“N’Jlo Na Kú—Be Biblu Gán Gọalọna Mi Eyin N’Nọ Lẹn Nado Hù Dee Ya?”

Gblọndo Biblu tọn

Gbau! Biblu yin owe de he wá sọn “Jiwheyẹwhe he nọ miọnhomẹna mẹhe jẹflumẹ lẹ” dè. (2 Kọlintinu lẹ 7:6) Dile etlẹ yindọ Biblu ma yin owe doto he nọ penukundo apọ̀nmẹ-zọ̀n go lẹ tọn de, e ko gọalọna mẹsusu nado duto linlẹn lọ nado hù yede ji. Ayinamẹ dagbe he to e mẹ lẹ gán gọalọna hiẹ lọsu.

Ayinamẹ he sọgbe tẹlẹ wẹ Biblu na?

● Nọ dọ nue lẹn a te lẹ tọ́n na mẹde.

Nuhe Biblu dọ: “Họntọn nugbo nọ yiwannamẹ to whelẹponu podọ nọvisunnu he go yè sọgan dejido to ojlẹ ayimajai tọn lẹ mẹ wẹ ewọ.”—Howhinwhẹn lẹ 17:17.

Zẹẹmẹ: Mí nọ do hudo godonọnamẹ mẹdevo lẹ tọn to whenue linlẹn he to ahunmẹduna mí lẹ hẹn mí jẹflumẹ.

Eyin a ṣí linlẹn towe lẹ ji bo ma dọ tọ́n na mẹde, a na doagbàn kọ̀ji na dewe, bọ hinhẹn sọgan wá glo we. Amọ́, eyin a nọ dọ numọtolanmẹ towe lẹ tọ́n, yé ma na wá húagbọ́ we podọ a na penugo nado ze ayiha do nue sọgbe lẹ ji.

Tẹ́n ehe pọ́n: Dọhona mẹde to egbé, vlavo hagbẹ whẹndo tọn kavi họntọn dejidego de.a A tlẹ sọgan sọ kàn nue lẹn a te lẹ do wema de mẹ.
● Biọ alọgọ doto azọ́nyọnẹntọ lẹ tọn.

Nuhe Biblu dọ: “Mẹhe to gángán lẹ ma nọ tindo nuhudo dotozọ́nwatọ tọn gba, adavo mẹhe to azọ̀njẹ lẹ.”—Matiu 9:12.

Zẹẹmẹ: Mí dona nọ yì dotowhé eyin mí to azọ̀njẹ.

Eyin mẹde nọ tindo linlẹn nado hù ede, be ohia de wẹ dọ mẹlọ to azọ̀njẹ to apọ̀nmẹ kavi to numọtolanmẹ-liho. Azọ̀n wunmẹ ehelẹ ma yin winyannu de kẹdẹdile e nọ yindo na azọ̀n paa he pò lẹ. Podọ yé tindo pọngbọ.

Tẹ́n ehe pọ́n: Dín alọgọ doto azọ́nyọnẹntọ de tọn dile e gán yawu yọnbasi do.
● Hẹn do ayiha mẹ dọ onú towe nọ duahunmẹna Jiwheyẹwhe.

Nuhe Biblu dọ: “Oblẹnọ atọ́n wẹ nọ yin sisà yin abọgan-kuẹ pẹvi awe, kavi e ma yin mọ wẹ? Ṣogan, Jiwheyẹwhe ma nọ wọn depope to yé mẹ. . . . Mì dibu blo; mìwlẹ họakuẹ hú oblẹnọ susu.”—Luku 12:6, 7.

Zẹẹmẹ: A họakuẹ to nukun Jiwheyẹwhe tọn mẹ.

E gán nọ di na we dọ mẹde ma to towe dọ, amọ́ Jiwheyẹwhe mọnukunnujẹ nue pehẹ a te mẹ. Onú towe nọ duahunmẹna ẹn—etlẹ yin to whenue gbẹninọ ko ṣiapọ̀ na we. Salmu lẹ 51:17 dọmọ: “Jiwheyẹwhe E, hiẹ ma na gbẹ́ ahun he jẹflumẹ bo to awubla dai.” Na nugbo tọn, Jiwheyẹwhe yiwanna we bo jlo dọ a ni nọgbẹ̀.

