“Mì Nọ Họ́ali”—Naegbọn E Do Yin Nujọnu Sọmọ?

“ETẸWẸ na yin ohia tintin tofi towe tọn po vivọnu titonu lọ tọn po?” (Mat. 24:3) To gblọndo kanbiọ enẹ tọn nina whenu, Jesu na ohia de devi etọn lẹ, yèdọ ohia he họnwun, yin zẹẹmẹ basina to gigọ́ mẹ, bọawu nado yin yinyọnẹn bo masọ pé awe, dile e yin kinkandai to Matiu weta 24, Malku weta 13, po Luku weta 21 po mẹ do. E sọ yidogọ dọmọ: “Mì nọ họ́ali.”—Mat. 24:42.

Eyin ohia lọ na họnwun sọmọ, naegbọn e sọ yí tudohomẹnamẹ enẹ dogọ? Lẹnnupọndo onú awe ehelẹ ji. Tintan, ayihafẹsẹnamẹnu lẹ sọgan hẹn mẹdelẹ nado yí nukunpẹvi do pọ́n ohia lọ bo gbọnmọ dali hẹn gbigbọnọ-yinyin po aṣejininọ yetọn po bu. Awetọ, Klistiani de sọgan doayi adà vonọtaun ohia lọ tọn delẹ go, ṣigba na lẹdo he mẹ e te wutu, e sọgan mọdọ e ma gando emi go tlọlọ. Enẹwutu, ewọ sọgan lẹndọ “nukunbibia daho” lọ, yèdọ nujijọ he na gbọngodo to dọdai Jesu tọn mẹ gbẹsọ pò to nukọn taun, podọ e ma ko yin dandan nado “nọ họ́ali” todin.—Mat. 24:21.

“Yé Ma Doayi E Go”

Jesu flinnu hodotọ etọn lẹ gando mẹhe nọgbẹ̀ to azán Noa tọn gbè lẹ go. Yé na ko yọnẹn dọ Noa to yẹwhehodọ, to aki blibata lọ gbá, podọ ylanwiwa sù to azán yetọn gbè. Ṣigba, suhugan yetọn “ma doayi e go.” (Mat. 24:37-39) Pọndohlan dopolọ wẹ mẹsusu tindo to egbé gando avase lẹ go. Di apajlẹ, mẹsusu nọ yí nukunpẹvi do pọ́n ohia aliji tọn he nọ do dogbó wezunhinhọ̀n tọn hia lẹ. Aṣẹpatọ lẹ nọ saba tin to dandannu glọ nado basi opó kleunkleun lẹ do ali daho lẹ ji na kẹkẹ-kùntọ kavi húnkùntọ lẹ nido de wezun pò. Mọdopolọ, Klistiani de sọgan tunwun ohia azán godo tọn lẹ tọn, ṣigba bo gbẹ́ hẹn alọnu ede tọn ján to nuwiwa he na fẹayihasẹna ẹn lẹ mẹ. Nuhe jọ do Arielle, viyọnnu jọja de he nọ nọ̀ Whèyihọ-waji Aflika tọn go niyẹn.

Arielle yiwanna bọlu alọ tọn he yọnnu lẹ nọ hò pinpọn to televiziọn ji. To whenue bọlu-hogbẹ́ de yin didoai to wehọ etọn mẹ, ojlo lọ nado hò bọlu zọ́n bọ e ma lẹnnupọndo owù he nudide etọn sọgan hẹnwa gbigbọnọ-yinyin etọn ji. E doalọwemẹ nado yin bọlu-wletọ. Etẹwẹ jọ bọdego? E dọmọ: “Delẹ to bọlu-hotọgbẹ́ ṣie lẹ mẹ tindo họntọn sunnu lẹ he nọ zan amasin adínọ bosọ nọ nù siga. Yé nọ ṣàn mi kò na n’gbọnvo wutu, ṣigba n’lẹndọ n’sọgan doakọnna enẹ. To mayọnẹn mẹ, aihundida lọ lọsu jẹ bibẹpla gbigbọnọ-yinyin ṣie ji. Bọlu alọ tọn hihò ji janwẹ n’nọ to nulẹnpọn do to whepoponu. Etlẹ yin to opli Klistiani tọn lẹ ji, ayiha ṣie nọ tin to bọlu-hotẹn lọ. Ehe sọ yinuwado gbẹtọ-yinyin Klistiani tọn ṣie ji. Owanyi ṣie na bọlu-hihò wá lẹzun ojlo zogbe tintindo nado duto agbàwhinwhlẹn lẹ ji. N’nọ plọn bọlu hihò vẹkuvẹku nado hẹn pekọ wá na gbigbọ agbàwhinwhlẹn tọn ṣie. N’tindo ayimajai susu. N’tlẹ yí họntọn lẹ do sanvọ́ na bọlu lọ wutu.

