Be Hiẹ Sọgan ‘Dọnsẹpọ Jiwheyẹwhe’ Nugbonugbo?

1, 2. (a) Etẹwẹ sọgan taidi nuhe ma yọnbasi na mẹsusu, ṣigba jide tẹwẹ Biblu na mí? (b) Haṣinṣan pẹkipẹki tẹwẹ Ablaham mọyi, podọ etẹwutu?

ETẸWẸ na yin numọtolanmẹ towe eyin Mẹdatọ olọn po aigba po tọn ylọ we dọ, “Họntọn ṣie”? Na mẹsusu, enẹ sọgan taidi nuhe ma yọnbasi. Depope he whẹho lọ na yin, nawẹ gbẹtọvi tata de sọgan jihọntọn hẹ Jehovah Jiwheyẹwhe gbọn? Etomọṣo, Biblu na jide mí dọ mí sọgan dọnsẹpọ Jiwheyẹwhe nugbonugbo.

² Ablaham he nọgbẹ̀ to hohowhenu duvivi kanṣiṣa mọnkọtọn tọn. Jehovah ylọ tọgbo enẹ dọ “họntọn ṣie.” (Isaia 41:8) Mọwẹ, Jehovah pọ́n Ablaham hlan taidi họntọn etọn. Ablaham mọ haṣinṣan pẹkipẹki mọnkọtọn yí na ewọ “yí Jiwheyẹwhe sè” wutu. (Jakobu 2:23) To egbehe ga, Jehovah nọ dín dotẹnmẹ hundote lẹ nado ‘dọnsẹpọ’ mẹhe nọ sẹ̀n ẹn sọn owanyi mẹ wá lẹ. (Deutelonomi 10:15) Ohó etọn dotuhomẹnamẹ dọmọ: “Mì sẹpọ Jiwheyẹwhe, ewọ nasọ sẹpọ mì.” (Jakobu 4:8) Mí mọ oylọ-basina po opagbe po to hogbe ehelẹ mẹ.

 3. Oylọ tẹwẹ Jehovah basi na mí, podọ opagbe tẹwẹ e bẹhẹn?

³ Jehovah basi oylọna mí nado dọnsẹpọ ẹ. E ko wleawu bosọ jlo nado kẹalọyi mí taidi họntọn etọn. To ojlẹ dopolọ mẹ, e dopagbe dọ eyin mí ze afọdide lẹ nado dọnsẹpọ ẹ, ewọ lọsu na dọnsẹpọ mí. Gbọnmọ dali mí sọgan biọ kanṣiṣa nujọnu tọn de mẹ—yèdọ ‘haṣinṣan pẹkipẹki hẹ Jehovah.’a (Psalm 25:14) ‘Haṣinṣan pẹkipẹki’ zẹẹmẹdo aṣli didọna họntọn alọmayiemẹ de.

 4. Nawẹ hiẹ sọgan basi zẹẹmẹ họntọn alọmayiemẹ de tọn gbọn, podọ aliho tẹ mẹ wẹ Jehovah sọawuhia nado yin họntọn mọnkọtọn na mẹhe dọnsẹpọ ẹ lẹpo te?

