gbẹtọvi tọn na hẹnwa ji. Enẹgodo, dohia ẹ sọn Biblu mẹ lehe gandudu Jiwheyẹwhe tọn na hẹn pọngbọ wá na nuhahun lọ mlẹnmlẹn podọ kakadoi do. Eyin gbẹtọ lẹ jlo na dọnnu gando whẹho de go taidi alọwle to mẹhe tindo vijinu dopolọ lẹ ṣẹnṣẹn kavi hòdide, yiavùnlọna nujinọtedo Jiwheyẹwhe tọn lẹ bo basi zẹẹmẹ lehe mí nọ hodo nujinọtedo enẹlẹ to gbẹzan mítọn mẹ do tọn. To hodọdopọ lọ whenu, ma dọhodo adà dagbe kavi ylankan he tonudọtọ lẹ nọ yiwà to whẹho ehelẹ mẹ ji blo. To whenue gbẹtọ lẹ to hodọ gando osẹ́n he dona yin didoai, yin hùzẹdeji, kavi yin didiọ lẹ go, mí ma nọ nọgodona linlẹn depope, podọ mí ma nọ gbidikọna mẹdevo lẹ nado kẹalọyi pọndohlan mítọn.

10. Na nuhe dù nuhe mí nọ pọ́n kavi nọ hia to linlinnamẹnu lẹ mẹ, nawẹ mí sọgan hẹn ẹn diun dọ mí hẹn kadaninọ go gbọn?

¹⁰ Linlinnamẹnu lẹ. Linlin-namẹtọ lẹ nọ saba ze nudọnamẹ lẹ donukọnnamẹ po nuvẹun po bosọ nọ nọgodona pọndohlan yetọn titi lẹ. Podọ to whedelẹnu, tonudọtọ lẹ nọ yí linlinnamẹnu lẹ zan. To otò he mẹ gandudu nọ paṣẹ do azọ́nwhé linlinnamẹnu lẹ tọn ji te lẹ mẹ, linlin lẹ sọgan yin kọslona gànna-gànna, podọ Klistiani he tlẹ tin to otò he to yedekannu lẹ mẹ lẹ dona tin to aṣeji ma nado kẹalọyi pọndohlan linlin-namẹtọ de tọn. Kanse dewe dọ, ‘Be n’yiwanna nado nọ dotoaina linlin-namẹtọ de na n’kọngbedopọ hẹ nuhe e nọ dọ gando tonudidọ go wutu ya?’ Eyin mọ wẹ, a sọgan dín asisa nudọnamẹ tọn devo lẹ he nọ tẹdo nudọnamẹ nugbo go. To popolẹpo mẹ, nuyọnẹnnu wẹ e yin nado nọ dapana asisa linlinnamẹ tọn he nọ nọgodona whẹho tonudidọ tọn lẹpo podọ nado nọ yí nuhe a sè lẹ jlẹdo “ohia ohó he sọgbe lẹ tọn” he tin to Biblu mẹ go.—2 Tim. 1:13.

11. Nawẹ e sọgan vẹawuna mí nado hẹn kadaninọ go gbọn eyin nutindo agbasa tọn mítọn lẹ nọ họakuẹ taun na mí?

¹¹ Wanyina agbasanu lẹ. Eyin mí yiwanna nutindo mítọn lẹ zẹjlẹgo, e yọnbasi dọ mí na wá gbẹkọ kadaninọ mítọn go bo na jogbe to whlepọn nukọn. To Malawi, Ruth mọ bọ Kunnudetọ susu wàmọ to whenue yé yin homẹkẹndo to owhe 1970 lẹ mẹ. Ewọ flin dọmọ: “Yé ma sọgan jo gbẹzan fẹẹmẹninọ tọn yetọn do. Mẹdelẹ zọnpọ hẹ mí yì osla fibẹtado tọn he to olá de mẹ, amọ́ to nukọn mẹ, yé wá kọnawudopọ hẹ tonudọgbẹ́ lọ bo lẹkọyi whé, na yé ma jlo na doakọnna ninọmẹ sinsinyẹn lẹ to osla fibẹtado tọn lọ mẹ wutu.” To vogbingbọn mẹ, suhugan omẹ Jiwheyẹwhe tọn lẹ tọn wẹ gbọṣi kada, mahopọnna dọ yé pehẹ nuhahun sinsinyẹn lẹ to akuẹzinzan-liho kavi tlẹ hẹn nutindo yetọn lẹpo bu.—Heb. 10:34.

12, 13. (a) Nawẹ Jehovah nọ pọ́n gbẹtọvi lẹ gbọn? (b) Nawẹ mí sọgan wagbọn do yọnẹn eyin mí ko jẹ awagundo ji zẹjlẹgo gando otò mítọn go?

