Be A Gán Gọalọ to Azọ́n Mẹhẹnzun Devi Tọn mẹ Ya?

 1. Etẹwẹ Jehovah ko wà na we?

NAWẸ a lẹzun Kunnudetọ Jehovah tọn de gbọn? Vlavo to tintan whenu, a sè “wẹndagbe lọ” sọn mẹjitọ towe lẹ, azọ́nwatọgbẹ́, kavi klasigbẹ́ towe de dè, kavi gbọn azọ́n yẹwhehodidọ sọn họndekọn jẹ họndekọn tọn gblamẹ. (Malku 13:10) Enẹgodo, mẹde yí whenu susu zan bo dovivẹnu nado plọn Biblu hẹ we. To oplọn lọ whenu, a wá yiwanna Jehovah bosọ plọn dọ ewọ yiwanna we. Jehovah dọ̀n we wá nugbo lọ mẹ, podọ todin, taidi devi Jesu Klisti tọn de, a tindo todido lọ nado nọgbẹ̀ kakadoi. (Joh. 6:44) Ayihaawe ma tin dọ a yọ́n pinpẹn etọn dọ Jehovah whàn mẹde nado plọn we nugbo lọ, bosọ kẹalọyi we taidi dopo to devizọnwatọ Etọn lẹ mẹ.

 2. Etẹwẹ mí na gbadopọnna to hosọ ehe mẹ?

² Todin he mí ko yọ́n nugbo lọ, mí do lẹblanulọkẹyi lọ nado gọalọna mẹdevo lẹ na yé nido wá gọna mí to ali ogbẹ̀ tọn lọ ji. Yẹwhehodidọ sọn họndekọn jẹ họndekọn gán nọ bọawuna mí, amọ́ e gán nọ vẹawuna mí nado ze plọnmẹ Biblu lẹ donukọnnamẹ bosọ deanana yé. Be mọ wẹ e nọ ṣí na we ya? Eyin mọ wẹ, vlavo ayinamẹ he to hosọ ehe mẹ delẹ gán gọalọna we. Mí na dọhodo nuhe nọ whàn mí nado hẹnmẹ zun devi ji. Mí nasọ dọhodo lehe mí gán duto avùnnukundiọsọmẹnu he gán glọnalina mí nado deanana plọnmẹ Biblu lẹ ji do ji. Jẹnukọn whẹ́, mì gbọ mí ni gbadopọnna nuhewutu mí ma dona yin yẹwhehodọtọ wẹndagbe lọ tọn lẹ kẹdẹ, amọ́ mẹplọntọ lẹ ga.

 3. Naegbọn mí nọ dọyẹwheho?

³ Whenue Jesu to aigba ji, e deazọ́n adà-awenọ de na hodotọ etọn lẹ. Tintan, e dọna yé nado dọyẹwheho wẹndagbe Ahọluduta lọ tọn, podọ e do lehe yé gán wàmọ do hia yé. (Mat. 10:7; Luku 8:1) Jesu sọ gọalọna devi etọn lẹ nado yọ́n nuhe yé na wà, eyin mẹlẹ kẹalọyi owẹ̀n Ahọluduta lọ tọn kavi gbẹ́ ẹ dai. (Luku 9:2-5) E sọ dọ dọdai obá he mẹ azọ́n yẹwhehodidọ tọn yetọn na gbloada jẹ tọn, bo dọna yé dọ hodotọ emitọn lẹ na ‘dekunnuna akọta lẹpo.’ (Mat. 24:14; Owalọ 1:8) Mahopọnna lehe gbẹtọ lẹ na yinuwa gando owẹ̀n lọ go do, devi lẹ dona dọyẹwheho na yé gando Ahọluduta Jiwheyẹwhe tọn po nuhe e na wadotana lẹ po go.