⁴ Be hiẹ tindo họntọn alọmayiemẹ de he a sọgan dọ aṣli towe na ya? Họntọn mọnkọtọn yin mẹhe nọ hò towe pọ́n. Hiẹ dejido e go, na e ko do ede hia nado yin nugbonọ. Ayajẹ towe nọ sudeji to whenuena a dọ aṣlihó towe lẹ na ẹn. Lehe e nọ yí awuvẹmẹ do dotoai na we do nọ na we kọgbọ sọn agbàn pinpẹn awubla towe lẹ tọn si. Eyin mẹdepope ma tlẹ mọnukunnujẹ ninọmẹ towe mẹ, ewọ nọ wàmọ. Mọdopolọ, to whenuena hiẹ dọnsẹpọ Jiwheyẹwhe, hiẹ ko yí ì do basi Họntọn vonọtaun de he yọ́n lehe a yin nujọnu sọ, he nọ hò towe pọ́n taun, bo nọ mọnukunnujẹ ninọmẹ towe lẹ mẹ to gigọ́mẹ. (Psalm 103:14; 1 Pita 5:7) Hiẹ dejido e go sọn ahun mẹ wá, na a yọnẹn dọ ewọ nọ yin nugbonọ hlan mẹhe yin nugbonọ hlan ẹn lẹ. (Psalm 18:25) Ṣigba, e bọawu na mí nado duvivi lẹblanulọkẹyi họntọnjiji hẹ Jiwheyẹwhe tọn, na ewọ ko hẹn ẹn yọnbasi na mí wutu.

 5. Etẹwẹ Jehovah wà nado hẹn ẹn yọnbasi na mí nado dọnsẹpọ ẹ?

⁵ Matin alọgọ, mí ma sọgan dọnsẹpọ Jiwheyẹwhe pọ́n gbede, na ylandonọ wẹ mí yin. (Psalm 5:4) Apọsteli Paulu wlan dọmọ: “Ṣigba Jiwheyẹwhe de owanyi etọn hia hlan mí . . . , na, whenuena mí gbẹ́ to ylandonọ yin, Klisti kú na mí.” (Lomunu lẹ 5:8) Mọwẹ, Jehovah basi tito na Jesu “nado yí ogbẹ̀ etọn do basi ofligọ na mẹsusu.” (Matiu 20:28) Yise mítọn to avọ́sinsan ofligọ tọn enẹ mẹ nọ hẹn ẹn yọnbasi na mí nado dọnsẹpọ Jiwheyẹwhe. To whenuena e yindọ Jiwheyẹwhe ‘whẹ́ wẹ yiwanna mí,’ e ze dodonu lọ dai na mí nado biọ họntọn-yinyin mẹ hẹ ẹ.—1 Johanu 4:19.

6, 7. (a) Nawẹ mí yọnẹn gbọn dọ Jehovah ma yin Jiwheyẹwhe he whlá, bo ma sọgan yin yinyọnẹn de? (b) Aliho tẹlẹ mẹ wẹ Jehovah ko do ede hia te?

⁶ Jehovah sọ ze afọdide devo: E ko do ede hia mí. To họntọnjiji depope mẹ, kanṣiṣa lọ nọ sinai do mẹlọ yinyọ́n ẹn ganji ji, yinyọ́n pinpẹn jẹhẹnu etọn lẹ tọn po aliho he mẹ e nọ yinuwa te po. Enẹwutu eyin Jehovah he nọ whlá ede, bo ma sọgan yin yinyọnẹn de wẹ Jiwheyẹwhe yin, mí ma sọgan dọnsẹpọ ẹ pọ́n gbede. Ṣigba, e ma nọ whlá ede gba, e jlo dọ mí ni yọ́n ẹn. (Isaia 45:19) Humọ, nuhe e dehia dogbọn ede dali tin-to-aimẹ na mẹlẹpo, etlẹ yin na míwlẹ mẹhe aihọn sọgan pọnhlan taidi mẹhe ma yin mẹjọmẹ lẹ.—Matiu 11:25.

⁷ Nawẹ Jehovah ko do ede hia mí gbọn? Azọ́n nudida tọn etọn lẹ hẹn jẹhẹnu tangan etọn delẹ zun yinyọnẹn na mí—yèdọ lehe huhlọn etọn klo sọ, lehe nuyọnẹn etọn siso sọ, podọ lehe owanyi etọn sù sọ. (Lomunu lẹ 1:20) Ṣigba e mayin nudida etọn lẹ kẹdẹ mẹ wẹ Jehovah do ede hia te gba. Taidi Nuplọnmẹtọ Daho tẹgbẹ̀ tọn, e wleawuna Ohó etọn, Biblu he e yí do do ede hia mí.