“To gbèdopo, ninọmẹ lọ wá ylan pete to whenue bọlu-hogbẹ́ he mí to agbàwhlẹn hẹ mọ jlọjẹ yí nado hò bọlu lọ tlọlọ do odọ̀ mẹ na mí. N’ko wleawufo nado wle bọlu lọ, ṣigba to mayọnẹn mẹ, n’hodẹ̀ dọ Jehovah ni gọalọna mi! Nujijọ ehe hẹn mi nado mọ lehe gbigbọnọ-yinyin ṣie ko yin bibẹpla do. Nawẹ n’jla ninọmẹ lọ do gbọn?

“N’ko pọ́n DVD lọ Les jeunes s’interrogent . . . Que vais-je faire de ma vie?a Ṣigba n’de nado vọ́ ẹ pọ́n whladopo dogọ bo lẹnnupọndeji sisosiso. Ninọmẹ dopolọ mẹ wẹ n’tin te taidi André, jọja he tin to nupinpọn-do-plọnnu lọ mẹ. Na taun tọn, n’doayi nuhe mẹho agun tọn de na tuli André nado wà go—enẹ wẹ nado hia Filippinu lẹ 3:8 bo lẹnayihamẹpọn do e ji. Nuhe n’wà niyẹn bo tọ́n sọn bọlu-hogbẹ́ lọ mẹ.

“N’mọ vogbingbọn taun! Gbigbọ agbàwhinwhlẹn tọn po ayimajai ṣie po busẹ. N’mọ ayajẹ susu bosọ dọnsẹpọ họntọn ṣie Klistiani lẹ dogọ. Nuwiwa gbigbọmẹ tọn lẹ wá họakuẹ na mi taun. N’nọ dotoai ganji to opli lẹ ji bosọ jẹ vivi yetọn dù ji whladopo dogọ. N’hẹn lizọnyizọn ṣie pọnte dogọ. Todin, n’nọ doalọ to sinsẹ̀nzọn gbehosọnalitọ alọgọtọ tọn mẹ whẹwhẹ.”

Eyin ayihafẹsẹnamẹnu de zọ́n bọ a nọ yí nukunpẹvi do pọ́n ohia he Jesu na mí lọ, ze afọdide nujikudo tọn lẹ dile Arielle wà do. A sọgan tẹ́n ayinamẹ he bọdego ehelẹ pọ́n. Basi dodinnanu to Index des publications Watch Tower mẹ, ehe yin yiylọdọ yẹdide alidohiamẹ tọn yì adọkunnu he whlá lẹ kọ̀n. A na mọ alọdlẹndonu lẹ gando ayinamẹ dagbe lẹ po otàn gbẹzan tọn he do lehe mẹdevo lẹ pehẹ whlepọn lẹ do po hia go. Nọ mọaleyi to gigọ́ mẹ sọn opli Klistiani tọn lẹ mẹ gbọn awuwiwle ganji po kandai bibasi po dali. Mẹdelẹ ko mọdọ aisinsin do oján nukọn tọn lẹ ji nọ hẹn ale wá. To whenue dotẹnmẹ yin nina mẹplidopọ lẹ nado tindo mahẹ, tẹnpọn nado nọ na gblọndo to bẹjẹeji. Humọ, gbọṣi nukle to gbigbọ-liho gbọn ayidido lehe linlin agọe tọn lẹ tindo kanṣiṣa hẹ adà voovo ohia lọ tọn lẹ po nudevo he dohiagona “azán godo tọn lẹ” po do go dali.—2 Tim. 3:1-5; 2 Pita 3:3, 4; Osọ. 6:1-8.

“Mì Wleawudai”

Ohia azán godo tọn lẹ tọn to jijọ lẹdo aihọn pé, to “aigba fininọ lẹpo ji.” (Mat. 24:7, 14) Gbẹtọ livi susu lẹ to gbẹnọ to lẹdo he mẹ azọ̀nylankan, núdùdù whèdomẹ, aigba sisọsisọ po nujijọ devo he yin didọdai lẹ po to nuhẹngble te lẹ mẹ. To vogbingbọn mẹ, mẹsusu devo lẹ tindo jijọho po vivomẹninọ po jẹ obá de mẹ. Eyin hiẹ ma tlẹ tindo numimọ adà ohia lọ tọn delẹ tọn pọ́n, be enẹwutu wẹ a na wá tadona lọ kọ̀n dọ nukunbibia daho lọ ma ko sẹpọ ya? Enẹ ma na yin nuyọnẹnnu.

