“Ylando Towe lẹ Ko Yin Jijona We”

Mẹhe tlẹ to fidindẹn lẹ ko sè gando Jesu go todin. Mẹsusu nọ zingbejizọnlin etlẹ yin sọn fie to olá taun lẹ nado wá dotoaina ẹn bo mọ azọ́n huhlọnnọ etọn lẹ. Ṣigba, to azán delẹ godo, e lẹkọyi Kapẹlnaumi, fihe e nọ nọ̀ hugan to lizọnyizọn etọn whenu. Linlin kọlilẹwa etọn tọn yawu gbàpe gbọn tòdaho he to Ohù Galili tọn tó ehe mẹ. Taidi kọdetọn de, mẹsusu wá owhé he gbè e nọ nọ̀. Delẹ to yé mẹ yin Falesi lẹ po Osẹ́n plọnmẹtọ lẹ po he wá sọn lẹdo voovo Galili po Jude po tọn mẹ, gọna Jelusalẹm.

“Mẹsusu sọ pli dopọ to owhé lọ gbè sọmọ bọ otẹn ma tin to finẹ ba, etlẹ yin kakajẹ ohọ̀n ji, bọ e jẹ wẹndagbe lọ lá na yé ji.” (Malku 2:2) Onú vonọtaun de jọ to ojlẹ ehe mẹ. Nujijọ lọ sọgan gọalọna mí nado mọnukunnujẹemẹ dọ Jesu tindo huhlọn nado de adọ̀ yajiji gbẹtọvi tọn sẹ̀ bo hẹn mẹhe e de lẹpo jẹgangan.

Dile Jesu to mẹplọn to ohọ̀ he mẹ gbẹtọ gọ́ lọ mẹ, sunnu ẹnẹ hẹn dawe awukuzọ̀njẹtọ de do adọzan de ji wá. Yé jlo dọ Jesu ni hẹnazọ̀ngbọna họntọn yetọn. Ṣigba, na gbẹtọgun lọ tọn wutu, yé ma gán “hẹn ẹn wá Jesu dè tlọlọ.” (Malku 2:4) Pọ́n lehe yé na ko jẹflumẹ do. Yé hẹji yì họta he to flala lọ bo de nùvo de gbọn ozà lọ mẹ. Enẹgodo, yé hẹn adọzan he ji dawe awukuzọ̀njẹtọ lọ te jẹte biọ ohọ̀ lọ mẹ.

Be Jesu gblehomẹ dọ yé gbòhódonù na emi wẹ ya? Paali! Yise yetọn hẹn awuji i taun bọ e dọna awukuzọ̀njẹtọ lọ dọ: “Ylando towe lẹ ko yin jijona we.” (Matiu 9:2) Amọ́, be Jesu sọgan jo ylando lẹ namẹ nugbonugbo ya? Wekantọ lẹ po Falesi lẹ po jẹ nudọn ji do ehe ji bo to linlẹn to yede mẹ dọ: “Naegbọn dawe ehe do to hodọ dole? E to nùzan. Mẹnu wẹ sọgan jo ylando lẹ namẹ adavo mẹdopo, yèdọ Jiwheyẹwhe?”—Malku 2:7.

Na Jesu yọ́n linlẹn yetọn lẹ wutu, e dọna yé dọmọ: “Naegbọn mì do to onú ehelẹ lẹn to ahun mìtọn mẹ? Detẹ wẹ bọawu hugan, nado dọna awukuzọ̀njẹtọ lọ dọ, ‘Ylando towe lẹ yin jijona we,’ kavi nado dọ dọ, ‘Fọ́n, ze adọzan towe bo zinzọnlin’?” (Malku 2:8, 9) Mọwẹ, Jesu sọgan jo ylando dawe lọ tọn lẹ na ẹn to dodonu avọ́sinsan he e na wá basi to nukọn mẹ tọn ji.

Enẹgodo, Jesu dohia gbẹtọgun lọ po homọdọdomẹgotọ etọn lẹ po dọ emi tindo aṣẹ nado jo ylando lẹ namẹ to aigba ji. E lẹhlan awukuzọ̀njẹtọ lọ bo degbena ẹn dọmọ: “Yẹn dọna we dọ, Fọ́n, ze adọzan towe, bo yì owhé towe gbè.” Dawe lọ sọ wàmọ to afọdopolọji bo hẹn adọzan etọn bosọ zinzọnlin tọ́nyi to nukun mẹhe to finẹ lẹpo tọn mẹ. E paṣa gbẹtọ lọ lẹ! Yé sọ pagigona Jiwheyẹwhe bo dọmọ: “Mí ma ko mọ ehe nkọ pọ́n gbede”!—Malku 2:11, 12.

E jẹna ayidonugo dọ Jesu donù ylando lẹ go to pọmẹ hẹ azọ̀n, podọ dọ jona ylando lẹ tọn tindo kanṣiṣa hẹ agbasalilo. Biblu plọn mí dọ mẹjitọ mítọn tintan Adam waylando, bọ mímẹpo ko dugu kọdetọn ylankan ylando tọn, enẹ wẹ azọ̀n po okú po. Ṣigba, to Ahọluduta Jiwheyẹwhe tọn glọ, Jesu na jo ylando mẹhe yiwanna Jiwheyẹwhe bo nọ sẹ̀n Ẹn lẹpo tọn na yé. To whenẹnu, azọ̀n na busẹ kakadoi.—Lomunu lẹ 5:12, 18, 19.