 8. Naegbọn e sọgan yin didọ dọ Biblu lọsu yin kunnudenu owanyi Jehovah tọn na mí?

⁸ Biblu lọsu yin kunnudenu dọ Jehovah yiwanna mí. To Ohó etọn mẹ, e do ede hia mí to hogbe he mí sọgan mọnukunnujẹemẹ lẹ mẹ. Ehe dohia dọ e ma yindọ e yiwanna mí kẹdẹ wẹ gba ṣigba e sọ jlo dọ mí ni yọ́n ẹn bo yiwanna ẹn. Nuhe mí hia to owe he họakuẹ ehe mẹ hẹn mí penugo nado mọ ‘whanpẹ Jehovah tọn’ bosọ whàn mí nado jlo nado dọnsẹpọ ẹ. (Psalm 90:17) Mì gbọ mí ni gbadopọnna aliho ojlofọndotenamẹ tọn delẹ he mẹ Jehovah nọ do ede hia to Ohó etọn mẹ te.

 9. Hodidọ tlọlọ tẹlẹ wẹ tin to Biblu mẹ he do jẹhẹnu Jiwheyẹwhe tọn lẹ hia?

⁹ Owe-wiwe bẹ hodidọ tlọlọ susu hẹn he do jẹhẹnu Jiwheyẹwhe tọn lẹ hia. Doayi apajlẹ delẹ go. ‘Jehovah yiwanna whẹdida dodo.’ (Psalm 37:28) Jiwheyẹwhe yin “yẹyi dahonọ to huhlọn mẹ.” (Job 37:23) ‘Nugbonọ wẹ yẹn, wẹ Jehovah dọ.’ (Jẹlemia 3:12) “Nuyọnẹntọ wẹ ewọ to ayiha mẹ.” (Job 9:4) Ewọ yin “Jiwheyẹwhe he gọ́ na akọ́ndonanu podọ dagbewanyinọ, awuwhletọ nado sadi, podọ susunọ to lẹblanu po nugbo po mẹ.” (Eksọdusi 34:6) “Hiẹ, [Jehovah], yin dagbe, bosọ nọ wleawu nado jona.” (Psalm 86:5) Podọ, dile e yin nùdego to weta tintan mẹ do, jẹhẹnu dopo yiaga hugan: “Jiwheyẹwhe wẹ owanyi.” (1 Johanu 4:8) Dile hiẹ lẹnnupọndo jẹhẹnu ojlofọndotenamẹ tọn ehelẹ ji, be hiẹ ma yiwanna Jiwheyẹwhe he ma tindo awetọ ehe ya?

10, 11. (a) Etẹwẹ Jehovah yidogọ to Ohó etọn mẹ nado gọalọna mí nado yọ́n jẹhẹnu etọn lẹ hezeheze? (b) Apajlẹ Biblu tọn tẹwẹ gọalọna mí nado mọ lehe Jiwheyẹwhe yí huhlọn etọn zan gbọn?

¹⁰ To yidogọmẹ na jẹhẹnu etọn lẹ didọna mí, Jehovah ko gbọn owanyi dali wleawuna apajlẹ tangan lẹ to Ohó etọn mẹ he do lehe e ko yí jẹhẹnu ehelẹ zan to nuyiwa etọn lẹ mẹ hia. Kandai enẹlẹ basi zẹẹmẹ awuvivi tọn lẹ he gọalọna mí nado mọ adà voovo jẹhẹnu etọn tọn hezeheze. To alọ devo mẹ, enẹ gọalọna mí nado dọnsẹpọ ẹ. Gbadopọnna apajlẹ dopo.

