NUPINPLỌN 15
Mẹnu Wẹ Jesu?
Jesu yin dopo to mẹhe diyin hugan to whenuho mẹ lẹ mẹ. Etomọṣo, gbọnvona yinkọ etọn, mẹsusu ma yọ́n onú kaka de gando ewọ go, podọ mẹsusu wẹ nọ tindo linlẹn voovo lẹ gando mẹhe Jesu yin taun go. Amọ́, etẹwẹ Biblu dọ gando ewọ go?
1. Mẹnu wẹ Jesu?
Nudida gbigbọnọ huhlọnnọ de wẹ Jesu yin to olọn mẹ. Jehovah Jiwheyẹwhe dá ewọ jẹnukọnna nulẹpo. Na whẹwhinwhẹ́n enẹ wutu, e nọ yin yiylọdọ “plọnji nudida lẹpo tọn.” (Kolosinu lẹ 1:15) Biblu dlẹnalọdo Jesu taidi “Visunnu detọ́n dopo akàn” Jiwheyẹwhe tọn, na Jesu kẹdẹ wẹ Jehovah dá tlọlọ wutu. (Johanu 3:16) Jesu wazọ́n dopọ pẹkipẹki hẹ Otọ́ etọn Jehovah, bo gọalọna Ẹn nado dá nuhe pò lẹpo. (Hia Howhinwhẹn lẹ 8:30.) Jesu gbẹ́ to vivi haṣinṣan dagbe de tọn dù hẹ Jehovah kakajẹ din. Ewọ gbọn nugbonọ-yinyin dali yilizọn na Jiwheyẹwhe taidi hoyidọtọ etọn, yèdọ “Ohó lọ,” bo nọ hẹn owẹ̀n po anademẹ etọn lẹ po zun yinyọnẹn na mẹdevo lẹ.—Johanu 1:14.
2. Naegbọn Jesu do wá aigba ji?
To nudi owhe 2 000 die, gbọn azọ́njiawu dali Jehovah yí gbigbọ wiwe etọn zan nado diọ ogbẹ̀ Jesu tọn sọn olọn mẹ do vidọ̀ awhli alọji de he nọ yin Malia tọn mẹ. Gbọnmọ dali, Jesu yin jiji taidi gbẹtọvi de. (Hia Luku 1:34, 35.) Jesu wá aigba ji taidi Mẹsia dopagbe lọ, kavi Klisti, podọ nado whlẹn gbẹtọvi lẹ gán.a Dọdai Biblu tọn he gando Mẹsia lọ go lẹpo wẹ mọ hẹndi gbọn ewọ gblamẹ. Abajọ gbẹtọ lẹ do doayi e go dọ Jesu wẹ “Klisti lọ, Visunnu Jiwheyẹwhe ogbẹ̀nọ lọ tọn.”—Matiu 16:16.
3. Fitẹ wẹ Jesu te todin?
To whenue Jesu ko dotana gbẹzan aigba ji tọn etọn godo, e yin finfọnsọnku taidi angẹli de bo lẹkọyi olọn mẹ. To finẹ, “Jiwheyẹwhe ze e daga do otẹn he yiaga de mẹ.” (Filipinu lẹ 2:9) Todin, Jesu tin to otẹn aṣẹpipa tọn he yiaga de mẹ, yèdọ omẹ dopo akàn lọ he bọdo Jehovah go tlọlọ.
DINDONANU DOGỌ
Gbadopọnna nususu dogọ gando omẹ nankọ he Jesu yin na taun tọn go, podọ nuhewutu nupinplọn gando ewọ go do yin nujọnu.
4. Jesu ma yin Jiwheyẹwhe Ganhunupotọ lọ
Biblu plọn mí dọ dile etlẹ yindọ Jesu dohuhlọn bo yin nudida gbigbọnọ de to olọn mẹ, ewọ nọ litaina Jiwheyẹwhe etọn, yèdọ Otọ́ etọn Jehovah. Naegbọn mí do dọ mọ? Hò VIDEO lọ nado mọ nuhe Biblu plọn mí gando otẹn he mẹ Jesu tin te yijlẹdo Jiwheyẹwhe ganhunupotọ lọ go.
Wefọ he bọdego ehelẹ gọalọna mí nado mọ haṣinṣan he tin to Jehovah po Jesu po ṣẹnṣẹn. Hia wefọ lọ lẹ dopodopo, bo dọhodo kanbiọ he bọdego lẹ ji.
Hia Luku 1:30-32.
Zẹẹmẹ tẹwẹ angẹli lọ basi gando haṣinṣan he tin to Jesu po Jehovah Jiwheyẹwhe “Gigogán lọ” po ṣẹnṣẹn go?
Hia Matiu 3:16, 17.
To baptẹm Jesu tọn whenu, etẹwẹ ogbè he yin sisè sọn olọn mẹ lọ dọ?
Ogbè mẹnu tọn wẹ a lẹndọ e yin?
Hia Johanu 14:28.
