Pita Mọ́n Jesu to Owhé Kaifa Tọn Gbè

To whenue Jesu yin wiwle to jipa Gẹtsemani tọn mẹ, obu jẹ apọsteli lẹ ji bọ yé jo e do bo họnyi. Ṣigba, omẹ awe to yé mẹ wá nọte. Yewlẹ wẹ Pita “po devi devo po,” he na ko yin apọsteli Johanu. (Johanu 18:15; 19:35; 21:24) Yé na ko plá Jesu dile yè to pinplan ẹn yì owhé Annas tọn gbè. To whenue Annas do Jesu hlan Yẹwhenọ Daho Kaifa dè, Pita po Johanu po hodo e to aganu. E taidi dọ yé to budi na ogbẹ̀ yede tọn bosọ to nuhà gando nuhe na jọ do Ogán yetọn go.

Yẹwhenọ daho lọ yọ́n Johanu podọ enẹwutu wẹ ewọ do penugo nado biọ awánu owhé Kaifa tọn mẹ. Pita gbọṣi gbonu to họngbo ji kakajẹ whenue Johanu lẹkọwa bo dọhona deviyọnnu he to nuyiwa di họ̀njinọtọ lọ. Whenẹnu wẹ Pita penugo nado biọ e mẹ.

Avivọ tin to ozán ehe mẹ, enẹwutu mẹhe to awánu lọ mẹ lẹ flọ akán-miyọ́n de. Pita sinai hẹ yé nado hú miyọ́n dile e to ote “nado pọ́n nuhe na jọ” to owhẹ̀ Jesu tọn didọ godo. (Matiu 26:58) Todin, to hinhọ́n miyọ́n lọ tọn nù, họ̀njinọtọ he jo Pita do nado biọ whégbè lọ pọ́n ẹn tlintlin. E kanse e dọmọ: “Hiẹ lọsu yin dopo to devi dawe ehe tọn lẹ mẹ ga, kavi e ma yin mọ wẹ?” (Johanu 18:17) Podọ e ma yin ewọ kẹdẹ wẹ doayi Pita go bo dohia dọ e nọ zọnhẹ Jesu.—Matiu 26:69, 71-73; Malku 14:70.

Ehe hẹn Pita jẹflumẹ taun. E to nuhe go e pé lẹpo wà nado whlá, bo tlẹ sọ to yonu dọ̀n do godo jei họngbo lọ kọ̀n. Enẹwutu, Pita mọ́n dọ emi ma yọ́n Jesu, kaka bo dọmọ: “Yẹn ma yọ́n ewọ mọjanwẹ yẹn masọ mọnukunnujẹ nuhe dọ a te mẹ do niyẹn.” (Malku 14:67, 68) Podọ, e jẹ “dẹ̀hodo ede ji bosọ jẹ whiwhle ji,” ehe zẹẹmẹdo dọ ewọ ko wleawufo nado whlé dọ nugbo wẹ nuhe dọ e te lẹ podọ nado pehẹ kọdetọn depope eyin e ma wá yinmọ.—Matiu 26:74.

To ojlẹ enẹ mẹ, owhẹ̀ Jesu tọn gbẹ́ to nukọnzindo, vlavo to aga awánu lọ tọn to owhé Kaifa tọn gbè. Pita po mẹdevo he to odò lẹ po sọgan mọ kunnudetọ voovo he yin pinplan yì nado dekunnu lẹ dile yé to yigọyigọ basi.

Kọnugbè Galilinu tọn Pita tọn dohia dọ lalodo wẹ ewọ te. Humọ, dopo to mẹhe pli to finẹ lẹ mẹ yin hẹnnumẹ Malkọs tọn, yèdọ mẹhe Pita pà otó na. Enẹwutu, e sawhẹdokọna Pita dọmọ: “Yẹn mọ we to jipa lọ mẹ hẹ ẹ, kavi yẹn ma mọ we wẹ?” To whenue Pita mọ́n ehe whla atọ̀ntọ godo, koklo dosé, kẹdẹdile e ko yin didọdai do.—Johanu 13:38; 18:26, 27.

To ojlẹ enẹ mẹ, e họnwun dọ Jesu to agbàsẹnu bo to awánu lọ pọnhlan. Oklunọ sọ lẹkọ bo pọ́n Pita hlan tlọlọ, ehe dona ko yinuwado Pita ji sinsinyẹn. E flin nuhe Jesu dọ to gànhiho kleun delẹ mẹ wayi to abò aga tọn lọ mẹ. Yí nukun homẹ tọn do pọ́n numọtolanmẹ he Pita na ko tindo to whenue nuhe e wà lọ wá họnwun na ẹn! E tọ́njẹgbonu bo viavi vivẹvivẹ.—Luku 22:61, 62.

Nawẹ ehe sọgan jọ gbọn? Nawẹ Pita—he kudo huhlọn gbigbọmẹ tọn etọn po nugbonọ-yinyin etọn po ji wayi sọmọ—sọgan mọ́n Ogán etọn gbọn? Yè to tasọdona nugbo, bo to Jesu dohia taidi sẹ́nhẹngbatọ kanylantọ de. To ojlẹ he mẹ Pita dona ko nọgodona homẹvọnọ te wẹ e wá dogodo Omẹ lọ he tindo “ohó ogbẹ̀ madopodo tọn lẹ.”—Johanu 6:68.

Numimọ ylankan Pita tọn dohia dọ etlẹ yin mẹhe tindo yise bo ze ede jo mlẹnmlẹn de sọgan hẹn jlẹkaji-ninọ etọn bu eyin e ma wleawu ganji nado pehẹ nuhahun kavi whlepọn madonukun lẹ. Na nuhe mẹ Pita jugbọn ni yin avase de na devizọnwatọ Jiwheyẹwhe tọn lẹpo!