Yí Ahun po Ayiha Towe po do Dín Jiwheyẹwhe

Sinsẹ̀n nugbo Klistiani tọn nọ namẹ tuli nado yí ahun po ayiha po zan to awuwiwlena yise he nọ hẹn homẹ Jiwheyẹwhe tọn hùn mẹ.

NA NUGBO tọn, Jesu Klisti, heyin dowatọ sinsẹ̀n Klistiani tọn, plọnmẹ dọ mí dona yí ‘ayiha mítọn,’ kavi nugopipe apọ̀nmẹ tọn, gọna ‘ahun mítọn’ po ‘alindọn mítọn lẹpo’ po do yiwanna Jiwheyẹwhe. (Matiu 22:37) Mọwẹ, nugopipe apọ̀nmẹ tọn mítọn lẹ dona yí adà titengbe de wà to sinsẹ̀n-bibasi mítọn mẹ.

To whenuena e to oylọ basina todoaitọ etọn lẹ nado lẹnnupọndo nuplọnmẹ etọn ji, Jesu nọ saba dọ, ‘Etẹwẹ mì lẹn?’ (Matiu 17:25; 18:12; 21:28; 22:42) To aliho mọnkọtọn de mẹ, apọsteli Pita wlanwe hlan yisenọ hatọ lẹ nado ‘fọ́n huhlọn nulẹnpọn he họnwun yetọn dote.’ (2 Pita 3:1) Mẹdehlan fliflimẹ tọn he zìn gbejizọnlin hugan lọ, yèdọ apọsteli Paulu, dotuhomẹna Klistiani lẹ nado yí ‘huhlọn nulẹnpọn’ tọn yetọn zan podọ nado “mọdona nuhe ojlo Jiwheyẹwhe tọn he yọ́n, alọkẹyi, bosọ sọgbe nẹ yin.” (Lomunu lẹ 12:1, 2) Kiki gbọn sọwhiwhe yíyí do lẹnnupọndo nuyise yetọn lẹ ji kẹdẹ dali wẹ Klistiani lẹ sọgan wleawuna yise he na hẹn homẹ Jiwheyẹwhe tọn hùn bo nasọ hẹn yé penugo nado doakọnna whlepọn he sọgan fọ́n to gbẹ̀mẹ lẹ.—Heblu lẹ 11:1, 6.

Nado gọalọna mẹdevo lẹ nado wleawuna yise mọnkọtọn, Klistiani wẹndagbe-jlatọ fliflimẹ tọn lẹ ‘yihojlẹdohogo hẹ yé sọn Owe-wiwe lẹ mẹ, bo basi zẹẹmẹ bosọ dlẹnalọdo’ nuhe yin pinplọn lẹ. (Owalọ lẹ 17:1-3) Nudọnsẹpọ lẹnpọn dagbenọ mọnkọtọn hẹn gbeyiyi dagbe wá sọn ahunjijlọnọ lẹ dè. Di apajlẹ, omẹ sọha delẹ sọn tòdaho Makedonia tọn heyin Belea mẹ ‘kẹalọyi ohó Jiwheyẹwhe tọn po jejejininọ daho po, bo nọ yí sọwhiwhe do gbadopọnna Owe-wiwe egbesọegbesọ nado pọ́n eyin nuhe Paulu po gbẹdohẹmẹtọ etọn lẹ po dọ lẹ yin nugbo.’ (Owalọ lẹ 17:11) E jẹ dọ mí ni doayi onú awe go tofi. Tintan, Beleanu lẹ tin to jejeji nado dotoaina Ohó Jiwheyẹwhe tọn; awetọ, yé ma kẹalọyi poun dọ nuhe yé sè lẹ yin nugbo gba, ṣigba yé basi dodinnanu sọn Owe-wiwe mẹ. Mẹdehlan Klistiani tọn Luku gbọn whiwhẹ dali pà Beleanu lẹ na ehe, bosọ ylọ yé dọ “yẹyinọ.” Be hiẹ nọ do ayiha yẹyinọ mọnkọtọn hia to lehe a nọ dọnsẹpọ whẹho gbigbọmẹ tọn lẹ do mẹ ya?

