Etẹwẹ Ahọluduta Jiwheyẹwhe Tọn Yin?

“Yẹwheho wẹndagbe ahọluduta lọ tọn ehe . . .”—MATIU 24:14.

TO YẸWHEHODIDỌ Osó ji tọn etọn he diyin hugan lọ mẹ, Jesu ze odẹ̀ apajlẹ tọn de dai he mẹ e biọ Jiwheyẹwhe te dọmọ: “Na ahọluduta towe ni wá.” Gbẹtọ livi susu wẹ ko plọn odẹ̀ enẹ do tamẹ bo nọ vọ́ ẹ dọ gbọzangbọzan. Otànwe aihọn tọn de dọ dọ “odẹ̀ tangan he Klistiani lẹpo nọ yizan to sinsẹ̀n-bibasi egbesọegbesọ tọn mẹ” wẹ e yin. Etomọṣo, susu mẹhe nọ basi dọvọdọ odẹ̀ ehe tọn lẹ tọn ma yọ́n nuhe Ahọluduta lọ yin kavi nuhe e na wà to whenue e na wá.—Matiu 6:9, 10.

Ehe ma yin nupaṣamẹ de. Nukọntọ Mẹylọhodotọklisti tọn lẹ nọ basi zẹẹmẹ he sọta yede, doglẹ, bosọ gẹdẹ lẹ do nuhe Ahọluduta lọ yin ji. Dopo to yé mẹ wlan dọ Ahọluduta Jiwheyẹwhe tọn yin “onú jiawu de, . . . kanṣiṣa mayinukundomọ de hẹ Jiwheyẹwhe ogbẹ̀nọ lọ . . . , haṣinṣan de hẹ Jiwheyẹwhe, ehe mẹ sunnu po yọnnu lẹ po nọ mọ whlẹngán te.” Mẹdevo basi zẹẹmẹ wẹndagbe Ahọluduta lọ tọn taidi “anademẹ gando ṣọṣi go.” Podọ owe lọ, Catéchisme de l’Église catholique dọmọ: “Ahọluduta Jiwheyẹwhe tọn [yin] dodowiwa, jijọho, po ayajẹ po to Gbigbọ Wiwe mẹ.”

Hiẹ na mọ zẹẹmẹ he họnwun ganji de to weda 2tọ linlinnamẹwe ehe tọn. E dọmọ: “Ahọluduta Jiwheyẹwhe tọn, yèdọ gandudu de he ko to nuyiwa to olọn mẹ, na hẹn kanyinylan lẹpo wá opodo to madẹnmẹ bo na diọ aigba zun paladisi.” Gbọ mí ni pọ́n lehe Biblu nọgodona nukunnumọjẹnumẹ enẹ do.

Mẹhe Na Dugán Do Aigba lọ Blebu ji to Sọgodo Lẹ

Ahọluduta de yin gandudu de he nọ yin anadena gbọn ahọlu de dali. Jesu Klisti he yin finfọnsọnku lọ wẹ Ahọlu na Ahọluduta Jiwheyẹwhe tọn. Zizedo ofìn ji etọn to olọn mẹ yin zẹẹmẹ basina to numimọ de he yẹwhegán Daniẹli mọ mẹ. E wlan dọmọ: “Yẹn sọ mọ to numimọ ozán lọ mẹ tọn lẹ mẹ, bo, doayi e go, mẹde po aslọ olọn tọn lẹ po taidi visunnu gbẹtọ tọn de [Jesu] wá finẹ, ewọ sọ wá yèdọ jẹ hohotọ azán lẹ tọn lọ [Jehovah Jiwheyẹwhe] dè, yé sọ hẹn ewọ wá sẹpọ ewọ nukọn. Yè sọ yí ahọluigba na ẹn finẹ, po gigo po, po ahọludu de po, na gbẹtọ lẹpo, po akọta lẹ po, po ogbè lẹ po nido nọ sẹ̀n ẹn: ahọluigba madopodo de wẹ ahọluigba etọn, he ma na juwayi, podọ ahọludu etọn enẹ he ma na yin viva.”—Daniẹli 7:13, 14.

Owe Biblu tọn Daniẹli sọ dohia dọ Ahọluduta lọ na yin hinhẹn lodo gligli gbọn Jiwheyẹwhe dali, e na hẹn opodo wá na gandudu gbẹtọvi tọn lẹpo, bo ma na yin vivasudo gbede. Weta 2tọ basi zẹẹmẹ dọ Jiwheyẹwhe hẹn ahọlu Babilọni tọn nado kudlọ de he mẹ e mọ boṣiọ daho de he nọtena huhlọn aihọn tọn debọdo-dego lẹ te. Yẹwhegán Daniẹli detana odlọ enẹ. E wlan dọmọ: “To azán godo tọn lẹ mẹ . . . Jiwheyẹwhe olọn tọn na ze ahọludu de daga, he ma na yin viva gbede, mọ yè ma na jo ahọludu etọn dai hlan gbẹtọ devo lẹ gba; ṣigba e na gbà ahọludu do flinflin bo sú ahọludu he lẹpo do, ewọ bo nasọ nọte kakadoi.”—Daniẹli 2:28, 44.

