Be Hùnwhẹ Lẹpo Wẹ Nọ Hẹn Homẹhun Jiwheyẹwhe Ya?

Jehovah jlo dọ mí ni duvivi ogbẹ̀ tọn, bosọ nọ jaya to hùnwhẹ lẹ tẹnmẹ to whedelẹnu. Ṣigba, be hùnwhẹ po whedudu lẹpo po wẹ nọ hẹn homẹhun in ya? Nawẹ mí sọgan do owanyi mítọn na Jehovah hia to whẹho ehe mẹ gbọn?

1. Naegbọn homẹ Jehovah tọn ma nọ hùn do hùnwhẹ susu go?

E sọgan paṣa we nado sè dọ suhugan hùnwhẹ po whedudu lẹ po tọn wẹ ma sọgbe hẹ nuplọnmẹ Owe-wiwe lẹ tọn kavi wá sọn aṣa kosi tọn lẹ mẹ. Hùnwhẹ mọnkọ lẹ nọ tindo kanṣiṣa hẹ sinsẹ̀n lalo. Yé sọgan bẹ afinyọnnuwiwa hẹn kavi nọgodona nuyise alindọn jọmaku tọn. Delẹ to hùnwhẹ ehelẹ mẹ sọ nọ sinai do otàngblo lẹ kavi tadagbe bibiọ ji. (Isaia 65:11) Jehovah na avase sinsẹ̀n-basitọ etọn lẹ dọmọ: ‘Mì klan mìde dovo, mì sọ doalọ onú mawé go ba blo.’—2 Kọlintinu lẹ 6:17.a

2. Nukun tẹwẹ Jehovah nọ yí do pọ́n hùnwhẹ delẹ he nọ na gbẹtọvi lẹ gigo he yé ma jẹna?

Jehovah na mí avase ma nado nọ “dejido gbẹtọvi tata lẹ go.” (Hia Jelemia 17:5.) Hùnwhẹ whedudu tọn delẹ nọ na gigo gandutọ lẹ kavi awhànfuntọ lẹ. Hùnwhẹ devo lẹ nọ yin bibasi nado gbògbéna ohia otò tọn lẹ kavi nado flin owhe he mẹ otò de jẹ ede si. (1 Johanu 5:21) Humọ, gbọjẹzan delẹ sọ nọ yin dide nado dùwhe pipli tonudidọ tọn lẹ tọn kavi tito devo he aihọn lọ zedai lẹ tọn. Nawẹ e na ṣí na Jehovah eyin mí nọ na gigo he ma jẹ gbẹtọ kavi pipli de he nọ yinuwa jẹagọdo lẹndai Etọn?

3. Walọ tẹlẹ wẹ sọgan zọ́n bọ hùnwhẹ de ma na yin alọkẹyi?

Biblu dosẹ́n gando “ahànnu-zẹjlẹgo, agọ́-gànyìn, [gọna] ahàn-gbẹdido” go. (1 Pita 4:3) Hùnwhẹ whedudu tọn delẹ nọ bẹ aṣa fẹnnuwiwa tọn po walọyizan he zẹ̀pá lẹ po hẹn. Nado to họntọn Jehovah tọn lẹ yin zọnmii, mí dona nọla pete na aṣa mawé mọnkọ lẹ.

DINDONANU DOGỌ

4. Ma nọ doalọ to hùnwhẹ he nọ de yẹyi sọn Jehovah go lẹ mẹ blo

Hia Efesunu lẹ 5:10, enẹgodo dọhodo kanbiọ ehelẹ ji:

• Etẹ mẹ wẹ mí dona mọnukunnujẹ to whenue mí jlo na basi nudide vlavo nado doalọ to hùnwhẹ whedudu tọn de mẹ kavi lala?

• Hùnwhẹ tẹlẹ wẹ mẹlẹ nọ basi hugan to lẹdo towe mẹ?

