Jiwheyẹwhe Nọ Hò Towe Pọ́n

MARY, Klistiani yọnnu de to owhe sẹpọ 50 etọn lẹ mẹ, ko jiya susu to gbẹzan etọn mẹ. Ayọdide asu etọn tọn dekọtọn do gbẹdai mẹ na nuhe hugan owhe ao die wayi. Enẹgodo, Mary dovivẹnu nado hẹn azọ́ngbàn etọn di taidi mẹjitọ godoponọ hlan ovi etọn ẹnẹ lẹ. Ṣigba ewọ gbẹsọ tin ewọ ṣokẹdẹ, bọ to whedelẹnu ṣokẹdẹninọ lọ nọ taidi nuhe yè ma sọgan doakọnna ba. Mary kanse dọ, ‘Be ehe zẹẹmẹdo dọ Jiwheyẹwhe ma nọ hò ṣie kavi ovi madotọ́ ṣie lẹ tọn pọ́n wẹ ya?’

Vlavo hiẹ ko tindo numimọ yajiji mọnkọtọn tọn pọ́n wẹo kavi lala, po nujikudo po hiẹ sọgan vẹawu numọtolanmẹ Mary tọn lẹ. Mímẹpo wẹ ko doakọnna ninọmẹ mẹwhlepọn tọn lẹ, podọ e sọgan ko paṣa mí dọ whetẹnu podọ nawẹ Jehovah na yinuwa do ota mítọn mẹ do. Delẹ to numimọ ehelẹ mẹ nọ yin kọdetọn tlọlọ na titẹdo osẹ́n Jiwheyẹwhe tọn lẹ go mítọn tọn wutu. (Matiu 10:16-18; Owalọ lẹ 5:29) Devo lẹ nọ yin kọdetọn yinyin gbẹtọvi mapenọ mítọn tọn he to gbẹnọ to aihọn de heyin gandudeji gbọn Satani dali mẹ. (1 Johanu 5:19) Apọsteli Paulu wlan dọmọ: “Nudida lẹpo wẹ to winwẹ̀n bo sọ to ajipanu to awufiẹsa mẹ.’’—Lomunu lẹ 8:22.

Ṣigba, nugbo lọ dọ hiẹ pannukọn whlepọn sinsinyẹn de ma zẹẹmẹdo dọ Jehovah ko jo we dai kavi ma tindo ojlo to dagbemẹninọ towe mẹ gba. Nawẹ hiẹ sọgan tindo jide ehe tọn gbọn? Etẹwẹ nọ dohia dọ Jiwheyẹwhe nọ hò towe pọ́n?

Apajlẹ Hohowhenu Tọn De

Biblu namẹ whẹwhinwhẹn họnwun heyin mẹtọnhopọn Jehovah tọn na gbẹtọvi dopodopo. Lẹnnupọn do Davidi ji. Jehovah tindo ojlo mẹdetiti tọn to ovi jọja lẹngbọhọtọ ehe mẹ, bo mọ ẹn nado yin ‘omẹ de he ayiha etọn kẹalọyi.’ (1 Samuẹli 13:14) Enẹgodo to whenue Davidi dugán taidi ahọlu, Jehovah dopagbe na ẹn dọmọ: “Yẹn [na NW] sọ tin po hiẹ po to fie hiẹ to yìyì lẹpo.’’—2 Samuẹli 7:9.

Be ehe zẹẹmẹdo dọ Davidi nọgbẹ matin nuhahun lẹ, po hihọ-basinamẹ vonọtaun po sọn Jiwheyẹwhe de wẹ ya? Lala, Davidi pannukọn whlepọn sinsinyẹn lẹ jẹnukọnna gandudu etọn podọ to gandudu etọn whenu ga. Na owhe susu lẹ whẹpo do lẹzun ahọlu, ewọ yin mẹhe Ahọlu hlọnhutọ Sauli yangbe etọn mapote. To gblagbla gbẹninọ etọn ehe whenu, Davidi wlan dọmọ: “Ayiha ṣie tin to kinnikinni lẹ ṣẹnṣẹn . . . Enẹ wẹ ovi gbẹtọ tọn lẹ, adú mẹhetọn basi owhán po oga po.’’—Psalm 57:4.

