Odẹ̀ Oklunọ Tọn—Nuhe E Zẹẹmẹdo Na We

HOGBE he Jesu yizan to Odẹ̀ Oklunọ tọn mẹ to Yẹwhehodidọ Osó ji tọn whenu lẹ yin kinkàndai to Biblu mẹ to Matiu weta 6 wefọ 9 jẹ 13. Tlolo jẹnukọnna odẹ̀ ehe zizedai, Jesu dọmọ: “Whenuena mì to dẹ̀ho, mì zan dọvọdọ vọ́tọ di Kosi lẹ blo; na yé lẹndọ yè na sè yetọn na ohó susu didọ yetọn.”—Matiu 6:7.

Enẹwutu, e họnwun dọ Jesu ma jlo dọ mí ni nọ to hogbe Odẹ̀ Oklunọ tọn lẹ pẹpẹ vọdọ gba. Nugbo wẹ dọ e vọ́ odẹ̀ ehe dọ na mẹplidopọ devo lẹ to nukọnmẹ. (Luku 11:2-4) Ṣigba, kandai Wẹndagbe Matiu po Luku po tọn lẹ ma yí hogbe dopolọ lẹ pẹpẹ zan na odẹ̀ lọ gba. Humọ, odẹ̀ he Jesu po devi etọn lẹ po hò to godo mẹ lẹ ma bẹ hogbe odẹ̀ apajlẹ tọn lọ tọn lẹ pẹpẹ hẹn gba.

Naegbọn Odẹ̀ Oklunọ tọn do yin kinkàndai to Biblu mẹ? Jesu ze apajlẹ ehe dai nado plọn mí lehe odẹ̀ mítọn lẹ sọgan yin alọkẹyi gbọn Jiwheyẹwhe dali do. Mí sọ mọ gblọndo na kanbiọ dodonu gbẹzan tọn delẹ to odẹ̀ ehe mẹ. Enẹwutu, mì gbọ mí ni gbadopọnna adà Odẹ̀ Oklunọ tọn dopodopo.

Nawẹ Yinkọ Jiwheyẹwhe Tọn Nọ Yin?

“Otọ́ mítọn he tin to olọn mẹ, hihiọ wẹ oyín towe.” (Matiu 6:9) Hogbe ehelẹ he yin yiyizan taidi homẹbibiọ na odẹ̀ apajlẹ tọn lọ nọ gọalọna mí nado dọnsẹpọ Jiwheyẹwhe gbọn yiylọ ẹ dọ “Otọ́ mítọn” dali. Taidi ovi de, he nọ yin dindọn hlan mẹjitọ owanyinọ po awuvẹmẹtọ de po dè, mí sọgan dọnsẹpọ Otọ́ olọn mẹ tọn mítọn po jidide po dọ e jlo nado dotoaina mí. Ahọlu Davidi jihàn dọmọ: “Hiẹ he nọ sè odẹ̀, dè we wẹ gbẹtọ lẹpo ja.”—Psalm 65:2.

Jesu plọn mí nado nọ hodẹ̀ dọ oyín Jiwheyẹwhe tọn ni yin hihiọ, kavi kinklandowiwe. Ṣigba etẹwẹ yinkọ Jiwheyẹwhe tọn nọ yin? Biblu na gblọndo kanbiọ ehe tọn dọmọ: “Hiẹ, oyín mẹhe tọn dopo kẹdẹ nọ yin Jehovah, wẹ Gigogán to wẹkẹ lẹpo ji.” (Psalm 83:18) Be hiẹ ko hia oyín Jehovah tọn pọ́n to Biblu mẹ ya?

Na nugbo tọn, yinkọ Jiwheyẹwhe tọn, Jehovah, sọawuhia diblayi whla 7 000 to alọnuwe-hihia Biblu tọn hohowhenu tọn lẹ mẹ. Ṣigba, lẹdogbedevomẹ basitọ delẹ ko de yinkọ ehe sẹ̀ sọn lẹdogbedevomẹ Biblu tọn yetọn lẹ mẹ. Enẹwutu, mí tindo whẹwhinwhẹ́n lẹpo nado nọ hodẹ̀ hlan Mẹdatọ mítọn dọ e ni klan oyín etọn do wiwe. (Ezekiẹli 36:23) Dopo to aliho he mẹ mí sọgan yinuwa sọgbe hẹ odẹ̀ enẹ te lẹ mẹ wẹ nado nọ yí yinkọ lọ Jehovah zan to whenuena mí to dẹ̀ho.

