Lizọnyizọn Jesu Tọn to Pelea

Jesu to gbẹtọ lẹ plọn bo to azọ̀nhẹngbọna yé to Jude po Jelusalẹm po. Enẹgodo, e dasá Tọ̀sisa Jọdani nado plọnmẹ sọn tòdaho de mẹ jẹ devo mẹ to agbegbe Pelea tọn ji. Ṣigba, to madẹnmẹ e na lẹkọyi Jelusalẹm.

To whenue Jesu to Pelea, dawe de kanse e dọmọ: “Oklunọ, be omẹ vude wẹ na yin whinwhlẹngán ya?” Dawe lọ sọgan ko yọ́n nudindọn he tin to nukọntọ sinsẹ̀n tọn lẹ ṣẹnṣẹn vlavo eyin mẹsusu wẹ na yin whinwhlẹngán kavi omẹ vude. Jesu lilẹ́ ayidonugo sọn omẹ nẹmu he na yin whinwhlẹngán ji wá nuhe dona yin wiwà nado sọgan yin whinwhlẹngán ji. E dọmọ: “Mì vánkan vẹkuvẹku nado gbọn ohọ̀n bibó lọ nù biọ e mẹ.” Na nugbo tọn, ehe nọ biọ dọ yè ni dovivẹnu bosọ hoavùn sinsinyẹn. Etẹwutu? Jesu basi zẹẹmẹ dọmọ: “Mẹsusu wẹ na dín nado biọ e mẹ ṣigba bo ma na penugo.”—Luku 13:23, 24.

Nado zinnudo nuhudo lọ nado dovivẹnu vẹkuvẹku ji, Jesu dọmọ: “To whenue whétọ lọ na ko fọ́n bo sú ohọ̀n lọ, mìwlẹ nasọ ṣite to gbonu bo jẹ họ̀nhúhú ji, bosọ to didọmọ, ‘Oklunọ, hùnhọ̀n na mí.’ . . . Ṣigba, e na gblọn bo dọna mì dọ, ‘Yẹn ma yọ́n fie mì wá sọn. Mì tọ́n sọn dè e, mìmẹpo he nọ wazọ́n mawadodo tọn lẹ!’”—Luku 13:25-27.

Ehe do adán he na gbò mẹhe gbọwhenu do wá de hia—vlavo to ojlẹ he bọawuna ẹn mẹ—bo wá mọdọ ohọ̀n lọ ko yin súsú bọ ogàn to e ji. E dona ko wá jẹnukọn, eyin enẹ ma tlẹ bọawuna ẹn. Mọdopolọ wẹ e yin na mẹsusu he dona ko mọaleyi sọn nuhe Jesu to pinplọn yé to whenue e to finẹ lọ mẹ. Yé gboawupo nado yí dotẹnmẹ hundote lọ zan nado ze sinsẹ̀n-bibasi nugbo do otẹn tintan mẹ to gbẹzan yetọn mẹ. Suhugan mẹhe Jesu yin didohlan lẹ tọn ma kẹalọyi awuwledainanu Jiwheyẹwhe tọn na whlẹngán. Jesu dọ dọ yé “na viavi bo dù adúkúnkún” to whenue yé na yin dindlan do gbonu. Etomọṣo, gbẹtọ lẹ na wá “sọn whèzẹtẹn-waji po whèyihọ-waji po, podọ sọn agewaji po hùwaji po, bo na jagla to tafo kọ̀n to Ahọluduta Jiwheyẹwhe tọn mẹ.”—Luku 13:28, 29.

Jesu basi zẹẹmẹ dọmọ: “Delẹ to mẹhe yin godotọ lẹ mẹ [taidi mẹhe ma yin Ju lẹ po Ju he yè gbidikọna lẹ po] na lẹzun tintan, podọ delẹ to mẹhe yin tintan lẹ mẹ [nukọntọ sinsẹ̀n tọn lẹ he nọ yigo dọ emi yin kúnkan Ablaham tọn lẹ] na lẹzun godotọ.” (Luku 13:30) Yé na lẹzun “godotọ” to linlẹn lọ mẹ dọ pinpẹn-nutọn-mayọnẹntọ mọnkọtọn lẹ ma na biọ Ahọluduta Jiwheyẹwhe tọn mẹ paali.