¹² Awagundido zẹjlẹgo. To paa mẹ, gbẹtọvi lẹ nọ doawagun gando sinmẹ agbasa tọn yetọn, akọ̀ yetọn, aṣa yetọn, lẹdo he mẹ yé wá sọn kavi otò yetọn go. Ṣigba, mí yọnẹn dọ awagundido zẹjlẹgo gando akọ̀, aṣa kavi otò mẹtọn go jẹagọdo pọndohlan he Jehovah tindo gando gandudu aihọn tọn lẹ po whẹndo gbẹtọvi tọn po go. Nugbo wẹ dọ Jiwheyẹwhe ma nọ donukun dọ mí ni gbẹkọ aṣa mítọn lẹ go. Na nugbo tọn, vogbingbọn he tin to aṣa lẹ ṣẹnṣẹn nọ do whanpẹ voovo he tin to whẹndo gbẹtọvi tọn mẹ lẹ hia. Etomọṣo, mí dona flindọ to nukun Jiwheyẹwhe tọn mẹ, gbẹtọvi de ma yiaga hú devo.—Lom. 10:12.

¹³ Awagundido zẹjlẹgo gando otò mẹtọn go wẹ nọ hẹn wanyina akọ̀ mẹtọn wá bo sọgan yin afọdide tintan he na zọ́n bọ mí na gboawupo nado gbọṣi kada. Klistiani lẹ ma gán sọn awagundido ehe si, na mẹdelẹ to agun owhe kanweko tintan whenu tọn mẹ tlẹ klan mẹmẹsunnu yetọn lẹ dovo, na otò he mẹ yé wá sọn wutu. (Owalọ 6:1) Nawẹ mí sọgan wagbọn do yọnẹn eyin mí ko to awagundo zẹjlẹgo to ahun mítọn mẹ? Mí ni dọ dọ mẹmẹsunnu kavi mẹmẹyọnnu de sọn otò devo mẹ na we ayinamẹ de. Be a na lẹn to afọdopolọji dọ ‘Lehe míwlẹ nọ basi nulẹ do tofi pọnte’ bo gbẹ́ ayinamẹ lọ dai wẹ ya? Kakatimọ, mímẹpo wẹ dona yí ayinamẹ gbọdo ehe do yizan mẹ, enẹ wẹ: “Mì nọ gbọn whiwhẹ dali pọ́n mẹdevo lẹ dọ yé yiaga hú mì.”—Flp. 2:3.

14. Nawẹ odẹ̀ sọgan gọalọna mí gbọn, podọ apajlẹ Biblu tọn tẹwẹ do ehe hia?

¹⁴ Onú atọ̀ntọ he mí dona wà nado gbọṣi kada wẹ nado ganjẹ Jehovah go. Hodẹ̀ bo biọ gbigbọ wiwe nado sọgan tindo homẹfa po mawazẹjlẹgo po, yèdọ jẹhẹnu he a tindo nuhudo etọn lẹ nado doakọnnanu to gandudu he nọ hò ahizi kavi he nọ yinuwa po mawadodo po de glọ. Hiẹ sọgan sọ biọ Jehovah dọ ni na we nuyọnẹn nado sọgan yọ́n ninọmẹ he na whlé kadaninọ Klistiani tọn towe pọ́n lẹ bo pehẹ yé po kọdetọn dagbe po. (Jak. 1:5) Eyin a yin súsúdo gànpamẹ kavi yin yasana to aliho devo mẹ na teninọ nujikudo tọn he a ze na sinsẹ̀n-bibasi nugbo wutu, biọ huhlọn to odẹ̀ mẹ nado sọgan yiavùnlọna yise towe po adọgbigbo po podọ nado doakọnna homẹkẹn depope he a sọgan wá pehẹ.—Hia Owalọ lẹ 4:27-31.

15. Nawẹ Biblu sọgan gọalọna mí nado gbọṣi kada gbọn? (Sọ pọ́n apotin lọ, “Ohó Jiwheyẹwhe Tọn Hẹn Nujikudo Yetọn Sinyẹn Deji.”)

¹⁵ Jehovah sọgan na we huhlọn gbọn Ohó etọn gblamẹ. Lẹnayihamẹpọn do wefọ he sọgan gọalọna we nado gbọṣi kada to whlepọn glọ lẹ ji. Plọn yé do tamẹ todin, na yé nido sọgan gọalọna we eyin e wá jọ bọ a ma sọgan mọ Biblu de. Ohó Jiwheyẹwhe tọn sọ sọgan hẹn todido he a tindo gando dona sọgodo tọn he Ahọluduta lọ na hẹnwa lẹ go lodo dogọ. Todido ehe yin dandannu eyin mí na penugo nado doakọnna homẹkẹn. (Lom. 8:25) De wefọ voovo he basi zẹẹmẹ dona he a to nukundo hugan nado duvivi etọn lẹ tọn, podọ yí nukun homẹ tọn do mọ dewe hlan Paladisi mẹ dile a to vivi dona enẹlẹ tọn dù.

