Nọ Plọnnu Dogọ Gando Jehovah Go Gbọn Nudida Etọn lẹ Gblamẹ

 1. Etẹwẹ yin dopo to aliho he mẹ Jobu wá yọ́n Jehovah dogọ te lẹ mẹ?

TO HODỌDOPỌ he Jobu tindo to gbẹzan etọn blebu mẹ lẹ mẹ, dopo tin he fọnjlodotenamẹ taun, enẹ wẹ hodọdopọ etọn hẹ Jehovah Jiwheyẹwhe. Nado hẹn nujikudo Jobu tọn lodo to nuyọnẹn po nugopipe Etọn nado penukundo devizọnwatọ Etọn lẹ go po mẹ, Jehovah donù nujiawu he ewọ dá delẹ go. Di apajlẹ, Jiwheyẹwhe flinnu Jobu dọ emi nọ penukundo kanlin lẹ go, enẹwutu Emi gán sọ wà nudopolọ na ewọ lọsu. (Jobu 38:39-41; 39:1, 5, 13-16) Jobu plọn nususu gando jẹhẹnu Jiwheyẹwhe etọn tọn lẹ go whenue e lẹnnupọndo nudida lẹ ji.

 2. Naegbọn e gán nọ vẹawuna mí to whedelẹnu nado nọ yí sọwhiwhe do pọ́n nudida Jehovah tọn lẹ?

² Mílọsu gán plọnnu dogọ gando Jiwheyẹwhe mítọn go eyin mí nọ yí sọwhiwhe do pọ́n nuhe e dá lẹ. Amọ́, e gán nọma bọawuna mí nado nọ wàmọ to whelẹponu. Eyin tòdaho de mẹ wẹ mí nọ nọ̀, e gán nọ vẹawuna mí nado mọ susu to nudida Jehovah tọn lẹ mẹ egbesọegbesọ. Eyin mí tlẹ nọ nọ̀ gbétatò de mẹ lọsu, mí gán nọ mọdọ mí ma do whenu sọmọ nado yí sọwhiwhe do pọ́n nuhe Jehovah dá lẹ. Enẹwutu, mì gbọ mí ni gbadopọnna nuhewutu e do yọ́n dọ mí ni nọ dovivẹnu bo nọ de whenu dovo nado pọ́n nudida lẹ. Mí nasọ dọhodo lehe Jehovah po Jesu po yí nudida lẹ zan nado plọnmẹ do ji gọna nuhe mí gán wà nado plọnnu dogọ gando nudida lẹ go.

 3. Etẹwẹ dohia dọ Jehovah jlo dọ Adam ni duvivi nudida lẹ tọn?

³ Jehovah jlo dọ gbẹtọvi tintan lọ ni duvivi nuhe emi dá lẹ tọn. Whenue Jiwheyẹwhe dá Adam, E na ẹn paladisi whanpẹnọ de podọ e deazọ́nna ẹn nado nọ pọ̀ paladisi enẹ bosọ hẹn ẹn gblodeji. (Jen. 2:8, 9, 15) Yí nukun homẹ tọn do pọ́n lehe homẹ Adam tọn dona ko hùn do sọ dile e to jinukun lẹ pọ́n bọ yé to tintọ́nkun bọ vounvoun lẹ sọ to sẹ́gbà. Lẹblanulọkẹyi nankọ die Adam tindo nado penukundo jipa Edẹni tọn go! Jehovah sọ biọ to Adam si nado do yinkọ na kanlin voovo lẹ. (Jen. 2:19, 20) Jehovah lọsu gán ko de yinkọ lọ lẹ dopodopo na ede; amọ́ e deazọ́n ehe na Adam. Ayihaawe ma tin dọ whẹpo Adam do dó yinkọ na kanlin lọ lẹ, e yí sọwhiwhe do pọ́n yé bo doayi aliho tangan he mẹ dopodopo yetọn nọ yinuwa te lẹ go. Adam dona ko duvivi azọ́ndenamẹ ehe tọn taun. Matin ayihaawe, dotẹnmẹ hundote de wẹ enẹ na ko yin na ẹn nado hẹn pinpẹn nutọn etọn na nuyọnẹn, anazọ́nwiwa po azọ́nyinyọnẹn Otọ́ etọn tọn po siso dogọ.

 4. (a) Etẹwẹ yin dopo to nuhewutu mí dona nọ yí sọwhiwhe do pọ́n nudida lẹ mẹ? (b) Azọ́n nudida tọn tẹlẹ wẹ a yiwanna hugan?