Ṣogan, to gblagbla mẹgbeyinyan ehe lẹpo whenu Davidi tindo nujikudo dogbọn mẹtọnhopọn mẹdetiti Jehovah tọn dali. “Hiẹ hia zọnlin ṣie,’’ wẹ ewọ dọ to odẹ̀ mẹ hlan Jehovah. Mọwẹ, na Davidi e tin taidi dọ Jehovah ko basi kandai nuhahun etọn tọn pete nkọ. Enẹgodo Davidi yidogọ dọmọ: “Kọ̀n dasìn ṣie do ogò towe mẹ; be yé ma tin to owe towe mẹ?’’a (Psalm 56:8) Po apajlẹ ehe po, Davidi do adọgbigbo hia dọ e ma yin dọ Jehovah yọn ninọmẹ lọ kẹdẹ gba ṣigba e yọ́n numọtolanmẹ homẹ tọn lọsu ga.

Sẹpọ vivọnu gbẹzan etọn tọn, Davidi sọgan wlan sọn numimọ edetiti tọn mẹ dọmọ: “Yè hẹn afọli sunnu de tọn lodo sọn Oklunọ de: E sọ basi homẹvivi do ali etọn go. Eyin e tlẹ jai, yè ma na takiti nẹ dlan gba: Na Oklunọ yí alọ etọn do hẹn e go.’’ (Psalm 37:23, 24) Hiẹ lọsu ga sọgan tindo jide dọ eyin whlepọn towe lẹ tlẹ gbọṣi aimẹ bo to wiwa debọdo-dego janwẹ, akọndonanu towe yin nuhe Jehovah nọ doayi e go bo nọ yí nukun nuhọakuẹ tọn do nọ pọ́n ẹn. Paulu wlan dọmọ: “Jiwheyẹwhe ma yin mawadodonọ nado wọn azọ́n mìtọn po tukla owanyi mìtọn tọn po, he mì ko sọhia gbọn oyin etọn dali, na le mì to devizọnwa hlan mẹwiwe lẹ do, bo sọ to bibasi i.’’—Heblu lẹ 6:10.

Humọ, Jehovah sọgan yinuwa nawe gbọn nina we huhlọn nado doakọnna afọklẹnnu depope he na pannukọn we dali. “Susu wẹ nukunbibia dodonọ tọn,’’ wẹ Davidi wlan, “Ṣigba Oklunọ de e sọn popo mẹ.’’ (Psalm 34:19) Na nugbo tọn, Biblu dọ na mí dọ nukun Jehovah tọn lẹ “to godo po nukọn po yì lẹdo aigba lẹpo pete, nado do ede hia huhlọnnọ na ayiha yé mẹhetọn yin pipe hlan e de lẹ tọn wutu.’’—2 Otannugbo lẹ 16:9.

Jehovah Ko Dọ̀n We

Kunnudenu dogọ heyin mẹtọnhopọn Jehovah lọsu titi tọn sọgan yin mimọ to hogbe Jesu tọn lẹ mẹ. E dọmọ: “Mẹdepope ma sọgan wá dee, adavo Otọ́ he do mi hlan dọ̀n ẹn.’’ (Johanu 6:44) Mọwẹ, Jehovah nọ gọalọna gbẹtọ dopodopo nado mọaleyi sọn avọ́sinsan klisti tọn mẹ. Gbọnna? To aliho he klo hugan mẹ, gbọn azọ́n yẹwhehodidọ Ahọluduta lọ tọn dali wẹ. Nugbo, azọ́n ehe nọ yinuwa taidi “okunnu de hlan akọta lẹpo,’’ ṣogan, e nọ jẹ gbẹtọ lẹ de to dodonu mẹdopodopo tọn ji. Nugbo lọ dọ hiẹ to todoai bo to gbeyina wẹndagbe lọ yin kunnudenu mẹtọnhopọn Jehovah lọsu titi tọn na we.—Matiu 24:14.

Gbọn gbigbọ wiwe etọn dali, Jehovah sọ nọ dọ̀n mẹdopodopo dohlan Visunnu etọn po todido ogbẹ̀ mavọmavọ tọn po. Ehe nọ hẹn mẹdopodopo penugo nado plọn bo yí nugbo gbigbọmẹ tọn do yizan mẹ mahopọnna ogú dogbo lẹ tintindo tọn po mapenọ-yinyin depope po. Na nugbo tọn, mẹde ma sọgan mọnukunnujẹ lẹndai Jiwheyẹwhe tọn lẹ mẹ matin alọgọnamẹ gbigbọ Jiwheyẹwhe tọn tọn gba. (1 Kọlintinu lẹ 2:11, 12) Dile Paulu wlan dohlan Tẹsalonikanu lẹ do dọ, “omẹ po ma tindo yise gba.’’ (2 Tẹsalonikanu lẹ 3:2) Jehovah nọ na gbigbọ etọn hlan kiki enẹnọ he do ojlo hia nado yin dindọn gbọn ewọ dali lẹ.