¹¹ Onú dopo wẹ e yin nado hia dọ Jiwheyẹwhe “sinyẹn to huhlọn mẹ.” (Isaia 40:26) Onú devo pete wẹ e yin nado hia lehe e whlẹn Islaeli gán to Ohù Vẹẹ mẹ bo penukundo akọta lọ go to zungbo mẹ na owhe 40 do. Hiẹ sọgan yí nukun homẹ tọn do pọ́n lehe agbówhẹn osin tọn lẹ to mimá do awe do. Hiẹ sọgan yí nukun homẹ tọn do pọ́n lehe akọta lọ—vlavo gbẹtọ he yì 3 000 000 lọ lẹpo, to zọnlinzin gbọn aigba kló ji, bọ osin lẹ mlin dote taidi adó gángán to adà awe lẹ ji. (Eksọdusi 14:21; 15:8) Hiẹ sọgan mọ kunnudenu hihọ́-basinamẹ po nukunpedomẹgo Jiwheyẹwhe tọn po to zungbo lọ mẹ. E hẹn osin nado tọ́njẹgbonu sọn osó mẹ. Núdùdù, he taidi okún wéwé lẹ nọ ja do aigba. (Eksọdusi 16:31; Osọha lẹ 20:11) Jehovah dohia tofi dọ e ma yindọ emi tindo huhlọn poun wẹ gba ṣigba emi nọ yí ì zan na dagbe omẹ emitọn lẹ tọn. Be e mayin jidenamẹnu de wẹ e yin nado yọnẹn dọ odẹ̀ mítọn lẹ nọ yì Jiwheyẹwhe huhlọnnọ lọ dè, mẹhe yin “fibẹtado po huhlọn mítọn po, alọgọ alọnu-alọnu tọn to tukla mẹ” ya?—Psalm 46:1.

12. Nawẹ Jehovah gọalọna mí bo “jlẹ” ede to hogbe he mí sọgan mọnukunnujẹemẹ lẹ mẹ gbọn?

¹² Jehovah, mẹhe yin gbigbọ, ko wà nususu nado gọalọna mí nado yọ́n ẹn. Taidi gbẹtọvi lẹ, nukun mítọn ma sọgan mọ onú lẹpo gba, enẹwutu mí ma sọgan mọnu hlan agblò gbigbọ tọn mẹ gba. Eyin Jiwheyẹwhe ko basi zẹẹmẹ edetiti tọn na mí to hogbe gbigbọ tọn lẹ mẹ, e na taidi dọ a to zẹẹmẹ gigọ́ awusọhia towe tọn, taidi sinmẹ nukun towe tọn kavi oblọ agbasa go tọn basi na mẹhe yin jiji po nukuntintọ́n po de. Kakatimọ, Jehovah gbọn homẹdagbe dali “jlẹ” ede na mí to hogbe he mí sọgan mọnukunnujẹemẹ lẹ mẹ. To ojlẹ delẹ mẹ, e nọ yí hogbe kavi apajlẹ yẹhiadonu tọn lẹ zan, bo nọ yí ede jlẹdo nuhe mí yọnẹn lẹ go. E tlẹ basi zẹẹmẹ ede tọn taidi dọ e tindo awutugonu gbẹtọvi tọn tangan delẹ.b