⁴ Dopo to nuhewutu mí dona nọ yí sọwhiwhe do pọ́n nudida lẹ mẹ wẹ yindọ Jehovah jlo dọ mí ni nọ wàmọ. E biọ to mí si nado “ze nukun [mítọn] lẹ daga hlan olọn bo pọ́n.” Enẹgodo, e kanse dọmọ: “Mẹnu wẹ dá onú ehelẹ?” Gblọndo lọ họnwun. (Isa. 40:26) Jehovah hẹn olọn lẹ, aigba po ohù po gọ́ na azọ́n nudida tọn jiawu susu he mẹ mí gán plọnnu sọn lẹ. (Salm. 104:24, 25) Sọ lẹnnupọndo aliho he mẹ Jiwheyẹwhe dá mí te ji. E dá mí to aliho de mẹ bọ mí nọ yiwanna whanpẹ nuhe e dá lẹ tọn pinpọn. E sọ na mí nugopipe lọ nado mọnú, sènu, doalọ núgo, dọnupọn bosọ sewán, yèdọ nugopipe delẹ he nọ gọalọna mí nado duvivi onú voovo he e dá lẹ tọn.

 5. Sọgbe hẹ Lomunu lẹ 1:20, nawẹ mí nọ mọaleyi gbọn eyin mí yí sọwhiwhe do pọ́n nudida Jehovah tọn lẹ?

⁵ Biblu dọ whẹwhinwhẹ́n titengbe devo he wutu mí dona nọ yí sọwhiwhe do pọ́n nudida lẹ. Yé nọ plọnnu mí gando jẹhẹnu Jehovah tọn lẹ go. (Hia Lomunu lẹ 1:20.) Di apajlẹ, lẹnnupọndo anazọ́n he nọ sọawuhia hezeheze to nudida lẹ mẹ ji. Be yé ma nọ de nuyọnẹn Jiwheyẹwhe tọn hia ya? Sọ lẹnnupọndo núdùdù voovo he mí gán duvivi yetọn lẹ ji. Kunnudenu he họnwun owanyi etọn na gbẹtọvi lẹ tọn wẹ ehe. Whenue mí mọ jẹhẹnu Jehovah tọn lẹ to nuhe e dá lẹ mẹ, mí nọ wá yọ́n ewọ dogọ, podọ mí nọ yin whinwhàn nado dọnsẹpọ ẹ dogọ. Todin, mì gbọ mí ni pọ́n aliho delẹ he mẹ Jehovah ko yí nudida lẹ zan nado plọn onú titengbe delẹ gbẹtọvi lẹ te.

 6. Etẹwẹ mí gán plọn eyin mí yí sọwhiwhe do pọ́n gbejizọnlin ohẹ̀ lẹ tọn?

⁶ Jehovah ko de ojlẹ de na onú dopodopo. To whemẹwhemẹ, bẹsọn vivọnu osun février tọn jẹ ṣẹnṣẹn mai tọn, Islaelivi lẹ nọ mọ adọwé lẹ nọ to zinzlọn gbọn agahomẹ pànta agewaji. Jiwheyẹwhe dọna Islaelivi lẹ dọ, “adọwé lọsu to agahomẹ tlẹ nọ yọ́n ojlẹ etọn lẹ.” (Jel. 8:7) Kẹdẹdile Jehovah ko de ojlẹ de na ohẹ̀ ehelẹ do nado nọ zingbejizọnlin yetọn, e ko de ojlẹ de dovo nado hẹn whẹdida etọn ṣẹ. To egbehe, dile mí yí sọwhiwhe do to ohẹ̀ he to gbejizọnlinzin lẹ pọ́n, e nọ flinnu mí dọ mí gán deji dọ Jehovah tindo ‘ojlẹ dide’ de he mẹ e na hẹn vivọnu wá na aihọn ylankan ehe te.—Hab. 2:3.

