Plọnnu sọn Aliho He mẹ Jesu Pehẹ Whlepọn lẹ te Mẹ

To whenue Jesu yin bibaptizi gbọn Johanu dali godo tlolo, gbigbọ Jiwheyẹwhe tọn deanana ẹn yì danfafa Juda tọn ji. Nuhe ji e dona lẹnnupọndo lẹ ma whè. To baptẹm Jesu tọn whenu, “olọn hùndonuvo.” (Matiu 3:16) Gbọnmọ dali, e sọgan flin nuhe e ko plọn po nuhe e wà to whenue e tin to olọn mẹ lẹ po. Na nugbo tọn, e dona lẹnayihamẹpọn do nususu ji!

Jesu nọ danfafa ji na okle 40 ozán 40. To ojlẹ enẹ mẹ, e ma dù nudepope. Enẹgodo to whenue huvẹ hù Jesu taun, Satani Lẹgba wá nado tẹ́n ẹn pọ́n bo dọmọ : “Eyin hiẹ yin visunnu Jiwheyẹwhe tọn de, dọna zannu ehelẹ dọ yé ni lẹzun akla.” (Matiu 4:3) Jesu gbẹ́ nuzedonukọnnamẹ enẹ dai, na e yọnẹn dọ e ma sọgbe nado yí huhlọn azọ́njiawu tọn etọn zan nado hẹn pekọ wá na ojlo edetiti tọn lẹ wutu.

Lẹgba ma nọte do finẹ. E tẹ́n aliho devo pọ́n. E biọ to Jesu si nado lọ́n sọn aga boboe tẹmpli lọ tọn. Ṣigba, Jesu ma joawuna whlepọn lọ nado basi dohia gbangba tọn mọnkọtọn gba. Jesu yihodọ sọn Owe-Wiwe lẹ mẹ bo dohia ẹ dọ e ma sọgbe nado whlé Jiwheyẹwhe pọ́n to aliho mọnkọtọn mẹ.

Enẹgodo, to whlepọn atọ̀ntọ whenu, Lẹgba do “ahọluduta aihọn tọn lẹpo po gigo yetọn po hia” Jesu to aliho de mẹ, bo dọmọ: “Onú ehe lẹpo wẹ yẹn na na we eyin hiẹ jẹklo bo basi sinsẹ̀n hlan mi whladopo.” Whladopo dogọ, Jesu gbẹ́ po nujikudo po bo dọmọ: “Tọ́n sọn fi, Satani!” (Matiu 4:8-10) E ma joawuna whlepọn lọ nado wà nuhe ma sọgbe, na e yọnẹn dọ Jehovah kẹdẹ wẹ yè dona nọ wà sinsẹ̀nzọn wiwe hlan. Mọwẹ, e basi dide nado gbọṣi nugbonọ-yinyin mẹ na Jiwheyẹwhe.

Mí sọgan plọnnu sọn whlepọn ehelẹ mẹ, podọ sọn lehe Jesu pehẹ yé do mẹ. Whlepọn jọ whlepọn lẹ wẹ Jesu pehẹ, ehe dohia dọ Lẹgba ma yin linlẹn ylankan de poun dile mẹdelẹ nọ dọ do gba. Omẹ nujọnu tọn de wẹ, yèdọ mayinukundomọ de. Nujijọ ehelẹ sọ dohia ga dọ gandudu aihọn tọn lẹ yin nutindo Lẹgba tọn nugbonugbo; ewọ wẹ nọ deanana yé. Eyin e ma yinmọ, be nuhe e zedonukọnna Klisti na ko yin whlepọn jọ whlepọn ya?

Humọ, Lẹgba dọ dọ ojlo emitọn wẹ nado suahọ Jesu eyin e basi sinsẹ̀n hlan emi whladopo, bo tlẹ jlo na na ẹn ahọluduta aihọn tọn lẹpo. Lẹgba sọgan whlé mílọsu pọ́n to aliho mọnkọtọn mẹ, vlavo gbọn dotẹnmẹ lọ nado tindo adọkun, huhlọn kavi yindidi to aihọn mẹ zizedo nukọn na mí dali. Lehe e nọ yin nuyọnẹnnu do sọ eyin mí hodo apajlẹ Jesu tọn bo gbọṣi nugbonọ-yinyin mẹ na Jiwheyẹwhe mahopọnna whlepọn depope! Ṣigba, flindọ Lẹgba yì sọn Jesu dè “kakajẹ dotẹnmẹ hundote dagbe devo whenu.” (Luku 4:13) E sọgan wà nudopolọ na mílọsu, enẹwutu mí dona tin to aṣeji.