13. Zẹẹmẹ he họnwun hezeheze tẹwẹ Isaia 40:11 basi, podọ nawẹ e yinuwado hiẹ ji gbọn?

¹³ Doayi zẹẹmẹ he yin bibasi gando Jehovah go to Isaia 40:11 mẹ go dọmọ: “Di lẹngbọhọtọ de: e nasọ yí awà etọn do bẹ lẹngbọvu lẹ pli, bo ze yé do akọ́n etọn nù.” Tofi, Jehovah yin yíyí jlẹdo lẹngbọhọtọ de go he “yí awà” etọn do bẹ lẹngbọ etọn lẹ. Ehe do nugopipe Jiwheyẹwhe tọn hia nado basi hihọ́na omẹ etọn lẹ bo gọalọna yé, etlẹ yin mẹhe yin madogánnọ taun lẹ. Adọ̀ sọgan gbó mí to awà huhlọnnọ etọn lẹ mẹ, na eyin mí yin nugbonọ hlan ẹn, e ma na gbẹ́ mí dai pọ́n gbede. (Lomunu lẹ 8:38, 39) Lẹngbọhọtọ Daho lọ bẹ lẹngbọ lẹ do “awà etọn” lẹ mẹ. Ehe yin hogbe de he to alọdlẹndo apò awugbó de tọn, ehe mẹ lẹngbọhọtọ nọ ze lẹngbọvu he ṣẹṣẹ yin jiji de do to whedelẹnu. Gbọnmọ dali, jide yin nina mí dọ Jehovah nọ wlebòna mí bo nọ yí awuvẹmẹ do penukundo mí go. Jọwamọnu de wẹ e yin nado jlo nado dọnsẹpọ ẹ.

14. Naegbọn e sọgan yin didọ dọ Jehovah basi zẹẹmẹ awusọhia edetiti tọn hezeheze gbọn Jesu gblamẹ?

¹⁴ To Ohó etọn mẹ, Jehovah basi zẹẹmẹ awusọhia edetiti tọn hezeheze gbọn Ovi yiwanna etọn Jesu gblamẹ. Mẹdevo depope ma sọgan do pọndohlan po numọtolanmẹ Jiwheyẹwhe tọn po hia kavi basi zẹẹmẹ Etọn to gigọ́mẹ hú lehe Jesu basi i do gba. Na ewọ wẹ Ovi plọnji he ko tin to Otọ́ etọn dè whẹpo nudida gbigbọnọ devo lẹ po wẹkẹ yinukundomọ lọ po do yin didá. (Kọlọsinu lẹ 1:15) Jesu tindo haṣinṣan pẹkipẹki de hẹ Jehovah. Enẹ wẹ zọ́n bọ e sọgan dọmọ: “Mẹde ma sọ yọ́n mẹhe Ovi yin, adavo Otọ́; podọ mẹhe Otọ́ yin, adavo Ovi, podọ mẹhe jlo e, e yí ì hia hlan.” (Luku 10:22) To whenuena Jesu tin to aigba ji taidi gbẹtọ, e do Otọ́ etọn hia to aliho titengbe awe mẹ.

15, 16. To aliho awe tẹlẹ mẹ wẹ Jesu hẹn Otọ́ etọn zun yinyọnẹn te?

¹⁵ Tintan, nuplọnmẹ Jesu tọn lẹ gọalọna mí nado yọ́n Otọ́ etọn. Jesu basi zẹẹmẹ Jehovah tọn po hogbe he fọnjlodotena mí lẹ po. Di apajlẹ, nado do Jiwheyẹwhe hia taidi lẹblanunọ he nọ jona ylandonọ he lẹnvọjọ lẹ, Jesu yí Jehovah jlẹdo otọ́ he nọ jonamẹ de go, mẹhe homẹ etọn hùn sọmọ to whenuena e mọ ovi duvanọ etọn lẹkọwa whé, bọ e họ̀nwezun bo plá alọ kọna ẹn bosọ donùnùgo na ẹn po homẹhunhun po. (Luku 15:11-24) Jesu sọ do Jehovah hia taidi Jiwheyẹwhe he nọ “dọ̀n” ahunjijlọnọ lẹ na e yiwanna dopodopo yetọn lẹ wutu. (Johanu 6:44) E tlẹ nọ yọnẹn eyin oblẹnọ pẹvi de flẹ jẹ aigba. Jesu basi zẹẹmẹ dọmọ: “Mì dibu blo, mìwlẹ doale hú oblẹnọ susu.” (Matiu 10:29, 31) Na jide tọn, mí dona yiwanna Jiwheyẹwhe mẹtọnhopọntọ mọnkọtọn.