Ayiha po Ahun po Nọ Yinuwa to Pọmẹ

Dile e yin nudego jẹnukọn do, sinsẹ̀n-bibasi nugbo nọ bẹ ayiha po ahun po hẹn. (Malku 12:30) Lẹnnupọn do apajlẹ he tin to hosọ tintan mẹ ji he gando sẹ̀nsatọ he yí osẹ̀n sinmẹ he ma sọgbe lọ zan to whenuena e to sẹ̀nsado ohọ̀ de. Eyin e ko dotoai po sọwhiwhe po na anademẹ azọ́nmẹyimẹdotọ etọn tọn wẹ, e na ko yí ahun po alindọn etọn po do wazọ́n lọ bo na deji dọ mẹhe tindo owhé lọ na kẹalọyi azọ́n etọn. Onú dopolọ yin nugbo gando sinsẹ̀n-bibasi mítọn go.

Jesu dọmọ: ‘Sinsẹ̀ntọ nugbonọ lẹ na sẹ̀n Otọ́ to gbigbọ po nugbo po mẹ.’ (Johanu 4:23) Enẹwutu, apọsteli Paulu wlan dọmọ: “Ehe tọn wutu míwlẹ . . . ma gọ̀n odẹ̀ ma hò na mì, bosọ to bibiọ na mì nido gọ́ na [oyọnẹn he pegan] ojlo etọn tọn to wuntuntun mẹ podọ to nuyọnẹn gbigbọnọ lẹpo mẹ; na mì nido to zọnlinzin dole e jẹ na Oklunọ to nukundagbe lẹpo mẹ.” (Kọlọsinu lẹ 1:9, 10) “Oyọnẹn he pegan” mọnkọtọn nọ hẹn ahundoponọ lẹ penugo nado ze ahun po alindọn yetọn po do sinsẹ̀n-bibasi yetọn mẹ po jidide mlẹnmlẹn po na yé “to enẹ he [yé] yọnẹn sẹ̀n” wutu.—Johanu 4:22.

Na whẹwhinwhẹ́n ehelẹ wutu, Kunnudetọ Jehovah tọn lẹ ma nọ baptizi ovivu kavi jlodotọ yọyọ he ma ko yí sọwhiwhe do plọn Owe-wiwe lẹ gba. Jesu deazọ́nna hodotọ etọn lẹ dọmọ “[Mì] hẹn akọta lẹpo zun nuplọntọ, . . . mì ni sọ nọ plọn yé nado nọ doayi onú lẹpo go, nudepope he yẹn degbena mì.” (Matiu 28:19, 20) Kiki to oyọnẹn he pegan ojlo Jiwheyẹwhe tọn tintindo godo kẹdẹ wẹ Biblu plọntọ ahundoponọ lẹ sọgan basi nudide nuyọnẹn tọn gando whẹho sinsẹ̀n-bibasi tọn go. Be hiẹ to kanván nado tindo oyọnẹn he pegan enẹ lọ ya?

Nukunnumimọjẹ Odẹ̀ Oklunọ Tọn Mẹ

Nado mọ vogbingbọn he tin to tintindo oyọnẹn he pegan Biblu tọn po oyọnẹn he tindo dogbó nuhe e dọ tọn lẹ po ṣẹnṣẹn, mì gbọ mí ni gbadopọnna nuhe nọ saba yin yiylọdọ Odẹ̀ Otọ́ mítọn, kavi Oklunọ tọn, heyin kinkàndai to Matiu 6:9-13 mẹ.

Omẹ livi susu wẹ nọ basi dọvọdọ odẹ̀ apajlẹnọ Jesu tọn to ṣọṣi mẹ gbọzangbọzan. Ṣigba omẹ nẹmu wẹ yè ko plọn nuhe e zẹẹmẹdo, titengbe adà tintan odẹ̀ lọ tọn he dọhodo yinkọ po Ahọluduta Jiwheyẹwhe tọn po ji? Hogo ehelẹ yin nujọnu sọmọ bọ Jesu dọ yé jẹnukọn to odẹ̀ lọ mẹ.

E bẹjẹeji dọmọ: “Otọ́ mítọn he tin to olọn mẹ, hihiọ wẹ oyín towe,” he zẹẹmẹdo nado yin kinklandowiwe, kavi yin hinhẹnzun wiwe. Doayi e go dọ Jesu dọ dọ mí ni hodẹ̀ na yinkọ Jiwheyẹwhe tọn nado yin kinklandowiwe. E whè gbau enẹ ko fọ́n kanbiọ awe dote na mẹsusu. Tintan, etẹwẹ yin yinkọ Jiwheyẹwhe tọn? Podọ awetọ, etẹwutu e dona yin kinklandowiwe?

