Dọdai He Gando Mẹssia lọ Go Lẹ

NA JUVI lẹ yọ́n nuhe Isaia po yẹwhegán devo lẹ po ko dọ gando Mẹssia lọ go wutu, yé to nukundo wiwá etọn sọn ojlẹ dindẹn. Na nugbo tọn, to azán Jesu tọn lẹ gbè, Juvi susu wẹ “to todo” dọ Mẹssia lọ na sọawuhia to madẹnmẹ. (Luku 3:15) E jẹ na ayidego dọ, dọdai Biblu tọn lẹ bẹ nudọnamẹ titengbe he gando gbẹzan Mẹssia lọ tọn go delẹ hẹn. Gbẹtọvi tata de poun ma sọgan dọ dọdai nujijọ ehelẹ tọn kavi basi tito dọ onú ehelẹ ni jọ do Jesu go domọ pẹpẹ gba.

Nudọnamẹ He Gando Jiji Mẹssia lọ Tọn Go Delẹ. Isaia dọ dọdai dọ Mẹssia kavi Klisti na yin jiji gbọn yọnnu alọji de dali. To whenuena apọsteli Matiu ko basi zẹẹmẹ ninọmẹ jiawu he mẹ Jesu yin jiji te tọn godo, e wlan dọmọ: “Onú ehe lẹpo sọ jọ, na ehe yè ko dọ sọn [Jehovah] dè gbọn onù yẹwhegán lọ tọn mẹ nido di, dọ, Doayi e go, awhli de na mọhò, e na jì visunnu de.” (Matiu 1:22, 23; Isaia 7:14) Isaia sọ dọ dọdai dọ Klisti na wá sọn kúnkan Davidi tọn mẹ, bo tlẹ sọ donù Jẹse otọ́ Davidi tọn go. Na nugbo tọn, kúnkan Davidi tọn mẹ wẹ Jesu wá sọn tlọlọ. (Matiu 1:6, 16; Luku 3:23, 31, 32) Abajọ, whẹpo Jesu do yin jiji, angẹli Gabliẹli dọna Malia, onọ̀ Jesu tọn dọmọ: ‘Jiwheyẹwhe nasọ yí ofìn Davidi otọ́ etọn tọn na ẹn.’—Luku 1:32, 33; Isaia 11:1-5, 10; Lomunu lẹ 15:12.

Nudọnamẹ He Gando Gbẹzan Mẹssia lọ Tọn Go Delẹ. To whenue Jesu whẹ́n, e yì sinagọgu Nazalẹti tọn mẹ bo hia sọn adà dọdai Isaia tọn de mẹ po gbèzeyiaga po dọmọ: “Gbigbọ [Jehovah] tọn tin to oji e, na e ko samisisana mi nado dọyẹwheho wẹndagbe tọn hlan wamọnọ lẹ.” Jesu yí dọdai ehe zan na ede, bo dọmọ: “Egbé wẹ Owe-wiwe he di to otó mìtọn mẹ.” (Luku 4:17-21; Isaia 61:1, 2) Isaia sọ dọ dọdai gando aliho he mẹ Jesu na yí awuvẹmẹ, walọmimiọn, po whiwhẹ po do yinuwa hẹ mẹhe tindo nuhudo azọ̀nhẹngbọ tọn lẹ te go. Matiu wlan dọmọ: “Gbẹtọ susu sọ to hihodo e, e sọ hẹnazọ̀ngbọna yemẹpo; e sọ kọna yé dọ, yé do e hia blo: na ehe yè dọ gbọn onù Isaia yẹwhegán tọn mẹ nido di, dọ, . . . E ma to avùn na hò, e ma to awhá na do . . . Ofán gbigbà wẹ ewọ ma to na wẹ́n.”—Matiu 8:16, 17; 12:10-21; Isaia 42:1-4; 53:4, 5.

Nudọnamẹ He Gando Yajiji Mẹssia lọ Tọn Go Delẹ. Isaia dọ dọdai dọ mẹsusu ma na kẹalọyi Mẹssia lọ to Islaeli gba, kakatimọ e na lẹzun “zannu ahlida tọn de” na yé. (1 Pita 2:6-8; Isaia 8:14, 15) Podọ na nugbo tọn, mahopọnna azọ́njiawu susu he Jesu wà lẹ, gbẹtọ lọ lẹ “ma yí i sè gba: na yè nido hẹn ohó Isaia yẹwhegán tọn di, ehe e dọ, dọmọ, [Jehovah], mẹnu wẹ yí owẹ̀n mítọn sè?” (Johanu 12:37, 38; Isaia 53:1) Nuhe yidogọna whẹwhinwhẹ́n he wutu Ju lẹ mado yise dọ Jesu wẹ Mẹssia lọ wẹ linlẹn agọ̀ he gbayipe lọ dọ, tlolo he Mẹssia lọ na wá, e na de akọta lọ sọn gandudu Lomu tọn glọ bo gọ̀ ahọluduta Davidi tọn he to edekannu de do tẹnmẹ to aigba ji. Na Jesu jiya bo kú wutu, suhugan Ju lẹ tọn ma kẹalọyi i taidi Mẹssia lọ. Ṣigba na nugbo tọn, Isaia ko dọ dọdai dọ Mẹssia lọ na jiya whẹpo do lẹzun Ahọlu.