 4. Sọgbe hẹ Matiu 28:18-20, gbọnvona yẹwheho Ahọluduta lọ tọn didọ, etẹwẹ mí dona wà?

⁴ Etẹwẹ yin adà awetọ gbedide he Jesu na tọn? E dọna hodotọ etọn lẹ nado plọn mẹhe gán wá lẹzun devi lẹ nado nọ payi nuhe e ko degbe etọn lẹpo go. Amọ́, be owhe kanweko tintan whenu kẹdẹ wẹ azọ́n yẹwhehodidọ po mẹpinplọn tọn ehe po dona yin wiwà te, dile mẹdelẹ gán lẹn do ya? Paali, Jesu dohia dọ azọ́n titengbe ehe na tlẹ dlẹnkan jẹ azán mítọn gbè, yèdọ “kakajẹ vivọnu titonu lọ tọn.” (Hia Matiu 28:18-20.) E taidi dọ Jesu na gbedide ehe to whenue e sọawuhia nuhe hugan 500 to devi etọn lẹ mẹ. (1 Kọl. 15:6) Podọ to osọhia he e na Johanu mẹ, Jesu dohia hezeheze dọ ojlo emitọn wẹ yindọ devi emitọn lẹpo ni gọalọna mẹdevo lẹ nado plọnnu gando Jehovah go.—Osọ. 22:17.

 5. Sọgbe hẹ 1 Kọlintinu lẹ 3:6-9, apajlẹ tẹwẹ Paulu na nado do kanṣiṣa he to yẹwhehodidọ po mẹpinplọn po ṣẹnṣẹn hia?

⁵ Apọsteli Paulu yí azọ́n mẹhẹnzun devi tọn jlẹdo nudido go, bo dohia dọ e ma ko pé nado donú. E flinnu Kọlintinu lẹ dọ: “Yẹn do, bọ Apolo húsinna . . . Mìwlẹ wẹ ogle Jiwheyẹwhe tọn he ewọ to lilẹ̀.” (Hia 1 Kọlintinu lẹ 3:6-9.) Taidi azọ́nwatọ lẹ to “ogle Jiwheyẹwhe tọn” mẹ, gbọnvona okún lẹ dido, mí sọ dona nọ húsinna yé bo nọ gbeje whinwhẹ́n yetọn pọ́n whẹwhẹ. (Joh. 4:35) To ojlẹ dopolọ mẹ, mí nọ yọnẹn dọ Jiwheyẹwhe wẹ nọ hẹn okún lọ whẹ́n.

 6. Etẹwẹ azọ́n mítọn taidi mẹplọntọ nọ bẹhẹn?

⁶ Mí nọ dín “mẹhe tindo ninọmẹ ahun mẹ tọn he jẹna ogbẹ̀ madopodo” lẹ. (Owalọ 13:48) Na omẹ enẹlẹ nido lẹzun devi, mí dona gọalọna yé (1) nado mọnukunnujẹ nuhe yé plọn to Biblu mẹ lẹ mẹ, (2) kẹalọyi yé, podọ (3) nado yí yé do yizan mẹ. (Joh. 17:3; Kol. 2:6, 7; 1 Tẹs. 2:13) Mẹlẹpo to agun mẹ wẹ gán gọalọna Biblu plọntọ lẹ, eyin yé nọ ze apajlẹ dai na nuhe dù owanyi didohia omẹ yọyọ ehelẹ, bosọ nọ hẹn yé voawu whenue yé wá opli lẹ. (Joh. 13:35) Mẹhe to anadena oplọn lọ lọsu gán sọ nọ yí whenu po huhlọn susu po zan nado gọalọna nuplọntọ de nado jo nuyise kavi walọ he ko “hẹnai lẹ” do. (2 Kọl. 10:4, 5) E gán yí osun susu nado deanana mẹde dile e to afọdide ehelẹ ze nado wá pegan na baptẹm to godo mẹ. Amọ́, vivẹnu he mí do lẹ ma nọ yin to ovọ́ mẹ.