Gblọndo kanbiọ tintan tọn sọgan yin mimọ hugan whla 7 000 to Biblu mẹ to ogbè dowhenu tọn etọn mẹ. Dopo tin to Psalm 83:18 mẹ he dọmọ: ‘Na yé nido yọnẹn dọ, hiẹ, oyín mẹhe tọn dopo kẹdẹ nọ yin Jehovah, wẹ Gigogán to wẹkẹ lẹpo ji.’ Gando oyín Jiwheyẹwhe tọn, heyin Jehovah go, Eksọdusi 3:15 dọmọ: “Ehe wẹ oyín ṣie kakadoidoi ehe sọ wẹ oflin ṣie hlan whẹndo lẹpo.”a Ṣigba etẹwutu yinkọ Jiwheyẹwhe tọn, heyin apajlẹ tangan wiwe-ṣeke po wiwe-yinyin tọn po, dona sọ yin kinklandowiwe? Na e ko yin masinkọndego bo ko yin vivlẹko sọn bẹjẹeji whenuho gbẹtọvi tọn gbọ́n wutu.

To Edẹni mẹ, Jiwheyẹwhe dọna Adam po Evi po dọ yé na kú eyin yé dù atin-sinsẹ́n heyin gbigbẹdai lọ. (Gẹnẹsisi 2:17) Satani jẹagọdo Jiwheyẹwhe sinsinyẹn, bo dọna Evi dọmọ: “Mì ma na kú dandan gba.” Gbọnmọ dali, Satani sawhẹ lalodido tọn dokọna Jiwheyẹwhe. Ṣigba, e ma nọte do finẹ gba. E kọnmasin do yinkọ Jiwheyẹwhe tọn go dogọ, bo dọna Evi dọ Jiwheyẹwhe gbọn mawadodo dali to oyọnẹn he họakuẹ de ze whlá do e. “Na Jiwheyẹwhe yọnẹn dọ azán he gbè mìwlẹ dù to [atin oyọnẹn dagbe po oylan po tọn lọ] mẹ te, whenẹnu wẹ yè na hùn nukun mìtọn, bọ mìwlẹ na tin di Jiwheyẹwhe, bo nọ yọ́n onú dagbe po oylan po.” Mẹhẹngble nankọtọn die!—Gẹnẹsisi 3:4, 5.

Gbọn atin-sinsẹ́n heyin gbigbẹdai lọ dùdù dali, Adam po Evi po dohia dọ yé tin to adà Satani tọn mẹ. Sọn whenẹnu gbọ́n suhugan gbẹtọ lẹ tọn, vlavo yé yọnẹn kavi lala, ko yidogọna masinkọndomẹgo dowhenu tọn enẹ gbọn gbigbẹ́ nujinọtedo dodonọ Jiwheyẹwhe tọn lẹ dai dali. (1 Johanu 5:19) Gbẹtọ lẹ gbẹ́ pò to masin kọ̀n do Jiwheyẹwhe go gbọn whẹgbigbledo e na yajiji yetọn lẹ dali—dile etlẹ sọgan yin na aliho ylankan yetọn lẹ wutu do sọ. “Nululu gbẹtọ tọn hẹn aliho etọn gble: whenẹnu wẹ ayiha etọn gblehomẹ do OKLUNỌ go,” wẹ Howhinwhẹn lẹ 19:3 dọ. Be hiẹ sọgan mọ nuhewutu Jesu, he yiwanna Otọ́ etọn nugbonugbo, hodẹ̀ dọ oyín Etọn ni yin kinklandowiwe ya?

“Ahọludu Towe Ni Wá”

To whenuena e ko hodẹ̀ dọ oyín Jiwheyẹwhe tọn ni yin kinklandowiwe godo, Jesu dọmọ: “Ahọludu towe ni wá. Ojlo towe ni yin wiwà to aigba go, dile e te to olọn mẹ.” (Matiu 6:10) Gando wefọ enẹ go, mí sọgan kanse dọ: ‘Etẹwẹ Ahọluduta Jiwheyẹwhe tọn yin? Podọ kọndopọ tẹwẹ tin to wiwá etọn po ojlo Jiwheyẹwhe tọn wiwà to aigba ji po ṣẹnṣẹn?’

