Gbẹtọvi lẹ Tindo Nuhudo Oyọnẹn Jiwheyẹwhe Tọn
“Hiẹ na tunwun osi Oklunọ tọn, bo nasọ mọ oyọnẹn Jiwheyẹwhe tọn.”—HOWHINWHẸN LẸ 2:5.
1. Naegbọn e do sọgan yin didọ dọ ahun gbẹtọvi tọn yin anazọ́n azọ́nyinyọnẹn tọn de he tindo anademẹ sọn olọn mẹ wá?
DIBLAYI ahun gbẹtọ 5 600 000 000 tọn wẹ to hihò to aigba ji to alọnu din. Egbesọegbesọ, ahun towe nọ hò whla 100 000 bo nọ gbọ́n ohùn lítlì 7 600 gbọn tito okàn agbasa tọn heyin kilomẹtlu 100 000 lẹ gblamẹ. Okàn agbasa tọn flinflin depope ma wazọ́n sinsinyẹn hugan alọnuzọn azọ́n yinyọnẹn tọn ehe heyin nudida olọn mẹ tọn gba.
2. Nawẹ hiẹ sọgan basi zẹẹmẹ ahun yẹhiadonu tọn gbọn?
2 Ahun yẹhiadonu tọn 5 600 000 000 lẹ wẹ sọ to azọ́nwa to aigba ji fi ga. To ahun yẹhiadonu tọn mẹ wẹ numọtolanmẹ mítọn lẹ, mẹwhinwhan mítọn lẹ, ojlo mítọn lẹ nọ nọ. Ahọ́nji linlẹn mítọn lẹ, nukunnumọjẹnumẹ mítọn lẹ, po ojlo mítọn lẹ po wẹ e yin. Ahun yẹhiadonu tọn sọgan yigo kavi whiwhẹ, blawu kavi tindo awuvivi, dozinvlu kavi tindo nukunnumọjẹnumẹ.—Nẹhemia 2:2; Howhinwhẹn lẹ 16:5; Matiu 11:29; Owalọ lẹ 14:17; 2 Kọlintinu lẹ 4:6; Efesunu lẹ 1:16-18.
3, 4. Nawẹ yè sọgan biọ ahun lẹ mẹ po wẹndagbe lọ po gbọn?
3 Jehovah Jiwheyẹwhe sọgan yọ́n nuhe tin to ahun gbẹtọ tọn mẹ. Howhinwhẹn lẹ 17:3 dọmọ: “Ogànzẹ́n tin na fataka, zokán na sika: Ṣigba Oklunọ to ayiha whlepọn.” Nalete, kakati nado nọ doayi nuhe tin to ahun mẹdopodopo tọn mẹ go bo nọ dawhẹ, Jehovah to Kunnudetọ etọn lẹ yizan nado biọ ahun gbẹtọ lẹ tọn mẹ po wẹndagbe lọ po. Ehe tin to gbesisọ mẹ hẹ hogbe apọsteli Paulu tọn lẹ he dọmọ: “Yè na whlẹn mẹdepope he na ylọ oyín Oklunọ tọn gán. Nawẹ yé na ylọ oyín mẹhe yé ma yise tọn do? Podọ nawẹ yé na yí mẹhe yé ma ko sèhó etọn gbede se do? Podọ nawẹ yé na sè do matin yẹwhehodọtọ? Nawẹ yé na dọyẹwheho do, adavo yé yin didohlan? Dile yé wlan ẹn do, Nawẹ afọ yé he dọyẹwheho wẹndagbe jijọho tọn, bosọ hẹn owẹ̀n dagbe onú dagbe lẹ tọn wá yọnwhanpẹ sọ!”—Lomunu lẹ 10:13-15.
