Ahọlu Homẹvọnọ de Jiya to Pòtin Ji

Jesu yin pinplan yì fide he ma dẹn do tòdaho lọ, fie ewọ po jaguda awe po na yin hùhù te. Filọ nọ yin yiylọdọ Gọlgọta, kavi Taká Tẹnmẹ, podọ fihe sọgan yin mimọ “sọn olá” de wẹ.—Malku 15:40.

Yè de awù sọn dawe atọ̀n he kú-whẹ̀ yin didá na lọ lẹ go. Enẹgodo, ovẹn he yè yí zuya po vivẹ́ po do hẹn flusọ́ de yin awuwlena. E taidi dọ yọnnu Jelusalẹm tọn lẹ wẹ wleawuna ovẹn flusọ́ lọ, podọ Lomunu lẹ ma nọ gbẹ́ nado na amasin he nọ de awufiẹsa pò enẹ mẹhe na yin hùhù lẹ. Ṣigba, to whenue Jesu dọ ẹ pọ́n, e gbẹ́ nado nù in. Etẹwutu? E ma jlo dọ nugopipe apọ̀nmẹ tọn etọn ni depò paali to whlepọn yise tọn daho ehe whenu; e jlo na to nukle bo yin nugbonọ kakajẹ okú.

Jesu yin titẹ́ do pòtin lọ go. (Malku 15:25) Awhànfuntọ lọ lẹ whè oṣó lẹ do alọ po afọ etọn lẹ po mẹ biọ agbasalan po agbasakàn etọn lẹ po mẹ, ehe hẹn awufiẹsa sinsinyẹn wá na ẹn. Dile yè to pòtin lọ jlọ dote, awufiẹsa lọ sọ to sinsinyẹn deji dile zínpinpẹn agbasa etọn tọn zọ́n bọ oṣó-pà lọ lẹ to tintlẹ́n. Ṣogan, Jesu ma dọ danú na awhànfuntọ lọ lẹ. E hodẹ̀ dọmọ: “Otọ́, jona yé, na yé ma yọ́n nuhe wà yé te.”—Luku 23:34.

Aṣa Lomunu lẹ tọn wẹ nado ze ohia de do pòtin lọ go nado do owhẹ̀ he sẹ́nhẹngbatọ lọ hù hia. To ojlẹ ehe mẹ, ohia he Pilati ze daga lọ hia dọmọ: “Jesu Nazalẹti tọn Ahọlu Ju lẹ tọn.” E kàn ẹn do Heblugbe, Latinigbe po Glẹkigbe po mẹ, na diblayin mẹlẹpo nido sọgan hia ẹ. Nuyiwa Pilati tọn do lehe e gbẹwanna Ju he tẹkudeji dọ Jesu dona yin hùhù lẹ do hia. Yẹwhenọgán he to adi ji lọ lẹ jẹagọdo ehe dọmọ: “Hiẹ kàn ‘Ahọlu Ju lẹ tọn’ blo, ṣigba dọ e dọ dọ, ‘Yẹn wẹ Ahọlu Ju lẹ tọn.’” Ṣigba, na Pilati masọ jlo na yin alọnugbọvi yetọn ba wutu, e gblọn dọmọ: “Nuhe yẹn kàn ko yin kinkan.”—Johanu 19:19-22.

Yẹwhenọgán he to adi ji lọ lẹ vọ́ kunnudenu lalo he yé na wayi to Whẹdatẹn daho lọ nukọn lẹ dọ. Abajọ, mẹhe juwajei lẹ do nọ to ota yetọn mimí dile yé to Jesu ṣanko bosọ nọ to zùnzùn in dọmọ: “Ṣiọ! Hiẹ he jlo na họ́ tẹmpli lọ liai bo vọ́ ẹ gbá to azán atọ̀n gblamẹ, whlẹn dewe gbọn tejijẹ sọn yatin lọ ji dali.” Mọdopolọ, yẹwhenọgán lẹ po wekantọ lẹ po to didọna yedelẹ dọmọ: “Gbọ Klisti, Ahọlu Islaeli tọn lọ ni jẹte sọn yatin ji todin, na míwlẹ nido mọ bo yise.” (Malku 15:29-32) Jaguda he yin whiwhè do adusi po amiyọn po mẹ na ẹn lẹ lọsu tlẹ vlẹ ẹ kò, mahopọnna dọ ewọ kẹdẹ wẹ yin homẹvọnọ nugbonugbo.

