Samalianu de Do Mẹhe Yin Kọmẹnu Nujọnu Tọn de Hia

To whenue Jesu gbẹ́ pò to fie ma dẹn do Jelusalẹm, Ju voovo lẹ wá e dè. Mẹdelẹ jlo na plọnnu sọn e dè podọ mẹdevo lẹ jlo na whlé e pọ́n. Dopo to yé mẹ he yọ́n Osẹ́n lọ ganji, kanse e dọmọ: “Mẹplọntọ, etẹwẹ yẹn dona wà nado dugu ogbẹ̀ madopodo tọn?”—Luku 10:25.

Jesu doayi e go dọ dawe lọ ma to nudọnamẹ dín poun gba. E sọgan ko to tintẹnpọn nado sisẹ́ Jesu nado gblọn nuhe na hẹn homẹgble Ju lẹ. Jesu mọdọ dawe ehe ko tindo pọndohlan tangan de. Enẹwutu, e yí nuyọnẹn do na gblọndo de he whàn dawe lọ nado dọ nuhe lẹn e te tọ́n.

Jesu kanse dọmọ: “Etẹwẹ yin kinkandai to Osẹ́n lọ mẹ? Etẹwẹ hiẹ hia?” Dawe ehe ko plọn Osẹ́n Jiwheyẹwhe tọn, enẹwutu e na gblọndo sọgbe hẹ nuhe yin kinkandai to e mẹ. E yihodọ sọn Deutelonomi 6:5 po Levitiku 19:18 po mẹ bo dọmọ: “‘Hiẹ dona yí ahun towe lẹpo, alindọn towe lẹpo, huhlọn towe lẹpo, podọ ayiha towe lẹpo do yiwanna Jehovah Jiwheyẹwhe towe’ podọ ‘na kọmẹnu towe di dewe.’” (Luku 10:26, 27) Be gblọndo lọ niyẹn ya?

Jesu dọna dawe lọ dọmọ: “Hiẹ gblọn ganji; ‘nọ to ehe wà, hiẹ nasọ mọ ogbẹ̀.’” Ṣigba, be enẹ doalọtena hodọdopọ lọ wẹ ya? Dawe lọ ma to gblọndo he sọgbe de dín poun; e jlo “[na] do ede hia di dodonọ,” podọ e jlo dọ Jesu ni yigbe dọ pọndohlan emitọn sọgbe bo gbọnmọ dali suwhẹna lehe e nọ yinuwa hẹ mẹdevo lẹ do. Enẹwutu, e kanse dọmọ: “Mẹnu wẹ kọmẹnu ṣie taun?” (Luku 10:28, 29) Kanbiọ enẹ taidi nuhe bọawu, ṣigba e tindo zẹẹmẹ he siso taun. Gbọnna?

Ju lẹ yise dọ hogbe lọ “kọmẹnu” dlẹnalọdo mẹhe nọ hodo aṣa Juvi lẹ tọn lẹ kẹdẹ, podọ e taidi dọ Levitiku 19:18 nọgodona linlẹn enẹ. Na nugbo tọn, Ju lẹ sọgan sọalọakọ́n dọ “e ma sọgbe hẹ osẹ́n” nado kọnawudopọ hẹ mẹhe ma yin Ju de. (Owalọ lẹ 10:28) Enẹwutu, dawe ehe podọ vlavo delẹ to devi Jesu tọn lẹ mẹ lọsu nọ pọ́n yede di dodonọ eyin yé yinuwa hẹ Ju hatọ lẹ po homẹdagbe po. Ṣigba, yé sọgan nọma do homẹdagbe hia mẹhe ma yin Ju de; na ewọ ma yin “kọmẹnu” nujọnu tọn de wutu.

