Dẹ̀hiho to Awubla Sinsinyẹn Mẹ

Jesu dotana dẹ̀hiho po apọsteli nugbonọ etọn lẹ po. Enẹgodo, “to ohàn pipà tọn lẹ jiji godo, yé tọ́nyi Osó Olivie tọn ji.” (Malku 14:26) Yé pànta whèzẹtẹn-waji bo dedo jipa de he nọ yin yiylọdọ Gẹtsemani mẹ, yèdọ fihe Jesu ko tindo aṣa nado nọ yì.

Tlolo he yé jẹ jipa whanpẹnọ he tin to atin olivie tọn lẹ ṣẹnṣẹn ehe mẹ, Jesu jo ṣinatọ̀n to apọsteli etọn lẹ mẹ do godo. Vlavo yé gbọṣi họntonu jipa lọ tọn, na e dọna yé dọmọ: “Mì sinai tofi, na yẹn ni yì dọ́n bo hodẹ̀.” Dile Jesu plan apọsteli atọ̀n—enẹ wẹ Pita, Jakọbu, po Johanu po—e sẹyì nukọn to jipa lọ mẹ. E sọ lẹzun awublanọ tlala bo dọna yé omẹ atọ̀n lẹ dọmọ: “Yẹn to awubla tlala, yèdọ kakajẹ okú. Mì nọfi bo nọ nukle hẹ mi.”—Matiu 26:36-38.

To whenue Jesu sẹyì olá na yé vude, e “họ́jai do kọmẹ bo jẹ dẹ̀ho ji.” Etẹ ji wẹ dẹ̀hiho etọn hlan Jiwheyẹwhe sinai do to ojlẹ sinsinyẹn ehe mẹ? E hodẹ̀ dọmọ: “Otọ́, onú lẹpo wẹ yọnbasi na we; de kọfo ehe sọn dè e. Ṣogan, e ma yin nuhe yẹn jlo, ṣigba nuhe hiẹ jlo.” (Malku 14:35, 36) Etẹ dọ wẹ e te? Be ota de wẹ ewọ te sọn azọngban etọn taidi Mẹfligọtọ lọ mẹ wẹ ya? Lala!

Jesu ko mọ awufiẹsa sinsinyẹn he mẹ mẹdevo lẹ jugbọn to whenue yé yin hùhù gbọn Lomunu lẹ dali hlan sọn olọn mẹ. Todin, taidi gbẹtọvi de he tindo numọtolanmẹ sisosiso lẹ he sọ sọgan sè awuvẹ, Jesu ma ze ayiha do nuhe to tepọn ẹn ji. Ṣigba humọ, e tin to awufiẹsa mẹ na e mọdọ okú etọn taidi sẹ́nhẹngbatọ ylankan de na hẹn vlẹko wá oyín otọ́ etọn tọn ji. To gànhiho kleun de godo, e na yin zizepla do yatin de go taidi nùzantọ do Jiwheyẹwhe go.

To whenue Jesu hodẹ̀ na ojlẹ de godo, e lẹkọyi apọsteli atọ̀n lọ lẹ dè bo mọdọ yé to amlọndọ. E dọna Pita dọmọ: “Be mìwlẹ ma sọgan nọ nukle hẹ mi na gànhiho dopo poun wẹ? Mì nọ nọ̀ nukle bo nọ hodẹ̀ to whepoponu, na mì nikaa biọ whlepọn mẹ.” Jesu mọdọ apọsteli lọ lẹ lọsu ko tin to ayimajai mẹ, podọ ozán ko kú taun. E yidogọ dọmọ: “Nugbo wẹ dọ gbigbọ to jijlo taun, ṣigba agbasa yin madogánnọ.”—Matiu 26:40, 41.

Enẹgodo, Jesu vọ́ gọyì whla awetọ bo biọ dọ Jiwheyẹwhe ni de “kọfo ehe” sọn e dè. To kọlilẹ etọn whenu, e sọ mọdọ apọsteli atọ̀n lọ lẹ to amlọndọ, to ojlẹ he mẹ yé dona ko to dẹ̀ho te ma nado biọ whlepọn mẹ. To whenue Jesu dọhona yé, “yé ma yọ́n nuhe yé na gblọnna ẹn.” (Malku 14:40) Jesu sọ vọ́ gọyì whla atọ̀ntọ, bo jẹklo nado hodẹ̀.

Vlẹko he okú Jesu tọn taidi sẹ́nhẹngbatọ de na hẹnwa oyín Otọ́ etọn tọn ji to ahunmẹduna ẹn taun. Jehovah to odẹ̀ Visunnu etọn tọn sè, enẹwutu to ojlẹ de mẹ, Jiwheyẹwhe do angẹli de hlan nado hẹn ẹn lodo. Mahopọnna enẹ, Jesu ma doalọtena Otọ́ etọn vivẹ̀, ṣigba e zindonukọn “to dẹ̀hiho vẹkuvẹku mẹ.” Ayimajai lọ sinyẹn taun. Agbàn pinpẹn nankọ die to abọ́ Jesu tọn lẹ ji! Ogbẹ̀ madopodo etọn titi po gbẹtọvi he tindo yise lẹ tọn po tin to owù mẹ. Na nugbo tọn, “odẹ́n etọn sọ taidi kùnkùn ohùn tọn he to kinkọ̀n do aigba.”—Luku 22:44.

To whenue Jesu lẹkọwa apọsteli etọn lẹ dè whla atọ̀ntọ, e sọ mọdọ yé to amlọndọ. E dọmọ: “To ojlẹ taidi ehe nkọ mẹ, mìwlẹ to amlọndọ bosọ to gbigbọjẹ! Mì pọ́n! Gànhiho lọ ko sẹpọ na Visunnu gbẹtọ tọn nido yin didehia do alọ ylandonọ lẹ tọn mẹ. Mì fọ́n, bo gbọ mí ni yì. Mì pọ́n! Mẹdehiatọ ṣie ko dọnsẹpọ.”—Matiu 26:45, 46.