 7. Nujikudo tẹwẹ aliho he mẹ ohẹ̀ de nọ zlọn te pinpọn gán na mí? (Isaia 40:31)

⁷ Jehovah nọ na huhlọn devizọnwatọ etọn lẹ. Gbọn Isaia gblamẹ, Jehovah dopà dọ emi na na huhlọn omẹ emitọn lẹ nado ‘yí awà lẹ do zlọn taidi akùn lẹ’ whenue nuṣikọna yé kavi whenue yé gbọjọ. (Hia Isaia 40:31.) Islaelivi lẹ nọ saba mọ akùn lẹ whenue yé to zinzlọn gbọn agahomẹ bọ e ma nọ biọ dọ yé ni hò awà susu. Nuflinmẹ dagbedagbe nankọ die dọ dile Jehovah nọ na huhlọn ohẹ̀ enẹlẹ do, e gán na huhlọn devizọnwatọ etọn lẹ lọsu ga! Eyin a mọ bọ ohẹ̀ daho de to zinzlọn gbọn agahomẹ pete bọ e ma tlẹ biọ dọ ni hò awà etọn lẹ po huhlọn po, nọ flindọ Jehovah gán na we huhlọn nado duto nuhahun towe lẹ ji.

 8. Etẹwẹ Jobu plọn whenue e lẹnnupọndo azọ́n nudida tọn Jiwheyẹwhe tọn lẹ ji, podọ etẹwẹ mí gán plọn sọn ehe mẹ?

⁸ Jehovah jẹna jidedomẹgo mítọn. Jehovah gọalọna Jobu nado hẹn jidide etọn to Ewọ mẹ jideji. (Jobu 32:2; 40:6-8) To whenue Jiwheyẹwhe to hodọdopọ hẹ Jobu, E donù nudida susu lẹ go, ehe bẹ sunwhlẹvu lẹ, aslọ po abì lẹ po hẹn. Jehovah sọ dọho gando kanlin lẹ go, taidi oyìn gbémẹ tọn po osọ́ po. (Jobu 38:32-35; 39:9, 19, 20) Ehe lẹpo yin kunnudenu lọ dọ gbọnvona dọ Jiwheyẹwhe do huhlọn he jiawu, e sọ tindo owanyi po nuyọnẹn daho po. Hodọdopọ ehe zọ́n bọ Jobu wá dejido Jehovah go hugan gbede pọ́n. (Jobu 42:1-6) Mọdopolọ, whenue mí plọnnu gando nudida lẹ go, yé nọ flinnu mí dọ Jehovah tindo nuyọnẹn po huhlọn po tlala hugan mí. Humọ, ewọ gán hẹn whlepọn mítọn lẹpo wá vivọnu podọ e nasọ wàmọ. Nugbo ehe gán hẹn jidide mítọn to ewọ mẹ sinyẹn deji.

 9, 10. Etẹwẹ owhè po jikun po plọn mí gando Jehovah go?

⁹ Jesu yọ́n nususu gando nudida lẹ go. Taidi “azọ́nwatọgan de,” e do lẹblanulọkẹyi lọ nado wazọ́n dopọ hẹ Otọ́ etọn whenue Ewọ to wẹkẹ lọ dá. (Howh. 8:30) To nukọn mẹ whenue Jesu to aigba ji, e yí nudida lẹ zan do plọnnu devi etọn lẹ gando Otọ́ etọn go. Lẹnnupọndo delẹ to nuhe e plọnmẹ lẹ mẹ ji.

¹⁰ Jehovah nọ dlẹnkanna owanyi etọn jẹ mẹlẹpo dè. To Yẹwhehodidọ Osó ji tọn whenu, Jesu dọ̀n ayidonugo devi etọn lẹ tọn wá nudida awe he mẹsusu nọ yí nukunpẹvi do pọ́n delẹ ji: enẹ wẹ owhè po jikun po. Nudida awe ehelẹ yin dandan nado nọgbẹ̀. Jehovah gán ko tẹ̀ yé gbẹtọvi he ma nọ sẹ̀n ẹn lẹ. Kakatimọ, e gbọn owanyi dali wleawu owhè po jikun po tọn na mẹlẹpo. (Mat. 5:43-45) Jesu yí nuplọnmẹ ehe zan nado plọn devi etọn lẹ dọ Jehovah nọ jlo dọ mí ni do owanyi hia mẹlẹpo. Whedepopenu he mí to vivi họ̀yiyi owhè tọn dagbedagbe de tọn dù kavi mọ bọ jikun to jijà, mí gán nọ lẹnnupọndo owanyi matin mẹnukuntahopọn Jehovah tọn ji. Apajlẹ etọn gán whàn mí nado nọ do owanyi mọnkọ hia gbọn yẹwhehodidọ na mẹlẹpo dali.