Jehovah nọ dọ̀n gbẹtọ lẹ na ewọ yiwanna yé taidi mẹdopodopo podọ e sọ jlo dọ yé ni jẹ whlẹngán kọ̀n wutu. Lehe kunnudenu masẹafọ mẹtọnhopọn mẹdetiti Jehovah tọn tọn klo do sọ! Jesu dọmọ: “E ma yin onú jijlo de to Otọ́ mìtọn he tin to olọn mẹ nukọn, dọ dopo to pẹvi helẹ de mẹ ni dọ̀n.’’ (Matiu 18:14) Mọwẹ, to nukun Jiwheyẹwhe tọn lẹ mẹ mẹlẹpo wẹ yin nujọnu taidi mẹdopodopo he tin to voovo. Enẹwutu wẹ Paulu sọgan wlan dọmọ: “[E] na na hlan omẹ dopodopo dile owalọ etọn lẹ te.’’ (Lomunu lẹ 2:6) Podọ apọsteli Pita dọmọ: “Jiwheyẹwhe ma yin mẹnukuntahopọntọ gba: ṣigba to akọta lẹpo mẹ mẹhe [omẹ dopodopo he] dibu si i bo wazọ́n dódó wẹ yè kẹalọyi to e de.’’—Owalọ lẹ 10:34, 35.

Azọ́njiawu Jesu tọn Lẹ

Ojlo mẹdetiti Jiwheyẹwhe tọn to gbẹtọ lẹ mẹ yin dohia basina taun to azọ́njiawu he yin bibasi gbọn Ovi etọn, yèdọ Jesu dali. Numọtolanmẹ sisosiso wẹ zọ̀n hẹ azọ̀nhẹngbọ ehelẹ. (Malku 1:40, 41) To whenue eyindọ Jesu “ma sọgan wà nude ededenu, adavo onú he e mọ Otọ́ wà,’’ yèdọ awuvẹmẹ etọn basi dohia mẹtọnhopọn owanyinọ Jehovah tọn na devizọnwatọ etọn lẹ dopodopo.—Johanu 5:19.

Gbadopọnna kandai azọ́njiawu de he Jesu basi tọn, ehe yin kinkandai to Malku 7:31-37 mẹ. Tofi Jesu gbọazọ̀nna dawe de he kúto bosọ yin unbọpẹnnọ. E “sọ de [dawe lọ] sọn agundaho lọ mẹ jẹ apadopo,’’ wẹ Biblu dọ. Enẹgodo, to “pinpọn aga hlan olọn, e wẹnhun, bosọ dọ hlan ẹn dọ, [‘Eph’pha-tha,’] enẹ wẹ yin húnhún.’’

Naegbọn Jesu do de dawe ehe sọn agundaho lọ mẹ? Mọwẹ, e taidi dọ unbọpẹnnọ de he e vẹawuna nado dọho na tindo numọtolanmẹ awugbopo tọn to nupọntọ lẹ nukọn. Jesu sọgan ko doayi awumajai dawe ehe tọn go, podọ enẹwutu wẹ e dè nado gbọazọ̀nna ẹn to nuglọ. Weyọnẹntọ Biblu tọn dopo doayi e go dọ “otan lọ lẹpo, dohia mí gblegede dọ Jesu ma pọ́n dawe lọ hlan taidi awutunọ de poun gba, ṣigba e pọ́n ẹn hlan taidi mẹdopo de. Dawe lọ tindo nuhudo vonọtaun de po nuhahun vonọtaun de po, podọ po awuvẹmẹ mẹtọnhopọn tọn po wẹ Jesu do yinuwa hẹ ẹ to aliho he yan numọtolanmẹ etọn lẹ dolá podọ to aliho he e sọgan mọnukunnujẹemẹ tọn mẹ.’’