¹⁶ Awetọ, apajlẹ Jesu tọn lẹ do mẹhe nkọtọn Jehovah yin hia mí. Jesu hodo apajlẹ Otọ́ etọn tọn mlẹnmlẹn sọmọ bọ e sọgan dọmọ: “Ewọ he ko mọ mi ko mọ Otọ́.” (Johanu 14:9) Enẹwutu, whenuena mí hia owe Wẹndagbe tọn lẹ dogbọn Jesu dali—numọtolanmẹ he e dohia lẹ po aliho he mẹ e yinuwa hẹ mẹdevo lẹ te po, apajlẹ lehe Otọ́ etọn nọ yinuwa do tọn mọ wẹ mí te niyẹn. Jehovah masọ sọgan basi zẹẹmẹ jẹhẹnu etọn lẹ tọn na mí to aliho he họnwun humọ mẹ gba. Etẹwutu?

17. Basi dohia nuhe Jehovah wà nado gọalọna mí nado mọnukunnujẹ mẹhe nkọtọn ewọ yin mẹ.

¹⁷ Di dohia: Mí ni dọ dọ a to tintẹnpọn nado basi zẹẹmẹ nuhe homẹdagbe yin tọn. Hiẹ sọgan yí hogbe lẹ do basi zẹẹmẹ etọn. Ṣigba eyin a sọgan dlẹnalọdo mẹde he to walọ homẹdagbe tọn dohia bo dọmọ, “Apajlẹ homẹdagbe tọn de niyẹn,” enẹ na hẹn zẹẹmẹ hogbe “homẹdagbe” tọn họnwun bo na hẹn ẹn bọawu nado mọnukunnujẹemẹ. Jehovah ko wà onú mọnkọtọn de nado gọalọna mí nado mọnukunnujẹ mẹhe nkọtọn ewọ yin mẹ. Gbọnvona hogbe yíyí do basi zẹẹmẹ edetiti tọn, e ko wleawu apajlẹ jọnun Ovi etọn tọn na mí. Jẹhẹnu Jiwheyẹwhe tọn lẹ yin mimọ to nuyiwa Jesu tọn lẹ mẹ. Gbọn owe Wẹndagbe tọn he basi zẹẹmẹ do Jesu ji lẹ gblamẹ, Jehovah to didọ to yẹhiadonu-liho, dọmọ: “Omẹ mọnkọtọn wẹ yẹn lọsu yin.” Nawẹ kandai heyin gbigbọdo lọ basi zẹẹmẹ Jesu tọn to whenuena e tin to aigba ji gbọn?

18. Nawẹ Jesu do jẹhẹnu delẹ taidi huhlọn, whẹdida dodo, po nuyọnẹn po hia gbọn?

¹⁸ Jesu tindo jẹhẹnu titengbe ẹnẹ Jiwheyẹwhe tọn lẹpo. E tindo huhlọn do azọ̀n, huvẹ, po okú po ji. Ṣogan, to vogbingbọnmẹ na gbẹtọ ṣejannabinọ he nọ ṣì huhlọn yetọn zan lẹ, Jesu ma yí huhlọn azọ́njiawu tọn zan na dagbe edetiti tọn kavi bo yí ì do gbleawuna mẹdevo lẹ pọ́n gbede. (Matiu 4:2-4) E yiwanna whẹdida dodo. Homẹgble e sinsinyẹn to whenuena e mọ ajọwatọ ṣejannabinọ lẹ to alọslona gbẹtọ lẹ. (Matiu 21:12, 13) E yinuwa hẹ wamọnọ lẹ po mẹhe jẹflumẹ lẹ po matin mẹnukuntahihopọn, bo gọalọna omẹ mọnkọtọn lẹ nado “mọ gbọjẹ” na alindọn yetọn. (Matiu 11:4, 5, 28-30) Nuyọnẹn he ma yọ́n jlẹ tin to nuplọnmẹ Jesu tọn lẹ mẹ, mẹhe “hú Sọlọmọni.” (Matiu 12:42) Ṣigba Jesu ma jlá nuyọnẹn etọn pọ́n gbede. Ohó etọn biọ ahun mẹ na gbẹtọ paa lẹ, na nuplọnmẹ etọn lẹ họnwun, bọawu, bo yọn-na-yizan wutu.