Di apajlẹ, lẹnnupọndo dọdai Jesu tọn gando “azọ̀nylankan lẹ po núdùdù whèdomẹ lẹ po” go ji. (Luku 21:11) Tintan, e ma dọ dọ onú enẹlẹ na jọ to filẹpo to ojlẹ dopolọ mẹ kavi to obá dopolọ mẹ gba. Kakatimọ, e dọ dọ yé na jọ “sọn fide jẹ fide.” Enẹwutu, mí ma sọgan donukun nujijọ dopolọ to filẹpo to ojlẹ dopolọ mẹ. Awetọ, ojlẹ vude to whenue Jesu donù núdùdù whèdomẹ go godo, e dohia dọ delẹ to hodotọ etọn lẹ mẹ dona tin to aṣeji ma nado nọ dùnú zẹjlẹgo bo dọmọ: “Mì payi mìde go ma nado yí dùdù zẹjlẹgo . . . do doagban pinpẹn na ahun mìtọn.” (Luku 21:34) Enẹwutu, Klistiani lẹpo ma dona donukun nado tindo numimọ adà ohia lọ tọn lẹpo tọn gba. Kakatimọ, Jesu dọmọ: “To whenue mì mọ onú ehelẹ to jijọ, mì ni yọnẹn dọ ahọluduta Jiwheyẹwhe tọn ko sẹpọ.” (Luku 21:31) Linlinnamẹnu egbezangbe tọn lẹ nọ gọalọna mí nado mọ adà ohia lọ tọn lẹpo, mahopọnna dehe mílọsu tindo numimọ etọn tlọlọ to lẹdo mítọn mẹ.

Sọ flindọ Jehovah ko de “azán . . . po gànmẹ lọ po” he ji nukunbibia daho lọ na bẹjẹeji. (Mat. 24:36) Nujijọ he to yìyì debọdo-dego to aigba ji lẹ ma na diọ azán enẹ gba.

Jesu dotuhomẹna Klistiani lẹpo dọmọ: “Mì wleawudai.” (Mat. 24:44) Mí dona nọ wleawudai to whepoponu. Nugbo wẹ dọ mí ma sọgan hẹn alọnu ján to nuwiwa yẹwhehọluduta tọn lẹ mẹ sọn afọnnu jẹ whèjai to azán lẹpo gbè. Humọ, mẹdepope ma yọ́n nuhe e na to wiwà to whenue nukunbibia daho lọ na bẹjẹeji. Mẹdelẹ sọgan to azọ́nwa to ogle mẹ kavi to whégbè. (Mat. 24:40, 41) To whelọnu lo, etẹwẹ mí sọgan wà nado wleawudai?

Emmanuel po Victorine po gọna viyọnnu ṣidopo yetọn lẹ nọ nọ̀ otò Aflika tọn de mẹ, fie yé ma tindo numimọ nujijọ he gando ohia lọ go lẹpo tọn te. Enẹwutu, yé de nado nọ dọhodo gbigbọnu lẹ ji to azán lẹpo ji, nado sọgan wleawudai. Emmanuel dọmọ: “E ma bọawu nado mọ gànmẹ he sọgbe na mẹlẹpo. To godo mẹ, mí de ogàn ṣidopo afọnnu tọn bo nọ yí nukunwhiwhe gbàn zan. To dogbigbapọnna wefọ egbesọegbesọ tọn godo, mí nọ wleawuna hukan vude to dopo to owe he mí na plọn to osẹ lọ mẹ to opli ji lẹ mẹ.” Be tito ehe gọalọna yé nado gbọṣi nukle ya? Gbau! Emmanuel yin anadenanutọ to pipli mẹho lẹ tọn mẹ to agun etọn mẹ. Victorine nọ kẹalọyi sinsẹ̀nzọn gbehosọnalitọ alọgọtọ tọn whẹwhẹ, bo ko gọalọna mẹsusu nado kẹalọyi nugbo lọ. Viyọnnu yetọn lẹpo wẹ to nukọnyi to gbigbọ-liho.

Jesu dotuhomẹna mí dọmọ: “Mì nọ họ́ali, mì nọ họ́ mìde.” (Malku 13:33) A dike ayihafẹsẹnamẹnu de ni dekanpona aṣejininọ towe to gbigbọ-liho blo. Kakatimọ, nọ na ayidonugo ayinamẹ dagbe he nọ yin nina to owe mítọn lẹ mẹ podọ to opli Klistiani tọn lẹ ji, dile Arielle wà do. Taidi whẹndo Emmanuel tọn, tẹnpọn nado nọ wà nude to azán dopodopo ji nado wleawudai podọ nado “nọ họ́ali.”

[Nudọnamẹ odò tọn]

[Yẹdide to weda 4]

Hodọdopọ egbesọegbesọ do gbigbọnu lẹ ji gọalọna Emmanuel po whẹndo etọn po nado “wleawudai”