11. Tuli tẹwẹ mí gán mọyi eyin mí yí sọwhiwhe do pọ́n ohẹ̀ agahomẹ tọn lẹ?

¹¹ Jehovah nọ penukundo nuhudo agbasa tọn mítọn lẹ go. To yẹwhehodidọ dopolọ mẹ, Jesu sọ dọmọ: “Mì pọ́n ohẹ̀ agahomẹ tọn lẹ tlintlin; yé ma nọ do jinukun kavi gbẹ̀n kavi bẹpli do agbànhọ lẹ mẹ, ṣogan Otọ́ mìtọn olọn tọn nọ na núdùdù yé.” E yọnbasi dọ todoaitọ Jesu tọn lẹ ni to mimọ bọ ohẹ̀ lẹ to zinzlọn gbọn agahomẹ whenue e kanse yé dọ: “Be mìwlẹ ma họakuẹ hú yé?” (Mat. 6:26) Aliho he do owanyi hia nankọ die nado hẹn mí deji dọ Jehovah na penukundo nuhudo mítọn lẹ go to agbasa-liho! (Mat. 6:31, 32) Nuhe mí plọn sọn nudida lẹ dè ehe gbẹ́ nọ na tuli devizọnwatọ nugbonọ lẹ. Mẹmẹyọnnu jọja de he yin gbehosọnalitọ to Espagne gbọjọ, na e ma penugo bo mọ fihe jẹ de he e gán nọ wutu. Amọ́, to whenue e mọ bọ ohẹ̀ lẹ to okún po sinsẹ́n atin tọn lẹ po dù, e mọ tuli yí dogọ. E dọmọ, “Ohẹ̀ enẹlẹ nọ flin mi dọ Jehovah nọ penukundo yé go, podọ e na wàmọ na yẹnlọsu ga.” Na nugbo tọn, e ma dẹn bọ mẹmẹyọnnu lọ mọ adọtẹn.

12. Sọgbe hẹ Matiu 10:29-31, etẹwẹ oblẹnọ lẹ plọn mí gando Jehovah go?

¹² Dopodopo mítọn họakuẹ na Jehovah. Whẹpo Jesu do dó apọsteli etọn lẹ hlan nado yì dọyẹwheho, e gọalọna yé nado duto obu homẹkẹn tọn yetọn ji. (Hia Matiu 10:29-31.) Nado wàmọ, e dọhodo ohẹ̀ he yin yinyọnẹn taun to Islaeli de ji, enẹ wẹ oblẹnọ lẹ. Ohẹ̀ ehelẹ ma nọ họakuẹ sọmọ to azán Jesu tọn gbè. Amọ́ e dọna devi etọn lẹ dọmọ: “Depope to yé mẹ ma na flẹ jẹ kọmẹ bọ Otọ́ mìtọn ma na yọnẹn.” Enẹgodo e yidogọ dọmọ: “Mìwlẹ họakuẹ hú oblẹnọ susu.” Gbọnmọ dali, Jesu hẹn devi etọn lẹ deji dọ dopodopo yetọn wẹ họakuẹ to nukun Jehovah tọn mẹ, enẹwutu yé ma do whẹwhinwhẹ́n depope nado dibuna homẹkẹn. Ayihaawe ma tin dọ devi lẹ flin hogbe Jesu tọn lẹ whenue yé to yẹwhehodọ bo mọ oblẹnọ lẹ to tòpẹvi po gbétatò lẹ po mẹ. Whedepopenu he a mọ ohẹ̀ pẹvi de, nọ flindọ a họakuẹ to nukun Jehovah tọn mẹ, na hiẹ lọsu “họakuẹ hú oblẹnọ susu” wutu. Po godonọnamẹ etọn po, a gán yí jidide do pehẹ nukundiọsọmẹ.—Salm. 118:6.

13. Etẹwẹ na gọalọna mí nado nọ plọnnu sọn nudida lẹ dè?

¹³ Mí gán plọn nususu devo lẹ gando Jehovah go sọn nudida lẹ dè. Gbọnna? Jẹnukọn whẹ́, mí dona nọ de whenu dovo nado yí sọwhiwhe do pọ́n nudida lẹ. Enẹgodo, mí dona nọ lẹnayihamẹpọn do nuhe yé plọn mí gando Jehovah go lẹ ji. Mí gán mọdọ e ma bọawu to whelẹponu nado ze afọdide ehelẹ. Mẹmẹyọnnu Géraldine he nọ nọ̀ Cameroun dọmọ: “Tòdaho de mẹ wẹ n’whẹ́n te, enẹwutu n’mọdọ e nọ biọ vivẹnudido sinsinyẹn nado yí sọwhiwhe do pọ́n nudida lẹ.” Mẹho agun tọn de he nọ yin Alfonso dọmọ: “N’ko plọn dọ n’dona nọ de whenu dovo nado nọ dee ṣo bo yí sọwhiwhe do pọ́n nudida Jehovah tọn lẹ bosọ lẹnayihamẹpọn do nuhe yé plọn mi gando ewọ go lẹ ji.”