19, 20. (a) Nawẹ Jesu yin apajlẹ ayidego owanyi tọn de gbọn? (b) Etẹwẹ mí dona hẹn do ayiha mẹ dile mí to hihia bo to nulẹnpọndo apajlẹ Jesu tọn lẹ ji?

¹⁹ Jesu yin apajlẹ ayidego owanyi tọn. To lizọnyizọn etọn lẹpo whenu, e do owanyi hia to aliho susu mẹ, gọna lẹblanu po awuvẹmẹ po. E ma sọgan mọ mẹdevo lẹ to yaji bo miyọnnukundo gba. Whlasusu wẹ lẹblanu wiwà na mẹdevo lẹ whàn ẹn nado yinuwa. (Matiu 14:14) Dile etlẹ yindọ Jesu hẹnazọ̀ngbọna awutunọ lẹ bo na núdùdù mẹhe huvẹ to hùhù lẹ, e sọ do awuvẹmẹ hia to aliho titengbe devo de mẹ. E gọalọna mẹdevo lẹ nado yọ́n, kẹalọyi, bo yiwanna nugbo lọ dogbọn Ahọluduta Jiwheyẹwhe tọn dali, ehe na hẹn dona tẹgbẹ̀ tọn lẹ wá na gbẹtọvi lẹ. (Malku 6:34; Luku 4:43) Humọ, Jesu do owanyi mẹde-yido-sanvọ́ tọn hia gbọn ogbẹ̀ etọn yíyí do sanvọ́ do ota mẹdevo lẹ tọn mẹ dali.—Johanu 15:13.

²⁰ Enẹwutu, e mayin nupaṣamẹ de gba dọ yọpọvu po mẹho po sọn filẹpo wẹ yiwanna dawe homẹdagbenọ he nọ hò mẹtọn pọ́n ehe. (Malku 10:13-16) Ṣigba, to whenuena mí to hihia bo to nulẹnpọndo apajlẹ zohunhunnọ Jesu tọn lẹ ji, mì gbọ mí ni nọ hẹn do ayiha mẹ tẹgbẹ̀ dọ nuhe Otọ́ lọ yin pẹpẹ wẹ mí to mimọ to Visunnu etọn mẹ niyẹn.—Heblu lẹ 1:3.

21, 22. Etẹwẹ Jehovah dindin bẹhẹn, podọ etẹwẹ owe ehe bẹhẹn he na gọalọna mí to vivẹnudido nado wà ehe mẹ?

²¹ Gbọn zẹẹmẹ edetiti tọn bibasi hezeheze to Ohó etọn mẹ dali, Jehovah hẹn ẹn họnwun dọ ojlo emitọn wẹ yindọ mí ni dọnsẹpọ emi. Etomọṣo, e ma hẹn mí po huhlọn po nado dín haṣinṣan dagbe de hẹ ẹ gba. E pò to dopodopo mítọn lẹ si nado dín Jehovah to “whenuena e tin to yakẹ.” (Isaia 55:6) Dindin Jehovah zẹẹmẹdo nado yọ́n jẹhẹnu po aliho he mẹ e nọ yinuwa te lẹ po dile e yin didohia to Biblu mẹ do. Owe he a to hihia to alọnu ehe yin awuwlena nado gọalọna we to vivẹnudido towe nado wà enẹ mẹ.