Awhànfuntọ Lomu tọn ẹnẹ lọ lẹ lọsu yí Jesu do davlẹ. Yé sọgan ko to ovẹn vẹsin nù, enẹwutu e họnwun dọ dile yé to Jesu ṣanko, yé nọ dlẹn ovẹn lọ hlan ẹn, dile etlẹ yindọ ewọ ma sọgan yí i sọn yé si bo nù sọn e mẹ. Lomunu lọ lẹ gbọn mẹṣanko dali dlẹnalọdo nuhe yin kinkando taligbé Jesu tọn lọ dọmọ: “Eyin hiẹ wẹ Ahọlu Ju lẹ tọn, whlẹn dewe gán.” (Luku 23:36, 37) Yí nukun homẹ tọn do pọ́n! Dawe he ko do ede hia nado yin aliho lọ, nugbo lọ, po ogbẹ̀ po wẹ yè wá to zunzun bosọ to ṣinṣàn kò do okà ji todin. Etomọṣo, e yí gbemima do doakọnna onú enẹ lẹpo, bo ma gblewhẹdo Ju he to nupọn lẹ, awhànfuntọ Lomu tọn he to ṣinṣàn ẹn kò lọ lẹ, kavi sẹ́nhẹngbatọ awe he yè dawhẹ okú tọn na bo whè do pòtin go to apá etọn lọ lẹ.

Awhànfuntọ ẹnẹ lọ lẹ ko ze awugbó Jesu tọn lẹ bo má yé do ẹnẹ. Yé sọ de ovò nado yọ́n adà he dopodopo yetọn na yí. Ṣigba, awù odò tọn Jesu tọn yin avọ̀ dagbedagbe, bo “ma tindo titọ̀tẹn de na e yin linlọ̀n sọn aga wá odò.” Awhànfuntọ lọ lẹ sọ dọmọ: “Mì gbọ mí ni ma tlẹ́n ẹn blo, ṣigba mì gbọ mí ni magbe mẹhe tọn e na yin gbọn ovò dide dali.” Yé gbọnmọ dali hẹn wefọ ehe di dọmọ: “Yé má awugbó ṣie lẹ to yede ṣẹnṣẹn, yé sọ de ovò do avọ̀ ṣie lẹ ji.”—Johanu 19:23, 24; Psalm 22:18.

To nukọn mẹ, dopo to sẹ́nhẹngbatọ lọ lẹ mẹ wá doayi e go dọ na taun tọn ahọlu de wẹ Jesu yin. E gbẹnuna awetọ etọn po hogbe ehelẹ po dọmọ: “Be hiẹ ma dibusi Jiwheyẹwhe paali wẹ, todin he hiẹ ko mọ whẹdida dopolọ yí? Sọgbe hẹ whẹdida dodo, míwlẹ to mimọyi to gigọ́ mẹ nuhe jẹna nuhe mí wà; ṣigba dawe ehe ma wà oylan de.” Enẹgodo, e vẹ̀ Jesu dọmọ: “Flin mi whenue hiẹ na biọ ahọluduta towe mẹ.”—Luku 23:40-42.

Jesu gblọn dọmọ: “Nugbo wẹ yẹn dọna we to egbé, Hiẹ na tin hẹ mi,” e ma yin to Ahọluduta lọ mẹ, ṣigba “to Paladisi mẹ.” (Luku 23:43) Pagbe ehe gbọnvona nuhe Jesu ko dọna devi etọn lẹ wayi, enẹ wẹ dọ yé na sinai to ofìn lẹ ji po ewọ po to Ahọluduta lọ mẹ. (Matiu 19:28; Luku 22:29, 30) Ṣigba, Juvi sẹ́nhẹngbatọ ehe na ko sèhó gando Paladisi aigba ji tọn he Jehovah ko wleawu etọn to whẹwhẹwhenu na Adam po Evi po gọna kúnkan yetọn lẹ na yé nido nọ nọ̀ e mẹ lọ go. Todin, jaguda ehe sọgan kú po todido he yin nina ẹn enẹ po.