Nawẹ Jesu sọgan jla pọndohlan ehe do bo ma hẹn homẹgble dawe lọ po Ju he pò lẹ po gbọn? E wàmọ gbọn otàn de pìnpìn dali dọmọ: “Dawe de jẹte sọn Jelusalẹm jei Jẹliko bo jẹ alọ jaguda lẹ tọn mẹ, bọ yé yí onú lẹpo sọn e si bo linú in, bosọ yì, bo jo e do kúdaa-gbẹ̀daa.” Jesu zindonukọn dọmọ: “Todin, gbọn kosọ dali, yẹwhenọ de to tejẹ gbọn aliho enẹ ji, ṣigba to whenue e mọ ẹn, e gbọn awà awetọ ji yì. Mọdopolọ, Levinu de, to whenue e jẹte wá finẹ bo mọ ẹn, e gbọn awà awetọ ji yì. Ṣigba, Samalianu de he to gbejizọnlinzin gbọn aliho lọ ji dọnsẹpọ ẹ, podọ to whenue e mọ ẹn, lẹblanu whàn ẹn.”—Luku 10:30-33.

Dawe he Jesu to otàn ehe pìn na lọ yọnẹn ganji dọ yẹwhenọ po mẹhe nọ gọalọna Levinu lẹ to tẹmpli mẹ lẹ po susu nọ nọ̀ Jẹliko. Nado lẹkọ sọn tẹmpli mẹ, yé dona zingbejizọnlin na nudi kilomẹtlu 23. Owù nọ tin to ali enẹ ji, na jaguda lẹ nọ tọ̀pọwu do ali lọ ji wutu. Eyin yẹwhenọ po Levinu de po mọ Ju hatọ de to nuhahun mẹ, be yé ma dona gọalọna ẹn ya? To otàn lọ mẹ, Jesu dọ dọ yé ma wàmọ. Ṣigba, Samalianu de wẹ gọalọna ẹn, yèdọ dawe de sọn mẹhe Ju lẹ gbẹwanna lẹ mẹ.—Johanu 8:48.

Nawẹ Samalianu lọ gọalọna Ju he gbleawu lọ gbọn? Jesu zindonukọn dọmọ: “E dọnsẹpọ ẹ bo kọ̀n amì po ovẹn po do apà etọn lẹ mẹ bosọ blá yé. Enẹgodo, e ze e do kanlin edetiti tọn ji bo hẹn ẹn wá hotẹli pẹvi de bosọ penukundo e go. Podọ to aihọngbè, e de denali awe tọ́n bo ze na nukunpedonugotọ hotẹli pẹvi lọ tọn, bo dọmọ, ‘Penukundo ewọ go, nudepope he hiẹ sọ zan gbọnvona ehe, yẹn na suahọ etọn we to whenue yẹn na lẹkọ wáfi.’”—Luku 10:34, 35.

To whenue Mẹplọntọ Daho lọ, Jesu, ko pìn otàn lọ godo, e kàn kanbiọ mẹhẹnlẹnnupọn tọn ehe sè dọmọ: “Mẹnu to omẹ atọ̀n ehelẹ mẹ wẹ hiẹ mọdọ e do ede hia di kọmẹnu na dawe lọ he jẹ alọ jaguda lẹ tọn mẹ?” Vlavo homẹ dawe lọ tọn ma hùn nado dọ dọ “Samalianu lọ” wẹ, enẹwutu e gbọ bo gblọn dọmọ: “Mẹhe do lẹblanu hia ẹ.” Enẹgodo, Jesu hẹn nuplọnmẹ otàn etọn tọn họnwun bo dotuhomẹna ẹn dọmọ: “Yì bo nọ wà onú dopolọ.”—Luku 10:36, 37.

Aliho mẹpinplọn tọn dagbe nankọ die! Eyin Jesu ko dọna dawe lọ poun dọ mẹhe ma yin Ju lẹ lọsu yin kọmẹnu etọn lẹ wẹ, be dawe lọ po Ju he pò bo to todoai lẹ po na kẹalọyi enẹ ya? E na vẹawu. Ṣigba, na otàn he bọawu bosọ bẹ nudọnamẹ he todoaitọ etọn lẹ jẹakọ hẹ lẹ hẹn wẹ e pìn wutu, gblọndo na kanbiọ lọ “Mẹnu wẹ kọmẹnu ṣie taun?” wá họnwun na mẹlẹpo. Mẹhe do ede hia nado yin kọmẹnu nujọnu tọn wẹ mẹde he nọ do owanyi po homẹdagbe po hia dile Owe-wiwe lẹ degbena mí nado nọ wà do.