²² Hiẹ na doayi e go dọ owe ehe yin mimá do adà ẹnẹ ji sọgbe hẹ jẹhẹnu titengbe Jehovah tọn ẹnẹ lẹ heyin: huhlọn, whẹdida dodo, nuyọnẹn, po owanyi po. Adà dopodopo nọ bẹjẹeji po zẹẹmẹ kleun jẹhẹnu lọ tọn po. Weta he bọdego lẹ nọ dọhodo lehe Jehovah nọ yí jẹhẹnu enẹ zan to aliho voovo lẹ mẹ do ji. Adà dopodopo sọ nọ tindo weta de he nọ dohia lehe Jesu ze apajlẹ jẹhẹnu lọ tọn dai gbọn, podọ weta dopo nọ dọhodo lehe mí sọgan do e hia to gbẹzan mítọn mẹ do ji.

23, 24. (a) Basi zẹẹmẹ adà vonọtaun lọ heyin “Kanbiọ He Na Yin Ayihamẹlẹnpọn Deji Lẹ” tọn. (b) Nawẹ ayihamẹlinlẹnpọn nọ gọalọna mí nado dọnsẹpọ Jiwheyẹwhe pẹkipẹki gbọn?

²³ Bẹsọn weta ehe ji, adà vonọtaun de tin he yin “Kanbiọ He Na Yin Ayihamẹlẹnpọn Deji Lẹ.” Di apajlẹ, pọ́n apotin he to weda 24 mẹ. Wefọ po kanbiọ lọ lẹ po ma yin awuwlena nado gbadopọnna weta lọ gba. Kakatimọ, lẹndai yetọn wẹ nado gọalọna we nado lẹnnupọndo adà titengbe hosọ lọ tọn devo lẹ ji. Nawẹ hiẹ sọgan yí adà ehe zan ganji gbọn? Hùn wefọ he yin dide lọ lẹ dopodopo, bo hia yé po sọwhiwhe po. Enẹgodo, gbadopọnna kanbiọ he zọnpọ hẹ wefọ dopodopo. Lẹnnupọndo gblọndo lọ lẹ ji. A sọgan sọ basi dodinnanu delẹ do e ji ga. Kàn kanbiọ devo lẹ biọ dewe taidi: ‘Etẹwẹ nudọnamẹ ehe plọn mi gando Jehovah go? Nawẹ e gando gbẹzan ṣie go gbọn? Nawẹ yẹn sọgan yí ì zan nado gọalọna mẹdevo lẹ gbọn?’

²⁴ Ayihamẹlinlẹnpọn mọnkọtọn sọgan gọalọna mí nado dọnsẹpọ Jehovah pẹkipẹki. Etẹwutu? Biblu dohia dọ kanṣiṣa tin to ayihamẹlinlẹnpọn po ahun po ṣẹnṣẹn. (Psalm 19:14) To whenuena mí lẹnnupọn po nukunnumọjẹnumẹ po do nuhe mí ko plọn dogbọn Jiwheyẹwhe dali lẹ ji, nudọnamẹ lọ nọ dlí biọ ahun mítọn mẹ, bo nọ yinuwado nulẹnpọn mítọn ji, bo nọ fọ́n numọtolanmẹ mítọn dote, bosọ nọ whàn mí to godo mẹ nado yinuwa. Taidi kọdetọn de, owanyi mítọn na Jiwheyẹwhe nọ siso deji, podọ owanyi enẹ nọ whàn mí nado jlo na hẹn homẹ etọn hùn taidi Họntọn alọmayiemẹ mítọn. (1 Johanu 5:3) Nado biọ haṣinṣan mọnkọtọn mẹ, mí dona yọ́n jẹhẹnu Jehovah tọn po aliho he mẹ e nọ yinuwa te po whẹ́. Ṣigba, mì gbọ mí ni gbadopọnna jẹhẹnu Jiwheyẹwhe tọn de whẹ́ he nọ wleawuna whẹwhinwhẹ́n lẹ he na sisẹ́ mí nado dọnsẹpọ ẹ—yèdọ wiwe-yinyin etọn.