KANBIỌ LẸ SỌN WEHIATỌ LẸ DÈ

Omẹ mọnkọtọn lẹ sọgan tindo ojlo sisosiso nado wá kọnawudopọ hẹ alọwlemẹ yetọn he na yin finfọnsọnku to aihọn yọyọ lọ mẹ. Asiṣiọsu de dọmọ: “E ma jlo yẹn po asi ṣie po dọ alọwle mítọn ni wá vivọnu. Mí tindo ojlo ahundopo tọn nado to Jehovah sẹ̀n to pọmẹ taidi asu po asi po kakadoi. Numọtolanmẹ he n’tindo enẹlẹ gbẹ́ pò to ote.” Be whẹwhinwhẹ́n dolido de tin nado tindo todido dọ mẹhe yin finfọnsọnku lẹ nasọ wá wlealọ ya? Do glido, mí ma sọgan dọ.

Na owhe susu lẹ, owe mítọn lẹ nọ dọ dọ hodidọ Jesu tọn gando fọnsọnku po alọwle po go na ko dlẹnalọdo fọnsọnku aigba ji tọn, podọ mẹhe na yin finfọnsọnku to aihọn yọyọ lọ mẹ lẹ ma na wlealọ.a (Mat. 22:29, 30; Malku 12:24, 25; Luku 20:34-36) Ṣigba, be e yọnbasi dọ fọnsọnku olọn mẹ tọn hodọ wẹ Jesu te ya? Dile etlẹ yindọ mí ma sọgan tẹdo pọndohlan dopo go to whẹho ehe mẹ, mì gbọ mí ni gbadopọnna nuhe Jesu dọ.

Lẹnnupọndo lẹdo hodidọ lọ tọn ji. (Hia Luku 20:27-33.) Na Sadusi lẹ ma yise to fọnsọnku mẹ wutu, yé jlo na tẹ́n Jesu pọ́n po kanbiọ de po he gando fọnsọnku po yọnnu sínsọ́n po go.b Jesu gblọn dọmọ: “Ovi titonu ehe tọn lẹ wẹ nọ wlealọ bo nọ yin nina to alọwle mẹ, ṣigba mẹhe ko yin mimọ nado jẹna titonu he ja podọ na fọnsọnku oṣiọ lẹ tọn ma na wlealọ kavi yin nina to alọwle mẹ. Na nugbo tọn, mọjanwẹ yé masọ sọgan kú ba, na yé taidi angẹli lẹ, podọ na yé na yin finfọnsọnku wutu, yé na yin ovi Jiwheyẹwhe tọn lẹ.”—Luku 20:34-36.

Naegbọn mí do dọ wayi to owe mítọn lẹ mẹ dọ fọnsọnku aigba ji tọn hodọ wẹ Jesu na ko te? Whẹwhinwhẹ́n awe wutu wẹ zọ́n bọ mí do wá tadona enẹ kọ̀n. Tintan, fọnsọnku aigba ji tọn wẹ Sadusi lẹ na ko tindo to ayiha mẹ podọ Jesu na ko na yé gblọndo sọgbe hẹ linlẹn yetọn. Awetọ, nado dotana gblọndo etọn, Jesu donù Ablaham, Isaki po Jakọbu po go, yèdọ tọgbo nugbonọ he na yin finfọnsọnku do aigba ji lẹ.—Luku 20:37, 38.

Ṣigba, e taidi dọ fọnsọnku olọn mẹ tọn wẹ Jesu na ko tindo to ayiha mẹ. Whẹwhinwhẹ́n tẹ wutu wẹ mí sọgan wá tadona enẹ kọ̀n? Mì gbọ mí ni gbadopọnna hodidọ Jesu tọn titengbe awe to gblọndo he e na Sadusi lẹ mẹ.

“Mẹhe ko yin mimọ nado jẹna . . . fọnsọnku oṣiọ lẹ tọn.” Mẹyiamisisadode nugbonọ lẹ “jẹ nado mọ ahọluduta Jiwheyẹwhe tọn yí.” (2 Tẹs. 1:5, 11) Yé ko yin lilá di dodonọ na ogbẹ̀ to dodonu ofligọ lọ tọn ji; gbọnmọ dali, yé ma nọ kú taidi ylandonọ he yin whẹgbledo lẹ. (Lom. 5:1, 18; 8:1) Yé yin yiylọdọ “ayajẹnọ podọ wiwe” bosọ yin pinpọnhlan taidi mẹhe jẹna fọnsọnku olọn mẹ tọn. (Osọ. 20:5, 6) To vogbingbọn mẹ, “mawadodonọ lẹ” tin to mẹhe na yin finfọnsọnku do aigba ji lẹ mẹ. (Owalọ 24:15) Be mí sọgan dọ dọ yé “yin mimọ nado jẹna” fọnsọnku ya?