 7. Etẹwẹ nọ whàn mí nado do mahẹ to azọ́n yẹwhehodidọ po mẹhẹnzun devi tọn lọ po mẹ?

⁷ Naegbọn mí nọ hẹn alọnu mítọn ján to azọ́n yẹwhehodidọ po mẹhẹnzun devi tọn lọ po mẹ? Tintan, na mí yiwanna Jehovah wutu wẹ. Eyin a nọ wà nuhe go a pé lẹpo nado setonuna gbedide lọ nado dọyẹwheho bosọ hẹnmẹ zun devi, owanyi towe na Jiwheyẹwhe dohia wẹ a te niyẹn. (1 Joh. 5:3) Lẹnnupọndo ehe ji: Owanyi towe na Jehovah ko whàn we nado nọ dọyẹwheho sọn whédegbè jẹ whédegbè. Be e bọawu nado setonuna gbedide enẹ ya? E yọnbayi dọ gblọndo lọ ni yin lala. Be obu ma di we whla tintan he a yì ohọ̀n de kọ̀n nado dọyẹwheho ya? Ayihaawe ma tin dọ mọwẹ! Amọ́, a yọnẹn dọ azọ́n he Jesu jlo dọ a ni wà lọ wẹ, enẹwutu a setonuna gbedide lọ. Podọ e yọnbayi dọ, dile ojlẹ to yìyì, e wá bọawuna we dogọ nado nọ doalọ to azọ́n yẹwhehodidọ tọn lọ mẹ. Todin, etẹwẹ dogbọn anadidena plọnmẹ Biblu de dali? Be linlẹn enẹ tata nọ gbàhundona we wẹ ya? E gán yinmọ. Amọ́, eyin a biọ Jehovah dọ ni gọalọna we nado duto obu towe ji bosọ wleawuna adọgbigbo nado ze plọnmẹ Biblu de donukọnnamẹ, e gán gọalọna we nado hẹn ojlo towe nado hẹnmẹ zun devi lodo.

 8. Sọgbe hẹ Malku 6:34, nudevo tẹwẹ sọ nọ whàn mí nado plọnnu mẹlẹ?

⁸ Awetọ, owanyi na kọmẹnu mítọn lẹ nọ whàn mí nado plọn yé nugbo lọ. To gbèdopo, onú ṣikọna Jesu po devi etọn lẹ po to gbejizọnlin yẹwhehodidọ tọn gaa de godo. Yé do hudo fie yé gán gbọjẹ te tọn, amọ́ gbẹtọgun daho de mọ yé. Lẹblanu whàn Jesu nado jẹ “nususu” plọn gbẹtọ lọ lẹ ji. (Hia Malku 6:34.) E yí ede do sanvọ́ to ninọmẹ enẹ mẹ. Etẹwutu? Jesu ze ede do otẹn gbẹtọgun lọ tọn mẹ. E mọ obá he mẹ yé to yaji jẹ, lehe yé do hudo todido tọn sọ, podọ e jlo na gọalọna yé. Ninọmẹ dopolọ mẹ wẹ mẹlẹ te to egbehe. Ma dike awusọhia yetọn ni klọ we blo. Yé taidi lẹngbọ he to fuflupé bo ma do lẹngbọhọtọ de he na deanana yé. Apọsteli Paulu bayi zẹẹmẹ omẹ ehelẹ tọn taidi mẹhe ma tindo Jiwheyẹwhe bo masọ tindo todido. (Efe. 2:12) Yé to “aliho lọ he nọ planmẹ yì vasudo” ji! (Mat. 7:13) Eyin mí lẹnnupọndo ninọmẹ gbigbọmẹ tọn mẹhe to aigba-denamẹ mítọn ji lẹ tọn ji, owanyi po awuvẹmẹ po nọ whàn mí nado gọalọna yé. Podọ, aliho dagbe hugan he mẹ mí gán gọalọ te wẹ nado ze plọnmẹ Biblu de donukọnna yé.