16, 17. Etẹwẹ mí sọgan plọn sọn apajlẹ devizọnwatọ nugbonọ Jiwheyẹwhe tọn he hẹn kadaninọ go lẹ tọn mẹ? (Pọ́n yẹdide he tin to bẹjẹeji hosọ ehe tọn.)

¹⁶ Onú ẹnẹtọ he mí dona wà nado gbọṣi kada wẹ nado plọnnu sọn apajlẹ devizọnwatọ nugbonọ Jehovah tọn lẹ tọn mẹ. Apajlẹ yetọn sọgan na mí nuyọnẹn po huhlọn he mí tindo nuhudo etọn po nado doakọnnanu. Di apajlẹ, Ṣadlaki, Mẹṣaki, po Abẹdinẹgo po gbẹ́ ma nado basi sinsẹ̀n na boṣiọ de he nọtena Gandudu Babilọni tọn. (Hia Daniẹli 3:16-18.) Kandai gbemima yetọn tọn hihia ko na adọgbigbo Kunnudetọ egbezangbe tọn lẹ nado gbẹ́ ma nado basi sinsẹ̀n hlan asia otò yetọn tọn. Humọ, Jesu dapana nudindọn tonudidọ tọn po nudindọn devo lẹ po mlẹnmlẹn. Na e yọ́n lehe apajlẹ etọn na yinuwado mẹdevo lẹ ji do wutu, e dotuhomẹna devi etọn lẹ dọmọ: “Mì gboadọ! N’ko gbawhàn aihọn tọn.”—Joh. 16:33.

¹⁷ To ojlẹ mítọn mẹ, Kunnudetọ susu wẹ hẹn kadaninọ yetọn go. Mẹdelẹ jiya nuyiwahẹmẹ kanyinylan tọn po gànpamẹninọ tọn po bo tlẹ kú do yise yetọn tamẹ. Apajlẹ yetọn sọgan gọalọna we dile e yin do na Barış he nọ nọ̀ Turquie, mẹhe dọmọ: “Franz Reiter yin mẹmẹsunnu jọja de he yin hùhù na e gbẹ́ ma nado kọnawudopọ hẹ awhànpa Hitler tọn wutu. Owe he e kàn hlan onọ̀ etọn to ozán he jẹnukọnna okú etọn mẹ dohia dọ e tindo yise po jidide ayidego tọn po to Jehovah mẹ, podọ n’jlo na hodo apajlẹ etọn eyin n’pehẹ whlepọn mọnkọtọn de.”^[2]

18, 19. (a) Nawẹ hagbẹ agun towe tọn lẹ sọgan gọalọna we nado hẹn kadaninọ go gbọn? (b) Etẹwẹ a magbe nado wà?

¹⁸ Godonọnamẹ sọ nọ wá sọn mẹmẹsunnu po mẹmẹyọnnu po he to agun towe mẹ lẹ dè. Dike mẹho agun tọn lẹ ni yọ́n whlepọn he a to pipehẹ lẹ na a hẹn kadaninọ go wutu, bo dín ayinamẹ dagbe yetọn he sinai do Biblu ji lẹ. Hagbẹ agun lọ tọn lẹ na na we tuli eyin yé yọ́n avùnnukundiọsọmẹnu he a to pipehẹ lẹ. Biọ to yé si nado hodẹ̀ do ota towe mẹ. Na nugbo tọn, eyin mí jlo dọ mẹmẹsunnu mítọn lẹ ni nọgodona mí bo hodẹ̀ do ota mítọn mẹ, mí dona wà nudopolọ do ota yelọsu tọn mẹ. (Mat. 7:12) Hosọ de tin to jw.org ji he na gọalọna we nado wàmọ, enẹ wẹ “Témoins de Jéhovah emprisonnés en raison de leur foi (par pays).” Nado mọ hosọ ehe, zín SALLE DE PRESSE, enẹgodo VEILLE JURIDIQUE, podọ to whenue a to odò yì, a na mọ hosọ lọ. Eyin a zín in, a na mọ todohukanji otò delẹ tọn he a na zín nado mọ yinkọ Kunnudetọ he yin súsú do gànpamẹ na yise yetọn wutu lẹ tọn. De yinkọ mẹdelẹ tọn, bo hodẹ̀ dọ yé ni yí adọgbigbo do hẹn tenọgligo.—Efe. 6:19, 20.

¹⁹ Dile opodo lọ to sisẹpọ, e ma na paṣa mí eyin gandudu gbẹtọvi tọn lẹ wá jẹ nukundiọsọ mí ji hugan dai tọn, na mí yin nugbonọ na Jehovah podọ na Ahọluduta etọn wutu. Enẹwutu, mì gbọ mí ni hẹn gbemima mítọn lodo todin nado hẹn kadaninọ go to aihọn he ko klan ehe mẹ.