4 E ko hẹn homẹ Jehovah tọn hun nado do Kunnudetọ etọn lẹ hlan agosu ẹnẹ aigba tọn lẹpo ji nado “lá [wẹndagbe] onú dagbe lẹ tọn” podọ nado din mẹhe tindo ahun alọkẹyi tọn lẹ mọ. Sọha mítọn todin ko diblayi 5 000 000—madozẹnzẹn Kunnudetọ 1 tọn na gbẹtọ 1 200 delẹ to aigba ji. Jijẹ gbẹtọ aigba ji tọn liva susu lẹ dè po wẹndagbe lọ po ma bọawu gba. Ṣigba Jiwheyẹwhe to anadena azọ́n ehe gbọn Jesu Klisti gblamẹ bo to dindọn omẹ ahun jijlọnọ lẹ. Gbọnmọ dali, dọdai heyin kinkan to Isaia 60:22 mẹ to awusọhia nado yin nugbo: “Omẹ vude na lẹzun fọtọ́n, omẹ pẹvi dopo akọta huhlọnnọ: yẹn Oklunọ na basi i do ganji to ojlẹ etọn mẹ.”
5. Etẹwẹ yin oyọnẹn, podọ etẹwẹ sọgan yin didọ dogbọn nuyọnẹn aihọn tọn dali?
5 Dinvie wẹ ojlẹ enẹ, podọ onú dopo họnwun—gbẹtọ liva susu he tin to aigba ji lẹ tindo nuhudo oyọnẹn tọn. Na paa tọn, oyọnẹn yin akọjijẹ hẹ nugbo he nọ yin mimọyi gbọn numimọ, ayidonugo, kavi nupinplọn dali. Aihọn ko bẹ oyọnẹn susu pli. Nukọnyiyi ko yin bibasi to awa mọnkọtọn lẹ ji taidi nuyizan tẹnsẹnamẹ tọn, nukunpedo agbasalilo go, po hodọdopọ po mẹ. Ṣigba be oyọnẹn aihọn tọn wẹ gbẹtọvi lẹ tindo nuhudo etọn nugbonugbo ya? Gbede pọ́n! Awhànfunfun, kọgbidinamẹ, azọ̀n, po okú po zindonukọn nado to tuklado gbẹtọvi lẹ. Nuyọnẹn aihọn tọn nọ saba sọawuhia nado taidi okọ́ heyin piplọ gbọn oyujẹhọn danfafa ji tọn dali lẹ.
6. Gando ohùn go, nawẹ oyọnẹn Jiwheyẹwhe tọn yin jijlẹdo nuyọnẹn aihọn tọn go gbọn?
6 Di dohia: To owhe kanweko donu awe die wayi, nuwiwa aṣa tọn de wẹ e yin nado lẹhlan ohùn desọn lanmẹ taidi nuhe yè dọ e nọ hẹn pọngbọ wá de. George Washington, togan tintan États Unis tọn, yin ohùn desọn lanmẹna pludopludo to ganhiho godo gbẹzan etọn tọn whenu. To whenuena e jẹ obá de mẹ, e dọmọ: “Mì gbọ ma kú whui; yẹn ma sọgan nọgbẹ̀ dẹn ba.” Owhẹ̀ etọn whẹn, na to azán enẹ pẹẹ gbè wẹ e kú—yèdọ 14 décembre 1799. Kakati nado dehùn sọn lanmẹ, to egbehe nuzindonuji nọ saba yin bibasi do ohùndido do agbasa gbẹtọvi tọn mẹ ji. Aliho nuwiwa tọn awe lọ lẹ ko gọna nuhahun mẹhùhù tọn. Nalete, to ojlẹ ehe lẹpo whenu, Ohó Jiwheyẹwhe Tọn ko dọmọ: “Mì ni jagọ̀ . . . sọn ohùn kọ̀n.” (Owalọ lẹ 15:29) Oyọnẹn Jiwheyẹwhe tọn nọ saba sọgbe, yin nuhe go yè sọgan ganjẹ, bosọ yọn-na-yizan to ojlẹ mítọn mẹ.