 9. Sọgbe hẹ Filipinu lẹ 2:13, nawẹ Jehovah gán gọalọna we gbọn?

⁹ Vlavo a nọ whleawu nado ze plọnmẹ Biblu de donukọnnamẹ, na a yọnẹn dọ e nọ yí whenu susu to mẹ si nado wleawuna oplọn de bosọ deanana ẹn wutu. Eyin mọ wẹ, dọ numọtolanmẹ towe lẹ na Jehovah. Biọ dọ ni gọalọna we nado wleawuna ojlo lọ nado mọ oplọn de bosọ deanana ẹn. (Hia Filipinu lẹ 2:13.) Apọsteli Johanu hẹn mí deji dọ Jiwheyẹwhe na na gblọndo odẹ̀ he to kọndopọ mẹ hẹ ojlo Etọn lẹ tọn. (1 Joh. 5:14, 15) Enẹwutu, a gán deji dọ Jehovah na gọalọna we nado wleawuna ojlo lọ nado nọ do mahẹ to azọ́n mẹhẹnzun devi tọn lọ mẹ.

10, 11. Etẹlẹ wẹ gán glọnalina mí nado deanana plọnmẹ Biblu de?

¹⁰ Mí nọ ylọ azọ́ndenamẹ mítọn nado dọyẹwheho dọ nujọnu, dile etlẹ yindọ mí nọ pehẹ avùnnukundiọsọmẹnu lẹ he nọ glọnalina mí nado wà susu dile mí na ko jlo do to azọ́n mẹhẹnzun devi tọn lọ mẹ. Mì gbọ mí ni gbadopọnna delẹ to avùnnukundiọsọmẹnu enẹlẹ mẹ gọna lehe mí gán duto yé ji do.

¹¹ Ninọmẹ mítọn lẹ gán nọ glọnalina mí. Di apajlẹ, owhe wẹnlatọ delẹ tọn ko sẹyì kavi yé ma do agbasalilo dagbe. Be ninọmẹ towe niyẹn ya? Eyin mọ wẹ, lẹnnupọndo dopo to nuhe mí plọn sọn azọ̀n bẹplamẹ COVID-19 tọn mẹ lẹ ji. Mí ko mọdọ mí gán yí nuyizan lẹtliki tọn lẹ do deanana plọnmẹ Biblu lẹ po kọdetọn dagbe po! Enẹwutu, a gán bẹ oplọn de jẹeji bosọ deanana ẹn sọn owhé towe gbè. Podọ, ale devo sọ to e mẹ. Mẹdelẹ nọ jlo na plọn Biblu, ṣigba yé ma nọ vò to ojlẹ he mẹ mẹmẹsunnu mítọn lẹ nọ saba dọyẹwheho te lẹ. Amọ́, yé gán nọ vò to afọnnu fuu kavi to zánmẹ. Be e na pà we nado plọn Biblu hẹ mẹde to ojlẹ enẹlẹ mẹ ya? Jesu plọnnu Nikodẹmi to zánmẹ, yèdọ to ojlẹ he yọ́n na Nikodẹmi hugan mẹ.—Joh. 3:1, 2.

12. Etẹlẹ wẹ gán hẹn mí deji dọ mí gán yin mẹplọntọ kọdetọn dagbenọ lẹ?

¹² Mí gán nọma dejido nugopipe mítọn nado deanana oplọn de go. Vlavo mí nọ mọdọ, mí dona yọ́n nususu kavi do nugopipe mẹpinplọn tọn dogọ whẹpo do sọgan plọnnu hẹ mẹde. Eyin mọ wẹ e nọ ṣí na we, lẹnnupọndo onú atọ̀n delẹ he gán yidogọna jidide towe ji. Tintan, Jehovah nọ mọdọ a ko pegan nado plọn mẹdevo lẹ. (2 Kọl. 3:5) Awetọ, Jesu he do ‘aṣẹ lẹpo to olọn mẹ podọ to aigba ji’ ko degbena we nado plọnmẹ. (Mat. 28:18) Podọ atọ̀ntọ, a gán mọ alọgọ yí sọn Jehovah po mẹmẹsunnu towe lẹ po dè. Jehovah gọalọna Jesu nado yọ́n nuhe e na dọ, podọ e gán wà nudopolọ na hiẹ lọsu ga. (Joh. 8:28; 12:49) Humọ, a gán biọ to nugopọntọ pipli kunnudegbe tọn towe, gbehosọnalitọ he pegan de, kavi wẹnlatọ numimọnọ de si dọ ni gọalọna we nado bẹ plọnmẹ Biblu de jẹeji bosọ deanana ẹn. Dopo to aliho he mẹ a gán wleawuna jidide te lẹ mẹ wẹ nado nọ oplọn he dopo to wẹnlatọ enẹlẹ mẹ nọ deanana de tẹnmẹ.