Tẹ́n ehe pọ́n: Gbadopọnna kunnudenu he Biblu na he dohia dọ Jiwheyẹwhe yiwanna we lẹ. Di apajlẹ, pọ́n weta 24tọ owe oplọn tọn lọ Dọnsẹpọ Jehovah tọn.
● Nọ hodẹ̀ hlan Jiwheyẹwhe.

Nuhe Biblu dọ: “Mì to magbọjẹ mìtọn lẹpo bẹ dlan [Jiwheyẹwhe] ji, na e to mìtọn hòpọn wutu.”—1 Pita 5:7.

Zẹẹmẹ: Jiwheyẹwhe biọ to asi we nado nọ dọ nue to ahun ji na we lẹ na ẹn po ahundopo po.

Jiwheyẹwhe sọgan na we jijọho ahun mẹ tọn gọna huhlọn he a nado to akọndona zọnmii. (Filipinu lẹ 4:6, 7, 13) Enẹ wẹ zọ́n bọ e nọ penukundo mẹhe nọ dawhá ylọ ẹ po ahundopo po lẹ go.—Salmu lẹ 55:22.

Tẹ́n ehe pọ́n: Hodẹ̀ hlan Jiwheyẹwhe to egbé. Yí yinkọ etọn Jehovah zan, bo dọ numọtolanmẹ towe lẹ tọ́n na ẹn. (Salmu lẹ 83:18) Vẹ̀ ẹ dọ ni gọalọna we ma nado hònuplá.
● Nọ lẹnayihamẹpọn do todido he Biblu namẹ gando sọgodo go ji.

Nuhe Biblu dọ: “Todido he mí tindo ehe tin taidi húnsingàn de na ogbẹ̀ mítọn, bo yin nujikudo tọn bosọ lodo.”—Heblu lẹ 6:19, po nudọnamẹ odò tọn po.

Zẹẹmẹ: Numọtolanmẹ towe lẹ sọgan nọ diọ whẹwhẹ taidi tọjihun de he yujẹhọn nọ to yidọn-yide do na, bọ eyin a jaya zande, tlolo a gán sọ blawu, ṣigba todido he Biblu bẹhẹn lẹ sọgan na we huhlọn nado deanana numọtolanmẹ towe lẹ.

Todido enẹ ma yin nukundido he ma do jide kavi odlọ nudagbe tọn kúkú poun gba, amọ́ e sinai do opagbe Jiwheyẹwhe tọn nado de awufiẹsa mítọn lẹpo sẹ̀ ji.—Osọhia 21:4.

Tẹ́n ehe pọ́n: A na plọn nususu dogọ do todido he Biblu namẹ ji, eyin a gbadopọnna nupinplọn 5tọ alọnuwe lọ Wẹndagbe de sọn Jiwheyẹwhe Dè! tọn.
● Nọ doalọ to nuwiwa he a yiwanna de mẹ.

Nuhe Biblu dọ: “Amasin dagbe de wẹ ahun he gọ́ na ayajẹ yin.”—Howhinwhẹn lẹ 17:22.

Zẹẹmẹ: Eyin mí nọ wà nue nọ hẹn ayajẹ wá na mí lẹ, enẹ sọgan de lẹnpọn mítọn lẹ pò bosọ hẹn mí tindo numọtolanmẹ he sọgbe lẹ dogọ.

Tẹ́n ehe pọ́n: Nọ wà nude he nọ saba hẹn awuvivi wá na we. Di apajlẹ, dotó nuhiho mẹjlọdote tọn lẹ, hia owe tulinamẹ tọn de, kavi daihun he a yiwanna de. A nasọ do ayajẹ dogọ eyin a nọ wà nude nado gọalọna mẹdevo lẹ, etlẹ gán nọma yin onú kaka de.—Owalọ lẹ 20:35.
● Penukundo agbasalilo towe go.

Nuhe Biblu dọ: “Agbasa yiyizan yin alenu.”—1 Timoti 4:8.

Zẹẹmẹ: Aihun lanmẹyiya tọn didà whẹwhẹ, amlọndidọ na ojlẹ he pé, gọna núdùdù hunsindagbe tọn lẹ nọ hẹn ale susu wá na agbasa mítọn.

