Luku 2:14—‘Jijọho to Gbẹtọ He Mẹ Ewọ Yin Homẹhunnọ te lẹ Ṣẹnṣẹn’

“Gigo to oji aga hlan Jiwheyẹwhe, podọ jijọho hlan mẹhe tindo ojlo dagbe to aigba ji lẹ.”—Luku 2:14, Lẹdogbedevomẹ Aihọn Yọyọ Tọn.

“Gigo hlan Jiwheyẹwhe to olọn aga, podọ jijọho to gbẹtọ mẹhe mẹ ewọ yin homẹhunnọ te lẹ ṣẹnṣẹn.”—Luku 2:14, Biblu Wiwe lọ—Gun Alada.

Zẹẹmẹ Luku 2:14 Tọn

Hogbe pipà tọn ehelẹ, he yin didọ gbọn angẹli lẹ dali to whenue Jesu yin jiji, dohia dọ mẹhe tindo yise to Jesu mẹ lẹ gán duvivi nukundagbe Jiwheyẹwhe tọn po jijọho po tọn.

“Gigo to oji aga hlan Jiwheyẹwhe.” Gbọn hogbe ehelẹ yiyizan dali, angẹli lẹ to nùzindeji dọ Jiwheyẹwhe wẹ jẹ nado mọ gigo lẹpo yí. Na nugbo tọn, hogbe lọ lẹ sọ dohia dọ jiji Jesu tọn po lizọnyizọn aigba ji tọn etọn po na yidogọna gigo Jehovaha Jiwheyẹwhe tọn tlala. Di apajlẹ, Jesu nọ saba na gigo Jiwheyẹwhe na nuhe e plọnmẹ lẹ, taidi whenue e dọ dọ: “Nuhe yẹn to pinplọnmẹ ma yin ṣie gba, ṣigba mẹhe do mi hlan tọn wẹ.” (Johanu 7:16-18) Eyin Jesu wà azọ́njiawu lẹ, mẹhe to finẹ lẹ nọ saba “jẹ gigopana Jiwheyẹwhe ji.” (Luku 5:18, 24-26; Johanu 5:19) Okú Jesu tọn lọsu tlẹ yidogọna gigo Jiwheyẹwhe tọn. E hùn dotẹnmẹ dote na Jiwheyẹwhe nado hẹn lẹndai daho hugan etọn di, ehe yindọ gbẹtọvi dodonọ he sọ yiwanna jijọho lẹ ni gọ́ aigba ji.—Jenẹsisi 1:28.

“Jijọho . . . to aigba ji.” Jijọho ehe bẹ nususu hẹn hugan dọ awhàn ma na tin ba. E sọ nọ dlẹnalọdo jijọho kavi vivomẹninọ ahun mẹ tọn he mẹde ma gán do adavo e tindo nukundagbe Jehovah tọn whẹ́. Mí dopẹ́ dọ gbọn Jesu gblamẹ, gbẹtọvi lẹ gán tindo haṣinṣan jijọho tọn enẹ hẹ Jiwheyẹwhe. (Jakọbu 4:8) Podọ taidi Ahọlu Ahọluduta Jiwheyẹwhe tọn, Jesu na hẹn jijọho mlẹnmlẹn he na dẹn-to-aimẹ de gọwá aigba blebu ji.—Salmu lẹ 37:11; Luku 1:32, 33.

“Mẹhe tindo ojlo dagbe . . . lẹ.” Hogbe ehelẹ to alọdlẹndo gbẹtọvi he tindo ojlo dagbe kavi nukundagbe Jiwheyẹwhe tọn lẹ, na yé tindo yise nujọnu tọn to ewọ mẹ podọ to mẹhe e dohlan lọ, yèdọ Jesu mẹ. Yé ma to alọdlẹndo ojlo dagbe he Jiwheyẹwhe nọ dohia gbẹtọvi lẹpo, mahopọnna pọndohlan po walọyizan yetọn lẹ po, mọjanwẹ yé masọ to alọdlẹndo ojlo dagbe he gbẹtọvi lẹ gán dohia do niyẹn. Lẹdogbedevomẹ Biblu tọn delẹ taidi Biblu Wiwe lọ—Gun Alada, lilẹ́ hogbe enẹlẹ do ‘gbẹtọ he mẹ ewọ yin homẹhunnọ te lẹ.’ Amọ́, alọnuwe dowhenu tọn susu devo he go yè sọgan dejido lẹ nọgodona aliho he mẹ linlẹn lọ jijọho to mẹhe Jiwheyẹwhe kẹalọyi lẹ ṣẹnṣẹn yin lilẹ́ do to Lẹdogbedevomẹ Aihọn Yọyọ Tọn po lẹdogbedevomẹ egbezangbe tọn devo lẹ po mẹ.—Pọ́n “Luku 2:14 to Lẹdogbedevomẹ Devo lẹ Mẹ.”

Nujijọ He Lẹdo Luku 2:14 Lẹ

Luku weta 2 dọhodo nuhe jọ to bẹjẹeji gbẹzan aigba ji tọn Jesu tọn taidi gbẹtọvi de mẹ lẹ ji. Ojlẹ vude to jiji etọn godo, angẹli de sọawuhia lẹngbọhọtọ he “to gbonu bo to lẹngbọpa yetọn lẹ họ́ to zánmẹ” lẹ.b (Luku 2:4-8) Angẹli lọ lá “wẹndagbe . . . gando ayajẹ daho de . . . go,” bo dọna lẹngbọhotọ lọ lẹ dọmọ: “Mẹwhlẹngántọ de yin jiji na mì to egbé, he yin Klisti Oklunọ lọ, to tòdaho Davidi tọn mẹ.” (Luku 2:9-11) Angẹli lọ dọ fihe lẹngbọhotọ lọ lẹ na mọ viyẹyẹ lọ te na yé, enẹgodo yé mọdọ nudida gbigbọnọ susu lẹ to gigopana Jiwheyẹwhe. To whenue lẹngbọhọtọ lọ lẹ wá Bẹtlẹhẹm, yé mọ Malia po Josẹfu po gọna viyẹyẹ lọ Jesu. (Luku 2:12-16) To whenue yé ko dọ numimọ jiawu he yé tindo lọ na yé godo, lẹngbọhọtọ lọ lẹ lẹkọyi lẹngbọpa yetọn lẹ kọ̀n, “bo to gigopana Jiwheyẹwhe bosọ to pipà ẹ na nuhe yé ko sè bo mọ lẹpo.”—Luku 2:17-20.

Luku 2:14 to Lẹdogbedevomẹ Devo lẹ Mẹ

“Gigo na Jiwheyẹwhe to olọn mẹ, jijọho ni tin to aigba ji na gbẹtọ he sin onú yọ́n to nukun Jiwheyẹwhe tọn mẹ lẹ.”—Luku 2:14, Mawuhowema Fọngbe Tọn.

“Gigo na Jiwheyẹwhe to olọn lẹ mẹ aga podọ jijọho ni tin na gbẹtọ he tindo nukundagbe etọn to aigba ji lẹ!”—Luku 2:14, La Bible de Jérusalem.

“Gigo na Jiwheyẹwhe to olọn lẹ mẹ aga! Podọ jijọho ni tin to aigba ji na gbẹtọ he ewọ yiwanna lẹ!”—Luku 2:14, Parole de Vie.

Pọ́n video kleun ehe nado mọ nue to owe Luku tọn mẹ delẹ.