Kandai ehe dohia dọ Jesu tindo mẹtọnhopọn mẹdetiti tọn na gbẹtọ lẹ. Hiẹ sọgan gboadọ dọ ewọ tindo ojlo to hiẹ mẹ. Nugbo, avọ́sinsan okú etọn tọn yin dohia owanyi tọn na aihọn lọ pete heyin gbẹtọvi fligọ lẹ tọn. Ṣogan, hiẹ sọgan kẹalọyi nuyiwa enẹ na dewe, dile Paulu basi do, mẹhe wlan dọmọ: “Ovi Jiwheyẹwhe tọn . . . yiwanna mì, bo sọ yi ede na mì.’’ (Galatianu lẹ 2:20) Podọ to whenue eyindọ Jesu dohia dọ ‘ewọ he ko mọ mi ko mọ Otọ́,’ mí sọgan tindo jide dọ Jehovah tindo ojlo dopolọ to devizọnwatọ etọn lẹ dopodopo mẹ. (Wekun flinflin lẹ yin mítọn).—Johanu 14:9.

Jehovah Lẹzun Ahọsutọ

Yíyí oyọnẹn Jiwheyẹwhe tọn do homẹ bẹ wiwá nado yọ́n ada gbẹtọ yinyin etọn tọn dopodopo dile e yin didohia to Biblu mẹ do. Yinkọ Jehovah tọn na taun tọn zẹẹmẹdo “E Dike Nado Lẹzun,’’ ehe dohia dọ Jehovah sọgan lẹzun nudepope he e jlo nado sọgan hẹn ojlo etọn di. To gblagbla whenuho tọn mẹ, e ko hẹn azọ́ngbàn voovo lẹ di, gọna dehe yin Mẹdatọ, Otọ́, Oklunọ, Lẹngbọhọtọ, Jehovah awhànpa lẹ tọn, Odẹ̀ Setọ, Whẹdatọ, Nuplọnmẹtọ Daho, po Mẹfligọtọ po.b

Nado yọ́n pinpẹn zẹẹmẹ gigọ oyin Jiwheyẹwhe tọn tọn, mí sọ dona wá nado yọ́n tẹnmẹ Jehovah tọn taidi Ahọsutọ de. Paulu wlan dọmọ: “Matin yise, e glo nado hẹn homẹ etọn hùn: na ewọ he ja Jiwheyẹwhe de, ma sọgan nọma yise dọ e tin, podọ ewọ wẹ ahọsutọ yé he whesọ do din in lẹ tọn.’’—Heblu lẹ 11:6.

Jehovah ko dopagbe gbẹninọ kakadoi to paladisi aigba ji tọn mẹ na mẹhe dè nado sẹ̀n ẹn po ayiha lẹpo po to egbehe lẹ. E ma yin ṣejannabi gba nado pọ́n nukọn hlan hẹndi dọdai jiawu enẹ, mọjanwẹ e ma yin saklanu de nado pọ́n dewe hlan taidi mẹhe ko tin to finẹ gba. Mose “pọ́n hlan ahọsu ale lọ tọn.’’ (Heblu lẹ 11:26) Paulu lọsu donukun hẹndi opagbe Jiwheyẹwhe tọn na Klistiani yiamisisadode nugbo lẹ po ojlo vẹkuvẹku po. E wlan dọmọ: “Yẹn to whinwhlẹndo nado jẹ fie ohia lọ te hlan ale oylọ daho Jiwheyẹwhe tọn to Klisti Jesu mẹ.’’—Filippinu lẹ 3:14.

Hiẹ lọsu ga sọgan donukun ale lọ he Jehovah dopagbe etọn hlan mẹhe doakọnnanu lẹ. Ale enẹ didonukun yin ada titengbe de to oyọnẹn Jiwheyẹwhe towe tọn mẹ po akọndonanu mìtọn po to sinsẹnzọn etọn mẹ. Enẹwutu nọ lẹnayihamẹpọn to whelẹponu do dona lẹ ehe to tenọpọn we sọn Jehovah de lẹ ji. Mary, heyin nùdego to bẹjẹeji, ko dovivẹnu vonọtaun nado basi ehe. E dọmọ, “Whla tintan to gbẹzan ṣie mẹ, yẹn wá kẹalọyi to agọe dọ avọ́sinsan ofligọ Jesu tọn gando yẹnlọsu go ga. Yẹn jẹ numọtolanmẹ tindo ji dọ Jehovah nọ hò ṣie pọ́n taidi gbẹtọ de. Yẹn ko yin Klistiani na nuhe hugan owhe 20 lẹ, ṣigba to agọe din poun wẹ yẹn jẹ ehe yise ji taun.’’