14. Etẹwẹ Davidi plọn whenue e lẹnayihamẹpọn do nudida Jiwheyẹwhe tọn lẹ ji?

¹⁴ Davidi nọ lẹnnupọn sisosiso do nudida Jiwheyẹwhe tọn lẹ ji. E dọna Jehovah dọmọ: “To whenue yẹn mọ olọn lẹ, alọnuzọ́n towe lẹ, yèdọ osun po sunwhlẹvu lẹ po he hiẹ basi, etẹwẹ gbẹtọ tata de yin bọ hiẹ do nọ hẹn ẹn do ayiha mẹ?” (Salm. 8:3, 4) Mọwẹ, dile Davidi to agahomẹ pọ́n tlintlin to zánmẹ, e wà nususu hú sunwhlẹvu lẹ pinpọn poun. E sọ lẹnayihamẹpọn do nuhe yé plọn ẹn gando Jiwheyẹwhe go ji. E plọn lehe Jehovah klo sọ. To ojlẹ devo lẹ mẹ, Davidi lẹnnupọndo lehe agbasa etọn whẹ́n to vidọ̀ onọ̀ etọn tọn mẹ do ji. Dile e to ayihamẹlẹnpọn do nudọnamẹ jiawu ehelẹ ji, pinpẹn nutọn etọn na nuyọnẹn Jehovah tọn jideji.—Salm. 139:14-17.

15. Na apajlẹ lehe a ko mọ jẹhẹnu Jehovah tọn to nudida lẹ mẹ do tọn. (Salmu lẹ 148:7-10)

¹⁵ Taidi Davidi, e ma biọ dọ a ni yì fidindẹn whẹpo do mọ nudida he ji a na lẹnayihamẹpọn do de. Eyin a pọ́n lẹdo towe mẹ, a gán mọ susu to nudida enẹlẹ mẹ he na gọalọna we nado mọ jẹhẹnu Jehovah tọn susu. Di apajlẹ, nọ mọ huhlọn Jehovah tọn whenue a doayi yozò owhè tọn go to agbasa towe go. (Jel. 31:35) Nọ lẹnnupọndo nuyọnẹn Jiwheyẹwhe tọn ji whenue a mọ ohẹ̀ de bọ e to adọ́ etọn do. Nọ lẹnnupọndo lehe Jiwheyẹwhe nọ do nukiko namẹ do ji whenue a mọ avún pẹvi de to osi etọn mimí. Podọ nọ dopẹna Jehovah na owanyi etọn wutu whedepopenu he a mọ onọ̀ de to aihunda po viyẹyẹ etọn po. Mí do dotẹnmẹ hundote susu tlala nado plọnnu gando Jehovah go, na nudida etọn lẹpo wẹ to ewọ pà wutu, yèdọ pẹvi po daho po, dehe sẹpọ mí kavi dehe dẹn do mí.—Hia Salmu lẹ 148:7-10.

16. Etẹwẹ mí dona magbe nado nọ wà?

¹⁶ Nuyọnẹn, owanyi, anazọ́nwiwa po huhlọn Jiwheyẹwhe mítọn tọn po mayọnjlẹ. Jẹhẹnu ehelẹ gọna devo lẹ nọ họnwun to nudida lẹ mẹ eyin mí ko gbẹ́ yí whenu zan nado pọ́n yé. Mì gbọ mímẹpo ni nọ de whenu dovo whẹwhẹ nado nọ duvivi nudida lẹ tọn bo nọ lẹnnupọndo nuhe yé plọn mí gando Jehovah go lẹ ji. Gbọnmọ dali, mí na dọnsẹpọ Mẹdatọ mítọn hugan gbede pọ́n. (Jak. 4:8) To hosọ he bọdego mẹ, mí na mọ lehe mẹjitọ lẹ gán yí nudida lẹ zan nado gọalọna ovi yetọn lẹ nado dọnsẹpọ Jehovah do.