Tẹ́n ehe pọ́n: Nọ zinzọnlin po awuyiya po vudevude, etlẹ yin na nukunwhiwhe 15 poun, nado dlẹn afọ-kàn lẹ.
● Nọ flindọ numọtolanmẹ mẹtọn po ninọmẹ gbẹ̀mẹ tọn lẹ po nọ wá diọ.

Nuhe Biblu dọ: “Mì ma yọ́n nuhe ogbẹ̀ mìtọn na yin to osọ.”—Jakọbu 4:14.

Zẹẹmẹ: Nuhahun he hẹnmẹ jẹflumẹ de—bo tlẹ di nue húagbọ́mẹ pete—sọgan nọma dẹn-to-aimẹ.

Mahopọnna depope he ninọmẹ towe sọgan di nuhe ylan sọ to egbehe, nulẹ gán gbẹ́ diọ to osọ. Enẹwutu, wà nuhe e biọ lẹpo nado doakọnnanu. (2 Kọlintinu lẹ 4:8) E yọnbasi taun dọ ninọmẹ he do lẹnpọn na we lọ ni wá mọ pọngbọ to gbèdopo, amọ́ eyin a hù dewe, enẹ ma do pọngbọ.

Tẹ́n ehe pọ́n: Hia otàn mẹdelẹ tọn to Biblu mẹ, he jẹflumẹ sọmọ bo biọ okú na yede, podọ doayi lehe gbẹzan yetọn wá diọ to nukọn mẹ do go, yèdọ to aliho he mẹ yelọsu ma tlẹ na ko lẹn pọ́n te. Pọ́n apajlẹ delẹ to yé mẹ tọn.

Be Biblu dọho gando mẹdelẹ he biọ okú na yede go ya?

Mọwẹ. Biblu dọhona mí gando mẹdelẹ go he ko dọ pọ́n dọ, “N’jlo na kú.” Jiwheyẹwhe ma gblewhẹdo yé, kakatimọ e gọalọna yé wẹ. E sọgan wà nudopolọ na hiẹ lọsu.

Elija

● Mẹnu wẹ ewọ? Elija yin yẹwhegán adọgbotọ de. Etomọṣo, ninọmẹ delẹ wá hẹn ewọ lọsu jẹflumẹ. Jakọbu 5:17 dọmọ: “Gbẹtọ he tindo numọtolanmẹ taidi mítọn lẹ nkọ wẹ Elija.”
● Naegbọn e do jlo na kú? To ojlẹ de mẹ, Elija mọ ede to ṣokẹdẹ, obu sọ di i bọ e mọdọ emi yin nuvọ́nọ. Enẹwutu e vẹ̀ Jiwheyẹwhe dọmọ: “Jehovah E, gbọ bo yí ogbẹ̀ ṣie.”—1 Ahọlu lẹ 19:4.
● Etẹwẹ gọalọna ẹn? Elija dọ nue to ahun etọn mẹ taun na Jiwheyẹwhe. Nawẹ Jiwheyẹwhe na ẹn tuli gbọn? Jiwheyẹwhe vẹawu i bo do lee ewọ dohuhlọn sọ hia Elija gbọn numimọ de gblamẹ. E sọ hẹn Elija deji dọ emi gbẹ́ do hudo etọn bo na yẹwhegán lọ devizọnwatọ mẹtọnhopọntọ he pegan de.
▸ Hianu gando Elija go: 1 Ahọlu lẹ 19:2-18.