To owe Isaia tọn mẹ, Mẹssia lọ dọ to dọdai-liho dọmọ: “Yẹn jo nẹgbé ṣie na nulimẹtọ lẹ, . . . yẹn ma yí nukun ṣie whlá sọn winyan tantúndogona tọn si.” Matiu dọ nuhe jọ do Jesu go to whenuena e tin to owhẹ̀ nukọn dọmọ: “Yé túntán do nukunmẹ na ẹn, bo tùn akotokún in: omẹ devo lẹ sọ yí alọhomẹ yetọn do hotómẹna ẹn.” (Isaia 50:6; Matiu 26:67) Isaia wlan dọmọ: “Yè sọ bianukun na ẹn, ganṣo ewọ ma kẹ̀ onù etọn.” Abajọ, whenuena Pilati kanhose Jesu gando whẹsadokọnamẹ Ju lẹ tọn go, Jesu “ma . . . na gblọndo de e yèdọ jẹ ohó dopo: sọmọ bọ awuji togán [lọ] tlala.”—Isaia 53:7; Matiu 27:12-14; Owalọ lẹ 8:28, 32-35.

Nudọnamẹ He Gando Okú Mẹssia lọ Tọn Go Delẹ. Dọdai Isaia tọn sọ mọ hẹndi to okú Jesu tọn whenu, podọ etlẹ yin to enẹgodo. Isaia dọ dọdai dọmọ: “E basi yọdò etọn hẹ mẹylankan lẹ, podọ hẹ adọkunnọ lẹ to okú etọn mẹ.” (Isaia 53:9) Nawẹ dọdai he taidi nuhe sọta ede ehe mọ hẹndi gbọn? Whenuena Jesu kú, e yin whiwhè do atin go to ajotọ awe ṣẹnṣẹn. (Matiu 27:38) Ṣigba to enẹgodo, Josẹfu Alimate tọn he yin adọkunnọ de di Jesu do yọdò yọyọ etọn titi he e kùn do osé mẹ de mẹ. (Matiu 27:57-60) To godo mẹ, okú Jesu tọn hẹn adà he yin titengbe hugan to dọdai Isaia tọn mẹ dopo di. Isaia dọ gando Mẹssia lọ go dọmọ: “Devi ṣie dodonọ na suwhẹna mẹsusu, na ewọ na hẹn ylando yetọn lẹ.” Na nugbo tọn, okú Jesu tọn wleawuna ofligọ lọ na agbàn ylando tọn nido sọgan yin didesẹ sọn nugbonọ lẹpo ji.—Isaia 53:8, 11; Lomunu lẹ 4:25.

Dọdai lẹ Mọ Hẹndi Pẹpẹ

Nado yí Owe-wiwe do do mẹhe Mẹssia lọ yin hia, apọsteli lẹ po Jesu lọsu po yihodọ whẹwhẹ sọn dọdai Isaia tọn mẹ hugan owe Biblu tọn devo depope. Etomọṣo, e ma yin owe Isaia tọn kẹdẹ wẹ dọho gando sọgodo go gba. Dọdai he sọawuhia to Owe-wiwe Heblu tọn mẹ susu devo lẹ sọ mọ hẹndi gando Jesu, Ahọluduta etọn, po onú dagbe he Ahọluduta enẹ na wadotana to sọgodo lẹ po go.a (Owalọ lẹ 28:23; Osọhia 19:10) Etẹwẹ dohia dọ dọdai ehelẹ na mọ hẹndi? Jesu dọna Juvi hosetọ etọn lẹ dọmọ: “Mì lẹn dọ yẹn wá nado hẹn osẹ́n kavi yẹwhegán lẹ [enẹ wẹ, Owe-wiwe Heblu tọn lẹ] gble blo: yẹn ma wá nado hẹngble gba, adavo nado hẹndi. Na nugbo wẹ yẹn dọ hlan mì, dọ, Kaka olọn po aigba po nado juwayi, yọwhi dopo kavi jàjá dopo ma na juwayi sọn osẹ́n mẹ, kaka onú lẹpo nado wá jọ.”—Matiu 5:17, 18.

Jesu sọ dlẹnalọdo dọdai Biblu tọn delẹ, he mọ hẹndi to gbẹwhenu etọn po dehe na wá mọ hẹndi lẹ po.(Daniẹli 9:27; Matiu 15:7-9; 24:15) Humọ, Jesu po devi etọn lẹ lọsu po dọ dọdai nuhe na wá jọ bọdo azán yetọn go lẹ tọn, kakajẹ dehe to jijọ to egbehe lẹ ji. Hosọ he bọdego na dọhodo hẹndi dọdai Biblu tọn ehelẹ po devo he na wá mọ hẹndi to sọgodo lẹ po ji.

[Nudọnamẹ odò tọn]

[Yẹdide to weda 4]

“Awhli de na . . . ji visunnu de”

[Yẹdide to weda 5]

“Yẹn ma yí nukun ṣie whlá sọn winyan . . . si”