7. Nawẹ oyọnẹn he pegan Owe wiwe lẹ tọn nọ yin jijlẹdo nuyọnẹn aihọn tọn go na nuhe dù ovi lẹ go pinpọn whẹ́n gbọn?
7 Gbadopọnna apajlẹ nuyọnẹn aihọn tọn he go yè ma sọgan deji do devo. Na owhe susu lẹ walọyizan gbẹtọ tọn plọntọ lẹ ko nọgodona ovi-go-pinpọn alọjodokọjinamẹ tọn, ṣigba dopo to godonọnamẹtọ etọn lẹ mẹ kẹalọyi to nukọnmẹ dọ nuṣiwa de wẹ ehe yin. Ogbẹ́ Tamẹnuplọnmẹ Allemagne Tọn yigbe, bo dọ dọ alọjodokọjinamẹ yin “e whè gbau nuhe nọ hẹn nuhahun he mí tindo todin po jọja lẹ po wá.” Nuyọnẹn aihọn tọn sọgan bli sọyì godo po nukọn po taidi gbọn nugbajẹmẹji jẹhọn tọn gblamẹ, ṣigba oyọnẹn he pegan Owe wiwe tọn ko sọawuhia nado yin dehe ma nọ whango. Biblu na ayinamẹ jlẹkaji tọn do ovi pinplọn ji. “Pọ́n ovi towe go, e na na gbọjẹ we; e nasọ yí homẹhun do ayiha towe mẹ,” wẹ Howhinwhẹn lẹ 29:17 dọ. Mẹplọnlọdomẹgo mọnkọtọn dona yin bibasi po owanyi po, na Paulu wlan dọmọ: “Mì otọ́ emi, mì hẹn homẹgblena ovi mìtọn lẹ blo, ṣigba mì nọ plọn yé to hihò po hokọnamẹ Oklunọ tọn po mẹ.”—Efesunu lẹ 6:4.
“Oyọnẹn Jiwheyẹwhe Tọn”
8, 9. Nawẹ hiẹ na basi zẹẹmẹ na nuhe Howhinwhẹn lẹ 2:1-6 dọ dogbọn oyọnẹn he gbẹtọvi lẹ tindo nuhudo etọn nugbonugbo dali gbọn?
8 Dile e tlẹ yindọ Paulu yin weyọnẹntọ de, e dọmọ: “Eyin omẹ de lẹn dọ e yin nuyọnẹntọ to mì mẹ to aihọn he mẹ, mì gbọ e ni lẹzun nulunọ, na e nido yin nuyọnẹntọ. Na nuyọnẹn aihọn he tọn onulu wẹ to Jiwheyẹwhe de.” (1 Kọlintinu lẹ 3:18, 19) Jiwheyẹwhe kẹdẹ wẹ sọgan ná oyọnẹn he gbẹtọvi lẹ tindo nuhudo etọn taun. Gando e go, Howhinwhẹn lẹ 2:1-6 dọmọ: “Ovi ṣie, eyin hiẹ na yí ohó ṣie lẹ, bosọ bẹ́ gbedide ṣie pli do de we. Sọmọ bọ hiẹ lẹ́ otó towe hlan nuyọnẹn go, bosọ jlẹ ayiha towe hlan ayitùnnugo. Nugbo eyin hiẹ to awhádo hodo nuyọnẹn, bosọ zé ogbè towe daga na ayitùnnugo; eyin hiẹ din in di fataka, bosọ din in di adọkunnu he whlá. Whenẹnu wẹ hiẹ na tunwun osi Oklunọ tọn, bo nasọ mọ oyọnẹn Jiwheyẹwhe tọn. Na Oklunọ wẹ nọ na oyọnẹn omẹ: Onù etọn mẹ wẹ nuyọnẹn po ayitùnnugo po nọ sọn.”
9 Mẹhe yin whinwhan gbọn ahun dagbe dali lẹ nọ payi nuyọnẹn go gbọn yíyí oyọnẹn he yin ninamẹ gbọn Jiwheyẹwhe dali zan ganji dali. Yé nọ hùn ahun yetọn lẹ do nùvo hlan ayitùnnugo, bo nọ jlẹ nuhọakuẹ nugbo he yé to pinplọn lẹ tọn pọ́n po sọwhiwhe po. Taidi kọdetọn de, yé nọ dawhá jẹgbonu na nukunnumọjẹnumẹ, kavi nugopipe lọ nado mọ lehe ada hosọ de tọn gando ode awetọ go do. Gbẹtọ ahunjijlọnọ lẹ nọ wazọ́n taidi mẹhe to fataka kùn bosọ to adọkun he whlá lẹ din. Ṣigba adọkun he whlá tẹwẹ nọ yin mimọ gbọn mẹhe tindo ahun alọkẹyi tọn lẹ dali? “Oyọnẹn Jiwheyẹwhe tọn” wẹ. Etẹwẹ enẹ yin? Nado dọ ẹ to aliho he bọawu mẹ, oyọnẹn he nọ yin mimọ to Ohó Jiwheyẹwhe tọn, yèdọ Biblu mẹ wẹ.