To Biblu mẹ, hogbe lọ ‘ahọluduta’ na taun tọn zẹẹmẹdo “gandudu gbọn ahọlu de dali.” Po gbesisọ po, Ahọluduta Jiwheyẹwhe tọn na dlẹnalọdo gandudu Jiwheyẹwhe tọn, gbọn ahọlu he ewọ lọsu dè de gblamẹ. Ahọlu ehe masọ yin mẹdevo zẹ̀ Jesu Klisti heyin finfọnsọnku lọ go gba—yèdọ “Ahọlu ahọlu lẹ tọn, Oklunọ Oklunọ lẹ tọn.” (Osọhia 19:16; Daniẹli 7:13, 14) Gando Ahọluduta Mẹssia Jiwheyẹwhe tọn to alọ Jesu Klisti tọn mẹ go, yẹwhegán Daniẹli wlan dọmọ: “To azán ahọlu nẹlẹ tọn lẹ [gandudu gbẹtọvi tọn he to aṣẹpa todin lẹ] mẹ wẹ Jiwheyẹwhe olọn tọn na ze ahọludu de daga, he ma na yin viva gbede, mọ yè ma na jo ahọludu etọn dai hlan gbẹtọ devo lẹ gba: ṣigba e na gbà ahọludu do flinflin bo sú ahọludu he lẹpo do, ewọ bo nasọ nọte kakadoi.”—Daniẹli 2:44.

Mọwẹ, Ahọluduta Jiwheyẹwhe tọn na dugán do aigba ji mlẹnmlẹn, bo na de danuwiwa po gandudu lẹpo po sẹ “kakadoi.” To aliho ehe mẹ, Ahọluduta Jiwheyẹwhe tọn wẹ yin nuyizan he gblamẹ Jehovah na klan oyín ede tọn do wiwe, bo na de masin lalo tọn he Satani po gbẹtọvi kanylantọ lẹ po ko kọndego lẹpo sẹ.—Ezekiẹli 36:23.

Taidi gandudu lẹpo, Ahọluduta Jiwheyẹwhe tọn tindo mẹjidugando lẹ. Mẹnu lẹ wẹ? Biblu gblọn dọmọ: “Homẹmiọnnọ lẹ na dugu aigba tọn; yé na hẹn homẹhun yede to jijọho susu mẹ.” (Psalm 37:11) Mọdopolọ, Jesu dọmọ: “Donanọ wẹ homẹmimiọnnọ lẹ; na yé na dugu aigba tọn.” Na nugbo tọn, omẹ ehelẹ tindo oyọnẹn he pegan Jiwheyẹwhe tọn, heyin nubiọtomẹsi de na gbẹninọ.—Matiu 5:5; Johanu 17:3.

Etẹwẹ na yin ninọmẹ aihọn tọn to whenuena homẹdagbenọ po homẹmimiọnnọ he yiwanna Jiwheyẹwhe bosọ yiwanna ode awetọ nugbonugbo lẹ po kẹdẹ na gọ́ aigba lọ ji? (1 Johanu 4:7, 8) Enẹ wẹ Jesu hodẹ̀ na to whenuena e dọmọ: “Ahọludu towe ni wá. Ojlo towe ni yin wiwà to aigba go, dile e te to olọn mẹ.” Be hiẹ yọ́n nuhewutu Jesu plọn hodotọ etọn lẹ nado hodẹ̀ domọ ya? Na taun tọn, be hiẹ mọ lehe hẹndi odẹ̀ enẹ tọn sọgan gando hiẹ lọsu go do ya?

Omẹ Livi Susu Wẹ to Hoyijlẹdohogo sọn Owe-Wiwe mẹ Todin

Jesu dọ dọdai nujijla weplọnmẹ lẹdo aihọn pé gbigbọmẹ tọn de he na lá Ahọluduta Jiwheyẹwhe tọn he ja tọn. E dọmọ: “Yè nasọ dọyẹwheho wẹndagbe ahọludu tọn he lẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo [aihọn, kavi titonu dinwhenu tọn] na wá.”—Matiu 24:14.

