Whenuena Jaguda lẹ Wá

Nalete, etẹwẹ hiẹ dona wà, eyin jaguda lẹ tẹnpọn bo biọ owhé towe gbè bo diọnukunsọ we? Flin dọ ogbẹ̀ towe yin onú titengbe hugan nutindo lẹ. Klisti Jesu dọmọ: “Mì gbẹ́ oylan lọ blo: ṣigba mẹdepope he hò alaka adusi tọn na we, lẹ́ amiyọn tọn hlan ẹn ga. Eyin mẹde jlo nado . . . yí awu towe, gbọ e ni yí avọ̀ towe ga.”—Matiu 5:39, 40.

Ehe yin ayinamẹ nuyọnẹn tọn. Dile etlẹ yindọ e mayin dandan dọ Klistiani lẹ ni na nudọnamẹ sẹ́ngbàtọ lẹ dogbọn nutindo lẹ dali, e taidi dọ jaguda lẹ nọ lẹzun danuwatọ eyin yé doayi e go dọ yè to nukundiọsọ, ma kọngbedopọ, kavi to kiklọ yé. Susu yetọn, na “ayiha yetọn jẹgló” wutu, nọ yawu yin homẹhẹngblena nado zan walọ danuwiwa tọn, matin lẹblanu.—Efesunu lẹ 4:19.

Samuel nọ nọ̀ owhé daho de gbè. Jaguda lẹ sú aliho ohọ̀ lọ tọn lẹpo bo nọ yì sọn ohọ̀ de mẹ jẹ devo mẹ, bo to nutindo lẹ bẹ. Samuel sè osògbe lẹ, ohọ̀n lẹ gbigbà, podọ gbẹtọ lẹ to awhádo, to avivi, bo to winwẹ̀n. Hinhọngán ma yọnbasi paali. Samuel dọna asi etọn po visunnu atọ̀n etọn lẹ po nado jẹklo do aigba, bẹ alọ yetọn lẹ do aga, miọn nukun yetọn lẹ, bo nọtepọn yé. To whenuena jaguda lẹ biọ họmẹ, Samuel dọho na yé po nukun etọn lẹ po to odò, to yinyọnẹn mẹ dọ eyin emi pọ́n nukun yetọn lẹ ji, yé sọgan lẹndọ emi na do yé hia to godo mẹ. “Mì biọ họmẹ,” wẹ e dọ. “Nudepope he mì jlo, mì bẹ. Mì vò nado bẹ nudepope. Kunnudetọ Jehovah tọn wẹ míwlẹ, podọ mí ma na diọnukunsọ mì gba.” Ehe paṣa jaguda lẹ. Na nudi ganhiho dopo kavi hugan mọ, sunnu 12 biọ họmẹ po adanwànu lẹ po to pọmẹ. Dile etlẹ yindọ yé fin aṣọdonu lẹ, akuẹ, po nuyizan lẹtliki tọn lẹ po, whẹndo lọ ma yin hihò kavi yin ohi hú dile e yin na mẹdevo lẹ to owhé lọ gbè do gba. Whẹndo Samuel tọn dopẹ́ na Jehovah na ogbẹ̀ yetọn.

Ehe yin apajlẹ de dọ na nuhe dù akuẹ po agbasanu lẹ po, mẹhe yè to ajojẹdo he ma diọnukun lẹ sọgan de yọnbasi awugblenamẹ tọn pò.a