Nuhe Jesu Plọn Mí

Lehe Angẹli lẹ Nọ Yinuwado Mí Ji Do

Jesu nọgbẹ̀ to lẹdo gbigbọ tọn de mẹ hẹ Otọ́ etọn “whẹpo aihọn do wá tintin mẹ.” (Johanu 17:5) Enẹwutu, e tin to otẹn dagbe mẹ nado na gblọndo kanbiọ he bọdego lẹ tọn.

Be angẹli lẹ nọ tindo ojlo to mí mẹ ya?

▪ Jesu plọn mí dọ angẹli lẹ nọ tindo ojlo sisosiso to gbẹtọ lẹ mẹ. E dọmọ: “Ayajẹ nọ tin to angẹli Jiwheyẹwhe tọn lẹ ṣẹnṣẹn do ylandonọ dopo he lẹnvọjọ ji.”—Luku 15:10.

Jesu dohia dọ angẹli lẹ yin azọ́ndena nado penukundo dagbemẹninọ devizọnwatọ Jiwheyẹwhe tọn lẹ tọn go to gbigbọ-liho. Enẹwutu, to whenue Jesu na avase devi etọn lẹ ma nado hẹn mẹdevo lẹ dahli, e dọmọ: “Mì hẹn ẹn diun ma nado gbẹkọ dopo to omẹ pẹvi ehelẹ mẹ go; na yẹn dọna mì dọ whepoponu wẹ angẹli yetọn lẹ to olọn mẹ nọ tin to Otọ́ ṣie he tin to olọn mẹ nukọn.” (Matiu 18:10) Po hogbe ehelẹ po, Jesu ma to didohia dandan dọ dopodopo hodotọ etọn lẹ tọn tindo angẹli tangan de he na nọ basi hihọ́na ẹn gba. Ṣigba Jesu dohia dọ angẹli he nọ wazọ́n to kọndopọ pẹkipẹki mẹ hẹ Jiwheyẹwhe lẹ nọ tindo ojlo to hagbẹ agun Klistiani tọn lẹ mẹ.

Nawẹ Lẹgba sọgan gbleawuna mí gbọn?

▪ Jesu na avase hodotọ etọn lẹ dọ Satani nọ tẹnpọn nado glọnalina gbẹtọ lẹ ma nado plọn nugbo lọ gando Jiwheyẹwhe go. E dọmọ: “To whenuena mẹdepope sè ohó ahọluduta lọ tọn ṣigba bo ma mọnukunnujẹ zẹẹmẹ etọn mẹ, mẹylankan lọ nọ wá bo nọ hò nuhe ko yin dido dó ahun etọn mẹ lọ yí.”—Matiu 13:19.

Jesu hùngona dopo to aliho he mẹ Satani nọ klọ gbẹtọ lẹ te mẹ to whenue e na apajlẹ gando dawe de he do okún likun tọn do ogle etọn mẹ go. Dawe lọ nọtena Jesu, podọ likun lọ nọtena Klistiani nugbo he na dugán hẹ Jesu to olọn mẹ lẹ. Ṣigba, Jesu dọ dọ kẹntọ de wá bo “dó ogbé ylankan lẹ do likun lọ lẹ ṣẹnṣẹn.” Ogbé ylankan lọ lẹ nọtena Klistiani lalo lẹ. “Kẹntọ he dó yé lọ wẹ Lẹgba.” (Matiu 13:25, 39) Kẹdẹdile ogbé ylankan sọgan taidi likun he tọ́nkun do, mẹhe sọalọakọ́n nado yin Klistiani lẹ sọgan sọawuhia taidi sinsẹ̀n-basitọ nugbo lẹ. Sinsẹ̀n he nọ plọnmẹ nuplọnmẹ lalo lẹ nọ klọ gbẹtọ lẹ nado vẹtolina Jiwheyẹwhe. Satani nọ yí sinsẹ̀n lalo zan nado hò haṣinṣan he gbẹtọ lẹ tindo hẹ Jehovah yí.

Nawẹ mí sọgan glọnalina Satani ma nado gbleawuna mí gbọn?

▪ Jesu ylọ Satani dọ “ogán aihọn tọn.” (Johanu 14:30) Jesu do lehe mí sọgan yin hihọ́ basina sọn Satani si do hia to odẹ̀ de he e hò hlan Jiwheyẹwhe mẹ. Jesu hodẹ̀ hlan Otọ́ etọn olọn mẹ tọn gando devi etọn lẹ go dọmọ: “Họ́ yé na mẹylankan lọ tọn wutu. Yé ma yin apadewhe aihọn tọn, kẹdẹdile yẹn ma yin apadewhe aihọn tọn do. Hẹn yé zun wiwe gbọn nugbo lọ gblamẹ; ohó towe wẹ nugbo.” (Johanu 17:15-17) Oyọnẹn Ohó Jiwheyẹwhe tọn tintindo sọgan basi hihọ́na mí sọn nuyiwadomẹji aihọn he Satani to gandudeji tọn si.

Nawẹ angẹli lẹ nọ yinuwado mí ji gbọn to egbehe?

▪ Jesu dọmọ: “To vivọnu titonu lọ tọn: angẹli lẹ na tọ́nyi bo klan mẹylankan lẹ dovo na dodonọ lẹ.” (Matiu 13:49) To egbehe, mí to gbẹnọ to “vivọnu titonu lọ tọn,” podọ gbẹtọ livi susu wẹ to alọkẹyi wẹndagbe Ahọluduta Jiwheyẹwhe tọn.—Matiu 24:3, 14.

Ṣigba, e ma yin mẹhe bẹ Ohó Jiwheyẹwhe tọn pinplọn jẹeji lẹpo wẹ ewọ nọ kẹalọyi gba. Angẹli lẹ nọ deanana azọ́n devizọnwatọ Jehovah tọn lẹ tọn, bọ mẹhe yiwanna Jiwheyẹwhe sisosiso lẹ nọ yin kinklandovo na mẹhe ma jlo na yí nuhe plọn yé te do yizan mẹ lẹ. Jesu basi zẹẹmẹ mẹhe Jiwheyẹwhe nọ kẹalọyi lẹ tọn dọmọ: “Ehelẹ wẹ mẹhe, to whenue yé ko yí ahun he yọ́n bosọ yin dagbe do sè ohó lọ godo, yé yí i hẹn bo yí akọndonanu do de sinsẹ́n tọ́n.”—Luku 8:15.

Nado mọ nudọnamẹ dogọ, pọ́n weta 10tọ owe Etẹwẹ Bliblu Plọn Mí Taun tọn, he Kunnudetọ Jehovah tọn lẹ zinjẹgbonu.

[Yẹdide to weda 24]

Angẹli lẹ nọ yí adà de wà nado bẹ ahunjijlọnọ lẹ pli do agun Klistiani tọn mẹ