• Be a lẹndọ hùnwhẹ mọnkọ lẹ nọ hẹn homẹhun Jehovah ya?

Di apajlẹ, be a ko kanse dewe pọ́n nuhe Jiwheyẹwhe nọ lẹn gando jijizan dùdù go ya? Biblu ma dọho gbede gando sinsẹ̀n-basitọ Jehovah tọn depope go he dù jijizan etọn, amọ́ e donù hùnwhẹ jijizan tọn omẹ awe he ma nọ sẹ̀n Ẹn delẹ tọn go. Hia Jenẹsisi 40:20-22 gọna Matiu 14:6-10. Enẹgodo, dọhodo kanbiọ ehelẹ ji:

• Etẹwẹ hùnwhẹ jijizan tọn awe ehelẹ tindo to kọndopọ mẹ?

• Sọgbe hẹ kandai Biblu tọn awe ehelẹ, nukun tẹwẹ a lẹndọ Jehovah nọ yí do pọ́n jijizan dùdù?

Todin, vlavo a gán nọ kanse dewe dọ, ‘Eyin n’nọ doalọ to hùnwhẹ jijizan tọn kavi whedudu devo he Biblu ma yigbena lẹ mẹ, be enẹ ka nọ yin nude to nukun Jehovah tọn mẹ dódó ya?’ Hia Eksọdusi 32:1-8. Enẹgodo, hò VIDEO lọ bo dọhodo kanbiọ he bọdego lẹ ji.

VIDEO: Gbọjẹzan po Hùnwhẹ He Jiwheyẹwhe Ma Kẹalọyi lẹ Po (5:07)

• Naegbọn e do yin nujọnu dọ mí ni nọ dindona nuhe Jehovah kẹalọyi taun lẹ?

• Nawẹ mí sọgan wàmọ gbọn?

Nudelẹ he nọ dohia dọ whedudu de ma nọ hẹn homẹhun Jiwheyẹwhe

• Be e sọgbe hẹ nuplọnmẹ Owe-wiwe tọn lẹ ya? Nado yọ́n enẹ, dindona aṣa dowhenu tọn he mẹ hùnwhẹ lọ wá sọn lẹ.

• Be e nọ na gigo he ma jẹ gbẹtọvi, pipli kavi ohia otò tọn lẹ wẹ ya? Jehovah wẹ mí nọ na gigo hugan mẹdevo depope, podọ mí deji dọ ewọ wẹ na didẹ nuhahun aihọn tọn lẹ.

• Be e bẹ aṣa po nuyiwa he jẹagọdo nubiọtomẹsi Jiwheyẹwhe tọn lẹ po hẹn wẹ ya? Mí dona hẹn walọyizan wiwe de go.

5. Gọalọna mẹdevo lẹ nado nọ na sisi nuyise towe lẹ

VIDEO: Nọ Yí Zinzin Do Basi Zẹẹmẹ Nuyise Towe lẹ Tọn (2:01)

Hia Matiu 7:12, enẹgodo dọhodo kanbiọ ehelẹ ji:

• Sọgbe hẹ wefọ ehe, be a dona gbẹna hẹnnumẹ towe he yin mayisenọ lẹ dọ yé ma sọgan nọ doalọ to hùnwhẹ whedudu tọn de mẹ wẹ ya?

• Etẹwẹ a sọgan wà nado hẹn hagbẹ whẹndo tọn towe lẹ deji dọ eyin a ma tlẹ nọ dùwhe lẹ hẹ yé, a gbẹ́ yiwanna yé bọ yé sọ họakuẹ na we?

6. Jehovah jlo dọ mí ni do ayajẹ

Jehovah jlo dọ mí ni nọ duvivi ojlẹ ayajẹ tọn lẹ tọn hẹ whẹndo mítọn gọna họntọn lẹ. Hia Yẹwhehodọtọ 8:15, bo dọhodo kanbiọ ehe ji:

• Nawẹ wefọ ehe dohia gbọn dọ Jehovah jlo dọ mí ni do ayajẹ?

