Núdùdù to Owhé Simọni Tọn Gbè to Bẹtani

To whenue Jesu tọ́n sọn Jẹliko, e dedo Bẹtani. E na fán pópló de na nudi kilomẹtlu 20 gbọn aigba he ma jlọ de ji. Jẹliko yìdo hú agayiyi ohù tọn na nudi mẹtlu 250, bọ Bẹtani yiaga hú agayiyi ohù tọn na nudi mẹtlu 610. Lazalọsi po nọviyọnnu etọn awe lẹ po nọ nọ̀ gbétatò pẹvi Bẹtani tọn mẹ, ehe dẹn do Jelusalẹm na nudi kilomẹtlu 3 bo tin to adà whèzẹtẹn-waji tọn Osó Olivie tọn ji.

Ju susu ko wá Jelusalẹm na hùnwhẹ Juwayi tọn. Yé yawu wá “nado sọgan klọ́ yede wé to aṣa-liho” eyin yé ko doalọ oṣiọ de go kavi wà nuhe na ko hẹn yé zun mawé de. (Johanu 11:55; Osọha lẹ 9:6-10) Delẹ to mẹhe yawu wá ehelẹ mẹ pli do tẹmpli mẹ. Yé to hodọ to yedelẹ ṣẹnṣẹn eyin Jesu na wá Juwayi lọ kavi lala.—Johanu 11:56.

Nudindọn daho de wẹ tin gando Jesu go. Sinsẹ̀ngán delẹ jlo na wle e bo hù i. Na nugbo tọn, yé degbe dọ eyin mẹdepope yọ́n fie Jesu te, mẹlọ dona wá dọna yé, “na yé nido sọgan wle e.” (Johanu 11:57) Sinsẹ̀ngán ehelẹ ko tẹnpọn nado hù Jesu to whenue e fọ́n Lazalọsi sọnku godo. (Johanu 11:49-53) Enẹwutu, e ma yin nupaṣamẹ eyin mẹdelẹ tindo ayihaawe dọ Jesu na sọawuhia to gbangba.

Jesu wá Bẹtani to Ahọluzangbe, yèdọ “azán ṣidopo jẹnukọnna hùnwhẹ Juwayi tọn.” (Johanu 12:1) Azán devo (Gbọjẹzan azán 8tọ Nisan tọn) bẹjẹeji to whèjai. Ehe dohia dọ e ko dotana gbejizọnlin lọ jẹnukọnna Gbọjẹzan. E ma sọgan ko zingbejizọnlin sọn Jẹliko to Gbọjẹzangbe—yèdọ sọn Ahọluzangbe whèjai jẹ Sibigbe whèjai—na osẹ́n Ju lẹ tọn jẹagọdo gbejizọnlin mọnkọtọn. Jesu na ko yì owhé Lazalọsi tọn gbè, dile e ko wà do wayi.

Simọni he nọ nọ̀ Bẹtani ga ylọ Jesu po gbẹdohẹmẹtọ etọn lẹ po, gọna Lazalọsi nado wá dùnú to Sibigbe whèjai. Simọni nọ yin yiylọdọ “pòtọnọ lọ,” vlavo na e ko yin pòtọnọ pọ́n bọ Jesu gbọazọ̀nna ẹn wutu. Malta he yin azọ́n sinsinyẹnwatọ to lizọnyina jonọ lọ lẹ. Malia na ayidonugo vonọtaun Jesu to aliho de mẹ he fọ́n nudindọn dote todin.

Malia hùn ogo alabasta tọn kavi ogo pẹvi de, ehe nọ hẹn nudi “litli daa amisisa owán gblingblinnọ, nadi akú” tọn. (Johanu 12:3) Amisisa ehe họakuẹ taun, na akuẹ etọn (yèdọ denali 300) sọ̀ nudi azọ́nkuẹ owhe dopo tọn! Malia kọ̀n amisisa lọ do ota po afọ po na Jesu bo yí oda etọn do súnsún afọ etọn lẹ. Owán gblingblin lọ sọ gọ́ ohọ̀ lọ mẹ.

Homẹgble devi lẹ bọ yé kanse dọmọ: “Naegbọn amisisa owán gblingblinnọ ehe do to yinyin hinhẹngú?” (Malku 14:4) Juda Iskaliọti tlẹ jẹagọdo bo dọmọ: “Naegbọn amisisa owán gblingblinnọ ehe ma yin sisà yin denali 300 bo yin nina wamọnọ lẹ?” (Johanu 12:5) Na taun tọn, Juda ma to wamọnọ lẹ tọn hòpọn. E ko nọ fìn akuẹ sọn apotin akuẹ tọn devi lẹ tọn he go e nọ hẹn lọ mẹ.

Jesu yiavùnlọna Malia bo dọmọ: “Naegbọn mì to tintẹnpọn nado dotukla nawe lọ? Azọ́n dagbe de wẹ e wà na mi. Na wamọnọ lẹ tin to mì dè to whepoponu, ṣigba yẹn ma na tin to mì dè to whepoponu gba. Whenue ewọ kọ̀n amisisa owán gblingblinnọ ehe do agbasa ṣie go, e basi i nado wleawuna mi na ṣiọdidi ṣie. Nugbo wẹ yẹn dọna mì, fidepope he yẹwheho wẹndagbe lọ tọn ehe yin didọ te to aihọn lọ lẹpo mẹ, nuhe nawe ehe wà lọsu na yin didọ ga nado nọ flin in.”—Matiu 26:10-13.

Azán dopo daa nkọ wẹ Jesu ko basi to Bẹtani todin, bọ linlin ko gbayipe dọ Jesu ko wá. Ju susu wá owhé Simọni tọn gbè, e ma yin nado mọ Jesu kẹdẹ, ṣigba nado mọ Lazalọsi ga, yèdọ “mẹhe [Jesu] ko fọ́n sọn oṣiọ lẹ mẹ.” (Johanu 12:9) Todin, yẹwhenọgán lẹ dewé nado hù Jesu po Lazalọsi po. Sinsẹ̀ngán ehelẹ mọdọ, Lazalọsi he gọwá ogbẹ̀ wẹ zọ́n bọ mẹsusu do to yise tindo to Jesu mẹ. Lehe sinsẹ̀ngán ehelẹ ylan do sọ!