13. Naegbọn mí dona nọ diọalọ?

¹³ Mí gán mọ ẹn di avùnnukundiọsọmẹnu de nado diọada sọgbe hẹ aliho po nuyizan yọyọ lẹ po. Aliho he mẹ mí nọ deanana plọnmẹ Biblu lẹ te ko diọ todin. Owe oplọn tọn tangan mítọn, enẹ wẹ Duvivi Ogbẹ̀ Tọn Kakadoi! biọ dọ mí ni wleawuna oplọn lọ bosọ deanana ẹn to aliho de he gbọnvona dehe mẹ mí ko nọ wàmọ te to dai. Mí nọ hia hukan vude bo nọ dọho susu dopọ hẹ nuplọntọ lọ. Whenue mí to mẹplọn, mí nọ yí video po nuyizan nuyọnẹn wintinwintin tọn lẹ po taidi JW Library^® zan hugan. Eyin a ma ko yọ́n alọ nuyizan enẹlẹ tọn, dọho hẹ mẹde he gán plọn we lehe yè nọ yí yé zan do. To paa mẹ, e ma nọ bọawu nado jo nue ko má mẹ do. Podọ, e nọ vẹawuna mí nado diọada sọgbe hẹ aliho nuyiwa tọn yọyọ lẹ. Amọ́, po alọgọ Jehovah tọn po gọna mẹdevo lẹ tọn, a na mọdọ e bọawu nado diọalọ, podọ awuvivinu wẹ etlẹ sọ yin nado plọnnu hẹ gbẹtọ lẹ. Dile gbehosọnalitọ de dọ do, aliho mẹpinplọn tọn ehe nọ yin “awuvivinu na nuplọntọ lọ po mẹplọntọ lọ po.”

14. Etẹwẹ mí dona nọ flin whenue mí to yẹwhehodọ to aigba-denamẹ he ji mẹsusu ma nọ dotoaina mí te de, podọ nawẹ 1 Kọlintinu lẹ 3:6, 7 nọ na mí tuli gbọn?

¹⁴ Vlavo mí nọ dọyẹwheho to aigba-denamẹ he ji e nọ vẹawu nado bẹ plọnmẹ Biblu lẹ jẹeji te de. E gán taidi dọ mẹlẹ ma nọ do ojlo to owẹ̀n mítọn mẹ kavi tlẹ nọ jẹagọdo e. Etẹwẹ gán gọalọna mí nado hẹn pọndohlan dagbe go to aigba-denamẹ mọnkọ ji? Nọ flindọ ninọmẹ mẹlẹ tọn gán diọ po awuyiya po to aihọn hunyanhunyan tọn ehe mẹ, podọ mẹhe ma do ojlo hia dai lẹ gán wá mọdọ yé do hudo onú gbigbọmẹ tọn lẹ tọn. (Mat. 5:3) Delẹ to mẹhe nọ saba gbẹ́ owe mítọn lẹ dai to ojlẹ de mẹ wayi lẹ mẹ nọ wá yigbe nado plọn Biblu. Mí sọ yọnẹn dọ Jehovah wẹ Ogán jibẹwawhé lọ tọn. (Mat. 9:38) E jlo dọ mí ni zindonukọn nado to dido bosọ to sinhúna, amọ́ ewọ wẹ Mẹlọ he nọ hẹn ẹn whẹ́n. (1 Kọl. 3:6, 7) Podọ, lehe e yin tulinamẹnu do sọ nado nọ flindọ eyin mí ma tlẹ penugo bo to anadena plọnmẹ Biblu de to alọnu, Jehovah nọ suahọ mí na vivẹnudido mítọn lẹ, e ma yin na kọdetọn mítọn lẹ wutu gba!b