Yọnnu de he nọ yin Patricia, whẹ́n to whẹndo Katoliki tọn de mẹ bo jẹakọhẹ Odẹ̀ Oklunọ tọn ganji. Nawẹ e yinuwa gbọn to whenuena Kunnudetọ Jehovah tọn de do yinkọ Jiwheyẹwhe tọn hia ẹ to Biblu mẹ? “Yẹn ma sọgan yí ì sè!” wẹ e dọ. “Yẹn sọ ze Biblu ṣie titi bosọ mọ yinkọ dopolọ to e mẹ. Enẹgodo Kunnudetọ lọ do Matiu 6:9, 10 hia mi bo basi zẹẹmẹ na mi dọ Odẹ̀ Oklunọ tọn tindo kanṣiṣa hẹ yinkọ Jiwheyẹwhe tọn. Ehe fọnjlodote na mi taun bọ yẹn biọ ẹ nado plọn Biblu hẹ mi.”

Ojlo Jiwheyẹwhe Tọn Ni Yin Wiwà to Aigba Ji

“Ahọludu towe ni wá. Ojlo towe ni yin wiwà to aigba go, dile e te to olọn mẹ.” (Matiu 6:10) Nawẹ adà odẹ̀ apajlẹ tọn Jesu tọn ehe na mọ hẹndi gbọn? Suhugan gbẹtọ lẹ tọn nọ pọ́n olọn hlan taidi nọtẹn jijọho po vivomẹninọ tọn de po. Owe-wiwe ylọ olọn dọ ‘aisintẹn walọ wiwe po gigo’ Jehovah tọn po. (Isaia 63:15) Abajọ mí nọ hodẹ̀ dọ ojlo Jiwheyẹwhe tọn ni yin wiwà to aigba ji “dile e te to olọn mẹ”! Ṣigba be ehe na wá jọ to gbèdopo ya?

Yẹwhegán Jehovah tọn Daniẹli dọ dọdai dọmọ: “Jiwheyẹwhe olọn tọn na ze ahọludu de daga, he ma na yin viva gbede, mọ yè ma na jo ahọludu etọn dai hlan gbẹtọ devo lẹ gba; ṣigba e na gbà ahọludu [aigba ji tọn lẹ] do flinflin bo sú ahọludu he lẹpo do, ewọ bo nasọ nọte kakadoi.” (Daniẹli 2:44) Ahọludu, kavi gandudu olọn tọn ehe na yinuwa to madẹnmẹ nado hẹn jijọho wá lẹdo aihọn pé gbọn gandudomẹji dodo tọn de dali.—2 Pita 3:13.

Dẹ̀hiho dọ Ahọluduta Jiwheyẹwhe tọn ni wá podọ ojlo etọn ni yin wiwà to aigba ji yin dohia yise tọn he ma na hẹn mí mọ winyan. Apọsteli Johanu wlan dọmọ: “Yẹn sọ sè ogbè daho de sọn olọn mẹ to didọmọ, Doayi e go, gòhọ Jiwheyẹwhe tọn tin to gbẹtọ lẹ dè, ewọ nasọ nọhẹ yé, yé na yin omẹ etọn, Jiwheyẹwhe lọsu nasọ nọhẹ yé, bo nasọ yin Jiwheyẹwhe yetọn. Jiwheyẹwhe nasọ súnsún dasin lẹpo sẹ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko juwayi.” Enẹgodo Johanu yidogọ dọmọ: “Ewọ he sọ sinai to ofìn lọ ji dọmọ, . . . Wlanwe: ohó helẹ dodo po nugbo po wẹ.”—Osọhia 21:3-5.

Dẹ̀hiho Na Nuhudo Agbasa Tọn Lẹ

Nuhe Jesu dọ to odẹ̀ apajlẹ tọn lọ mẹ lẹ dohia dọ oyín Jiwheyẹwhe tọn po ojlo etọn po wẹ dona yin ahunmẹdunamẹnu mítọn tintan. Etomọṣo odẹ̀ lọ bẹ obiọ mẹdetiti tọn heyin didọ hlan Jehovah to aliho he sọgbe mẹ lẹ hẹn.

Tintan lọ wẹ: “Na egbé núdùdù egbesọ mítọn mí.” (Matiu 6:11) E ma yin adọkunnu lẹ wẹ yin bibiọ tofi gba. Jesu dotuhomẹna mí nado nọ biọ ‘núdùdù gbèdopo gbèdopo tọn.’ (Luku 11:3) Odẹ̀ Oklunọ tọn dohia dọ mí sọgan hodẹ̀ po yise po dọ Jiwheyẹwhe na wleawu nuhudo egbesọ tọn mítọn lẹ tọn na mí, eyin mí yiwanna ẹn bo setonuna ẹn.