Jobu

● Mẹnu wẹ ewọ? Jobu yin dawe adọkunnọ he do whẹndo daho de, bosọ nọ sẹ̀n Jiwheyẹwhe nugbo lọ po ahundopo po.
● Naegbọn e do jlo na kú? Ogbẹ̀ wá dózin do Jobu to ajiji mẹ. Nujijọ ylankan susu wẹ jọ do e go. Ovi etọn lẹpo kú to nugbajẹmẹji de whenu. Ewọ lọsu bẹ azọ̀n de he hẹn awufiẹsa sinsinyẹn wá na ẹn. To godo mẹ, yè yinuwa hẹ ẹ po kanyinylan po bosọ sawhẹ lalo dokọna ẹn dọ ewọ lọsu wẹ hẹn nuhahun lẹ wá ede ji. Jobu dọmọ: “Ogbẹ̀ ṣie hiọawu na mi; n’masọ jlo na nọgbẹ̀ ba.”—Jobu 7:16.
● Etẹwẹ gọalọna ẹn? Jobu hodẹ̀ hlan Jiwheyẹwhe bosọ dọho hẹ mẹdevo lẹ. (Jobu 10:1-3) E mọ tuli yí sọn họntọn mẹtọnhopọntọ de he nọ yin Elihu dè, e gọalọna ẹn nado lẹnnupọndo ninọmẹ etọn ji to aliho he sọgbe mẹ. Hú popolẹpo, Jobu kẹalọyi ayinamẹ po alọgọ he wá sọn Jiwheyẹwhe dè lẹ po.
▸ Hianu gando Jobu go: Jobu 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mose

● Mẹnu wẹ ewọ? Mose yin nukọntọ akọta Islaeli tọn podọ yẹwhegán nugbonọ de.
● Naegbọn e do jlo na kú? Nuhe go Mose dona penukundo lẹ ma daihun paali, bọ mẹlẹ ka sọ nọ to homọdọdego, podọ e wá jẹflumẹ pete. To whenẹnu, e dawhá hlan Jiwheyẹwhe dọmọ: “Jaale kúkú gbọ bo hù mi hadopo.”—Sọha lẹ 11:11, 15.
● Etẹwẹ gọalọna ẹn? Mose dọ nue to ahun etọn mẹ taun na Jiwheyẹwhe. Podọ Jiwheyẹwhe yinuwa bo hẹn azọ́ndenamẹ lọ bọawuna ẹn, ehe zọ́n bọ ayimajai etọn depò.
▸ Hianu gando Mose go: Sọha lẹ 11:4-6, 10-17.

Wefọ Biblu tọn tẹlẹ wẹ gán gọalọna we nado duto linlẹn lọ nado hù dewe ji?

Wefọ delẹ die he dohia dọ Jiwheyẹwhe nọ hò towe pọ́n:

“Jehovah ma dẹn do mẹhe ahun yetọn jẹflumẹ lẹ; e nọ whlẹn ayimajainọ lẹ.”—Salmu lẹ 34:18.
“Whenue magbọjẹ lẹ húagbọ́ mi, hiẹ miọnhomẹna mi bo hẹn kọgbọ wá na mi.”—Salmu lẹ 94:19.

(Sọ pọ́n Salmu lẹ 27:10; 103:12-14; 2 Kọlintinu lẹ 1:3, 4.)

Wefọ delẹ die he dohia dọ Jiwheyẹwhe nọ mọnukunnujẹ awufiẹsa towe mẹ:

“Hiẹ ko mọ yajiji ṣie; hiẹ yọ́n ayimajai ahun ṣie mẹ tọn.”—Salmu lẹ 31:7.
“To ayimajai yetọn lẹpo whenu, e nọ hẹn ayimajai wá na ewọ lọsu. . . . na owanyi po awuvẹmẹ etọn po wutu, e sọ ze yé daga.”—Isaia 63:9.

Wefọ delẹ die he dohia dọ Jiwheyẹwhe jlo dọ a ni dọnsẹpọ emi bo nọ dọ nue to ahun ji na we lẹpo na ẹn to odẹ̀ mẹ:

“Mì yin magbọjẹnọ na nudepope blo, ṣigba to nulẹpo mẹ, mì nọ yí odẹ̀ . . . do hẹn obiọ mìtọn lẹ zun yinyọnẹn na Jiwheyẹwhe; jijọho Jiwheyẹwhe tọn he yiaga hugan nukunnumọjẹnumẹ lẹpo nasọ họ́ ahun mìtọn po nugopipe apọ̀nmẹ tọn mìtọn po.”—Filipinu lẹ 4:6, 7.
“Mì dọnsẹpọ Jiwheyẹwhe, ewọ nasọ dọnsẹpọ mì.”—Jakọbu 4:8.

(Sọ pọ́n Salmu lẹ 34:4, 15; 55:22.)