“Mọjanwẹ yé masọ sọgan kú ba.” Jesu ma dọ dọ: “Yé ma na kú ba.” Kakatimọ, e dọmọ: “Mọjanwẹ yé masọ sọgan kú ba.” Lẹdogbedevomẹ delẹ lilẹ́ hodidọ enẹ do “yé ma sọgan kú gbede ba” kavi “okú masọ tindo huhlọn do yé ji ba.” Mẹyiamisisadode he dotana gbẹzan aigba ji tọn yetọn po nugbonọ-yinyin po lẹ nọ yin finfọnsọnku do olọn mẹ bo nọ mọ ogbẹ̀ jọmaku yí, yèdọ ogbẹ̀ madopodo he ma sọgan yin vivasudo pọ́n gbede. (1 Kọl. 15:53, 54) Okú masọ nọ tindo huhlọn depope do mẹhe yin finfọnsọnku do olọn mẹ lẹ ji ba.c

Po nuhe mí dọ kakajẹ din lẹ po, tadona tẹ kọ̀n wẹ mí sọgan wá? E yọnbasi dọ fọnsọnku olọn mẹ tọn hodọ wẹ Jesu te to whenue e donù alọwle po fọnsọnku po go to gblọndo etọn mẹ. Eyin mọ wẹ, be hodidọ etọn lẹ do nususu hia mí gando mẹhe nọ yin finfọnsọnku do olọn mẹ lẹ go: Yé ma nọ wlealọ, yé ma sọgan kú, podọ to linlẹn de mẹ yé taidi angẹli lẹ, yèdọ nudida gbigbọnọ he nọ nọ̀ olọn mẹ lẹ. Etomọṣo, tadona enẹ he kọ̀n mí wá fọ́n kanbiọ susu dote.

Tintan, naegbọn Jesu donù fọnsọnku olọn mẹ tọn go to whenue e to gblọndo na Sadusi lẹ he na ko tindo fọnsọnku aigba ji tọn to ayiha mẹ? E ma yin whelẹponu wẹ Jesu nọ na gblọndo nukundiọsọmẹtọ etọn lẹ sọgbe hẹ nuhe yé tindo to ayiha mẹ. Di apajlẹ, e dọna Ju he biọ ohia de sọn e dè lẹ dọmọ: “Mì họ́ tẹmpli ehe liai, yẹn nasọ jlọ ẹ dote to azán atọ̀n gblamẹ.” Jesu na ko yọnẹn ganji dọ tẹmpli lọ gbigbá wẹ yé tindo to ayiha mẹ, “ṣigba, tẹmpli agbasa etọn tọn hodọ wẹ e te.” (Joh. 2:18-21) Vlavo Jesu mọdọ emi ma tin to dandannu glọ nado na gblọndo Sadusi yẹnuwatọ enẹlẹ, he ma yise dọ fọnsọnku kavi angẹli lẹ tin. (Howh. 23:9; Mat. 7:6; Owalọ 23:8) Ṣigba, e sọgan ko jlo nado do nugbo lọ hia gando fọnsọnku olọn mẹ tọn go na ale devi etọn lẹ tọn, mẹhe na wá pegan nado mọ fọnsọnku mọnkọtọn yí.

Awetọ, naegbọn Jesu do dotana gblọndo etọn gbọn alọdindlẹndo Ablaham, Isaki, po Jakọbu po dali, yèdọ mẹhe na yin finfọnsọnku do aigba ji lẹ? (Hia Matiu 22:31, 32.) Doayi e go dọ whẹpo Jesu do donù tọgbo enẹlẹ go e dọmọ: “Gando fọnsọnku oṣiọ lẹ tọn go.” E yọnbasi dọ hodidọ kleun enẹ lilẹ́ ayidonugo sọn nujidọhodo lọ ji yì nudevo ji. Enẹgodo, Jesu yí hodọ sọn kandai Mose tọn he Sadusi lẹ nọ dọ dọ emi kẹalọyi lẹ mẹ, bo yí ohó he Jehovah dọna Mose to wùnkan he to jiji lọ kọ̀n zan nado na kunnudenu devo dọ fọnsọnku lọ, yèdọ fọnsọnku aigba ji tọn yin lẹndai dejidego Jiwheyẹwhe tọn de.—Eks. 3:1-6.

Atọ̀ntọ, eyin hodidọ Jesu tọn he gando fọnsọnku po alọwle po go dlẹnalọdo fọnsọnku olọn mẹ tọn, be enẹ zẹẹmẹdo dọ mẹhe na yin finfọnsọnku do aigba ji lẹ sọgan wlealọ wẹ ya? Ohó Jiwheyẹwhe tọn ma na gblọndo tlọlọ de na kanbiọ dagbe enẹ. Eyin fọnsọnku olọn mẹ tọn hodọ wẹ Jesu te nugbonugbo, be hodidọ etọn lẹ ma dohia dọ mẹhe na yin finfọnsọnku do aigba ji lẹ na wlealọ kavi lala to aihọn yọyọ lọ mẹ.

Ṣigba todin whẹ́, mí yọnẹn dọ Ohó Jiwheyẹwhe tọn dọ madoadúdẹji dọ okú wẹ nọ hẹn alọwle wá opodo. Enẹwutu, asiṣiọsu kavi asuṣiọsi de ma dona nọ gblewhẹdo ede eyin e basi dide nado vọ́ alọwle. Nudide mẹdetiti tọn wẹ, podọ mẹde ma dona nọ mọhodọ gando omẹ mọnkọtọn lẹ he jlo nado duvivi gbẹdido alọwlemẹ de tọn go.—Lom. 7:2, 3; 1 Kọl. 7:39.

Na nugbo tọn, mí sọgan tindo kanbiọ susu lẹ gando gbẹninọ to aihọn yọyọ lọ mẹ go. Etomọṣo, kakati nado pàhodọ gando gblọndo kanbiọ enẹlẹ tọn go, mí dona whesọ bo mọ lehe onú lẹ na wá yì do. Ṣigba, mí sọgan deji gando nugbo ehe go: Gbẹtọvi tonusetọ lẹ na tindo ayajẹ, na Jehovah na hẹn pekọ wá na ojlo po nuhudo yetọn lẹpo po to aliho dagbe hugan mẹ.—Ps. 145:16.