Kaifa penugo nado yinuwado hagbẹ Sanhedlin lọ tọn lẹ ji na yé nido dewé nado hù Jesu. Be Nikodẹmi he yin dopo to hagbẹ Sanhedlin lọ tọn lẹ mẹ bo jihọntọn hẹ Jesu wẹ dọhona ẹn gando sébibla lọ go ya? Depope he whẹho lọ yin, Jesu tọ́n sọn lẹdo Jelusalẹm tọn mẹ bo gbọnmọ dali dapana okú jẹnukọnna ojlẹ dide Jiwheyẹwhe tọn.

Nado hẹn sébibla Sanhedlin lọ tọn nado hù i zun ovọ́, Jesu zingbejizọnlin yì tòdaho Eflaimi tọn mẹ to agewaji whèzẹtẹn Jelusalẹm tọn. Ewọ po devi etọn lẹ po gbọṣi finẹ, yèdọ fie kẹntọ etọn lẹ ma gán mọ ẹn te. (Johanu 11:54) Ṣigba, ojlẹ hùnwhẹ Juwayi owhe 33 W.M. tọn to sisẹpọ, bọ Jesu nasọ dedo to madẹnmẹ. E zingbejizọnlin pànta agewaji gbọn Samalia bo hẹji yì Galili, yèdọ whla godo tọn he e yì lẹdo ehe mẹ jẹnukọnna okú etọn.