E Yí Akla po Whèvi Vude po Do Na Núdùdù Gbẹtọ Susu

Apọsteli 12 lẹ duvivi yẹwhehodidọ tọn to agbegbe Galili tọn ji, podọ yé dọ “nuhe yé ko wà bosọ plọnmẹ lẹpo” na Jesu. Na nugbo tọn, agbọ́ ko pé yé. Etomọṣo, yé ma tlẹ mọ whenu nado dùnú, na mẹsusu wẹ to wiwá bo to yìyì wutu. Enẹwutu, Jesu dọmọ: “Mì wá bo gbọ mí ni sẹ̀ jẹ olá bo gbọjẹ vude.”—Malku 6:30, 31.

Yé biọ tọjihun de mẹ vlavo sẹpọ Kapẹlnaumi bo dedo fie to olá de to whèzẹtẹn Tọ̀sisa Jọdani tọn, ehe zẹ̀ Bẹtsaida go. Ṣigba, mẹsusu mọ whenue yé to yìyì, podọ mẹdevo lẹ sọ yọ́n filọ. To pọmẹ, yé họ̀nwezun gbọn huto bosọ jẹ dọ́n whẹpo tọjihun lọ do glin.

To whenue Jesu jẹte sọn tọjihun lọ mẹ, e mọ gbẹtọgun daho de bọ onú yetọn wàlẹblanuna ẹn, na yé taidi lẹngbọ lẹ he ma tindo lẹngbọhọtọ de wutu. Enẹwutu, e jẹ “onú susu plọn yé ji” gando Ahọluduta lọ go. (Malku 6:34) E sọ hẹnazọ̀ngbọna “mẹhe tindo nuhudo azọ̀nhẹngbọ tọn lẹ.” (Luku 9:11) Dile ojlẹ to yìyì, devi lẹ dọna ẹn dọmọ: “Filọ jẹ gblolo mẹ podọ whenu ko yì taun; do gbẹtọgun lẹ hlan, na yé nido sọgan yì gbétatò lẹ mẹ bo họ̀ núdùdù na yede.”—Matiu 14:15.

Jesu gblọn dọmọ: “E ma biọ dọ yé ni yì gba; mì na nude yé nado dù.” (Matiu 14:16) Dile etlẹ yindọ Jesu ko yọ́n nuhe ewọ jlo na wà, e tẹ́n Filippi pọ́n bo kanse e dọmọ: “Fie wẹ mí na mọ akla họ̀ te na omẹ ehelẹ nado dù?” Filippi wẹ e jẹ dọ ni kanhose, na ewọ wá sọn lẹdo Bẹtsaida tọn mẹ wutu. Etomọṣo, akla hihọ̀ ma na gbọ nuhahun lọ gba. Nudi sunnu 5 000 wẹ tin to finẹ. Podọ sọha mẹlẹpo tọn sọgan yì sọha enẹ donu awe eyin yè hia yọnnu lẹ po yọpọvu lẹ po! Filippi gblọn dọmọ: “Akla denali 200 nù [denali dopo wẹ yin azọ́nkuẹ gbèdopo tọn] ma na pé yé, eyin etlẹ yindọ pẹvide wẹ dopodopo yetọn na mọ.”—Johanu 6:5-7.

Vlavo nado dohia dọ e ma yọnbasi nado na núdùdù yemẹpo, Andle yidogọ dọ: “Yọpọ sunnu de die he tindo akla balekun tọn atọ́n po whèvi flinflin awe po. Ṣigba etẹwẹ ehelẹ na wà to omẹ susu ehelẹ ṣẹnṣẹn?”—Johanu 6:9.

Amakikọ-whenu wẹ, ojlẹ vude jẹnukọnna Juwayi owhe 32 W.M., podọ ogbé-mú gọ́ lẹdo osó tọn enẹ mẹ. Jesu biọ to devi etọn lẹ si nado dọna gbẹtọ lọ lẹ dọ yé omẹ 50 kavi 100 ni sinai to pọmẹ do ogbé lẹ ji. E yí akla atọ́n po whèvi awe lọ lẹ po bo dopẹna Jiwheyẹwhe. Enẹgodo, e wẹ́n akla lọ lẹ bosọ má whèvi lọ lẹ. Jesu yí yé na devi etọn lẹ nado má na gbẹtọ lẹ. E jiawu taun dọ mẹlẹpo dùnú bo gọ́ho!

Enẹgodo, Jesu dọna devi etọn lẹ dọmọ: “Mì bẹ dupò he pò lọ lẹ pli, na nudepope ni ma yin hinhẹngú blo.” (Johanu 6:12) To whenue yé bẹ dupò lọ lẹ pli, e gọ́ ohà 12!