15. Nawẹ e nọ ṣí na Jehovah whenue mẹde kẹalọyi plọnmẹ Biblu de bosọ yí nuhe plọn e te lẹ do yizan mẹ?

¹⁵ Homẹ Jehovah tọn nọ hùn eyin mẹde kẹalọyi nugbo Biblu tọn bosọ má ẹn hẹ mẹdevo lẹ. (Howh. 23:15, 16) Lehe ayajẹ Jehovah tọn dona ko gọfla do sọ whenue e mọ zohunhun he omẹ etọn lẹ nọ dohia to egbehe! Di apajlẹ, mahopọnna azọ̀n bẹplamẹ lẹdo aihọn pé to owhe sinsẹ̀nzọn tọn 2020 tọn mẹ, oplọn 7 705 765 wẹ yin anadena, ehe gọalọna gbẹtọ 241 994 nado klan gbẹzan yetọn do wiwe na Jehovah bo yí baptẹm. Devi yọyọ ehelẹ lọsu na deanana plọnmẹ Biblu lẹ bosọ hẹn mẹsusu dogọ zun devi. (Luku 6:40) Matin ayihaawe, mí nọ hẹn homẹ Jehovah tọn hùn whenue mí to mahẹ do to azọ́n mẹhẹnzun devi tọn lọ mẹ.

16. Yanwle dagbe tẹwẹ mí gán zedonukọnna míde?

¹⁶ Azọ́n mẹhẹnzun devi tọn ma bọawu paali, amọ́ po alọgọ Jehovah tọn po, mí gán yí adà de wà nado plọn mẹyọyọ lẹ nado yiwanna Otọ́ olọn mẹ tọn mítọn. Be mí gán yí do bayi yanwle nado bẹ e whè gbau plọnmẹ Biblu dopo jẹeji bosọ nọ deanana ẹn ya? Eyin mí nọ yí dotẹnmẹ depope he hundote na mí zan nado ze plọnmẹ Biblu donukọnna mẹhe mí dukosọna lẹ, kọdetọn lọ lẹ gán paṣa mí. Mí gán kudeji dọ Jehovah na dona vivẹnudido mítọn lẹ.

17. Numimọ tẹwẹ mí na do eyin mí penugo bo deanana plọnmẹ Biblu de?

¹⁷ Lẹblanulọkẹyi nankọ die nado dọyẹwheho na mẹdevo lẹ bosọ plọn yé nugbo lọ! Azọ́n ehe nọ hẹn ayajẹ nujọnu tọn wá na mí. Apọsteli Paulu he gọalọna mẹsusu to Tẹsalonika nado lẹzun devi dọ numọtolanmẹ etọn to aliho ehe mẹ: “Etẹwẹ yin todido kavi ayajẹ kavi jẹgbakun aglinjijẹ tọn mítọn to Oklunọ mítọn Jesu nukọn to tintin tofi etọn whenu? Na nugbo tọn, be e ma yin mìwlẹ wẹ? E họnwun dọ mìwlẹ wẹ gigo po ayajẹ mítọn po.” (1 Tẹs. 2:19, 20; Owalọ 17:1-4) To egbehe, mẹsusu wẹ nọ do numọtolanmẹ dopolọ. Mẹmẹyọnnu de he nọ yin Stéphanie bọ ewọ po asu etọn po ko gọalọna mẹsusu nado pegan na baptẹm, dọmọ: “Ayajẹ de masọ hugan alọgigọna gbẹtọ lẹ nado klan yede do wiwe na Jehovah.”