Jesu Hẹnazọ̀ngbọna Viyọnnu de po Dawe Tókunọ de Po

To whenue Jesu ko gblewhẹdo Falesi lẹ na aṣa ṣejannabi tọn yetọn lẹ wutu godo, e tlọ́n finẹ po devi etọn lẹ po. E dedo agbegbe Tile po Sidoni po tọn lẹ ji to Fenike, to kilomẹtlu susu lẹ to agewaji-whèyihọ tọn.

To finẹ, Jesu mọ owhé he gbè e sọgan nọ de, ṣigba e ma jlo dọ mẹdepope ni yọnẹn dọ emi to finẹ. Ṣogan, mẹsusu wẹ yọnẹn to lẹdo enẹ lọsu mẹ. Nawe Glẹkinu de he yin jiji to lẹdo lọ mẹ mọ Jesu bo jẹ vivẹ̀ ẹ ji dọmọ: “Wàlẹblanuna mi, Oklunọ, hiẹ Visunnu Davidi tọn. Gbigbọ aovi tọn to yasana viyọnnu ṣie sinsinyẹn.”—Matiu 15:22; Malku 7:26.

To ojlẹ de godo, devi Jesu tọn lẹ vẹ̀ ẹ dọmọ: “Dọna ẹn dọ e ni yì, na e to awhádo hodo mí mapote wutu.” To gblọndo Jesu tọn mẹ, e do nuhewutu e do dovọ́na nawe lọ hia: “Yẹn ma yin didohlan mẹdevo depope adavo hlan lẹngbọ owhé Islaeli tọn he bu lẹ.” Ṣigba, nawe lọ ma gbọjọ. E dọnsẹpọ Jesu bo jẹklo to nukọn etọn bosọ to vivẹ̀ ẹ dọmọ: “Oklunọ, gọalọna mi!”—Matiu 15:23-25.

E taidi dọ nado whlé yise etọn pọ́n, Jesu donù pọndohlan agọ̀ he Ju lẹ tindo gando mẹhe wá sọn akọta devo mẹ lẹ go dọmọ: “E ma sọgbe nado yí akla ovi lẹ tọn bo dlan ẹn hlan avún pẹvi lẹ gba.” (Matiu 15:26) To whenue Jesu donù “avún pẹvi lẹ” kavi avúnvi lẹ go to hodidọ etọn mẹ, numọtolanmẹ sisosiso he e tindo na mẹhe ma yin Ju lẹ dohia wẹ e te. Nukunta etọn po kọnugbè awuvẹmẹ tọn etọn lọsu po dona ko do numọtolanmẹ enẹlẹ hia.

Kakati nado gblehomẹ, nawe lọ ma na ayidonugo pọndohlan agọ̀ Ju lẹ tọn he go Jesu donù lọ bo gbọn whiwhẹ dali dọmọ: “Mọwẹ, Oklunọ; ṣigba avún pẹvi lẹ nọ dù jàjá he nọ flẹ sọn tafo klunọ yetọn tọn ji lẹ be.” Jesu doayi ninọmẹ ahun mẹ tọn dagbe he e tindo go bo dọmọ: “Hiẹ yọnnu E, daho wẹ yise towe; na e ni yin wiwà hlan we kẹdẹdile hiẹ jlo do.” (Matiu 15:27, 28) Podọ e sọ jọ domọ, mahopọnna dọ whégbè gbọ́n wẹ viyọnnu lọ te! To whenue nawe lọ lẹkọyi whégbè, e mọ ovi pẹvi lọ to aimimlọn to adọzan ji, azọ̀n lọ ko gbọ mlẹnmlẹn bọ “aovi lọ ko tọ́n sọn ewọ mẹ”!—Malku 7:30.

To whenue yé tọ́n sọn agbegbe Fenike tọn ji, Jesu po devi etọn lẹ po zingbejizọnlin pànta lẹdo he tin to agewaji Tọ̀sisa Jọdani tọn mẹ. E taidi dọ yé dasá Jọdani to fide to agewaji Tọ̀sisa Galili tọn bo biọ lẹdo Dekapole tọn mẹ. To finẹ, yé hẹji yì osó de ji, ṣigba gbẹtọgun lẹ mọ yé. Gbẹtọ lọ lẹ hẹn omẹ yetọn he yin sẹkunọ, klegbesatọ, nukuntọ́nnọ po unbọpẹnnọ lẹ po wá Jesu dè. Yé tẹ́ mẹhe to azọ̀njẹ ehelẹ do afọ Jesu tọn kọ̀n, podọ ewọ hẹnazọ̀ngbọ na yé. Na awuji gbẹtọ lọ lẹ wutu, yé pagigona Jiwheyẹwhe Islaeli tọn.

Jesu na ayidonugo vonọtaun dawe de he kúto bosọ tindo nuhahun hodidọ tọn. Hiẹ sọgan mọnukunnujẹ numọtolanmẹ he dawe lọ na ko tindo to gbẹtọgun daho enẹ mẹ lẹ mẹ. Vlavo na Jesu doayi e go dọ obu to dawe ehe di wutu, e plan ẹn sọn gbẹtọgun lọ mẹ jẹ olá. To whenue yé jẹ olá, Jesu dohia dawe lọ nuhe ewọ jlo na wà na ẹn. E ze alọ etọn lẹ do otó dawe lọ tọn lẹ mẹ, podọ to whenue e ko túntán godo, e doalọ odẹ́ dawe lọ tọn go. Enẹgodo, Jesu pọ́n olọn bo yí hogbe Heblugbe tọn de zan he zẹẹmẹdo “Hùn.” To whenẹnu, otó dawe lọ tọn lẹ hùn, podọ e penugo nado dọho ganji. Jesu ma jlo dọ azọ́njiawu ehe ni yin jijlá pé, ṣigba dọ gbẹtọ lẹ ni yí emi sè na nuhe yelọsu lẹ mọ bosọ sè lẹ wutu.—Malku 7:32-36.

Huhlọn he Jesu tindo nado hẹn azọ̀n mọnkọtọn lẹ gbọ yinuwado mẹhe mọ azọ́njiawu lọ lẹ ji sisosiso bo hẹn “awuji yé tlala.” Yé dọmọ: “E ko wà onú lẹpo ganji. E tlẹ hẹn tókunọ lẹ nado sènu podọ unbọpẹnnọ lẹ nado dọho.”—Malku 7:37.