10. Etẹwẹ mí dona wà nado sọgan duvivi agbasalilo dagbe gbigbọmẹ tọn?
10 Oyọnẹn Jiwheyẹwhe tọn yọ́n, dolido, bo nọ namẹ ogbẹ̀. E nọ zé agbasalilo gbigbọmẹ tọn daga. Paulu dotuhomẹna Timoti dọmọ: “Hẹn ohia oho tọn he pegan lọ go gligli, ehe hiẹ ko sè to dee, to yise po owanyi po mẹ, he tin to Klisti Jesu mẹ.” (2 Timoti 1:13) Ogbè de nọ tindo ohia hogbe lẹ tọn. Mọdopolọ wẹ, “ogbè wiwe-ṣeke” lọ heyin nugbo he sọgbe hẹ Owe wiwe lẹ tindo “ohia ohó tọn he pegan,” bo sinai do hosọ Biblu tọn kẹdẹ ji he yin whẹsuna nupojipetọ-yinyin Jehovah tọn gbọn Ahọluduta lọ gblamẹ. (Zefania 3:9) Mí dona hẹn ohia ohó he pegan helẹ tọn do ayiha po ahun po mẹ. Eyin mí na dapana ahunzọ̀n yẹhiadonu tọn bo gbọṣi agbasalilo gbigbọmẹ tọn mẹ, mí dona yí Biblu zan to gbẹninọ egbesọ tọn mẹ bo yí nuwleawudai gbigbọmẹ tọn he Jiwheyẹwhe to awuwlena gbọn “afanumẹ nugbonọ nuyọnẹntọ lọ” gblamẹ do yizan gigọ mẹ. (Matiu 24:45-47; Titu 2:2) Mì gbọ mí ni nọ saba flin dọ na agbasalilo gbigbọmẹ tọn, mí tindo nuhudo oyọnẹn Jiwheyẹwhe tọn.
11. Etẹwẹ yin whẹwhinwhẹn delẹ na nuhewutu gbẹtọvi lẹ do tindo nuhudo oyọnẹn Jiwheyẹwhe tọn?
11 Lẹnnupọn do whẹwhinwhẹn devo lẹ ji na nuhewutu gbẹtọ liva liva aigba ji tọn lẹ do tindo nuhudo oyọnẹn Jiwheyẹwhe tọn. Be yemẹpo yọ́n lehe aigba po gbẹtọvi lẹ po wagbọn do wá tintin mẹ ya? Lala, yé ma yọnẹn. Be gbẹtọvi lẹpo yọ́n Jiwheyẹwhe nugbo lọ po Visunnu etọn po ya? Be mẹlẹpo yọ́n whẹho he Satani ko fọndote lẹ gando nupojipetọ-yinyin sọn olọn mẹ wá po tenọgligo hinhẹn gbẹtọvi lẹ tọn po go ya? Whladopo dogọ lala. Be gbẹtọ lẹpo yọ́n nuhewutu mí do nọ poyọnho bosọ nọ kú ya? Whladopo dogọ mí dona dọ lala. Be mẹhe tin to aigba ji lẹpo yọnẹn dọ Ahọluduta Jiwheyẹwhe Tọn to gandu to olọn lẹ mẹ todin bọ mí sọ tin to azán godo tọn lẹ mẹ ya? Be yé yọnẹn dọ huhlọn gbigbọ ylankan lẹ tọn tin ya? Be gbẹtọvi lẹpo tindo oyọnẹn he go yè sọgan deji do dogbọn lehe yè sọgan tindo whẹndo ayajẹnọ de do dali nugbonugbo ya? Podọ be gbẹtọgun lẹ yọnẹn dọ ogbẹ̀ ayajẹnọ to Paladisi mẹ yin lẹndai Mẹdatọ mítọn tọn na gbẹtọvi tonusetọ lẹ ya? Gblọndo kanbiọ ehelẹ lọsu tọn yin lala. To whelọnu lò, e họnwun hezeheze dọ gbẹtọvi lẹ tindo nuhudo oyọnẹn Jiwheyẹwhe tọn.