Jehovah jlo dọ omẹ etọn lẹ ni nọ deayidai bosọ nọ mọ awuvivi to nuwiwa pọmẹ tọn lẹ tẹnmẹ. Hò VIDEO lọ nado mọ lehe mí nọ wàmọ to plidopọ akọjọpli tọn mítọn lẹ whenu do.

VIDEO: Johẹmẹ Didohia to Plidopọ Akọjọpli Tọn lẹ Whenu (5:40)

Hia Galatianu lẹ 6:10, enẹgodo dọhodo kanbiọ ehelẹ ji:

• Be hùnwhẹ whedudu tọn lẹ mẹ janwẹ mí dona doalọ te dandan whẹpo do sọgan wà “nuhe yin dagbe” na mẹdevo lẹ ya?

• Detẹ to aliho nunamẹ tọn awe ehelẹ mẹ wẹ na hẹn ayajẹ wá na we hugan—eyin a desọn ojlo mẹ nado nanúmẹ wẹ ya kavi eyin a mọdọ a ma gán gọ̀n númanamẹ na whèzangbe wẹ wutu?

• Kunnudetọ susu lẹ wẹ nọ basi tito ojlẹ ayajẹ tọn lẹ tọn na ovi yetọn lẹ whẹwhẹ, bo tlẹ sọ nọ wleawu nunina he ovi lọ lẹ ma donukun etọn lẹ tọn na yé. Eyin hiẹ lọsu ko do ovi lẹ, onú vonọtaun he yé ma donukun tẹlẹ wẹ a sọgan nọ wà na yé?

BLADOPỌ

Jehovah jlo dọ mí ni nọ yí ojlẹ ayajẹ tọn lẹ zan hẹ whẹndo po họntọn mítọn lẹ po. Amọ́, e sọ jlo dọ mí ni nọla na hùnwhẹ he e gbẹwanna lẹ.

Dogbapọn

• Kanbiọ tẹlẹ wẹ mí sọgan nọ kanse míde nado yọnẹn eyin hùnwhẹ de nọ hẹn homẹhun Jehovah?

• Nawẹ mí sọgan hẹn nudide mítọn gando whedudu lẹ go họnwun na hagbẹ whẹndo tọn po họntọn mítọn lẹ po gbọn?

• Etẹwẹ hẹn we kudeji dọ Jehovah jlo dọ mí ni nọ jaya bosọ nọ deayidai?

PỌ́N NUDỌNAMẸ DEVO LẸ

Gbadopọnna hùnwhẹ whedudu tọn delẹ he mẹ Klistiani lẹ ma nọ doalọ te.

“Etẹwutu Kunnudetọ Jehovah Tọn lẹ Ma Nọ Dù Owhe Delẹ?” (Hosọ Intẹnẹt ji tọn)

Pọ́n whẹwhinwhẹ́n ẹnẹ delẹ he wutu mí yise dọ hùnwhẹ jijizan tọn lẹ ma nọ hẹn homẹhun Jiwheyẹwhe.

“Naegbọn Kunnudetọ Jehovah Tọn lẹ Ma Nọ Dù Jijizan?” (Hosọ Intẹnẹt ji tọn)

Pọ́n lehe yọpọvu he yiwanna Jehovah lẹ gán hẹn homẹ etọn hùn to hùnwhẹ wehọmẹ tọn lẹ whenu do.

A Họakuẹ to Nukun Jehovah Tọn Mẹ (11:35)

Klistiani livi susu lẹ wẹ ko basi dide ma nado nọ dù hùnwhẹ Noẹli tọn. Etẹwẹ yé lẹn gando nudide yetọn enẹ go?

“Yé Mọ Nuhe Yọ́n Hugan De” (Alọnuwe Atọ̀họ̀-Nuhihọ́ lọ Tọn, 1^er décembre 2012 tọn)