Nudi Kunnudetọ Jehovah tọn livi ṣidopo wẹ to wẹndagbe enẹ má hẹ kọmẹnu yetọn lẹ lẹdo aihọn pé. Yé basi oylọ na we nado plọnnu dogọ gando Jiwheyẹwhe po Ahọluduta etọn po go gbọn ‘sọwhiwhe yíyí do gbadopọnna Owe-wiwe dali,’ bo yí huhlọn nulẹnpọn tọn towe zan. Mọwiwà na hẹn yise towe lodo bo nasọ hẹn we tindo ayajẹ dile hiẹ to nulẹnpọndo todido gbẹninọ to paladisi aigba ji tọn de he na “gọ́ na nuyọnẹn OKLUNỌ tọn, dile osin ṣinyọ́n ohù ji do” mẹ ji.—Isaia 11:6-9.

[Nudọnamẹ Odò Tọn]

[Apotin to weda 8]

Hodo Apajlẹ Mẹplọntọ Daho Lọ Tọn

Jesu nọ saba plọnmẹ gbọn nuzinzindo hosọ tangan Biblu tọn lẹ ji dali. Di apajlẹ, to fọnsọnku etọn godo, e basi zẹẹmẹ azọngban he e tindo to lẹndai Jiwheyẹwhe tọn mẹ tọn na devi awe he tin to ayihaawe mẹ gando okú etọn go lẹ. Luku 24:27 dọmọ: “E sọ hẹn ẹn sọn Mose, po yẹwhegán lẹpo po ji, e sọ detana nuhe yè dọ gbọn ewlọsu tọn dali lẹ hlan yé to Owe-wiwe lẹpo mẹ.”

Doayi e go dọ Jesu dè hosọ tangan de—yèdọ “ewlọsu,” Mẹssia lọ—podọ dọ e yihodọ sọn “Owe-wiwe lẹpo mẹ” to hodidọ etọn mẹ. Na taun tọn, Jesu kọ̀n wefọ Biblu tọn he sọgbe lẹ dopọ, nado hẹn devi etọn lẹ penugo nado mọ nugbo gbigbọmẹ tọn lẹ hezeheze. (2 Timoti 1:13) Taidi kọdetọn de, e mayin dọ yé mọnukunnujẹnumẹ poun wẹ gba ṣigba yé sọ yin whinwhàn sisosiso ga. Kandai lọ dọna mí dọmọ: “Yé sọ to didọ hlan yenọzo, dọmọ, Be ayiha mítọn ma hunzo to ohò mítọn mẹ, whenuena e to hodọ hẹ mí to aliho, podọ whenuena e hùn Owe-wiwe hlan mí?”—Luku 24:32.

Kunnudetọ Jehovah tọn lẹ nọ tẹnpọn nado hodo aliho nuyiwa Jesu tọn lẹ to lizọnyizọn yetọn mẹ. Owe tangan he yé nọ yizan nado plọnmẹ lẹ wẹ alọnuwe Etẹwẹ Jiwheyẹwhe Biọ to Mí Si? po owe Oyọnẹn He Nọ Planmẹ sọyi Ogbẹ̀ Madopodo Mẹ po. Owe ehelẹ dọhodo hosọ ojlofọndotenamẹ Biblu tọn susugege ji, taidi: “Mẹnu Wẹ Jiwheyẹwhe?,” “Naegbọn Jiwheyẹwhe do Jotẹnna Yajiji?,” Nawẹ Hiẹ Sọgan Dín Sinsẹ̀n Nugbo lọ Mọ Gbọn?,” “Ehelẹ Wẹ Azán Godo Tọn Lẹ!,” po “Awuwlena Whẹndo He Nọ Gbògbéna Jiwheyẹwhe De” po. Nupinplọn dopodopo nọ bẹ wefọ susu hẹn.

Hiẹ yin oylọ basina nado dọnsẹpọ Kunnudetọ Jehovah tọn he tin to lẹdo towe mẹ lẹ kavi nado wlanwe hlan adlẹsi he tin to weda 2 linlinnamẹwe ehe tọn na plọnmẹ Biblu whégbè tọn vọ́nu do hosọ ehelẹ kavi devo lẹ ji.

[Yẹdide]

Biọ ahun nuplọntọ towe tọn mẹ gbọn nuzinzindo hosọ tangan Biblu tọn lẹ ji dali

[Yẹdide to weda 7]

Be hiẹ yọ́n zẹẹmẹ odẹ̀ apajlẹnọ Jesu tọn tọn ya?

“Otọ́ mítọn he tin to olọn mẹ, hihiọ wẹ oyín towe . . . ”

“Ahọludu [Mẹssia tọn] towe ni wá . . . ”

“Ojlo towe ni yin wiwà to aigba go, dile e te to olọn mẹ”