12. Nawẹ mí sọgan basi sinsẹ̀n hlan Jiwheyẹwhe to “gbigbọ mẹ podọ to nugbo mẹ” gbọn?
12 Gbẹtọvi lẹ sọ tindo nuhudo oyọnẹn Jiwheyẹwhe tọn na nuhe Jesu dọ to odẹ̀ mẹ to ozán godo tọn heyin gbẹninọ etọn to aigba ji whenu. E dona ko whàn apọsteli etọn lẹ to whenuena yé sè bọ e dọmọ: “Ehe wẹ ogbẹ̀ madopodo, dọ yé ni yọ́n hiẹ ṣokẹdẹ Jiwheyẹwhe nugbo, podọ ewọ mẹhe hiẹ dohlan, yèdọ Jesu Klisti.” (Johanu 17:3) Oyọnẹn mọnkọtọn yiyi-do-yizan mẹ wẹ yin aliho dopo kẹdẹ lọ nado basi sinsẹ̀n hlan Jiwheyẹwhe po alọkẹyi po. “Gbigbọ wẹ Jiwheyẹwhe: e jẹ yé he to sinsẹ́n ẹn lẹ ni nọ sẹ̀n ẹn to gbigbọ mẹ podọ to nugbo mẹ,” wẹ Jesu dọ. (Johanu 4:24) Mí nọ basi sinsẹ̀n hlan Jiwheyẹwhe “to gbigbọ mẹ” to whenuena mí yin whinwhan gbọn ahun heyin gigọ po yise po gọna owanyi dali. Nawẹ mí na sẹ̀n ẹn ‘to nugbo mẹ gbọn’? Gbọn Ohó etọn pinplọn po sinsẹ̀n bibasi hlan ẹn po sọgbe hẹ nugbo etọn he yè dohia dali—yèdọ “oyọnẹn [nugbo] Jiwheyẹwhe tọn.”
13. Nujijọ tẹwẹ yè basi kandai etọn to Owalọ lẹ 16:25-34, podọ etẹwẹ mí sọgan plọn sọn e mẹ?
13 Fọtọ́n susu gbẹtọ lẹ tọn ko jẹ sinsẹ̀n basi ji hlan Jehovah to whemẹwhemẹ. Ṣogan, be yè dona deanana plọnmẹ Biblu lẹ po jlodotọ lẹ po na whenu dindẹn wẹ, kavi be e yọnbasi nado gọalọna omẹ ahunjijlọnọ lẹ nado jẹ baptẹm kọ̀n to niyaniya mẹ ya? Eyọn, lẹnnupọn do nuhe jọ to whẹho gankọnnọtọ po whédo etọn po tọn mẹ heyin didonu e go to Owalọ lẹ 16:25-34 mẹ ji. Paulu po Sila po ko yin wiwle do ganmẹ to Filippi, ṣigba to whenuena ozán-gbo-dawe, aigba sisọsisọ daho de hùn ohọ̀n ganpamẹ tọn lẹ do nùvo. Po linlẹn lọ po dọ gantọ lọ lẹpo ko họnyi podọ dọ emi na yin yasana sinsinyẹn, gankọnnọtọ lọ dibla hù ede to whenuena Paulu dọ na ẹn dọ yemẹpo tin to finẹ. Paulu po Sila po “dọ ohó Oklunọ tọn hlan ẹn, po hlan omẹ he tin to owhé etọn gbè lẹpo po.” Gankọnnọtọ enẹ po whẹndo etọn po yin Kosi he ma tindo dodonu Owe wiwe tọn lẹ gba. Ṣogan, to zánto dopo enẹ mẹ, yé lẹezun yisenọ lẹ. Humọ, “yè sọ baptizi i po omẹ etọn lẹpo po to tẹndoponẹmẹ.” Ninọmẹ vonọtaun wẹ enẹlẹ yin, ṣigba mẹyọyọ lẹ nọ yin pinplọn nugbo dodonu tọn lẹ podọ to enẹgodo nọ plọn onú devo lẹ to opli agun tọn lẹ tẹnmẹ. To whedelẹnu onú dopolọ dona yọnbasi to egbehe.
