Jesu Plọn Nado Nọ Setonu

BE E nọ vẹawuna we to whedelẹnu nado setonu wẹ ya?—a Eyin mọ wẹ, yọnẹn dọ e ma yin nupaṣamẹ de gba. Mẹlẹpo wẹ e nọ vẹawuna to whedelẹnu nado setonu. Be a yọnẹn dọ Jesu lọsu tlẹ plọn nado nọ setonu ya?—

Be hiẹ yọ́n mẹhe yọpọvu lẹpo dona nọ setonuna ya?— Mọwẹ, otọ́ mítọn po onọ̀ mítọn po wẹ. Biblu dọmọ: “Mì nọ setonuna mẹjitọ mìtọn lẹ to kọndopọ mẹ hẹ Oklunọ.” (Efesunu lẹ 6:1) Mẹnu wẹ yin otọ́ Jesu tọn?— Jehovah Jiwheyẹwhe wẹ, podọ ewọ yin Otọ́ mílọsu tọn ga. (Matiu 6:9, 10) Ṣigba owhẹ̀ towe nasọ whẹ́n eyin a dọ dọ Josẹfu wẹ otọ́ Jesu tọn bọ Malia yin onọ̀ etọn. Be a yọ́n lehe yé wá lẹzun mẹjitọ etọn lẹ gbọn ya?—

Angẹli Gabliẹli dọna Malia lehe ewọ na lẹzun onọ̀ Jesu tọn do, dile etlẹ yindọ e ma ko tindo kọndopọ zanhẹmẹ tọn po sunnu de po. Jehovah hẹn hòmimọ ehe yọnbasi gbọn azọ́njiawu daho de dali. Gabliẹli dọna Malia dọmọ: “Huhlọn Gigogán lọ tọn na ṣinyọnyẹ oji we. Podọ na enẹ tọn wutu, ovi he yin jiji lọ na yin yiylọdọ wiwe, Visunnu Jiwheyẹwhe tọn.”—Luku 1:30-35.

Jiwheyẹwhe ze ogbẹ̀ Visunnu etọn tọn sọn olọn mẹ bo ze e do vidọ̀ Malia tọn mẹ. Enẹgodo ovi lọ whẹ́n to ohò etọn mẹ dile viyẹyẹ lẹ nọ whẹ́n to ohò onọ̀ yetọn lẹ tọn mẹ do. Nudi osun ṣinẹnẹ godo, Jesu yin jiji. To ojlẹ enẹ gblamẹ, Josẹfu wlealọ hẹ Malia, bọ mẹsusu lẹndọ Josẹfu wẹ yin otọ́ jọnun Jesu tọn. Na nugbo tọn, otọ́ mẹgopọntọ etọn wẹ Josẹfu yin. Gbọnmọ dali, Jesu tindo otọ́ awe to linlẹn de mẹ!

Whenue Jesu tindo owhe 12, e wà nude he dohia dọ ewọ yiwanna Otọ́ olọn mẹ tọn etọn, Jehovah taun. To ojlẹ enẹ mẹ, whẹndo Jesu tọn basi gbejizọnlin gaa de wá Jelusalẹm na hùnwhẹ Juwayi tọn, dile e ko yin aṣa yetọn do. To godo mẹ, whenue yé lẹkọ jei whé to Nazalẹti, Josẹfu po Malia po ma doayi e go dọ Jesu ma zọnhẹ yé. Be a yọ́n nuhewutu yé do wọn Jesu ya?—

To whenẹnu, Josẹfu po Malia po tindo ovi devo lẹ. (Matiu 13:55, 56) E sọ sọgan ko yindọ hẹnnumẹ yetọn delẹ to gbejizọnlinzin hẹ yé, taidi Jakọbu po Johanu po to pọmẹ hẹ otọ́ yetọn, Zebede po onọ̀ yetọn Salome po, he sọgan ko yin nọviyọnnu Malia tọn. Enẹwutu, Malia sọgan ko lẹndọ Jesu tin po hẹnnumẹ devo lẹ po to pipli lọ mẹ.—Matiu 27:56; Malku 15:40; Johanu 19:25.

Whenue Josẹfu po Malia po wá doayi e go dọ Jesu ma zọnhẹ yé, yé lẹkọyi Jelusalẹm po awuyiya po. Yé dín visunnu yetọn taun. To azán atọ̀ntọ gbè, yé mọ ẹn to tẹmpli mẹ. Malia dọna ẹn dọmọ: “Naegbọn hiẹ yinuwa hẹ mí dole? Yẹn po otọ́ towe po ko yí ayimajai do to dindin we pé.” Ṣigba Jesu gblọnna yé dọmọ: “Naegbọn mìwlẹ do to dindin mi pé? Be mì ma yọnẹn dọ yẹn dona tin to ohọ̀ Otọ́ ṣie tọn mẹ wẹ?”—Luku 2:45-50.

Be a lẹndọ e ma sọgbe dọ Jesu ni na gblọndo onọ̀ etọn domọ wẹ ya?— Mẹjitọ etọn lẹ yọnẹn dọ e yiwanna nado nọ basi sinsẹ̀n to owhé Jiwheyẹwhe tọn gbè. (Psalm 122:1) Enẹwutu be e ma sọgbe dọ Jesu ni lẹndọ mẹjitọ emitọn lẹ dona ko dín emi to tẹmpli mẹ whẹ́ ya?— To nukọn mẹ, Malia jẹ nulẹnpọndo nuhe Jesu dọ lẹ ji.

Nawẹ Jesu yinuwa hẹ Josẹfu po Malia po gbọn?— Biblu dọmọ: “[Jesu] sọ hodo yé bo wá Nazalẹti, bosọ to mẹmẹglọ yin hlan yé zọnmii.” (Luku 2:51, 52) Etẹwẹ mí sọgan plọn sọn apajlẹ Jesu tọn mẹ?— Mọwẹ, mílọsu dona setonuna mẹjitọ mítọn lẹ.

Ṣigba e ma bọawuna Jesu to whelẹponu nado setonu—etlẹ yin na Otọ́ olọn mẹ tọn etọn.

To ozán he jẹnukọnna okú etọn, Jesu biọ to Jehovah si eyin Ewọ sọgan diọlinlẹn gando nuhe E jlo dọ emi ni wà go. (Luku 22:42) Ṣigba Jesu setonuna Jiwheyẹwhe dile etlẹ yindọ e ma bọawuna ẹn. Biblu dọ dọ “e plọn tonusise sọn nuhe e jiya etọn lẹ mẹ.” (Heblu lẹ 5:8) Be a lẹndọ mílọsu sọgan plọn nado wàmọ ya?—