Nuhe Ohẹ̀ lẹ Sọgan Plọn Mí

“MÌ PỌ́N ohẹ̀ he to aga lẹ; yé ma doji, mọ yé ma gbẹ̀n, mọ yé ma nọ bẹpli do zinhọ̀ lẹ mẹ; ṣigba Otọ́ mìtọn olọn tọn to núdù na yé. Be mìwlẹ ma pọnte hú yé?” (Matiu 6:26) Jesu Klisti dọ hogbe ehelẹ to yẹwhehodidọ diyin he e dọ to osó de pá sẹpọ Ohù Galili tọn mẹ. E mayin hodotọ etọn lẹ kẹdẹ wẹ se hodidọ etọn gba. Gbẹtọgun daho de he sọgan lẹzun devi to sọgodo, he wá sọn adà otò lọ tọn lẹpo mẹ tin to finẹ. Susu yetọn yin wamọnọ he hẹn awutunọ lẹ wá na Jesu nado hẹnazọ̀ngbọna.—Matiu 4:23–5:2; Luku 6:17-20.

To whenuena Jesu ko hẹnazọ̀ngbọna awutunọ lẹpo godo, e ze ayidonugo do nuhudo titengbe gbigbọmẹ tọn lẹ ji. Dopo to nuhe e plọnmẹ lẹ mẹ wẹ dehe yin nùdego to aga.

Ohẹ̀ olọn tọn lẹ ko tin na ojlẹ dindẹn. Delẹ nọ dù wanvú lẹ, devo lẹ nọ dù atin-sinsẹ́n po okún lẹ po. Eyin Jiwheyẹwhe ko na núdùdù susugege mọnkọtọn ohẹ̀ lẹ, na jide tọn e sọgan gọalọna devizọnwatọ etọn lẹ nado mọ núdùdù egbesọ tọn yetọn. E sọgan wà ehe gbọn alọgigọna yé nado mọ agbasazọ́n he na hẹn yé mọ akuẹ bo họ̀ núdùdù dali. Kavi e sọgan hẹn yé tindo kọdetọn dagbe to jinukun yede tọn lẹ didó mẹ. To ojlẹ nujijọ madonukun tọn lẹ mẹ, Jiwheyẹwhe sọgan whàn ahun kọmẹnu po họntọn homẹdagbenọ lẹ tọn po nado má núdùdù he yé tindo hẹ agbátọnọ lẹ.

Nususu devo lẹ sọ tin he mí sọgan plọn sọn ayidido gbẹzan ohẹ̀ lẹ tọn go po sọwhiwhe po mẹ. Jiwheyẹwhe ko dá ohẹ̀ lẹ po nugopipe jọwamọ tọn jiawu lẹ po nado dó adọ́ he mẹ yé sọgan pọ́n ovi yetọn lẹ go whẹ́n te. Pọ́n adọ́ wunmẹ voovo awe ehelẹ. Yẹdide he to amiyọn mẹ yin adọ́ agadawhlé Aflika tọn de tọn. E yin didó do osó kavi adó ohọ̀ de tọn go. Adọ́ mọnkọtọn lẹ nọ dokọ̀do, dile e yin didohia to yẹdide lọ mẹ do. Adọ́ lọ homẹ nọ yin awuwlena po okò mimlin he nọ yin bibẹpli dopọ nado taidi kọfo de po. Asu po asi po lẹ nọ wazọ́n sinsinyẹn nado bẹ okò mimlin lọ pli bo sọgan yí hugan osun dopo nado dotana adọ́ yetọn. Enẹgodo yé nọ tẹ́ ogbé po ofún lẹ po do ohò lọ mẹ. Yé awe lẹ wẹ nọ tindo mahẹ to núdùdù nina ovi lẹ mẹ. Dehe sọawuhia to odò yin adọ́ owhlẹ́n asu de tọn. Ohẹ̀ Aflika tọn ehe he nọ wazọ́n sinsinyẹn nọ yí ogbé wunmẹ voovo lẹ do dó adọ́ etọn. E sọgan dó adọ́ dopo fó to gbèdopo bo sọgan dó hugan adọ́ 30 to osaa dopo mẹ!

Etẹwẹ yin nuplọnmẹ lọ? Eyin Jiwheyẹwhe nọ na azọ́nyinyọnẹn po onú susugege mọnkọtọn po ohẹ̀ lẹ nado dó adọ́, na jide tọn e sọgan gọalọna devizọnwatọ etọn lẹ nado mọ owhé he gbè yé na nọ̀. Ṣigba, Jesu dohia dọ nudevo yin dandan eyin mí jlo dọ Jehovah Jiwheyẹwhe ni gọalọna mí nado mọ dandannu agbasa tọn mítọn lẹ. “Ṣigba mì dín ahọludu Jiwheyẹwhe tọn, po dodo etọn po whẹ́; onú helẹ pó wẹ yè na dogọ hlan mì,” wẹ opagbe Jesu tọn. (Matiu 6:33) Hiẹ sọgan kanse dọ, ‘Etẹlẹ wẹ Ahọluduta Jiwheyẹwhe tọn dindin whẹ́ bẹhẹn?’ Kunnudetọ Jehovah tọn lẹ, he nọ má linlinnamẹwe ehe, na hùnhomẹ nado na gblọndo na kanbiọ enẹ.