E ma yin Ahọlu Ahọluduta Jiwheyẹwhe tọn lọ kẹdẹ wẹ na dugán gba. To lizọnyizọn aigba ji tọn etọn whenu, Jesu na jide apọsteli nugbonọ etọn lẹ dọ yé na yin finfọnsọnku do olọn mẹ to pọmẹ hẹ mẹdevo lẹ bo na sin ofìn lẹ ji. (Luku 22:28-30) Jesu ma to hodọ gando ofìn paa lẹ go gba, na dile ewọ dohia do, Ahọluduta lọ na tin to olọn mẹ. Biblu basi zẹẹmẹ gandutọgbẹ́ ehelẹ tọn taidi mẹhe wá sọn “hẹnnu lẹ, ogbè lẹ, gbẹtọ lẹ, podọ sọn akọta lẹpo mẹ.” Yé na yin “ahọluduta de po yẹwhenọ lẹ po hlan Jiwheyẹwhe mítọn, bọ yé na duahọlu do aigba ji.”—Osọhia 5:9, 10.

Nuhewutu Owẹ̀n Ahọluduta lọ Tọn Do Yin Dagbe

Doayi e go dọ Klisti Jesu yin dide nado dugán do “gbẹtọ lẹpo, po akọta lẹ po, po ogbè lẹ po” ji podọ gbẹdohẹmẹtọ etọn lẹ na “duahọlu do aigba ji.” To whelọnu lo, mẹnu lẹ wẹ na yin mẹjidugando Ahọluduta ehe tọn? Mẹhe kẹalọyi wẹndagbe he to yinyin lilá to egbehe lẹ wẹ. Mẹjidugando lọ lẹ sọ bẹ mẹhe na yin finfọnsọnku do ogbẹ̀ to aigba ji bo na tindo todido nado nọgbẹ̀ kakadoi lẹ lọsu hẹn.

Biblu basi zẹẹmẹ dona he gbẹtọ lẹ na duvivi etọn to Ahọluduta lọ glọ lẹ tọn hezeheze. Delẹ die:

“E hẹn awhàn gbọ kakajẹ aigba pòdo; e wẹ́n ogá, bosọ sán owhán do awe; e hẹn kẹkẹ awhàn tọn fiọ to miyọ́n mẹ.”—Psalm 46:9.

“Yé na gbá ohọ̀, bosọ nọ nọ̀ yé mẹ, yé na do vẹngle, bosọ dù sinsẹ́n yetọn. Yé ma na gbá ohọ̀ bọ mẹdevo na nọ e mẹ; yé ma na do bọ mẹdevo na dù.”—Isaia 65:21, 22.

“[Jiwheyẹwhe] nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.”—Osọhia 21:3, 4.

“Whenẹnu wẹ nukun nukuntọ́nnọ lẹ tọn na hùn, otó tókunọ lẹ tọn nasọ hùn. Whenẹnu wẹ pòtẹn na lọ́n di agbanlin, odẹ́ unbọpẹn tọn nasọ jihàn.”—Isaia 35:5, 6.

“Ojlẹ lọ ja, to ehe mẹ mẹhe to yọdò oflin tọn lẹ mẹ lẹpo na sè ogbè [Jesu tọn] bo tọ́njẹgbonu, mẹhe wà dagbe lẹ na fọnsọnku ogbẹ̀ tọn.”—Johanu 5:28, 29.

“Homẹmiọnnọ lẹ na dugu aigba tọn; yé na hẹn homẹhun yede to jijọho susu mẹ.”—Psalm 37:11.

Na nugbo tọn, wẹndagbe de wẹ enẹ yin! Humọ, dọdai Biblu tọn he ko mọ hẹndi lẹ dohia dọ ojlẹ lọ ko sẹpọ na Ahọluduta lọ nado hẹn gandudu dodowiwa tọn etọn lodo to aigba lọ blebu ji.

Etẹwẹ Wẹndagbe lọ Yin?

‘Wẹndagbe ehe . . .’—MATIU 24:14.

KLISTIANI lẹ dona dọyẹwheho “wẹndagbe ahọluduta lọ tọn” gbọn hodidọ na mẹdevo lẹ gandego dali, bo basi zẹẹmẹ na yé dọ Ahọluduta lọ wẹ gandudu sọgodo tọn he na dugán do aigba ji to dodowiwa mẹ. Etomọṣo, Biblu sọ yí hogbe lọ “wẹndagbe” zan to aliho devo lẹ mẹ. Di apajlẹ, mí mọ alọdlẹndonu delẹ taidi, “wẹndagbe whlẹngán tọn” (Psalm 96:2, NW); “wẹndagbe Jiwheyẹwhe tọn lọ” (Lomunu lẹ 15:16); po “wẹndagbe he gando Jesu Klisti go lọ” po.—Malku 1:1.

