Jesu Jẹ Devi lẹ Ṣinyan Ji

To whenue Jesu ko nọ danfafa ji na azán 40 godo, podọ whẹpo e nado lẹkọ dedo Galili, e lẹkọyi Johanu dè, yèdọ mẹhe baptizi i. Dile Jesu to dindọnsẹpọ ẹ, Johanu dlẹnalọdo e bo dọna mẹhe to finẹ lẹ dọmọ: “Mì pọ́n, Lẹngbọvu Jiwheyẹwhe tọn lọ he ze ylando aihọn tọn yì! Omẹ ehe lọ go wẹ yẹn ko dọ gando dọ, To godo ṣie dawe de ja he ko jẹnukọnna mi, na ewọ ko tin jẹnukọnna mi wutu.” (Johanu 1:29, 30) Dile etlẹ yindọ Johanu yin mẹho na Jesu pẹẹde, e yọnẹn dọ Jesu ko tin jẹnukọnna emi taidi nudida gbigbọnọ de to olọn mẹ.

Osẹ kleun delẹ jẹnukọn, to whenue Jesu wá nado yin bibaptizi, e taidi dọ Johanu ma ko kudeji mlẹnmlẹn dọ Jesu wẹ na yin Mẹsia lọ. Johanu yigbe dọmọ: “Dile etlẹ yindọ yẹn ma yọ́n ewọ, whẹwhinwhẹ́n he wutu yẹn yí osin do to omẹ lẹ baptizi wẹ yindọ, na ewọ nido sọgan yin hinhẹn sọawuhia Islaeli.”—Johanu 1:31.

Johanu zindonukọn nado dọna todoaitọ etọn lẹ nuhe jọ to whenue e baptizi Jesu dọmọ: “Yẹn mọ gbigbọ to tejẹ taidi apoe de sọn olọn, e sọ jẹ do e ji. Dile etlẹ yindọ yẹn ma yọ́n ewọ, ṣigba Omẹ lọ he do mi hlan nado yí osin do baptizi dọna mi dọ, ‘To whenue hiẹ mọ gbigbọ ja odò bosọ jẹ do mẹde ji, hiẹ ni yọnẹn dọ omẹ enẹlọ wẹ nọ yí gbigbọ wiwe do baptizi.’ Podọ yẹn ko mọ ẹn, yẹn ko sọ dekunnu dọ omẹ ehe lọ wẹ Visunnu Jiwheyẹwhe tọn.”—Johanu 1:32-34.

To aihọngbè, Johanu tin topọ hẹ devi etọn awe to whenue Jesu ja e dè whladopo dogọ. Johanu dọmọ: “Mì pọ́n, Lẹngbọvu Jiwheyẹwhe tọn lọ!” (Johanu 1:36) To whenẹnu, devi Johanu Baptizitọ lọ tọn awe ehelẹ hodo Jesu. Dopo to yé mẹ nọ yin Andle. Omẹ awetọ lọ wẹ mẹhe na ko basi kandai nujijọ ehe tọn, ewọ lọsu nọ yin Johanu. Na Johanu ehe yin visunnu Salome tọn, ewọ na ko yin nafẹ-vi Jesu tọn. Salome sọgan ko yin nọviyọnnu Malia tọn, podọ asu etọn wẹ Zebede.

To whenue Jesu lẹgodo bo mọdọ Andle po Johanu po to hihodo e, e kanse yé dọmọ: “Etẹ dín wẹ mì te?”

Yé kanse e dọmọ: “Labi, fie wẹ hiẹ nọ nọ̀?”

Jesu gblọn dọmọ: “Mì wá, mì nasọ mọ.”—Johanu 1:37-39.

Nudi ogàn ẹnẹ whèmẹ tọn wẹ to hihò, podọ Andle po Johanu po gbọṣi Jesu dè kakajẹ vivọnu azán lọ tọn. Homẹ Andle tọn hùn sọmọ bọ e wá yì mọ nọvisunnu etọn, Simọni, he sọ nọ yin yiylọdọ Pita, bo dọna ẹn dọmọ: “Mí ko mọ Mẹsia lọ.” (Johanu 1:41) Andle plan Pita yì Jesu dè. Nujijọ he bọdego lẹ dohia dọ Johanu lọsu yì mọ nọvisunnu etọn Jakọbu bo plan ẹn wá Jesu dè; ṣigba Johanu ma kàn adà mẹdetiti tọn ehe do kandai etọn mẹ gba.

To wunkẹngbe, Jesu mọ Filippi, mẹhe wá sọn Bẹtsaida. Tòdaho ehe sẹpọ agewaji Ohù Galili tọn, podọ finẹ wẹ Andle po Pita po wá sọn. Jesu basi oylọna Filippi dọmọ: “Lẹzun hodotọ ṣie.”—Johanu 1:43.

Enẹgodo, Filippi yì mọ Natanaeli, mẹhe sọ nọ yin yiylọdọ Batelemi bo dọmọ: “Mí ko mọ omẹ lọ he Mose, to Osẹ́n lọ mẹ, po Yẹwhegán lẹ po ko kanwe gandego, yèdọ Jesu, visunnu Josẹfu tọn, sọn Nazalẹti.” Ṣigba, Natanaeli tindo ayihaawe bo dọna Filippi dọmọ: “Be onú dagbe depope sọgan wá sọn Nazalẹti ya?”

Filippi dotuhomẹna ẹn dọmọ: “Wá pọ́n.” Jesu doayi e go dọ Natanaeli ja emi dè bo dọmọ: “Pọ́n, Islaelivi de, mẹhe mẹ oklọ depope ma tin te.”

Natanaeli kanse e dọmọ: “Nawẹ hiẹ wagbọn do yọ́n mi?”

Jesu gblọnna ẹn dọmọ: “Whẹpo Filippi do ylọ we, to whenue hiẹ tin to ovòtin glọ, yẹn ko mọ we.”

E paṣa Natanaeli bọ e gblọnna ẹn dọmọ: “Labi, hiẹ wẹ Visunnu Jiwheyẹwhe tọn lọ, hiẹ wẹ Ahọlu Islaeli tọn.”

Jesu kanse e dọmọ: “Na yẹn dọna we dọ yẹn mọ we to ovòtin glọ wutu wẹ hiẹ do yí mi sè ya? Hiẹ na mọ nuhe klohugan ehelẹ.” Enẹgodo, Jesu dopagbe dọmọ: “Nugbonugbo wẹ yẹn dọna mì, mì na mọ olọn hùndonuvo bọ angẹli Jiwheyẹwhe tọn lẹ na to jihẹ bo to tejẹ wá Visunnu gbẹtọ tọn dè.”—Johanu 1:45-51.

Ojlẹ kleun de to enẹgodo, Jesu po devi yọyọ etọn lẹ po tlọ́n Agbàdo Jọdani tọn mẹ bo zingbejizọnlin yì Galili.