Wefọ delẹ die he dohia dọ Jiwheyẹwhe sọgan na we huhlọn:

“To nulẹpo mẹ, yẹn tindo huhlọn lọ gbọn mẹlọ he nọ na mi huhlọn dali.”—Filipinu lẹ 4:13.
“A dibu blo, na yẹn tin hẹ we. A yin magbọjẹnọ blo, na yẹn wẹ Jiwheyẹwhe towe. Yẹn na hẹn we lodo, mọwẹ, n’na gọalọna we.”—Isaia 41:10.

(Sọ pọ́n Salmu lẹ 138:3; Isaia 40:29-31.)

Etẹwẹ a na wà eyin a sè bọ họntọn towe de dọ dọ, “N’jlo na hù dee”?

Eyin a sè dọ mẹde to linlẹn nado hù ede, a yì nukunpẹvi do pọ́n gbede blo. Dotuhomẹna ẹn nado dọhona we; gọalọna ẹn na ni dọ nuhe to ahun ji na ẹn lọ tọ́n. (Howhinwhẹn lẹ 20:5) Eyin mẹde penugo bo dọ linlẹn etọn nado hù ede tọ́n na họntọn de, e yọnbasi taun dọ mẹlọ ni ma hù ede ba blo.
Vẹawu mẹlọ dile a to todoaina ẹn. “Nọ yawu nado dotoai, whleawu nado dọho.” (Jakọbu 1:19) Yọnẹn dọ awufiẹsa po flumẹjijẹ po sọgan hẹn mẹde “ma [nado] lẹnnupọn whẹpo do dọho” delẹ. (Jobu 6:2, 3) Enẹwutu, eyin họntọn de he to linlẹn nado hù ede dọho ma lẹnnupọn kavi to aliho he ma jọmẹ mẹ, a yinuwa aplà bo gblehomẹ blo.
Dọho nado miọnhomẹna ẹn. Biblu na mí ayinamẹ dọmọ: “[Mì] nọ dọho homẹmiọnnamẹ tọn na mẹhe jẹflumẹ lẹ.” (1 Tẹsalonikanu lẹ 5:14) A yí nukunpẹvi do pọ́n numọtolanmẹ họntọn towe tọn lẹ blo. Dohia dọ a yọ́n pinpẹn numọtolanmẹ etọn lẹ tọn bosọ mọnukunnujẹ whẹwhinwhẹ́n he e na lẹ mẹ. Dọna họntọn towe obá he mẹ onú etọn nọ duahunmẹna we jẹ.
Dotuhomẹna họntọn towe nado dín alọgọ. Howhinwhẹn lẹ 13:10 dọmọ: “Nuyọnẹn tin to mẹhe nọ dín ayinamẹ lẹ dè.” Eyin họntọn towe to azọ̀n sinsinyẹn de jẹ wẹ, na ẹn tuli nado yì dotowhé. Linlẹn mẹdetiti hùhù tọn lẹ gán yin ohia de dọ mẹlọ to azọ̀njẹ to apọ̀nmẹ kavi to numọtolanmẹ-liho, enẹwutu dotuhomẹna ẹn nado dín alọgọ doto azọ́nyọnẹntọ de tọn. A tlẹ sọgan dọna ẹn dọ a na zọnhẹ ẹ yì mọ doto lọ.
Do owanyi hia. Biblu dọmọ: “Họntọn nugbo nọ yiwannamẹ to whelẹponu podọ nọvisunnu he go yè sọgan dejido to ojlẹ ayimajai tọn lẹ mẹ wẹ ewọ.” (Howhinwhẹn lẹ 17:17) A ma sọgan de nuhahun kavi linlẹn mẹdetiti hùhù tọn he họntọn towe to ahidi hẹ lẹ sẹ̀. Amọ́, eyin nuyiwa towe hẹ ẹ nọ hẹn owanyi po godonọnamẹ towe po họnwun na ẹn, a gán gọalọna ẹn nado doakọnna awufiẹsa azán dopodopo tọn, bosọ hẹn ẹn penugo nado nọ pọ́n osọ hlan po ayajẹ po.

Etẹwẹ n’na wà eyin n’ko tẹnpọn nado hù dee to ojlẹ de mẹ wayi?