Nuhiha zẹjlẹgo na nuhahun akuẹzinzan tọn lẹ sọgan hẹn mí nado dovọ́na nuhudo gbigbọmẹ tọn mítọn lẹ, bo gbọnmọ dali gboawupo nado wà nuhe Jiwheyẹwhe to nukundo sọn mí si lẹ. Ṣigba eyin mí ze sinsẹ̀n-bibasi mítọn hlan Jiwheyẹwhe do otẹn tintan mẹ, mí sọgan deji dọ obiọ mítọn lẹ na nuhudo agbasa tọn lẹ, taidi núdùdù po avọ̀ po, na mọ gblọndo. Jesu dọmọ: “Mì [nọ] dín ahọludu Jiwheyẹwhe tọn, po dodo etọn po whẹ́; onú helẹ pó wẹ yè na dogọ hlan mì.” (Matiu 6:26-33) To whenuena e yindọ ylandonọ wẹ mímẹpo yin bosọ tindo nuhudo jona tọn, avùnnukundiọsọmẹnu de wẹ e yin nado dín dodo Jiwheyẹwhe tọn. (Lomunu lẹ 5:12) Odẹ̀ Oklunọ tọn dọhodo whẹho enẹ ji ga.

Dẹ̀hiho Na Jona Ylando Tọn

“Jo ahọ́ mítọn lẹ na mí, dile mí ko jona ahọ́tọnọ mítọn lẹ do.” (Matiu 6:12) To kandai Luku tọn mẹ “ahọ́” ehelẹ yin yiylọdọ “ylando.” (Luku 11:4) Be Jehovah na jo ylando mítọn lẹ na mí nugbonugbo ya?

Dile etlẹ yindọ Ahọlu Islaeli hohowhenu tọn Davidi ko waylando sinsinyẹn lẹ, e lẹnvọjọ bo hodẹ̀ po nujikudo po dọmọ: “Hiẹ, [Jehovah], yin dagbe, bosọ nọ wleawu nado jona; a sù [to] lẹblanu mẹ hlan yé he to awhádo ylọ we lẹpo.” (Psalm 86:5) Lehe linlẹn ehe yin homẹmiọnnamẹ tọn do sọ! Otọ́ olọn mẹ tọn mítọn ko “wleawu nado jona” ylando mẹhe lẹnvọjọ bo dawhá ylọ ẹ lẹ tọn. Kẹdẹdile ahọ́ de sọgan yin hùzẹdeji mlẹnmlẹn do, mọdopolọ wẹ Jehovah Jiwheyẹwhe sọgan jo ylando mítọn lẹ na mí mlẹnmlẹn do niyẹn.

Ṣigba, Jesu donù nubiọtomẹsi de go: Eyin mí jlo na mọ jona Jiwheyẹwhe tọn yí, mí dona nọ jona mẹdevo lẹ. (Matiu 6:14, 15) Mahopọnna dọ Job, dawe nugbonọ lọ yin nuyiwahẹ to aliho agọ̀ mẹ gbọn họntọn etọn atọ̀n dali, e jona yé bo tlẹ sọ hodẹ̀ na yé. (Job 42:10) Eyin mí nọ jona mẹhe ṣinuwa do mí lẹ, mí na tindo nukundagbe Jiwheyẹwhe tọn bo nasọ mọ lẹblanu etọn yí.

Ojlo he Jiwheyẹwhe tindo nado nọ sè obiọ vẹkuvẹku mítọn lẹ dona nọ whàn mí nado dín nukundagbe etọn. Podọ mí sọgan wàmọ dile etlẹ yindọ mapenọ wẹ mí yin. (Matiu 26:41) Jesu dohia dọ mí sọgan mọ alọgọ Jehovah tọn to ninọmẹ ehe mẹ ga gbọn obiọ titengbe de yíyí do dotana odẹ̀ apajlẹ tọn lọ dali.

Alọgọ Nado Zindonukọn to Aliho Dodowiwa Tọn Ji

“A dọ̀n mí do whlepọn mẹ blo, ṣigba whlẹn mí sọn danunọ si.” (Matiu 6:13) Jehovah ma nọ gbẹkọ mí go to whlepọn lẹ whenu kavi nọ sisẹ mí biọ ylando mẹ gba. Ohó etọn dọmọ: “Yè ma sọgan yí oylan do whlé Jiwheyẹwhe pọ́n gba, mọ e masọ nọ whlé mẹdepope pọ́n.” (Jakobu 1:13) Jiwheyẹwhe nọ dike mí ni yin whiwhlepọn, ṣigba e tindo nugopipe lọ nado whlẹ́n mí sọn Mẹwhlepọntọ Daho lọ si—yèdọ “danunọ” lọ, he nọ yin yiylọdọ Satani Lẹgba.