Mẹnu wẹ tindo aṣẹpipa hugan bosọ wà mẹho hú mẹde to otọ́ de po visunnu etọn po ṣẹnṣẹn?
Etẹ na dohia wẹ Jesu te to whenue e ylọ Jehovah dọ Otọ́ etọn?
Hia Johanu 12:49.
Be Jesu nọ mọdọ emilẹ po Otọ́ emitọn po yin omẹ dopo wẹ ya? Etẹwẹ a lẹn?
5. Jesu do ede hia taidi Mẹsia lọ
Biblu bẹ dọdai susu hẹn he na gọalọna gbẹtọ lẹ nado yọ́n Mẹsia lọ, yèdọ mẹdide Jiwheyẹwhe tọn he na whlẹn gbẹtọvi lẹ. Hò VIDEO lọ nado basi homẹbibiọ kleun de gando dọdai he mọ hẹndi gbọn Jesu gblamẹ delẹ go to whenue e wá aigba ji.
Hia dọdai Biblu tọn ehelẹ, enẹgodo dọhodo kanbiọ he bọdego lẹ ji:
Hia Mika 5:2 nado yọ́n fie Mẹsia lọ dona yin jiji te.b
Be dọdai lọ mọ hẹndi to jiji Jesu tọn whenu ya?—Matiu 2:1.
Hia Salmu lẹ 34:20 po Zekalia 12:10 po nado mọ nuhe Biblu ko dọ jẹnukọn gando okú Mẹsia lọ tọn go.
Be dọdai ehelẹ mọ hẹndi ya?—Johanu 19:33-37.
Be Jesu lọsu wẹ kàn ayiha na depope to dọdai enẹlẹ mẹ nido mọ hẹndi ya?
Etẹwẹ ehe dohia gando Jesu go?
6. Nupinplọn gando Jesu go nọ hẹn ale wá na mí
Biblu dohia dọ nujọnu wẹ nado plọnnu gando Jesu po azọngban etọn po go. Hia Johanu 14:6 gọna 17:3, enẹgodo dọhodo kanbiọ ehe ji:
Naegbọn e do yin nujọnu nado plọnnu gando Jesu go?
Jesu ko hẹn ẹn yọnbasi na mí nado lẹzun họntọn Jiwheyẹwhe tọn. E plọnmẹ nugbo lọ gando Jehovah go, podọ gbọn ewọ gblamẹ mí gán mọ ogbẹ̀ madopodo
MẸDELẸ NỌ DỌ DỌ: “Kunnudetọ Jehovah tọn lẹ ma yise to Jesu mẹ.”
Etẹwẹ a na gblọnna omẹ mọnkọ?
BLADOPỌ
Jesu yin angẹli huhlọnnọ de. Visunnu Jiwheyẹwhe tọn wẹ e yin bosọ yin Mẹsia lọ.
Dogbapọn
Naegbọn Jesu do yin yiylọdọ “plọnji nudida lẹpo tọn”?
Etẹwẹ Jesu ko wà whẹpo do wá aigba ji?
Nawẹ mí wagbọn do yọnẹn dọ Jesu wẹ Mẹsia lọ?
PỌ́N NUDỌNAMẸ DEVO LẸ
Plọnnu dogọ gando adà he Jesu yiwà taidi Mẹsia lọ go.
“Be Dọdai He Gando Mẹsia lọ Go lẹ Dohia Nugbonugbo Dọ Jesu Wẹ Mẹsia lọ Ya?” (Hosọ Intẹnẹt ji tọn)
Gbadopọnna nuhewutu Jiwheyẹwhe yin yiylọdọ Otọ́ Jesu tọn, dile etlẹ yindọ ewọ ma nọ jivi to aliho he mẹ gbẹtọvi lẹ nọ jivi te.
“Naegbọn Jesu Do Nọ Yin Yiylọdọ Visunnu Jiwheyẹwhe Tọn?” (Hosọ Intẹnẹt ji tọn)
Pọ́n nuhewutu nuplọnmẹ Atọ̀n-to-Dopomẹ tọn ma do wá sọn Biblu mẹ.
“Be Jesu Yin Jiwheyẹwhe Wẹ Ya?” (Alọnuwe Atọ̀họ̀-Nuhihọ́ lọ Tọn, 1er avril 2009 tọn)
Pọ́n lehe gbẹzan nawe de tọn diọ do to whenue e plọn nuhe Biblu dọ gando Jesu go godo.
“Nawe Ju de Dọ Nuhewutu E Do Vọ́ Nuyise Etọn lẹ Gbeje Pọ́n” (Fọ́n!, mai 2013 tọn)
a Nupinplọn 26 po 27 po na dọhodo nuhewutu e biọ dọ gbẹtọvi lẹ ni yin whinwhlẹngán po lehe Jesu wàmọ do po ji.
b Pọ́n Ayidonugo 2 nado mọ dọdai de he dọho gando whenue Jesu na wá aigba ji te go po gbesisọ po.