Do glido, wẹndagbe lọ bẹ nugbo he go Jesu dọho gando bọ devi etọn lẹ wlan dai lẹpo hẹn. Whẹpo Jesu do hẹji yì olọn mẹ, e dọna hodotọ etọn lẹ dọmọ: “Enẹwutu, mì yì bo hẹn gbẹtọ lẹ sọn akọta lẹpo mẹ zun devi lẹ, bosọ nọ baptizi yé to oyín Otọ́ tọn, Visunnu tọn, po gbigbọ wiwe tọn po mẹ, bo nọ plọn yé nado payi nuhe yẹn ko degbe etọn na mì lẹpo go.” (Matiu 28:19, 20) Enẹwutu, azọ́n Klistiani nugbo lẹ tọn ma yin nado dọhona mẹdevo lẹ gando Ahọluduta lọ go kẹdẹ gba; yé sọ dona dovivẹnu nado hẹn gbẹtọ lẹ zun devi.

Nawẹ ṣọṣi lẹ to ehe wà gbọn? Na mẹsusu ma mọnukunnujẹ nuhe Ahọluduta lọ yin mẹ wutu, yé ma sọgan plọnnu mẹdevo lẹ gandego ganji. Kakatimọ, yé nọ dọyẹwheho he na hẹn homẹhun gbẹtọ lẹ gando jona ylando tọn po yise to Jesu mẹ po go. Nado sọgan dọ̀n mẹsusu wá ṣọṣi yetọn mẹ, yé sọ nọ wazọ́n homẹdagbe tọn lẹ kavi gbá dotowhé, wehọmẹ, po owhé lẹ po na wamọnọ lẹ. Dile etlẹ yindọ vivẹnudido mọnkọtọn lẹ sọgan hẹn gbẹtọ susu wá ṣọṣi lọ mẹ, omẹ ehelẹ ma nọ yin Klistiani nugbo he jlo na yí ahundopo do nọgbẹ̀ sọgbe hẹ nuhe Jesu plọnmẹ lẹ gba.

Sinsẹ̀n-nuplọnmẹtọ de wlan dọmọ: “Suhugan weyọnẹntọ kavi nukọntọ he yin Klistiani lẹ tọn wẹ na kẹalọyi dọ mí dona hẹn gbẹtọ lẹ zun devi kavi azọ́nvi Jesu tọn lẹ bo plọn yé nado nọ wà nuhe Jesu dọ lẹpo. . . . To popolẹpo mẹ, anademẹ Jesu tọn do whẹho ehe ji họnwun taun. Mí ma to nuhe e dọ wà poun wẹ. Mí ma nọ ylọ azọ́n lọ dọ nujọnu. Podọ e họnwun dọ mí ma yọ́n lehe mí na wà ẹ do.”

Mọdopolọ, dodinnanu sinsẹ̀n Katoliki tọn de to États-Unis dohia dọ gbẹtọ 95 to kanweko ji wẹ kẹalọyi dọ yẹwheho wẹndagbe lọ tọn didọ yin nubiọtomẹsi de na yise yetọn. Etomọṣo, diblayin yemẹpo wẹ lẹndọ e ma yin hodidọ gandego wẹ aliho dagbe hugan lọ nado wàmọ, kakatimọ gbẹninọ to aliho de mẹ he na yin apajlẹ na mẹdevo lẹ wẹ. Dopo to mẹhe yin hokanse lẹ mẹ dọmọ: “Wẹndagbe-jijlá ma zẹẹmẹdo hodidọ gba. Mílọsu wẹ dona yin Wẹndagbe lọ.” Azọ́nwhé linlinwe tọn, yèdọ U.S. Catholic, he deanana dodinnanu lọ dọ dọ mẹsusu nọ whleawu nado má nuyise yetọn hẹ mẹdevo lẹ na “nujijọ agọe tọn he gando ovivu zinzanhẹ go po nuplọnmẹ sinsẹ̀n tọn he nọ fọ́n ayihaawe dote lẹ po hẹn vlẹko wá ṣọṣi lọ ji” wutu.

To fidevo, biṣọpu ṣọṣi Méthodiste tọn de wule dọ kinklan po bẹwlu po tin to hagbẹ ṣọṣi emitọn tọn lẹ ṣẹnṣẹn, yé ma tindo adọgbigbo nado hẹn azọ́ndenamẹ yetọn di podọ nujinọtedo walọyizan tọn dopolọ wẹ yé tindo hẹ mẹhe ma nọ yì ṣọṣi lẹ. E kanse po flumẹjijẹ po dọmọ: “Mẹnu lẹ wẹ na lá wẹndagbe Ahọluduta lọ tọn lo?”

Biṣọpu lọ ma na gblọndo kanbiọ etọn tọn. Ṣigba, gblọndo lọ tin. Hiẹ na mọ ẹn to hosọ he bọdego mẹ.

[Blurb on page 6]

Wẹndagbe lọ gando Ahọluduta Jiwheyẹwhe tọn po whlẹngán gbọn yise to Jesu Klisti mẹ dali po go