E yọnbasi dọ a gán nọ wá do numọtolanmẹ whẹhuhu kavi winyan tọn. A sọgan sọ nọ mọdọ e na vẹawu dọ mẹde ni mọnukunnujẹ nue sisẹ́ we bọ a do tẹnpọn nado hù dewe mẹ gọna awufiẹsa sinsinyẹn he a to akọndona todin.

Biblu dohia hezeheze dọ gbẹtọ ma sọgan mọnukunnujẹ numọtolanmẹ nọzo etọn tọn mẹ to gigọ́ mẹ. “Ahun lọsu wẹ nọ yọ́n nuhe to awuvẹ hẹnwa na ẹn,” wẹ Biblu dọ. (Howhinwhẹn lẹ 14:10; 1 Ahọlu lẹ 8:38) Enẹwutu, obá he mẹ mẹyiwanna towe lẹ sọgan miọnhomẹna we jẹ do dogbó. Ṣigba, a sọgan deji dọ a ma to ṣokẹdẹ.

Jiwheyẹwhe nọ yọ́n nuhe to gbẹtọ homẹ. (2 Otànnugbo lẹ 6:30) Jehovah yọ́n nuhe gán zọ́n kaka bọ mẹde na lẹndọ onú dopo gee he na na emi agbọ́ wẹ yindọ emi ni hù emide. E sọ nọ mọnukunnujẹ numọtolanmẹ he a to ahidi hẹ to alọnu din lẹ mẹ, ehe vlavo sọgan yin whẹhuhu kavi winyan tọn.—Salmu lẹ 139:1.

Nugbo wẹ dọ ogbẹ̀ gbẹtọ tọn yin nuhọakuẹ taun na Jiwheyẹwhe, ṣigba e nọ wleawufo nado jona mẹhe ko lẹn nado hù yede wayi lẹ. (Salmu lẹ 86:5) E nọ mọnukunnujẹemẹ dọ susu mẹhe ko tẹnpọn nado hù yede lẹ tọn ma to jijlo nugbonugbo nado kú gba—nue dín yé te poun wẹ yindọ awufiẹsa yetọn ni doalọte. Enẹwutu, dile etlẹ yindọ “ahun mítọn sọgan gblewhẹdo mí,” Jehovah gán gọalọna mí, “na Jiwheyẹwhe klohu ahun mítọn bosọ yọ́n nulẹpo.” (1 Johanu 3:19, 20) Na nugbo tọn, ewọ jlo dọ a ni nọ mọ emi di “Otọ́ lẹblanu sisosiso lẹ tọn podọ Jiwheyẹwhe homẹmimiọn lẹpo tọn” towe.—2 Kọlintinu lẹ 1:3.

a Eyin linlẹn mẹdetiti hùhù tọn towe lẹ wá sinyẹn taun, bọ a ma penugo bo mọ mẹyiwanna he a na dọhona de, tẹkan hlan azọ́nwatẹn de he nọ namẹ ayinamẹ kavi gọalọnamẹ to niyaniya mẹ to owù-nujijọ whenu.

“N’Jlo Na Kú—Be Biblu Gán Gọalọna Mi Eyin N’Nọ Lẹn Nado Hù Dee Ya?”

Gblọndo Biblu tọn

Ayinamẹ he sọgbe tẹlẹ wẹ Biblu na?

● Nọ dọ nue lẹn a te lẹ tọ́n na mẹde.

● Biọ alọgọ doto azọ́nyọnẹntọ lẹ tọn.

● Hẹn do ayiha mẹ dọ onú towe nọ duahunmẹna Jiwheyẹwhe.

● Nọ hodẹ̀ hlan Jiwheyẹwhe.

● Nọ lẹnayihamẹpọn do todido he Biblu namẹ gando sọgodo go ji.

● Nọ doalọ to nuwiwa he a yiwanna de mẹ.

● Penukundo agbasalilo towe go.

● Nọ flindọ numọtolanmẹ mẹtọn po ninọmẹ gbẹ̀mẹ tọn lẹ po nọ wá diọ.

Be Biblu dọho gando mẹdelẹ he biọ okú na yede go ya?

Elija

Jobu

Mose