Gbọn nupinplọn po ayihamẹlẹnpọn sọn ahunmẹ wá do Biblu ji dali, Mary, to pọmẹ po liva susu devo lẹ po, ko to wiwá nado plọn dọ Jehovah nọ hò omẹ etọn lẹ tọn pọ́n e ma yin taidi pipli de kẹdẹ wẹ gba ṣigba taidi mẹdopodopo. Apọsteli Pita tindo nujikudo ehe tọn sọmọ bọ e sọgan wlan dọmọ: “Mì bẹ magbọjẹ mìtọn lẹpo do alọ [Jiwheyẹwhe] tọn mẹ; na ewọ to tukla mìtọn jẹ wutu.’’ (1 Pita 5:7) Mọwẹ, Jiwheyẹwhe nọ hò towe pọ́n!

[Nudọnamẹ odò tọn lẹ]

[Apotin to weda 6]

Fọnsọnku—Kunnudenu Dọ Jiwheyẹwhe Nọ Hò Mẹtọn Pọ́n

KUNNUDENU dutomẹji ojlo Jiwheyẹwhe tọn na dopodopo mítọn yin mimọ to Biblu mẹ to Johanu 5:28, 29 mẹ, he dọmọ: “Ojlẹ lọ ja, to ehe mẹ omẹ he tin to [yọdo oflin tọn, NW] mẹ lẹpo na se ogbè [Jesu tọn], bo na tọnjẹgbonu.’’

Po awuvivi po, hogbe Glẹki tọn lọ mne-mei’on [yọdo oflin tọn], yin zinzan tofi kakati ni yin ta’phos (yọdo). Linlẹn ṣiọdidi tọn poun wẹ hogbe lọ ta’phos detọ́n. Ṣigba mne-mei’on dè linlẹn lọ tọ́n dọ kandai omẹ he ko kú lọ tọn yin finflin.

To pọndohlan ehe tọn mẹ, saa lẹnnupọn dogbọn nuhe fọnsọnku lọ na biọ to Jehovah Jiwheyẹwhe si dali. Nado hẹn mẹde gọwa ogbẹ̀, e dona yọ́n onú lẹpo dogbọn omẹ enẹ dali—gọna ogú gbẹtọ-yinyin etọn po nulinlẹn apọnmẹ etọn tọn lẹpo po. Kiki to whelọnu lo wẹ omẹ enẹ sọgan do yin hinhẹn gọwa po gbẹtọ-yinyin dopolọ pẹpẹ po.

Nugbo wẹ dọ, ehe ma yọnbasi sọn pọndohlan gbẹtọvi tọn mẹ gba, ṣigba “onú lẹpo wẹ wiwà na Jiwheyẹwhe.’’ (Malku 10:27) Ewọ tlẹ sọgan yọ́n onú he tin to ahún gbẹtọ tọn mẹ. Eyin etlẹ yindọ mẹde ko kú na owhe kanweko susu lẹ, oflin Jiwheyẹwhe tọn na ẹn ma nọ busẹ gba; e ma nọ kupẹ́ gba. (Job 14:13-15) Gbọnmọ dali, to whenue e to hodọ dogbọn Ablaham, Isaki, po Jakobu po dali, Jesu sọgan dọ etlẹ yin to owhe kanweko lẹ to whenuena yé ko kú godo dọ Jehovah “ma yin Jiwheyẹwhe oṣiọ lẹ tọn gba, adavo mẹhe to ogbẹ̀ lẹ tọn: na gbẹtọ lẹpo wẹ tin to ogbẹ̀ hlan ẹn.’’ (Wekun flinflin lẹ yin mítọn).—Luku 20:38.

Gbọnmọ dali, liva susu he ko kú lẹ tin to oflin Jehovah Jiwheyẹwhe tọn mẹ to gigọ mẹ. Lehe e yin ohia awujinu dọ Jiwheyẹwhe nọ hò gbẹtọvi lẹ tọn pọ́n to dodonu mẹdopodopo tọn ji do sọ!

[Yẹdide to weda 7]

Jesu tindo ojlo mẹdetiti tọn to mẹhe e gbọazọ̀nna lẹ mẹ