Ojijẹ lọ Sù!
14. Naegbọn nuhudo de do tin nado deanana sọha daho plọnmẹ Biblu kọdetọn dagbe tọn lẹ to ojlẹ gli de gblamẹ?
14 E na yọ́n hugan eyin Kunnudetọ Jehovah Tọn lẹ sọgan deanana plọnmẹ Biblu kọdetọn dagbe tọn lẹ na ojlẹ he whègli de. Nuhudo nujọnu tọn de tin na ehe. Di dohia, to aigba Europe Whezẹtẹn tọn lẹ ji, gbẹtọ lẹ dona yin tito do hukan debọdo-dego tọn ji na plọnmẹ Biblu lẹ. Mọwẹ whẹho lọ te do to fidevo lẹ ga. To tòdaho dopo mẹ to République Dominicaine, Kunnudetọ atọ́n tindo obiọ he sù sọmọ bọ yé ma sọgan penugo nado deanana oplọn lọ lẹpo gba. Etẹwẹ yé wà? Yé na tuli jlodotọ lọ lẹ nado nọ wá opli lẹ to Plitẹnhọ Ahọluduta lọ tọn mẹ bo ze yinkọ dai to todohukan debọdo-dego tọn ji na plọnmẹ Biblu lẹ. Ninọmẹ dopolọ tin to ofi susu lẹ lẹdo aigba pe.
15, 16. Etẹwẹ ko yin awuwlena nado hẹn oyọnẹn Jiwheyẹwhe tọn gbayipe po awuyiya po hugan, podọ etẹwẹ yin nugbo delẹ dogbọn dali etọn?
15 Aigba-denamẹ he gblo lẹ—aigba daho na jibẹwawhé lẹ—to hunhundonuvo na omẹ Jiwheyẹwhe tọn lẹ. Dile etlẹ yindọ Jehovah, “Oklunọ ojijẹ tọn,” to azọ́nwatọ susu dogọ lẹ dohlan do, onú susu gbẹsọ tin nado wà. (Matiu 9:37, 38) Enẹwutu, nado hẹn oyọnẹn Jiwheyẹwhe tọn gbayipe po awuyiya po, ‘afanumẹ nugbonọ’ lọ ko basi awuwle nude tọn he bẹ nudọnamẹ tangan he sọgbe lẹ hẹn na Biblu plọntọ lẹ nido sọgan basi nukọnyiyi gbigbọmẹ tọn po nupinplọn dopodopo po. Owe yọyọ de wẹ he sọgan yin tadona to plọnmẹ Biblu whégbè tọn lẹ bibasi mẹ po awuyiya po—vlavo to osun vude lẹ gblamẹ. Podọ e sọgan yin hinhẹn po awubibọ po to saki pẹvi mítọn lẹ, saki pipla mítọn lẹ, kavi apò mítọn lẹ mẹ! Gbẹtọ kanweko donu fọtọ́n lẹ he plidopọ to Plidopọ Agbegbe “Gigopanamẹtọ Ayajẹnọ” heyin Kunnudetọ Jehovah Tọn lẹ tọn tẹnmẹ tindo homẹhunhun nado mọ owe yọyọ weda 192 tọn ehe yí he hosọ etọn yin Oyọnẹn He Nọ Planmẹ Sọyì Ogbẹ̀ Madopodo Mẹ.
