E Plọnnumẹ to Whenue E Jei Jelusalẹm

Na ojlẹ de, Jesu hẹn lizọnyizọn etọn di titengbe to Galili, fihe mẹsusu kẹalọyi owẹ̀n etọn te hugan Jude. Humọ, to whenue e tin to Jelusalẹm bo gbọazọ̀nna dawe de to Gbọjẹzangbe, “Ju lẹ jẹ aliho lẹpo dín ji nado hù i.”—Johanu 5:18; 7:1.

Todin, osun septembre kavi octobre owhe 32 W.M. tọn wẹ, podọ Hùnwhẹ Gòhọtúntún tọn ko sẹpọ. Hùnwhẹ ehe nọ yin bibasi na azán ṣinawe, podọ opli ayidego tọn de nọ bọdego to azán ṣinatọ̀ntọ gbè. Hùnwhẹ lọ nọ dohiagona vivọnu ojlẹ glelilẹ tọn bosọ nọ yin ojlẹ ayajẹ daho po pẹdido po tọn.

Nọvisunnu daa Jesu tọn lẹ, yèdọ Jakọbu, Simọni, Josẹfu po Juda po dotuhomẹna ẹn dọmọ: “Tọ́n sọn fi bo yì Jude.” Jelusalẹm wẹ yin ahọnkan sinsẹ̀n-bibasi tọn to otò lọ mẹ. To hùnwhẹ whemẹwhemẹ tọn atọ̀n lẹ whenu, gbẹtọ lẹ nọ gọ́ tòdaho lọ mẹ. Nọvisunnu Jesu tọn lẹ yidogọ dọmọ: “Mẹde ma nọ wà nudepope to nuglọ to whenue e to jijlo nado yin yinyọnẹn to gbangba. To whenue e yindọ hiẹ wẹ to onú ehelẹ wà, do dewe hia aihọn lọ.”—Johanu 7:3, 4.

Na taun tọn, nọvisunnu ẹnẹ ehelẹ “ma to yise dohia to ewọ mẹ” taidi Mẹsia lọ. Etomọṣo, yé jlo dọ mẹhe wá hùnwhẹ lọ tẹnmẹ lẹ ni mọ azọ́njiawu etọn delẹ. Na Jesu doayi owù lọ go wutu, e dọna yé dọmọ: “Aihọn lọ ma tindo whẹwhinwhẹ́n de nado gbẹwanna mìwlẹ gba, ṣigba yẹn wẹ e gbẹwanna, na yẹn dekunnu gando e go dọ azọ́n etọn lẹ yin ylankan wutu. Mìwlẹ ni yì hùnwhẹ lọ; yẹn ma jei hùnwhẹ ehe todin, na ojlẹ dide ṣie ma ko wá to gigọ́ mẹ gba.”—Johanu 7:5-8.

Azán vude to whenue nọvisunnu Jesu tọn lẹ ko dedo to pọmẹ hẹ pipli gbejizọnlinzintọ tọn daho de godo, Jesu po devi etọn lẹ po gbọn nuglọ yì, yèdọ gbọn fie mẹdepope ma na mọ yé te. Yé ze aliho he jlọ hugan bo gbọn Samalia lọ, kakati nado gbọn dehe ji gbẹtọ lẹ nọ saba gbọn sẹpọ Tọ̀sisa Jọdani tọn. Na Jesu po devi etọn lẹ po na tindo nuhudo adọtẹn tọn to Samalia wutu, e do wẹnsagun delẹ hlan jẹnukọn nado yì wleawudai. To fide, gbẹtọ lẹ gbẹ́ nado yí yé kavi nado hẹjó yé dile e nọ yì do to paa mẹ, na Jesu jei Jelusalẹm na hùnwhẹ Ju lẹ tọn de wutu. Po homẹgble po, Jakọbu po Johanu po kanse e dọmọ: “Oklunọ, be hiẹ jlo dọ mí ni dọna miyọ́n nado flẹ sọn olọn bo hù yé sudo ya?” (Luku 9:54) Jesu gbẹnuna yé na linlẹn enẹ he yé tindo, podọ yé zindonukọn to gbejizọnlin yetọn mẹ.

To whenue yé to aliho ji, wekantọ de dọna Jesu dọmọ: “Mẹplọntọ, yẹn na hodo we yì fidepope he hiẹ na yì.” Jesu gblọnna ẹn dọmọ: “Owọ̀ lẹ tindo odò lẹ podọ ohẹ̀ agahomẹ tọn lẹ tindo adọ́ lẹ, ṣigba Visunnu gbẹtọ tọn ma tindo fidepope he e na ze ota etọn bọdai do.” (Matiu 8:19, 20) Jesu to didohia wekantọ lọ dọ ewọ na pehẹ avùnnukundiọsọmẹnu lẹ, eyin e lẹzun hodotọ emitọn. Podọ e taidi dọ goyiyi glọnalina wekantọ lọ nado yigbe bo zan gbẹzan enẹ. Enẹwutu, dopodopo mítọn sọgan kanse ede dọ, ‘Be n’ko wleawufo nado hodo Jesu ya?’

Jesu dọna dawe devo dọmọ: “Lẹzun hodotọ ṣie.” Dawe lọ gblọn dọmọ: “Oklunọ, nagbè mi nado yì bo dì otọ́ ṣie whẹ́.” Na Jesu yọ́n ninọmẹ dawe lọ tọn wutu, e dọmọ: “Gbọ oṣiọ lẹ ni dì oṣiọ yetọn lẹ, ṣigba hiẹ ni yì bo lá Ahọluduta Jiwheyẹwhe tọn pé.” (Luku 9:59, 60) E họnwun dọ otọ́ dawe lọ tọn ma ko kú. Eyin otọ́ etọn ko kú wẹ, e na vẹawu dọ visunnu lọ ni to finẹ bo to hodọ hẹ Jesu. Visunnu lọ ma ko wleawufo nado ze Ahọluduta Jiwheyẹwhe tọn do otẹn tintan mẹ to gbẹzan etọn mẹ.

Dile yé zindonukọn to gbejizọnlin lọ mẹ jei Jelusalẹm, dawe devo dọna Jesu dọmọ: “Oklunọ, yẹn na hodo we, ṣigba nagbè mi nado dọ e yì whedenu na mẹhe tin to whédo ṣie mẹ lẹ whẹ́.” Jesu gblọn dọmọ: “Omẹ depope he doalọ glepọnu go bo pọ́n nuhe to godo lẹ ma jẹna Ahọluduta Jiwheyẹwhe tọn.”—Luku 9:61, 62.

Mẹhe jlo na yin devi nugbo Jesu tọn lẹ dona ze nukun yetọn lẹ do sinsẹ̀nzọn Ahọluduta lọ tọn ji. Eyin glesi de ma zindonukọn nado to nukọnpọnhlan, e yọnbasi dọ owhẹ̀n he pọ̀ e te lẹ ni gbán. Eyin e jo glepọnu lọ do nado pọ́n nuhe to godo lẹ, enẹ na bẹpla azọ́n he wà e te to ogle lọ mẹ. Mọdopolọ, mẹdepope he pọ́n godo hlan titonu hoho ehe na zẹ̀ sọn aliho he planmẹ yì ogbẹ̀ madopodo mẹ lọ ji.