Todin, Falesi delẹ wá Jesu dè bo na ẹn ayinamẹ dọmọ: “Tọ́n bo yì sọn fi, na Hẹlọdi [Antipa] jlo na hù we.” Vlavo Ahọlu Hẹlọdi lọsu wẹ jẹ hodidọ enẹ hẹn gbàpe ji, na e jlo dọ Jesu ni họ̀n sọn agbegbe etọn ji wutu. Hẹlọdi sọgan to budi dọ to aliho de mẹ emi sọgan wá tindo mahẹ to yẹwhegán devo hùhù mẹ, dile e doalọ to okú Johanu Baptizitọ lọ tọn mẹ do. Ṣigba, Jesu dọna Falesi lẹ dọmọ: “Mì yì bo dọna owọ̀ enẹ dọ, ‘Pọ́n! yẹn to aovi lẹ yàn jẹgbonu bo to azọ̀nhẹngbọnamẹ to egbé po osọ he ja po, podọ yẹn na dotana to azán atọ̀n gbè.’” (Luku 13:31, 32) To whenue Jesu ylọ Hẹlọdi dọ “owọ̀” de, e sọgan ko to alọdlẹndo aliho he mẹ owọ̀ lẹ nọ doyẹklọ kanlin devo lẹ te. Ṣigba, Jesu ma na yin yẹdoklọ kavi nọ whlẹndo ji na nuyiwa Hẹlọdi kavi mẹdevo depope tọn wutu. E na hẹn azọ́ndenamẹ he Otọ́ etọn de na ẹn di, sọgbe hẹ tito Jiwheyẹwhe tọn, e ma yin sọgbe hẹ gbẹtọ tọn.

Jesu zindonukọn to gbejizọnlin etọn mẹ dedo Jelusalẹm, na dile e dọ do “e ma jẹ dọ yẹwhegán de ni yin hùhù to gbonu Jelusalẹm tọn.” (Luku 13:33) Dọdai Biblu tọn depope ma dọ dọ Mẹsia lọ dona kú to tòdaho enẹ mẹ, enẹwutu, naegbọn Jesu do dọ dọ emi na yin hùhù to finẹ? Na Jelusalẹm wẹ yin tatọ́-tònọ otò lọ tọn, yèdọ fie hagbẹ 71 Whẹdatẹn Daho Ju lẹ tọn tin te, podọ fie mẹhe yin whẹsadokọna dọ yé yin yẹwhegán lalo lẹ nọ yin whẹdana te. Humọ, finẹ wẹ avọ́sinsan kanlin lẹ tọn nọ yin bibasi te. Enẹwutu, Jesu mọdọ e ma na sọgbe dọ emi ni yin hùhù to fidevo depope.

Jesu dawhá po awubla po dọmọ: “Jelusalẹm, Jelusalẹm E, hiẹ he nọ hù yẹwhegán lẹ bo nọ dlan zannu do mẹhe yin didohlan we lẹ—whla nẹmu wẹ yẹn ko jlo nado bẹ ovi towe lẹ pli kẹdẹdile koklosi de nọ bẹ ovi etọn lẹ pli do awà etọn lẹ glọ do, ṣigba mìwlẹ ma jlo domọ! Mì pọ́n! Owhé mìtọn ko yin jijodai na mì.” (Luku 13:34, 35) Visunnu Jiwheyẹwhe tọn wẹ akọta lọ to gbigbẹdai, podọ e na jiya kọdetọn etọn lẹ tọn!

Whẹpo Jesu nado jẹ Jelusalẹm, dopo to ogán Falesi lẹ tọn de mẹ basi oylọna ẹn wá owhé etọn gbè to Gbọjẹzangbe nado dùnú hẹ ẹ. Mẹhe yin oylọ-basina wá owhé lọ gbè lẹ to ṣiṣọ́ Jesu sinsinyẹn nado pọ́n nuhe e na wà na dawe de he to jijizọ̀n jẹ bo wá finẹ (yèdọ azọ̀n de he nọ zọ́n bọ osin nọ hlá do afọ po afọpapa lẹ po mẹ). Jesu kanse Falesi lẹ po mẹhe yọ́n Osẹ́n lọ ganji lẹ po dọmọ: “Be e sọgbe hẹ osẹ́n nado hẹnazọ̀ngbọ to Gbọjẹzangbe ya kavi lala?”—Luku 14:3.

Mẹdepope ma kẹnù. Jesu hẹnazọ̀ngbọna dawe lọ bo kanse yé to enẹgodo dọmọ: “Mẹnu to mì mẹ wẹ visunnu etọn kavi oyìnsú etọn na flẹ jẹ dotọ̀ de mẹ bọ e ma na de e tọ́n to afọdopolọji to Gbọjẹzangbe?” (Luku 14:5) Whladopo dogọ, mẹdepope ma gblọn nude gando aliho mẹhẹnlẹnnupọn tọn he sọgbe etọn go.