Apọsteli Pita dotuhomẹna Klistiani lẹ dọmọ: “Mì yin huwhẹnọ bosọ nọ họ́ mìde: na [Lẹgba], mẹglatọ mìtọn, di kinnikinni he to lìlì, e to zọnlinzin pé, bo to mẹhe e na tlẹndu dín.” (1 Pita 5:8) Etẹ, Satani tlẹ sọ whlé gbẹtọ pipé lọ Jesu Klisti pọ́n! Etẹwẹ yin yanwle Lẹgba tọn? E jlo na klan Jesu sọn sinsẹ̀n-bibasi nugbo Jehovah Jiwheyẹwhe tọn kọ̀n. (Matiu 4:1-11) Yanwle Satani tọn wẹ nado tlẹ́n we dù ga, eyin hiẹ to díndín nado sẹ̀n Jiwheyẹwhe!

Lẹgba sọgan yí aihọn he ji e to gandu do zan nado whlé mí pọ́n biọ walọ he Jiwheyẹwhe gbẹwanna lẹ mẹ. (1 Johanu 5:19) Enẹwutu, onú titengbe wẹ e yin dọ mí ni nọ lẹhlan Jiwheyẹwhe dè gbọzangbọzan na alọgọ, titengbe to whenuena mí pannukọn whlepọn he dẹn-to-aimẹ de. Podọ eyin mí nọ sẹ̀n Jehovah sọgbe hẹ nuhe yin kinkàn do Ohó gbọdo etọn, Biblu mẹ, e na whlẹ́n mí gbọn alọgigọna mí nado nọavunte sọta Lẹgba dali. “Nugbonọ wẹ Jiwheyẹwhe” wẹ Biblu dọna mí, “mẹhe ma na dike yè ni whlé mì pọ́n hú ehe mì sọgan hẹn.”—1 Kọlintinu lẹ 10:13.

Yise Tintindo to Jiwheyẹwhe mẹ Yin Nujọnu

Lehe e yin homẹmiọnnamẹnu nado yọnẹn dọ Otọ́ olọn mẹ tọn mítọn nọ tindo ojlo to dopodopo mítọn mẹ do sọ! E tlẹ sọ de Visunnu etọn Jesu Klisti nado plọn mí lehe mí sọgan hodẹ̀ gbọn. Na nugbo tọn, ehe fọ́n ojlo mítọn dote dogọ nado hẹn homẹ Jehovah Jiwheyẹwhe tọn hùn. Nawẹ mí sọgan wà ehe gbọn?

Biblu dọmọ: “Matin yise, e glo nado hẹn homẹ [Jiwheyẹwhe tọn] hùn: na ewọ he ja Jiwheyẹwhe dè, ma sọgan nọma yise dọ e tin, podọ ewọ wẹ ahọsutọ yé he whesọ do dín in lẹ tọn.” (Heblu lẹ 11:6) Nawẹ mí sọgan wleawuna yise mọnkọtọn gbọn? “Yise wá sọn sisè mẹ,” wẹ Biblu dọ. (Lomunu lẹ 10:17) Kunnudetọ Jehovah tọn lẹ nọ hùnhomẹ nado dọhodo whẹho he gando Owe-wiwe go lẹ ji hẹ mẹhe to jijlo nado sẹ̀n Jiwheyẹwhe to yise nugbo mẹ lẹpo.

E yin nukundo dọ dogbapọn Odẹ̀ Oklunọ tọn ehe na gọalọna we nado mọnukunnujẹ zẹẹmẹ he e tindo mẹ dogọ. Gbọn nupinplọn dogọ gando oyọnẹn Jehovah tọn po ahọsumẹ etọn na “yé he whesọ do dín in lẹ” po go dali, hiẹ sọgan hẹn yise towe to Jiwheyẹwhe mẹ lodo dogọ. Jaale plọnnu dogọ gando Otọ́ olọn mẹ tọn towe po lẹndai etọn lẹ po go nado sọgan duvivi haṣinṣan pẹkipẹki de tọn hẹ ẹ kakadoi.—Johanu 17:3.

[Blurb to weda 5]

“Otọ́ mítọn he tin to olọn mẹ, hihiọ wẹ oyín towe. Ahọludu towe ni wá. Ojlo towe ni yin wiwà to aigba go, dile e te to olọn mẹ. Na egbé núdùdù egbesọ mítọn mí. Bo jo ahọ́ mítọn lẹ na mí, dile mí ko jona ahọ́tọnọ mítọn lẹ do. A dọ̀n mí do whlepọn mẹ blo, ṣigba whlẹn mí sọn danunọ si.”—Matiu 6:9-13

[Yẹdide lẹ to weda 7]

Jehovah nọ penukundo nuhudo mẹhe yiwanna ẹn lẹ tọn go

Jiwheyẹwhe nọ gọalọna mí ga nado nọavunte sọta Lẹgba

Taidi Job, eyin mí nọ jona mẹhe ṣinuwa do mí lẹ, mí sọgan mọ lẹblanu Jiwheyẹwhe tọn yí