16 Wekantọ lẹ to otò voovo lẹ mẹ wleawuna hosọ lẹ he yè yí sọwhiwhe do zé do ada godo tọn mẹ to owe Oyọnẹn tọn lọ mẹ. Enẹwutu e dona yin onú dọnmẹdogo akọjọpli tọn. Ṣigba be e na yí whenu dindẹn whẹpo owe yọyọ ehe nido yin didetọ́n to ogbè gbẹtọ lẹ tọn mẹ lẹdo aihọn pe ya? Lala, na owe weda 192 tọn de sọgan yin lilẹdogbedevomẹ to niyaniya mẹ hugan owe he klo taun lẹ. To août 1995 mẹ, Wedegbẹ́ Wekinkan Tọn heyin Hagbẹ Anademẹtọ Tọn ko kẹalọyi lẹdiọdogbedevomẹ owe ehe tọn do nuhugan ogbè 130 lẹ mẹ.
17. Onú tẹlẹ wẹ na hẹn ẹn bọawu na mí nado yí owe Oyọnẹn tọn lọ zan?
17 Onú agokun tangan lẹ to weta dopodopo owe Oyọnẹn tọn lọ mẹ dona hẹn nuplọntọ lẹ penugo to filẹpo nado basi nukọnyiyi gbigbọmẹ tọn he yọ́n to niyaniya mẹ. Owe lọ zé nugbo Owe wiwe lẹ tọn donukọnnamẹ to aliho mẹjlọdote tọn de mẹ. E ma dọho do sinsẹ̀n-nuplọnmẹ lalo tọn lẹ ji gba. Hinhọnwun ogbè lọ tọn po kandlẹnnahó he sọgbe hẹ lẹnpọn dagbe po dona hẹn ẹn bọawu nado yí owe lọ zan nado deanana plọnmẹ Biblu lẹ bosọ gọalọna gbẹtọ lẹ nado mọnukunnujẹ oyọnẹn Jiwheyẹwhe tọn mẹ. Gbọnvona wefọ he yè yíhodọ sọn e mẹ lẹ, wefọ Biblu tọn he yin dide lẹ tin he nuplọntọ lọ dona yin alọgọna nado gbadopọnna to awuwlena hodọdopọ lọ whenu. Wefọ ehelẹ sọgan yin hihia to oplọn lọ whenu dile whenu tin do, ṣigba e ma yin nuyọnẹnnu nado hẹn nudọnamẹ devo lẹ biọ hodọdopọ lọ mẹ he sọgan hẹn nuagokun titengbe lẹ dozinvlu gba. Kakatimọ, mẹhe to anadena plọnmẹ Biblu lẹ dona tẹnpọn nado mọnukunnujẹemẹ bo dọ na nuplọntọ lọ nuhe owe lọ to didohia to weta dopodopo mẹ. Ehe zẹẹmẹdo dọ mẹplọntọ lọ dona yí sọwhiwhe do plọnnu ganji, na linlẹn titengbe lẹ nido họnwun ganji to ayiha etọn mẹ.
18. Ayinamẹ tẹlẹ wẹ yin nina gando yizan owe Oyọnẹn tọn lọ go?
18 Nawẹ owe lọ Oyọnẹn He Nọ Planmẹ Sọyì Ogbẹ̀ Madopodo Mẹ sọgan hẹn azọ́n devi lẹ bibasi tọn yinukọn gbọn? Owe weda 192 tọn ehe sọgan yin pinplọn to gblagbla ojlẹ gli de tọn mẹ, podọ mẹhe “yè dedo ogbẹ̀ madopodo” mẹ lẹ dona penugo nado plọnnu ganji gbọn oplọn etọn dali nado basi klandowiwe hlan Jehovah bo yin bibaptizi. (Owalọ lẹ 13:48) Enẹwutu mì gbọ mí ni yí owe Oyọnẹn tọn lọ zan to aliho dagbe mẹ to lizọnyizọn lọ mẹ. Eyin Biblu plọntọ de ko yinukọn susu tlala to owe devo pinplọn mẹ, e sọgan yin nuhe yọn-na-yizan nado dotana ẹn. Eyin e ma yinmọ, yè na ayinamẹ etọn dọ plọnmẹ Biblu lẹ ni yin adadiọna biọ owe Oyọnẹn tọn lọ mẹ. To tadona owe yọyọ ehe po godo, yè ma na ayinamẹ etọn dọ oplọn de ni yin anadena po nuplọntọ dopolọ po to owe awetọ de mẹ gba. Mẹhe mọ nugbo lẹ sọgan hẹn oyọnẹn yetọn lẹ gblo gbọn opli Kunnudetọ Jehovah Tọn lẹ yìyì gọna Biblu po owe Klistiani tọn voovo lẹ hihia na yede titi po dali.—2 Johanu 1.
19. Whẹpo yè nado jẹ anadena plọnmẹ Biblu lẹ ji to owe Oyọnẹn tọn lọ mẹ, naegbọn e nado yin alọgọnamẹnu nado gbadopọnna weda 175-218 owe Tito-basina Nado Wà Lizọnyizọn Mítọn Ganji?
19 Owe Oyọnẹn tọn lọ yin kinkan po yanwle lọ po nado gọalọna mẹde nado na gblọndo kanbiọ lọ lẹpo tọn he mẹho lẹ nọ gbadopọnna po wẹnlatọ he ma ko baptizi he tindo ojlo nado yin bibaptizi taidi Kunnudetọ Jehovah Tọn lẹ po. Gbọnmọ dali, whẹpo hiẹ nido diọada na plọnmẹ Biblu towe alọnu tọn lẹ biọ owe yọyọ ehe mẹ, e yin nuhe yè na ayinamẹ etọn dọ hiẹ ni yí ganhiho vude zan nado gbadopọnna kanbiọ lọ lẹ to weda 175-218 heyin owe Tito-basina Nado Wà Lizọnyizọn Mítọn Ganjia mẹ. Ehe na gọalọna we nado zinnudo gblọndo lọ lẹ hlan kanbiọ mọnkọtọn lẹ ji to plọnmẹ Biblu lẹ whenu to owe Oyọnẹn lọ tọn mẹ.
20. Etẹwẹ hiẹ basi tito nado wà po owe Oyọnẹn He Nọ Planmẹ Sọyì Ogbẹ̀ Madopodo mẹ po?
20 Gbẹtọ lẹ to filẹpo dona sè wẹndagbe mọnkọtọn. Mọwẹ, gbẹtọvi lẹ tindo nuhudo oyọnẹn Jiwheyẹwhe tọn, podọ Jehovah tindo Kunnudetọ etọn lẹ nado hẹn ẹn zun yinyọnẹn. Todin mí tindo owe yọyọ de he yin awuwlena gbọn Otọ́ olọn mẹ tọn mítọn dali gbọn afanumẹ nugbonọ nuyọnẹntọ lọ gblamẹ. Be hiẹ na yi i zan nado plọnmẹ nugbo lọ bo hẹn yẹyi wá na yinkọ wiwe Jehovah tọn ya? Jehovah na dona we janwẹ dile hiẹ dovivẹnu lẹpo nado hẹn oyọnẹn he nọ planmẹ sọyì ogbẹ̀ madopodo mẹ tin to aimẹ na mẹsusu.
[Nudọnamẹ odò tọn]
a Yin zinzinjẹgbonu gbọn Watchtower Bible and Tract Society of New York, Inc. dali.
Nawẹ Hiẹ Na Na Gblọndo Gbọn?
◻ Nawẹ hiẹ sọgan basi zẹẹmẹ ahun yẹhiadonu tọn gbọn?
◻ Etẹwẹ yin oyọnẹn Jiwheyẹwhe tọn?
◻ Naegbọn oyọnẹn Jiwheyẹwhe tọn do yin nuhudo gbọn gbẹtọvi lẹ dali?
◻ Owe yọyọ tẹwẹ tin to aimẹ, podọ tito tẹwẹ hiẹ basi nado yi i zan?
[Yẹdide to weda 3]
Whẹwhinwhẹn susu wẹ tin na nuhewutu gbẹtọ liva he tin to aigba ji lẹ do tindo nuhudo oyọnẹn Jiwheyẹwhe tọn